2 Samuel 17

Hushày ɨ jɨ̀ŋsɨ̀ Absalòm

¹Ahitofèl nɨ̀n be meyn sɨ̂ Devìt na, “Visi mà choʼtɨ ghelɨ nkam njvàsɨ̀ bò ghesɨ̀ àŋena kfa ndù nù Devìt nɨ̀ntuʼ. ²Mɨ n-shɨŋsɨ ŋweyn ɨ̀ zue, a ghelɨ ghì a ŋêyn àŋena nɨn ghɨ amoʼ leʼnɨ. Mɨ n-zue kɨ fòyn ŋweyn nìnyɨŋ. ³Mɨ n-zue-a ɨ̀ kasi gvì nɨ̀ ghelɨ ghɨli ghì sɨ̂ và. A n-kfɨ kɨ wul ɨ̀moʼ a ghɨli kasi kfa nô ghɨ̀ jɨ̀m bula afo kûm àŋena. ⁴Absalòm ŋêyn chyeʼsɨ Isìlæ̀sɨ̀ nô sɨ̀ jɨ̀m nɨ̀n yvɨ meyn ìwo ateyn yi nà jôf sɨ̂ àŋena.

⁵Absalòm ɨ bè na, “Yì jaŋ gvì nɨ̀ Hushày ɨ wul ɨ̀ Alkì vzɨ̀, ghesɨ̀nà boŋ yvɨ na wu n-bè na gha a.” ⁶Hushày ɨ gvì Absalòm ɨ fèʼtɨ̀ na à ti iwo zɨ̀ a Ahitofèl bè ɨ bɨf na àŋena ni iwo zɨ̀ a wù bè ma, ɨ̀ngaŋ a? Bula tì wu bè ìwo zɨ̀ a wù n-kfâʼtɨ̀.”

⁷Hushày ɨ bè sɨ̂ Absalòm na, “Mɨ n-kfâʼtɨ̀ na itebtɨ yèynì a Ahitofèl fù layn nɨn ghɨ wi a jûŋ. ⁸Wà n-kya na bò vâ ŋêyn ghelɨ ŋweyn nɨn kya sɨ nù nô a jûŋ. Àŋena nɨn se sɨ nù ghɨ nà nû ta nyam àbo ɨlvɨ ta ghɨ lì wayn àteyn. Bò vâ faytɨ kya ìwoŋ. Wù kàʼ wu bû chi ŋêyn sugèyʼsɨ̀ alèʼ àmòʼ. ⁹Ghɨ n-taŋî nô mɨ lvɨ̂yn tèyn ma wù kàʼ a wù na ghɨ ma wù leytɨ meyn ifò kèsa alèʼ a li-a. À kæ gvì ŋweyn nɨ̀ ìnu-i sɨ asɨ ɨ̀ zuètɨ sugèyʼ shya sɨ lisɨ, a à na yvɨ nô mɨ ndà iwo ateyn wu be kɨ na, ‘Ghɨ zuetɨ meyn sugèyʼsɨ Absalòm sɨ dvɨ̂ kɨ tèyn.’ ¹⁰Yi kæ gàyn tî, a sugèyʼsɨ̀ na faynà, a nô mɨ ɨsîsɨ̀ a sɨ n-kelɨ atem kɨ to ta atem a bzɨ̀kem boli, bòm ta ghelɨ Isìlæ̀ nô ghɨ̀ jɨ̀m nɨn kya na bò vâ ŋêyn sugèyʼsɨ ŋweynsɨ nɨn bema.

