2 Kings 7

¹Elishà nɨ̀n be meyn sɨ̂ fòyn Isìlæ̀ na, “Yvɨtɨ iwo zɨ̀ a Bôbo Fɨyini bè. Wù bè na, “À læ̀ nà ghɨ kɨmɨ aleŋ a lvɨ̂yn a libɨ̀s a ghɨ na beyʼlɨ̂ kilùsɨ ɨnkfɨ̀ŋ ɨ̀n jùŋ sɨ̀ tâyn kɨ̀ sɨ a aso ɨkwo a fɨfâ kɨ dɨlɨ̀ chem àbeʼ a kilù, beyʼlɨ̂ kilùsɨ asaŋ a balì ìvɨm kɨ̀ sɨ a aso ɨkwo a fɨfâ kɨ dɨlɨ̀ chem àbeʼ a kilù ɨchfɨ mbàyn Sàmalìyà.”

²Sugèyʼ i to zɨ̀ a yi nà n-gâmtɨ fòyn ɨ bè sɨ̂ Elishà na, “Bôbo Fɨyini kæ dzɨ̀si mɨ ɨ̀chfɨ̂ iyvɨ, iwo nâ yèyni kaʼ yi bû gàyn.”

Elishà ɨ bè sɨ̂ ŋweyn na, “Wa læ̀ yeyn ìwo ateyn kɨ̀ nô nɨ̀ àsɨ à kya mɨtì faŋ tɨ̀ yɨ nô àfo àmòʼ ateyn.”

Sugèyʼ sɨ Alàmsɨ̀ ɨ leʼ sɨ a Sàmalìyà

³Ghelɨ nɨn læ meyn nà duʼ ɨchfɨ mbàyn ntèʼ Sàmalìya ghɨ̀ kæ̀ kelɨ ànsàsì. Àŋena nà n-taŋî kɨ sɨ a àŋena ngeŋsɨ bê na, “Ghesɨ̀nà nɨn kɨŋ sɨ faŋ afêyn sɨ kfɨtɨ bòm ghà? ⁴Ghesɨ̀na kæ zɨ antêynɨ̀ ntèʼ, a ghesɨ̀nà kfɨ jeŋ, ɨ̀ fàŋ mɨ afêyn a ghesɨ̀nà kfɨtɨ jeŋ. Ghesɨ̀nà lu ndù alèʼ ghè a sugèyʼsɨ Alàmsɨ̀ bɨ̀ ateyn àŋena ghal ghesɨ̀nà. Àŋena kæ zuetɨ ghesɨ̀nà a ghɨ kfɨtɨ, ɨ̀ kæ visi, a ghesɨ̀nà na chi-à.”

⁵Àŋena ni lù aleŋ ɨlvɨ ikfa ɨ ndù alèʼ ghè a sugèyʼsɨ Alàmsɨ̀ bɨ̀ ateyn. Àŋena nɨn ndu chem alèʼ nâ ghè nô wùl ɨ ghɨ wi afu. ⁶À nà n-ghɨ tì ma Bôbo Fɨyini ni meyn ghelɨ Alàm yvɨ nchɨynsɨ sugèyʼsɨ̀ nô sɨ a idvɨ̀ nɨ̀ nchɨynsɨ nyamsɨ kfaŋsɨ nɨ̀ ɨ sɨ mɨnchaʼ mɨ̀ ìwòŋ ta sɨ n-gvî a àŋena ibàm. Àŋena nɨn yvɨ tî ɨ nà sɨ bê kɨ sɨ a àŋena ngeŋsɨ na, “Yeyna, fòyn Isìlæ̀ ndu meyn jàŋ tɨ̀fôyn tɨ Hît nɨ̀ ɨ tɨ Ijìbtɨ̀ na tɨ gvi nù ghesɨ̀nà.” ⁷Àŋena nɨn bè tî a ni nà ghɨ aleŋ ɨlvɨ ikfa àŋena leʼ visi mɨ̀two mɨ̀ àŋena nɨ̀ nyamsɨ kfaŋsɨ nɨ̀ njàkâsɨ̀. Àŋena nɨn visi nô mɨ ghà afu kɨ̀ ta àŋena nɨn læ gvi bɨ̀ ɨ lèm ɨ taŋ kɨ atu a àŋena.

