2 Samuel 20

Shebà ɨ to nɨ̀ àtu a sɨ̂ fòyn Devìt

¹Wùl ɨlvì nà n-ghɨ a ntèʼ Gilgàl ghɨ toŋtɨ na Shebà, a ghɨ wâyn Biklì ɨ wul ɨ̀ Benjamìn, fu ngeʼ nô sɨ a ŋaŋ. Wù n-toŋ meyn ìsoŋ ɨ byal bè na,

“Ghes nɨn kelɨ wi iwo ili ghesɨ̀ fòyn Devìt,

kelɨ wi iwo sɨ nì nɨ̀ wâyn Jesì.

Mɨ n-bê sɨ̂ ghelɨ Isìlæ̀ na ghesɨ̀nà kasi kfa a ghesɨ̀nà a ndosɨ.”

²Wu n-taŋi tî ghelɨ Isìlæ̀ nô ghɨ̀ jɨ̀m ɨ kasi sɨ ibam nɨ̀ fòyn Devìt ɨ jùmtɨ̀ Shebà ɨ wâyn Biklì. Mɨtì ghelɨ Judà ɨ faŋ ŋêyn Devìt ɨ jùmtɨ kɨ ŋweyn tèyn ɨ ndu chem a Jèlusalèm.

³A nà ghɨ ta fòyn Devìt kàsi kfa ɨ̀ zɨ a ŋweyn a ntoʼ a Jèlusalèm ɨ lèm suynsɨ ŋweyn sìsɨ̀ a wu n-lu visi na sɨ na kinî ntoʼ a ndo ìmòʼ ghɨ nà chî àŋena. Wù nà n-toʼnɨ̀ nɨ̀ àŋena, fu nô mɨ ghà ta àŋena nɨn kɨŋ mɨtì chî wì nɨ̀ àŋena. Àŋena nà sɨ chî kɨ tèyn ta ghɨ̀ki nkfɨ ma ghɨ lem meyn àŋena kɨ̀ alèʼ amòʼ nà chi-à nô ta ka àŋena læ kfɨ̀tɨ.

⁴Ɨtuʼ ɨ layn achi a li-a fòyn ɨ bè sɨ̂ Amasà na, “Jàŋtɨ ghelɨ Judà nô ghɨ̀ jɨ̀m zɨ̂ àŋena gvi ɨ̀ yèyn ma ibàm i mɨchi ɨ̀n tal. ⁵Amasa ɨ ndù sɨ jàŋtɨ ghelɨ Judà mɨtì ɨ chi chwò mɨ̀chi mzɨ̀ a fòyn fu.

⁶Devìt ɨ bè sɨ̂ Abishà na, “Shebà ɨ wâyn Biklì kàʼ a wù fu ngeʼ sɨ̂ ghesɨ̀nà yi chwô ɨzɨ̂ a Absalòm tî fu. Li sugèyʼ semsɨ zɨ̂ àŋena nyɨŋ tèyn ŋweyn bula tì ŋêyn ghelɨ ŋweyn kaʼ a ghɨ ndu ɨ̀ zɨ̀ a ntèʼ sɨ lisɨ ma ghɨ tɨm meyn mbàyn jɨ̀ŋ kal, a dzɨ̀ na bu fì ghɨ wi sɨ̂ ghesɨ̀nà sɨ ghal àŋena.” ⁷Wu n-taŋi ti Abishà ɨ lù ŋêyn sugèyʼsɨ Jowàbsɨ̀ nɨ ɨ sɨ Kelètsɨ̀ nɨ̀ ɨ sɨ Belètsɨ̀, baʼsɨ̂ nɨ ɨsîsɨ̀ a sɨ nà n-chi fòyn, àŋena fvɨ̀ Jèlusalèm ɨ ndù ibàm nɨ̀ Shebà.

⁸A nà ghɨ ta àŋena ndù chem iwu ighaʼnɨ ili abàs a Gibìyòn, Amasà ɨ fvɨ kòynɨ̀ ŋêyn àŋena. Jowàb nà n-ghɨ ma wù maʼ meyn ndzɨsɨ sugèyʼsɨ̀ ɨ̀ lì ìfô ɨ̀ kùl akuʼtɨ. A nà ghɨ ta wù gvì baʼsɨ sɨ̂ Amasà, ifo ateyn i fvɨ̀ sɨ abuʼlɨ ɨ chem a nse.

⁹Wu bɨf sɨ̂ Amasà na, “Awo nɨn ghɨ ti-a a ba?” Wù nà n-bɨf tì ghal ndù nɨ̀n ŋweyn a nyuŋsɨ idyèl nɨ̀ ɨkœ ɨ two sɨ baʼnɨ ŋweyn. ¹⁰Amasà nà n-yeyn wi na wù n-kelɨ ìfô awu a li-a. Jowàb ɨ sù ìfô ɨlvà nɨ̀ Amasà kɨ ɨlvɨ ɨ̀mòʼ, mɨ̀tû ɨ fvɨ̀ a nse wu kfɨ kɨ kfɨ. Jowàb ŋêyn wâynà ŋweyn Abishà ɨ kæ sɨ ndù ibam nɨ̀ Shebà ɨ wâyn Biklì.

