2 Samuel 2

Ghɨ yisi Devìt sɨ a Fòyn Judà

¹A nà n-ghɨ ta awo nâ kèynà ghàyn, Devìt ɨ bɨf sɨ̂ Bôbo Fɨyini na, “Mà kàʼ a mà koʼ nà chî a ntèʼ ili a Judà a?”

Bôbo Fɨyìnì ɨ bè na, “Koʼ.”

Devìt ɨ bɨf sɨ̂ ŋweyn nâ, “Mà ndu nà chî a ntèʼ ì kà?”

Bô Fɨyini ɨ bè na, “Ndu wa chî a ntèʼ Heblòn.”

²Devìt ɨ kæ li ghɨ̀ki ŋweyn ghɨ̀bò ma à ti Ahinòm ɨ wâyn wùl ntèʼ Jezlèl nɨ̀ Abigèl ɨ wî nkfɨ Nabàl ta wu n-fvɨ̀ a ntèʼ Kamèl. ³Wu n-li meyn kɨmɨ ghɨ̀lûmnɨ̀ ghì a ŋêyn àŋena nà n-ghɨ amoʼ baʼsɨ̂ nɨ̀ ghɨ̀ki àŋena nɨ̀ woyn ŋêyn àŋena chɨyntɨ koʼ ɨ nà chî a Heblòn nɨ̀ ntèʼ sîsɨ̀ a sɨ n-baʼsɨ afu. ⁴A nà ghɨ achi a li-a ghɨ̀lûmnɨ̀ ghɨli ɨ lù a Judà ɨ gvì a Heblòn ɨ yisi Devìt sɨ a fòyn Judà.

Devɨ̀t ɨ yvɨ na à n-læ gvɨ̀mi ghelɨ ntèʼ Jabèsh Gilèd ɨ gvìmi Sôl, ⁵ɨ tum ghelɨ na ghɨ ndu abàs ilaʼ nâ ghè ɨ̀ bè sɨ̂ ghelɨ nâ ghì na, “Mɨ n-jêm na Bôbo Fɨyini boysɨ zɨ bòm ta yi dyeyn meyn na yi ti meyn nà yvɨnɨ̂ Sôl ma à ti fòyn vzɨ. À tî nì ìyvɨnɨ ì zɨ-i yi gvɨmì ŋweyn. ⁶Mɨ n-jêm na Bôbo Fɨyini dyeyn ikôŋ sɨ̂ zɨ̀ ɨ̀ nì àwo kì a Fɨ chfɨ̀nɨ̀ sɨ̂ zɨ̀. Nô mà nɨn dyèyn àtem a juŋà sɨ̂ zɨ̀ bòm ìwo nâ yèynì a yì tî nì. ⁷Mɨ n-bê sɨ̂ zɨ̀ lvɨ̂yn na ka yì na fàynà, yì na kelɨ àtem ato-a. Sôl ma à ti fòyn vzɨ sɨ ghɨ ma wù kfɨ meyn, ghelɨ Judà gvî yìsi mà sɨ a fòyn nɨ̀ àŋena.”

⁸À nà n-ghɨ tì ma Abnà ɨ wâyn Nê ɨ lûmnɨ̀ li meyn Ishboshèt ɨ wâyn Sôl ŋêyn ŋweyn dyâŋ a ntèʼ Màhanèm. Nê nà n-ghɨ àtu a sugèyʼsɨ̀ sɨ̂ fòyn Sôl. ⁹Àŋena nɨn ndù ɨ chem a ntèʼ Màhanèm Abnà ɨ lèm ŋweyn na wù na ghɨ fòyn saʼ ntèʼ Gilèd nɨ̀ ntèʼ Ashù nɨ̀ ntèʼ Jezlèl nɨ̀ ntèʼ Eflèm nɨ̀ ntèʼ Benjamìn. Yi ti n-dyêyn na wu nà n-saʼ kɨ Isìlæ̀ ìjìm.

¹⁰Ghɨ n-lèm Ishboshèt ɨ wâyn Sôl sɨ a fòyn Isìlæ̀ wu ghɨ bèŋ mɨ̀vɨm ɨ̀n kæ̀. Wu saʼ sɨ a bèŋ sɨ̀ bò, saʼ tì ma isas i ndo nɨ̀ Judà leʼ meyn ɨ̀ kwo ndù nà yvɨ kɨ sɨ̂ Devìt. ¹¹Devìt nɨn saʼ ghelɨ Judà sɨ a bèŋsɨ̀ nsòmbo nɨ̀ abeʼa chî a Heblòn.