⁸Ghelɨ ànsàsì ghì ɨ ndu chem alèʼ nâ ghè ɨ zɨ a ɨtwò ɨ yɨ ɨ fi nyvɨ. Àŋena nɨn yɨ tî ɨ lì àso ɨkwo a fɨfâ nɨ̀ àso ɨkwo a baŋnɨ-a nɨ̀ ndzɨsɨ ɨ ndu lèytɨ̀, ɨ kasi gvì ɨ fi zɨ a ɨtwò ɨlvɨ ɨ lì ɨ̀fwo ɨlvɨ ɨ fi ndu lèytɨ̀.

⁹Àŋena nɨn lèytɨ̀ tî ɨ be kɨ sɨ a àŋena ngeŋsɨ na, “Iwo yèynì a ghesɨ̀nà nɨn nî tèyn nɨn ghɨ wi a jûŋ. Ghesɨ̀na keli meyn saʼgha ì jùŋ layn, ka ghesɨ̀na nɨ̂n lêm kɨ̀ sɨ̂ ngeŋsɨ ghesɨ̀nàsɨ. Ghesɨ̀nà kæ chìtɨ̀ na ɨtuʼ layn a ngeʼ koli ghesɨ̀nà. Ghesɨ̀nà lu kɨ̀ lvɨ̂yn ndù fèʼtɨ̀ ìwo nâ yèynì a ntoʼ.”

¹⁰Àŋena nɨn taŋi tî ɨ ndu fèʼtɨ̀ sɨ̂ ghelɨ ghì a ghɨ nà n-chî ɨchfɨ mbàyn Sàmalìyà na, “Ghès nì ndù alèʼ ghè a ghelɨ Alàm tî bɨ̀ ateyn ɨ̀ faŋ tɨ̀ yèyn nô wul afu, ɨ̀ faŋ tɨ̀ yvɨ mɨ ta wùl nɨ̀n taŋi ɨ̀ yeyn kɨ̀ nyamsɨ kfaŋ nɨ̀ njàkâsɨ̀ ta ghɨ chfɨ̀ŋtɨ. Mɨ̀two ɨ ghɨ bula ghɨ kûm àfo ateyn.” ¹¹Nchì sɨ ateynsɨ ɨ jaŋ làʼì saʼgha àteyn sɨ̂ ghelɨ ghɨ li ghɨ ndu fèʼtɨ̀ a ntoʼ.

¹²Fòyn ɨ làlì nɨ̀ntuʼ ɨ bè sɨ̂ ghelɨ ghɨ felɨnɨ nɨ̀ ŋweyn na, “Mɨ n-fèʼtɨ̀ ìwo zɨ̀ sɨ̂ zɨ̀ a ghelɨ Alàm ghèyn nì sɨ̂ ghesɨ̀nà. Àŋena nɨn kya na jeŋ ku meyn ghesɨ̀nà. À ti iwo zɨ̀ a àŋena lù sɨ alèʼ ghè a ghɨ tî bɨ̀ ateyn ndù lèytɨ̀ ɨtwaʼ kfâʼ kɨ na, ‘Ghelɨ ghèyn nɨn fvɨ̀ gvi-à a ghèsɨ̀ ghaytɨ àŋena kɨ̀ sɨ adyaʼ ɨ̀ zɨ ndù lì ntèʼ àteyn.”

¹³Wul ɨ̀ felɨnɨ nɨ̀ ŋweyn ɨ bè na, “Mbæ̀, bè a ghelɨ ghɨ li li nyamsɨ kfaŋ sìsɨ̀ a sɨ fàŋ a ntèʼ sɨ̀ tâyn tì ndù yeyn na à gàyn ghà a? Àŋena kæ ndù ghɨ zuetɨ àŋena, àŋena bu nà koʼnɨ̂ chwô ghelɨ ghì a ghɨ sɨ ghɨ ma ghɨ kfɨtɨ meyn. Àŋena kæ bœ̀ a ghɨ na ghɨ kɨ ta anôyn a ghelɨ Isìlæ̀ kì a kɨ bu chi.”

