2 Samuel 16

Devìt ŋêyn Zibà

¹A nà n-ghɨ ta Devìt ŋêyn ghelɨ ghì koʼ chèm atû kfɨ̀yn ɨ̀ nà sɨ kalì ndu-à ɨ yeyn Zibà ɨ wul ɨfelɨnɨ nɨ̀ Mèfiboshèt nɨ̀ njàkây sɨ̀ bòsɨ. Njàkây sɨ ateynsɨ nà n-ghɨ ma sɨ beʼi meyn tɨ̀ghef tɨ abayn ighɨ ì bò nɨ̀ ntuʼsɨ lesìnsɨ̀ ɨvɨ nɨ̀ ntuʼsɨ figsɨ̀ ɨvɨ baʼsɨ̂ nɨ̀ nsàl mɨ̀lùʼ ma ghɨ fàytɨ nɨ̀ gvɨ̂ nyàm.

²Fòyn Devìt ɨ bɨf sɨ̂ Zibà na, “Wà gvì sɨ ni gha nɨ̀ ɨfwo wèyn a?”

Zibà ɨ bèynsɨ ɨ bè na, “Mà gvì nɨ̀ njakây sèynsɨ̀ ta ka ghelɨ ndo nɨ̀ va na jêl atu àteyn. Ɨbwayn wèyn nɨ̀ mɨ̀tâm mèyn nɨn ghɨ ɨ̀fwo ɨ yɨnɨ ta ka ghelɨ na yɨ-a. Mɨ̀lùʼ ɨ ghɨ ta ka ghelɨ nî bol a nse ìyum ɨ̀ nyvɨ.”

³Fòyn ɨ kæ bɨf sɨ̂ ŋweyn na wayn wâyn bò ìfèl nɨ̀ ŋweyn bà? Zibà ɨ bè sɨ̂ ŋweyn na, “Wù faŋ meyn a Jèlusalèm. Wù lem meyn na yi n-kasî fsɨ àchɨ a bòbò ŋweyn layn sɨ̂ ghelɨ Isìlæ̀.”

⁴Fòyn ɨ bè sɨ̂ ŋweyn na, “Nô mɨ ghà ta Mèfiboshèt ti nà kelɨ-a sɨ kelɨ và lvɨ̂yn.”

Zibà ɨ bè na, “Mɨ n-nì nô mɨ ghà ta wà bè a Mbæ̀. Mɨ n-jêm na nô mɨ ghà ta mɨ n-nì na jòf sɨ̂ và.

Shimè ɨ te Devìt

⁵A nà ghɨ ta fòyn Devìt ŋêyn ghelɨ ŋweyn gvì chem a ntèʼ Bahulìm, Shimè ɨ wâyn Gelà a ghɨ wul ìsas i ndo nɨ̀ Sôl ɨ fvɨ gvì ɨ nà telɨ̂ fòyn. ⁶Wù nà n-telɨ̂ fòyn Devìt tì fî tɨmlɨ̂ ŋêyn chyeʼsɨ ŋweynsɨ nɨ̀ ngòʼsɨ̀, nô mɨ ta sugèyʼsɨ̀ nɨ̀ nchìsi ntoʼsɨ nà n-ghɨ ma sɨ timi meyn jɨ̀ŋ kal fòyn. ⁷Shimè nà n-telɨ̂ fòyn Devìt bê sɨ ŋweyn na, “Leʼ sɨ afêyn, wà n-zue-a, wà n-ghɨ kɨ nô àfo a maʼi na. ⁸Bôbo Fɨyini sɨsɨ meyn ìkfɨ i ghelɨ ghì a wà tî zuètɨ a ndo nɨ̀ Sôl vzɨ̀ a wà n-læ lì alêʼ a ŋweyn sɨ a fòyn. Bôbo Fɨyini fsɨ meyn ɨ̀fôyn ateyn ɨ̀ fu sɨ̂ wâyn vâ Absalòm. Izæ mæ meyn bòm ta wà n-zue.

⁹A nà ghɨ ta wù telɨ tî, Abishà ɨ wâyn Zèluwà ɨ bɨf sɨ̂ fòyn na, “Ghɨ vìsi na wùl wèyn a wù n-ghɨ têyn ta akfɨ a bɨ na telɨ̂ và a mbæ̀ bòm ghà. Visi mà ndu kaʼ teyn atu kèynà.”

¹⁰Mɨtì fòyn ɨ bɨf sɨ̂ ŋweyn na, yì tuŋ ɨchfɨ gha iwo nâ ghàyn a woyn Zèluwà ghêyn? Wù kæ nà telɨ̂ mà ma a bè Bôbo Fɨyini sɨ̂ ŋweyn na, “Telɨ Devìt,” yi nà ki zɨ̀ a gha?”

