2 Samuel 1
Ŋwàʼlɨ̀ 2 Samwèl
Devìt ɨ yvɨ na Sôl kfɨ meyn
1Sôl nɨ̀n læ se sɨ kfɨ ma Devìt ndu meyn tɨm yɨ ghelɨ Amalèk ɨ̀ kàsî kfa chi a ntèʼ Ziklàg sɨ a mɨ̂chi ɨ̀m bò. 2A nà sɨ ghɨ a mɨ̂chi ɨ̀n tal, wùl ɨlvì ɨ gvì ma wù lù aleʼ ghè a Sôl ŋêyn sugyèʼsɨ̀ ŋweynsɨ nɨ̂n læ ndu ɨ bɨ̀ ateyn ɨ nà fvɨ̂ tɨm ìwoŋ, ndzɨsɨ ghɨ a ŋweyn ɨwùyn ma sɨ baytɨ meyn, atu a ghɨ kɨ abɨ̂l abɨ̂l. Wu gvì ɨ chem asɨ nɨ̀ Devìt ɨ tɨm alvɨ a nse sɨ ngɨmlɨ ŋweyn.
3Devìt ɨ bɨf sɨ̂ ŋweyn na, “Wà lù wo dzɨ a?” Wu bè na, “Mà lèʼ alèʼ ghè a sugyèʼsɨ Isìlæ̀ sɨ̀ ti ndù bɨ̀ ateyn ɨ̀ nà fvɨ̂ tɨm ighoŋ.”
4Devìt ɨ bɨf sɨ̂ ŋweyn nâ, “Awo nɨn ghɨ ti-a? Saʼgha nɨn ghɨ na gha a?”
Wùl ateyn ɨ bè na, sugyèʼsɨ ti meyn lèʼnɨ lù sɨ ɨtwaʼ iwòŋ, ghɨ zuetɨ sɨ lisɨ, sɨ dvɨ̂ kɨ tèyn, Fòyn Sôl ŋêyn wayn ŋweyn Jonatàn bôŋ kfɨ.”
5Devìt ɨ bɨf sɨ̂ ŋweyn nâ, “Wà keli sɨ a gha na fòyn Sôl ŋêyn wayn ŋweyn Jonatàn kfɨ meyn a?”
6Wùl ateyn bè na, “Mà ti nà bɨm jêl kɨ jel ɨ̀ ndù chem atû kfɨ̂yn Gilbwà ɨ se sɨ ki ɨ̀ gvɨ̀tɨ̀ yeyn fòyn Sôl ma wù yeʼtɨ meyn atu ìwòŋ nɨ̀ ŋweyn, a ghɨ tì ma sugyeʼsɨ Fìlisìyà sɨ nyɨŋ meyn atû mɨ̀nchàʼ mɨ̀ ìwòŋ ɨ̀ nà sɨ baʼsɨ ndû sɨ̂ ŋweyn. 7À na sɨ ghɨ ta wù beynsɨ̀ yèyn ma ɨ̀ byal jàŋ mà ɨ bè na mà gvi. Ma ndû bàʼsɨ ɨ̀ bɨf sɨ̂ ŋweyn na wù n-kɨŋ na mà jel ti-a?’
8Wù bɨf sɨ̂ mà nâ, mɨ ghɨ ndà a?
Ma bê sɨ̂ ŋweyn na mɨ n-ghɨ wul ìlaʼ i Amalèk.
9Wù bê sɨ̂ mà na, yi n-yvɨ kɨ nô mɨ̀lùm nchuŋ, kɨŋ sɨ kfɨ ɨ kæ chwotɨ na mà zue zɨ.”
10Wùl àteyn ɨ taŋi tì ɨ bè sɨ̂ Devìt na, “Wù tî bè tèyn ma kæ zue ŋweyn bòm ta mà tî yèyn na ghɨ fì nì mɨ ghà a wu kfɨ. Ma zue ŋweyn tì ɨ̀ kæ li afol a ŋweyn nɨ̀ nchaʼ zɨ̀ a wù nì nà kelɨ a ŋweyn ɨkœ ɨ̀ gvì nɨ̀ ɨfwo ateyn sɨ̂ và a bôbo.”
11Devìt ŋêyn ghelɨ ghì a ŋêyn àŋena nà n-ghɨ amoʼ ɨ yvɨ iwo ateyn tì nô mɨ ndà ɨ nà sɨ ghal bàytɨ̀ kɨ baytɨ ndzɨsɨ sɨ ɨwùyn bòm ta saʼgha àteyn nà n-fu ngeʼ sɨ̂ àŋena nô sɨ a ŋaŋ. 12Àŋena dzɨ̀ tèyn ɨ fi bam ɨchfɨ̂ sɨ achi a fɨ̂blɨ̀-à bòm ìkfɨ i fòyn Sôl nâ zɨ-ì ŋêyn wayn ŋweyn Jonatàn nɨ̀ sugyèʼsɨ̀ Bôbo sɨ baʼsɨ̂ nɨ̀ ghelɨ Isìlæ̀ ghɨli.