¹⁴Wu n-bè tî ghɨ lì mɨ̀nchaʼ mɨ̀ ìwòŋ ɨ̀n bò nɨ̀ nyamsɨ kfaŋ sìsɨ̀ a sɨ n-gufɨ̀, fòyn ɨ tum àŋena ibàm nɨ̀ sugèyʼsɨ Alàmsɨ̀. Wu n-bè sɨ̂ ghelɨ ghì a ghɨ n-gûf mɨ̀nchaʼ mɨ̀ àteyn na, “Yì ndu ki yeyn nâ à gàyn ghà a.” ¹⁵Àŋena lu jùmtɨ ndù nɨ̀ sugèyʼsɨ Alàmsɨ̀ ɨ ndu chem a jvâ Jodàn. Àŋena nà n-ndû a dzɨ yeyn ndû kɨ nɨ̀ ndzɨsɨ nɨ̀ ɨ̀fwo iwòŋ ta ghelɨ Alàm tî nà maʼì ndû a dzɨ ta ghɨ n-leʼ. Ghelɨ ntum nâ ghì ɨ kasi kfa ɨ fèʼtɨ̀ ìwo zɨ̀ sɨ̂ fòyn a yi gàyn. ¹⁶Àŋena nɨn fèʼtɨ tî ghelɨ Sàmalìyà ɨ fvɨ ndù alèʼ ghè a ghelɨ Alàm tî bɨ̀ ateyn ɨ kumtɨ ɨ lù nɨ̀ ɨ̀fwo. Ghɨ nà sɨ beyʼlɨ̂ kilùsɨ ɨnkfɨ̀ŋ ɨ̀n jùŋ sɨ̀ tâyn kɨ̀ sɨ a aso ɨkwo a fɨfâ kɨ dɨlɨ̀ chem àbeʼ a kilù, beyʼlɨ̂ kilùsɨ asaŋ a balì ìvɨm kɨ̀ sɨ a aso ɨkwo a fɨfa kɨ̀ ighel ta Bôbo Fɨyini nɨ̂n bè.

¹⁷À nà n-ghɨ tì ma fòyn lem meyn wul ɨ̀ felɨnɨ nɨ̀ ŋweyn vzɨ̀ a wù n-gâmtɨ̀ ŋweyn na wù na chî ɨ̀chfɨ mbàyn. Ghelɨ ɨ se sɨ nyɨŋ sɨ fvɨ sɨ a idvɨ̀ ɨ chɨyn bàʼ ŋweyn ɨ jèylɨ̀ wu kfɨ kɨ ighel ta Elishà ɨ wul ɨ̀ Fɨyini tî bè ta fòyn kàlì a ŋweyn a ndo. ¹⁸Yi n-læ gayn kɨ ighel ta Elishà nɨ̂n bè sɨ̂ fòyn na, “À læ̀ nà ghɨ kɨmɨ aleŋ a lvɨ̂yn a libɨ̀s a ghɨ na beyʼlɨ̂ kilùsɨ ɨnkfɨ̀ŋ ɨ̀n jùŋ sɨ̀ tâyn kɨ̀ sɨ a aso ɨkwo a fɨfâ kɨ dɨlɨ̀ chem àbeʼ a kilù, beyʼlɨ̂ kilùsɨ asaŋ a balì ìvɨm kɨ̀ sɨ a aso ɨkwo a fɨfâ kɨ dɨlɨ̀ chem àbeʼ a kilù ɨchfɨ mbàyn Sàmalìyà.”

¹⁹Elishà nɨn læ bè tî wùl ɨ̀ fèlɨnɨ nɨ̀ fòyn vzɨ̀ ɨ bè sɨ̂ ŋweyn na, “Bôbo Fɨyini kæ dzɨ̀si mɨ ɨ̀chfɨ̂ iyvɨ, iwo nâ yèyni kaʼ yi bû gàyn.”

Elishà ɨ bè sɨ̂ ŋweyn na, “Wa læ̀ yeyn ìwo ateyn kɨ̀ nô nɨ̀ àsɨ à kya mɨtì faŋ tɨ̀ yɨ nô àfo àmòʼ ateyn.” ²⁰Iwo ateyn i ɨ gayn kɨ sɨ̂ ŋweyn tì bòm ta ghelɨ nɨn læ meyn jèylɨ̀ ŋweyn ɨchfɨ mbàyn wu kfɨ.