¹¹Wu taŋi tì ɨ fi bɨf sɨ̂ Abishà nɨ̀ ghelɨ ghɨ tisɨnɨ nɨ̀ ŋweyn na, “Wàyn kæ nà sɨ ghɨ kɨ nô ɨwôm nà kɨŋ sɨ zue ma yi nà ghâm wul ɨ̀ Bejamìn wèyn sa gha? Yì visi ŋweyn wu na telɨ-a bòm ta à bè Bôbo Fɨyini na wù telɨ. ¹²Bôbo Fɨyini kàʼ a wu yeyn ànjɨ̀ŋ à kema ɨ̀ kòynsɨ ìsuyn sɨ̂ mà ɨ̀ laʼ mà nɨ̀ njùŋ bòm kɨ̀ nô ta wùl wèyn tèlɨ ma.”

¹³Àŋena nɨn taŋi tî ɨ dyàŋsɨ̀ chwò ɨ nà ndu-a, Shimè ɨ koʼ ndù dzɨ abàs a kfɨyn bu telɨ̂ ndû kɨ ndu nɨ̀ fòyn Devìt fî tɨmlɨ kâysɨ̀ nɨ̀ ngòʼsɨ̀ nɨ̀ ɨ̀guŋ. ¹⁴Fòyn Devìt ŋêyn ghelɨ ghì a ghɨ nà n-ghɨ ŋêyn ŋweyn ɨ ndu chem alèʼ ghè a ghɨ nà ndû ateyn ma ghɨ bol meyn ɨ duʼi yvɨ̀tɨ̀.

Ahitofèl ɨ tebtɨ Absalòm

¹⁵Absalòm ŋêyn ghelɨ Isìlæ̀ ghì nô ghɨ̀ jɨ̀m nɨn gvi meyn zɨ sɨ a Jèlusalèm. Ahitofèl ɨ boŋ gvì afu. ¹⁶Wul ìjèl nɨ̀ Devìt vzɨ̀ a ghɨ nà n-toŋtɨ na Hushày ɨ wul ɨ̀ ntèʼ Alkì ɨ gvì sɨ toŋtɨ Absalòm ɨ bè sɨ̂ ŋweyn na, “Mɨ̀chi mya dyebtɨ a mbæ̀!”

¹⁷Wu n-toŋtɨ tî Abaslòm ɨ bɨf sɨ̂ ŋweyn na, “A ti bè na iyeynì nɨn ghɨ ìkôŋ zɨ̀ a wà dyèyn sɨ̂ sûyn zya a? Wà tî faŋ tɨ̀ lu zɨ̂ ŋweyn bòm ghà?”

¹⁸Hushày ɨ tuynsɨ ɨ bè sɨ̂ ŋweyn na, “Mɨ n-faŋ kɨ ghesɨ̀ wùl vzɨ̀ a Bôbo Fɨyini ŋêyn ghelɨ ghèyn nɨ̀ ghelɨ Isìlæ̀ chòʼ meyn. ¹⁹Ba wà n-ghɨ wâyn fòyn Devìt vzɨ̀ a mà ti nà felɨ̀ sɨ̂ ŋweyn? Mà ti kæ faŋ tɨ̀ fèl sɨ̂ và ma fi fèl sɨ̂ ndà? Mà na fêl sɨ̂ và kɨ ighel ta mà ti nà felɨ̀ sɨ̂ bò vâ.”

²⁰Hushày nɨn taŋi tî Absalòm ɨ bè sɨ̂ Ahitofèl na, “Fèʼtɨ læ nâ ghès nɨn jèl ti a. Tebtɨ ghes.”

²¹Ahitofèl ɨ bè sɨ̂ ŋweyn na, “Ndu chi nɨ̀ suynsɨ bò vâ sìsɨ̀ a wù tî lù ɨ̀ vìsi na sɨ na kinî ntoʼ tì. Wà nì tî a ghelɨ Isìlæ̀ nô ghɨ̀ jɨ̀m yeyn kèli na wà ni meyn bò vâ na bàyn và fu kɨ sɨ̂ ìkfɨ-i, a iwo ateyn i na jôf sɨ̂ ghelɨ ghì a zɨ̂ àŋena nɨn ghɨ amoʼ a àŋena timi nà to kɨ tèyn a wa ibàm. ²²Wu taŋi tì, ghɨ kas fɨtwotɨ̂ sɨ̂ Absalòm atû ndo ìlì a ntoʼ, wu nà chî nɨ̀ suynsɨ bò ŋwensɨ ateyn, ghelɨ Isìlæ̀ nô ghɨ̀ jɨ̀m ɨ yeyna.

²³A nà n-ghɨ ɨtuʼ nâ ghè Ahitofèl ɨ tebtɨ wul bè nô mɨ na gha wu li kɨ têyn ta à tàŋi Fɨyini. À ti ta Devìt nà n-lî itebtɨ i ŋweyn, Absalòm ɨ gvì ɨ nà fî boŋ lì kɨ tì.