¹²A nà ghɨ achi a li-a, Abnà ma à ti wâyn Nê ŋêyn sugèyʼsɨ Ishboshèt ɨ wâyn Sôl ɨ lù a ntèʼ Màhanèm ɨ dyàŋ a ntèʼ Gibìyòn. ¹³Jowàb ɨ wâyn Zèluwà ɨ lù ŋêyn sugèyʼsɨ Devìt sɨ̀ ɨ ndù kòynɨ̀ ŋêyn ghɨ̀ Abnà a mbæ̀ àchɨ̀m a Gibìyòn ɨ kèʼnɨ̀, anôyn a li-a nà ki dyàŋsɨ̀ nɨ̀ a li-a.

¹⁴Abnà ɨ kæ bè sɨ dyaŋsɨ sɨ̂ Jowàb na, “Ghesɨ̀và choʼtɨ woynda tɨ̂kùŋ antêynɨ̀ ìnòyn nɨ̀ ghesɨ̀và àŋena nu ghesɨ̀và yeyn nâ a n-to chwò ndà a.”

Jowàb ɨ bɨmi ɨ bè na “Àŋena lali nù.”

¹⁵Woynda tɨ̂kùŋ ɨ fvɨ̀ njvàsɨ̀ bò ɨntweŋ nɨ̀ Benjamìn sɨ nù abàs nɨ̀ Ishboshèt ɨ nù woyndà tɨ̂kùŋ njvàsɨ̀ bò abàs nɨ̀ Devìt. ¹⁶Àŋena zɨ̀tɨ sɨ nù, nô mɨ ndà ɨ nà ghal kɨ wul vzɨ̀ a wù n-kêʼ ŋweyn atu sû fɨ̀nyuè a ŋweyn ichɨ ibɨ̀. Wù nà n-sû tì, wùl ɨ̀ vzɨ̀ a wù kèʼ ŋweyn ɨ boŋ su bèynsɨ̀, àŋena chɨ̀yntɨ fe a nse kɨ ghɨ̀ jɨ̀m. Yi n-gàyn tî ghɨ nà sɨ toŋtɨ̂ àlêʼ nâ kì a ntèʼ Gibìyòn na, Helkat Hàzulìm ma à ti gvêyn mɨ̀nyuè.

¹⁷Inû ateyn i nà n-bema achi nâ ghè. Sugèyʼsɨ Devìt sɨ̀ ɨ tɨm yɨ Abnà ŋêyn ghelɨ Isìlæ̀.

¹⁸Ghɨ nà nû tì woyn woyn ghɨ lûmnɨ̀ nɨ̀ Zèluwà ɨ ghɨ afu ghɨ̀ tal ɨ Jowàb nɨ̀ Abishà nɨ̀ Asahèl. Asahèl nà n-kya sɨ nyɨŋ nô sɨ a ŋaŋ, nyɨŋ kɨ ta fɨchue. ¹⁹Abnà ŋêyn ghelɨ ŋweyn ɨ se sɨ leʼnɨ, Asahèl ɨ lutɨ kɨ Abnà ɨ nà nyɨŋ kɨ a ŋweyn ibàm. ²⁰Abnà ɨ se sɨ kasi sɨ ki ɨ yeyn ta wù n-gvî ɨ bɨf nâ, “A ti nyɨŋ và a ma ibàm têyn a Asahèl?”

Asahèl ɨ bèynsɨ̀ na à ghɨ kɨ nô zɨ̀.

²¹Abnà ɨ byal ɨ bè sɨ̂ ŋweyn na, “Ka fì nyɨ̀ŋ a ma ibàm. Nyɨŋ ibàm nɨ̀ wayndà ɨkùŋ nô mɨ abàs à kà ɨ ghal ɨ fsɨ ɨfwo iwoŋ nɨ̀ ŋweyn.” Mɨtì Asahèl ɨ faŋ tɨ̀ yvɨ̀tɨ ɨ nà ndû kɨ a ŋweyn ibàm.