13Devìt nɨ̀n bɨf meyn sɨ̂ wayndà ɨ̂kùŋ nâ vzɨ̀ a wù gvì fèʼtɨ̀ saʼgha àteyn nâ, wù fvɨ̀ ilaʼ ikà a. Wu bè na,
“Mɨ n-ghɨ wâyn wùl àtum ɨ wul ɨ̀ Amalèk.”
14Devìt ɨ bɨf sɨ̂ ŋweyn nâ, wù ti nà fâyn wì sɨ zue wul ma Bôbo nɨn læ̂ meyn bè ghɨ yisi sɨ a fòyn bòm ghà a?
15Ta wù bɨ̀f tî ɨ̀ kasî bè kɨ̀ sɨ̂ wayndà ɨ̂kuŋ ɨlvɨ̀ na wù gvi ghal zuè ŋweyn. Wàyn ateyn ɨ gvi zue wùl ɨ̀ Amalèk nâ vzɨ̀. 16A ghɨ tì ma Devìt ni meyn bè mèsì kɨ̀mɨ tèyn sɨ̂ ŋweyn na ikfɨ i ŋweyni lì kɨ̀ ŋweyn nɨ̀ àwu a ŋweyn a ta wu nì bè tî na, Ma zue meyn wul ma Bô Fɨyini nɨ̂n læ meyn bè ghɨ yisi sɨ a fòyn.
17Devìt nɨ̂n læ meyn dzɨ̀ ìkfɨ i fòyn Sôl ŋêyn wâyn ŋweyn Jonatàn tèyn ɨ fi betɨ njàŋ kûm ìkfɨ i àŋena, 18ɨ bè na ghɨ yeʼi njàŋ àteyn ghelɨ Judà na yema. Ghɨ nà n-toŋtɨ̂ njàŋ àteyn na, njàŋ fɨ̀nchya. Ghɨ n-fi meyn nyàʼ ɨ lèm njàŋ àteyn a Ŋwàʼlɨ̀ nɨ̀ Jashà ɨ nà yema bê na,
19Ɨvɨs ɨ̀vzɨ lɨma meyn a yi atû kfɨ̀ynsɨ a Isìlæ̀. Sugèyʼ sɨ tosɨ nɨ̀ ghèsɨ ti fèlɨ ti iwòŋ têyn a?
20Ka wùl nɨ̂n yvɨ a ntèʼ Gât. Ka nchwò-dzɨ̀ nɨ̂n yvɨ a ntèʼ Ashkelòn, bu tì a ghɨ̀ki Fìlisìyà na mô sɨ a ngàyn. Atum a nɨn gvêl ta kɨ lì njva.
21Ka ivɨ i nɨ̂n læ̀ fì sùʼi atû kfɨ̀ynsɨ Gìlbwâ; ka amyaʼà nɨ̂n læ̀ fì sùʼi ateyn. Ka asaŋa nɨ̂n læ̀ fɨ̀ kòʼ a kfɨynsɨ nâ ghè. Wùl jeylɨ meyn nkyàsɨ iwòŋ nɨ̀ fòyn wes nɨ̀ ɨ̀vɨ. Wùl læ̀ bu fì kusɨ̂ wi (nɨ̀ mɨ̀jâŋ).
22Jonatàn nɨ̀n bu læ se sɨ tɨm wul nɨ̀ fɨ̀nchya fɨ, kèsa wù n-bem mɨ ti ɨ læ sœ̀.
Fòyn Sôl nɨ̀n bu læ choʼ ifô i ŋweyn ɨ fi kasi tuŋ abuʼlɨ bula fɨluŋ fɨ wûl àtum fɨ bâŋ.
23Ghɨ tî nà kôŋ fòyn Sôl ŋêyn Jonatàn kɨ ghɨ̀ jɨ̀m.
Àŋena ti nà lum tom kɨ avɨ àmòʼ,
Fòyn Sôl tî kfɨ atû àbùyn, Jonatàn kfɨ a bulî gvèyn.
Àŋena tî nà to chwò nyamsɨ abo ɨ̀ se sɨ nyɨŋ, ghɨ nà tâyn ta mɨnyuyn.
24Yì toʼ dzɨ̀ fòyn Sôl a ghɨ̀ki Isìlæ̀.
Wù tî nà labsɨ̂ zɨ̀ nɨ̀ ndzɨsɨ jûŋsɨ̀,
fu tɨfwo yi wê atû àteyn ma ghɨ fàytɨ nɨ̀ aso ɨkwo a.
25Sugèyʼ sɨ tosɨ nɨ̀ ghèsɨ ti fèlɨ ti iwòŋ têyn a?
Jonatàn weyn nyɨŋ atû kfɨ̀yn ma wù kfɨ meyn.
26Mɨ n-dzɨ̂ và tèyn a waynà wom Jonatàn.
Ma ti meyn nà kôŋ và nô a jûŋ.
Wa ti meyn nà kya ìwo iyemi sɨ a nyɨŋ.
Wà tî nà kôŋ mà chwô ta wul ɨ wi kòŋ lum.
27Sugèyʼ sɨ tosɨ nɨ̀ ghèsɨ ti fèlɨ ti iwòŋ têyn a?
Ɨfwo iwòŋ nɨ̀ ghèsɨ lelɨ meyn ɨtwaʼ.