¹¹Ma na sɨ bê na wà yvɨŋtɨ ghelɨ ilaʼi Isìlæ̀ nô ghɨ̀ jɨ̀m kɨ̀ sɨ zɨ̀tɨ̀ a ntèʼ Dan abàs ikuè sɨ kàli sɨ chem a Beshebà, ghɨ na dvɨ̂ kɨ ta asese a mbæ̀ jvà wà li seʼ nɨ̀ àŋena iwòŋ. ¹²Wà nì têyn a ghesɨ̀nà koli ŋweyn nô mɨ wo ta wù n-ghɨ ɨ̀ gvɨ̀ a ŋweyn atu kɨ̀ ŋêyn ghelɨ ŋweyn ghɨ̀ jɨ̀m ta amwâʼ, a nô wul sɨ ateyn faŋ tɨ̀ bœ̀. ¹³Wù kæ leʼ zɨ a ntèʼ î lì antêynɨ̀ mbàyn, a Isìlæ̀ fvɨ kɨ ì jɨ̀m nɨ̀ nkfɨ̀sɨ ndù gùf mbàyn àteyn a yì fe afoŋlɨ kɨ ì jɨ̀m.”

¹⁴Absalòm ŋêyn ghelɨ Isìlæ̀ nô ghɨjɨ̀m ɨ bè na, “Itebtɨ i Hushày ɨ wûl ntèʼ Alkì wèyn nɨn jôf chwô izɨ-ì a Ahitofèlì.” Àŋena nɨn bè tî bòm ta Bôbo Fɨyini nà n-ghɨ ma wù lem meyn na yi n-bebsɨ̂ ìtebtɨ ijûŋ zɨ̀ a Ahitofèl nɨn læ fu sɨ̂ Absalòm ta ka ngeʼ koli ŋweyn.

¹⁵Hushày ɨ ndu fèʼtɨ̀ ìtebtɨ zɨ̀ a Ahitòfèl fù sɨ̂ Absalòm sɨ̂ Zadòk ŋêyn Abìyatà ɨ ngàŋsɨ ndô Fɨyini ɨ fi fèʼtɨ kɨmɨ izɨ-ì a wù bòŋ fù sɨ̂ Absalòm ŋêyn chyeʼsɨ Isìlæ̀sɨ̀. ¹⁶Wu n-fèʼtɨ tî ɨ kæ be sɨ̂ àŋena na ghɨ nyaŋsɨ ɨ̀ tùm ghelɨ ghɨ ndu bè sɨ̂ fòyn Devìt na, ka wu n-chi alèʼ ghè a ghelɨ nɨn ndû chi ateyn a nse ìyum tì, na ka wu n-faŋ tɨ̀ dyàŋ jva Jodàn bu tì a ghɨ gvi ɨ̀ zuè ŋweyn baʼsɨ̂ nɨ̀ ghelɨ ŋweyn nô ghɨ̀ jɨ̀m.

¹⁷Jonatàn ŋêyn Ahimàz nà n-chî a En-Logèl, a gâyn mɨ ghà wayn ɨ wi ɨ̀ felɨnɨ ɨ̀lvì ɨ gvi feʼ̀tɨ̀ sɨ̂ àŋena ta ka àŋena ndu fèʼtɨ̀ sɨ̂ fòyn Devìt. Àŋena nà n-zɨ wì a Jèlusalèm ka ghɨ yeyn àŋena ɨ̀ nyàblɨ̀ nɨ̀ àŋena. ¹⁸Wayn ɨ lûmnɨ̀ ɨ̂lvì ɨ yeyn àŋena ɨ ndu fèʼtɨ̀ sɨ̂ Absalòm, àŋena nyàŋsɨ leʼ ndù a ndo nɨ̀ wùl ɨ lvì a ntèʼ Bahulìm wu kelɨ ìbɨ i mu a ŋweyn abe, àŋena leʼ ɨ zɨ ateyn. ¹⁹Wî wùl nâ vzɨ̀ ɨ chɨl ɨchfɨ̂ ibɨ nâ zɨ̀ nɨ̀ fɨghâmfɨ̀ ɨ sàŋtɨ̀ àsaŋ atû àteyn wùl ɨ nà kya wi.

²⁰Ghelɨ Absalòm ɨ gvi zɨ abe afu ɨ bɨf sɨ̂ wùl ɨ wi nâ vzɨ̀ na, “Ahimàz ŋêyn Jonatàn bà a?” Wu bè na, “Àŋena dyaŋ meyn injɨyn izɨ-i.” Ghelɨ ateyn ɨ kɨŋ ndù nɨ̀ àŋena ɨ faŋ tɨ̀ yèyn ɨ kasi ndù a Jèlusalèm.