²²Abnà ɨ fi byal bè sɨ̂ ŋweyn na ba ma be meyn sɨ̂ và na ka wà fî nyɨ̀ŋ a ma ibàm. Wà n-kɨŋ na mà zue vâ bòm ghà? Mà ti kæ zue vâ ma bè na gha sɨ̂ wâynà vâ Jowàb a?

²³Wu n-tàŋi tî Asahèl ɨ faŋ tɨ̀ yvɨ̀tɨ ɨ nà ndû kɨ ndu a ŋweyn ibàm. Wu ni shɨŋ bèynlɨ̀ ɨ sù ìwoŋ a ŋweyn ɨlvà, yi toynɨ ɨ chwò ɨ fvɨ̀ a jɨm wu fe kfɨ, a nà nyɨŋ gvì mɨ ndà ɨ̀ yeyn ŋweyn wu timi kɨ afu ɨ nà ki a.

²⁴Mɨtì Jowàb ŋêyn Abishà ɨ chwò ɨ nà nyɨŋ ndù kɨ ndu ibam nɨ̀ Abnà. Ɨchfɨ̂ iyvɨ ɨ ni se sɨ sœ ma àŋena chem meyn a Kfɨyn Amà a ngùŋ Giyà, abàs a nse ìyum a Gibìyòn. ²⁵Ghelɨ isas i ndo nɨ̀ Benjamìn ghì ɨ ndu kɨ sɨ a anòyn ibam nɨ̀ Abnà ɨ koʼ timi atû kfɨ̀yn

²⁶Abnà ɨ byal ɨ jàŋ ɨ bɨf sɨ̂ Jowàb nâ, “Ghesɨ̀nà nɨn faŋa nà zuetɨ̂ kɨ ngeŋsɨ nɨ̀ mɨ̀nyuè têyn ɨ̀ læ̀ zuètɨ ndù chèm wo? Ghesɨ̀nà kæ faŋ nà nû kɨ nu a ngòʼsɨ àteyn na jofɨ̀ wì. A wa ti n-visi-à a ghelɨ̀ ghya faŋ nà nyɨŋ kɨ ibàm nɨ̀ woynà àŋena têyn?

²⁷Wu n-taŋi tî Jowàb ɨ bèynsɨ̀ ɨ bè sɨ̂ ŋweyn na, “Mɨ n-bê sɨ̂ và fâyn ìzɨyn i Fɨyini fìfɨ̀ a Fɨ n-chi na, wà bû tàŋi tèyn a ghesɨ̀ ghelɨ̀ ghem faŋ nà nyɨŋ kɨ nyɨŋ a wa ibàm nô ta ka ɨtuʼ nî layn.”

²⁸Jowàb nɨn bè tî ɨ toŋ isoŋ àŋena timi ɨ faŋ tɨ̀ fì tɨ̀ nyɨŋ ibàm nɨ̀ ghelɨ Isìlæ̀, inû ateyn i ɨ mæ̀.

²⁹Abnà ŋêyn ghelɨ ŋweyn ɨ kasi ɨ jèl ɨ toynɨ afoŋlɨ a Jvâ Jodàn ɨ chi jèlɨ kɨ têyn ɨ dyàŋ jva. Ɨtuʼ layn àŋena fi jèl nô sɨ ŋaŋ ɨ kæ gvì sɨ chem a ntèʼ Màhanèm.

³⁰Jowàb nɨn kàsi sɨ a ibàm nɨ̀ Abnà ɨ yvɨ̀ŋtɨ ghelɨ ŋweyn alèʼ àmòʼ ɨ taŋtɨ ɨ yeyn ghelɨ bu anòyn nɨ̀ ŋweyn njvàsɨ̀ bula mòʼ sɨ baʼsɨ sɨ̂ Asahèl. ³¹A nà n-ghɨ abàs nɨ̀ Abnà ma ghelɨ Devìt zuetɨ meyn ghelɨ Benjamìn iwòŋ nâ ghè ɨ ghɨ ìtal nɨ̀ ghelɨ mɨ̀vɨm ntufa. ³²Jowàb ŋêyn ghelɨ ŋweyn nɨn læ gvìmi Asahèl ifò afî a ghɨ n-gvìmi bò ŋweyn ateyn a ntèʼ Betɨ̀lèhêm ɨ lù ɨ chi ɨ jèlɨ kɨ têyn ɨ bɨs ɨ zɨ zɨ a ntèʼ Heblòn.