²¹A nà ghɨ ta ghelɨ ateyn lù, Ahimàz ŋêyn Jonatàn ɨ fvɨ̀ sɨ ibɨ imu afî ɨ ndu yeyn Devìt ɨ bè sɨ̂ ŋweyn na, “Lu kɨ lvɨ̂yn ɨ dyàŋ ijɨyn izɨ̂-i. Ahitofèl feʼtɨ meyn dzɨ zɨ̀ a ka Absalòm zue vâ ateyn.” ²²Devìt ŋêyn ghelɨ ŋweyn ɨ lù ɨ dyàŋ ijɨyn i jvâ Jodàn. Ɨtuʼ ɨ se sɨ layn ma àŋena dyaŋ meyn nô ghɨ̀ jɨ̀m.

²³Ahitofèl ɨ yeyn na Absalòm bû nì ìwo zɨ̀ a wù bè ɨ koʼ atû njàkâs ɨ kasi lù ɨ ndù a àŋena a ntèʼ ɨ baʼtɨ ndô ŋweyn. A nà ghɨ ta wù bàʼtɨ ɨ̀ mèsì ɨ shɨ̀ŋsɨ̀, ghɨ gvɨ̀mì ŋweyn a n-gvɨ̀misɨ nɨ̀ bò ŋweyn.

²⁴Devìt nɨn dyàŋ tî ɨ ndù a ntèʼ Mahanèm, Absalòm ɨ boŋ dyàŋ jva Jodàn ŋêyn sugèyʼsɨ Isìlæ̀sɨ̀ nô sɨ̀ jɨ̀m. ²⁵Absalom nà n-ghɨ ma wù choʼ meyn Amasà sɨ a atu a sugèyʼsɨ̀ na wù li alêʼ a Jowàb. Amasà nà n-ghɨ wâyn Jetà, Jetà ɨ ghɨ wul ɨ̀ Isìlæ̀ vzɨ̀ a wu n-læ mala Abigèl ɨ wâyn Nahàsh ɨ jêmtɨ̀ Zèluwà ɨ nà Jowàb. ²⁶Absalòm ŋêyn Sugèyʼsɨ Isìlæ̀sɨ̀ nɨn læ meyn ndù ɨ bɨ̀ a ntèʼ Gilèd.

²⁷Devìt nɨn ndu chem a ntèʼ Màhanèm, ghɨ̀lûmnɨ̀ ɨ gvì sɨ yeyn ŋweyn ghɨ̀ tal, a ghɨ Shobì ɨ wâyn Nahàsh ɨ wul ɨ̀ ntèʼ Labà ma à ti ghelɨ Amòn. Wu n-gvì ŋêyn Makì ɨ wâyn Amèl ta wu n-fvɨ̀ a ntèʼ Lodebà nɨ̀ Bàzilà ta wu n-fvɨ̀ a ntèʼ Logelìm ilaʼi Gilèd. ²⁸Àŋena nɨn gvi nɨ̀ mɨ̀ghàm nɨ̀ ɨ̀kfaŋ nɨ̀ ntòynsɨ̀ baʼsɨ̂ nɨ̀ wît nɨ̀ àsaŋ a balì-à nɨ̀ ɨ̀nkfɨ̀ŋ nɨ̀ asaŋ akaŋnɨ-a nɨ̀ tɨ̀nkì tɨ akuyn tɨlitɨ. ²⁹Àŋena nɨn gvi meyn kɨmɨ nɨ̀ ɨlû nɨ̀ bzɨsɨ njɨ̀sɨ̀ nɨ̀ ìgheyn i nyâm mbòloʼ itabtɨnɨ-i nɨ i yi njɨ̀sɨ̀ ɨ fu sɨ̂ Devìt ŋêyn ghelɨ ŋweyn. Àŋena nɨn gvi fu ɨfwo nâ wèyn bòm ta àŋena nà n-kya na, “Ghelɨ ateyn bol meyn, jeŋsɨ na yaf àŋena, ɨtoŋ mu ɨ fî yumtɨ̂ àŋena a nse iyum.”