¹¹Sugèyʼ Jowàb ìlì ɨ timi a ngùŋ ìgvɨyn nɨ̀ Amasà ɨ byal bè na, “Ghelɨ ghì a ghɨ n-kôŋ Jowàb nɨ ɨghî a ghɨ n-kôŋ fòyn Devìt jumtɨ ndù nɨ̀ Jowàb.” ¹²Amasà nà n-nyɨŋ achàʼlɨ̀ a mɨ̂lùŋ avɨ̀ a dzɨ, a se sɨ chwo nô mɨ sugèyʼ ikà timî ki-a. Sugèyʼ zɨ̀ a yì nì byal ɨ̀ tàŋi tì ɨ yeyn tî ɨ gùf ɨ zɨsɨ nɨ̀ ŋweyn ɨtwaʼ ɨ màʼ dzɨsɨ atu. ¹³A nà ghɨ ta ghɨ dzɨ̀sì igvɨyn i Amasà sɨ a dzɨ Jowàb ŋêyn sugèyʼ sìsɨ̀ nô sɨ̀ jɨ̀m ɨ lù ɨ nà n-ndû ibàm nɨ̀ Shebà ɨ wâyn Biklì sɨ ghal.

¹⁴Shèba nɨ̀n toynɨ meyn ntèʼsɨ Isìlæ̀ kɨ sɨ̀ jɨ̀m ɨ ndu chem abàs a Abel Bet Makà ɨ ndù dzɨ abàs a Biklì ghelɨ fvɨ̀ afu nô ghɨ̀ jɨ̀m ɨ ndù a ŋweyn ibàm ¹⁵Sugèyʼ sɨ Jowàbsɨ̀ ɨ keli na Shebà nɨ̀n ghɨ a ntèʼ Abel Bet Makà ɨ gvì ɨ timi jɨ̀ŋ ɨ kal ntèʼ nâ zɨ̀ ɨ bàʼlɨ koʼsɨ afo ɨwuyn mbàyn. Àŋena nà n-nî tì kfɨ̂yn ɨ̀wuyn mbàyn na yì fe. ¹⁶Wùl ɨ wi ɨ̀tofɨnɨ ɨ̀lvì ɨ jàŋ ɨ be fvɨ̀sɨ gvì antêynɨ̀ mbàyn na, “Yi timi tî! Yì be sɨ̂ Jowàb na wù kɨŋtɨ gvì tì mà be iwo sɨ̂ ŋweyn.” ¹⁷Jowàb ɨ kɨŋtɨ ndù ɨ baʼsɨ sɨ̂ ŋweyn wu bɨf na, “À n-ghɨ và Jowàb a?”

Jowàb ɨ bɨmi.

Wùl ɨwu àteyn ɨ bè sɨ̂ ŋweyn na, “Faytɨ yvɨtɨ iwo zɨ̀ a ka mà be a bô.”

Jowàb ɨ bɨmi ɨ bè na wù be iwo zɨ̀ a wù n-kɨŋ sɨ bè.

¹⁸Wu bè na, “A nà n-ghɨ ɨtuʼ ɨ mu ghɨ nî ghɨ nà bê na, ‘Wà na kòŋ na ghɨ tebtɨ vâ a jûŋ wa ndu a ntèʼ Abel.’ Ghɨ nà n-bê tì, wùl ɨ ndu kɨ ndu. ¹⁹Ghès nɨn ghɨ tèyn kôŋ mbôynɨ̀ fî yvɨnɨ-a a Isìlæ̀. Wà n-kɨŋ sɨ bebsɨ ntèʼ ighaʼnɨ a Isìlæ̀. Bòm ghà ta wà n-kɨŋ sɨ bebsɨ ntèʼ Fɨyini a?”

²⁰Jowàb ɨ bèynsɨ̀ ɨ bè na, “Nyô mà. À n-ghɨ wi ma sɨ bebsɨ ntèʼ zɨ. ²¹Ghesɨ bû gvì sɨ bebsɨ ntèʼ zɨ. Wùl telɨ meyn fòyn Devìt ɨ̀ leʼ gvì afêyn izɨyn i ŋweyn ɨ ghɨ Shebà ɨ wâyn Biklì ma wù fvɨ̀ ilaʼ i kfɨynsɨ a Eflèm. Yì fu kɨ̀ wul nâ wèyn sɨ̂ ghes a ka ghès kasi lù nɨ iyesi.”

Wul ɨ wi àteyn ɨ bè sɨ̂ Jowàb na, “Ghɨ n-làŋ yaʼsɨ̂ àtu a ŋweyn sɨ̂ zɨ̀ atû mbàyn.”

²²Wùl ɨ wi àteyn ɨ ndu yeyn ghelɨ ntèʼ nâ ghì ɨ tebtɨ àŋena, ghɨ teyn atu a Shebà ɨ wâyn Biklì ɨ làŋ ɨ yaʼsɨ atû mbàyn sɨ̂ Jowàb. Jowàb ɨ toŋ isoŋ, sugèyʼsɨ ŋweynsɨ ɨ gwòsɨ̀ ɨ kasi nà kfâ, Jowàb ɨ kasi ndù sɨ yeyn fòyn a Jèlusalèm. ²³Jowàb nà n-ghɨ àtu sɨ̂ sugèyʼsɨ̀ nô sɨ̀ jɨ̀m a Isìlæ̀, Bènayà ɨ wâyn Jèhoyidà ɨ ghɨ àtu sɨ̂ sugeyʼ sìsɨ̀ a sɨ nà n-chî fòyn. ²⁴Adonilàm nà n-ghɨ àtu sɨ̂ ghelɨ ghì a ghɨ ghàl sɨ adyaʼ, àŋena na felɨ̀ sɨ̂ fòyn, Jèhoshafàt ɨ wâyn Ahilùd, ɨ ghɨ wul ɨ vzɨ̀ a wù nyâʼ lêm nô mɨ ghà ta Devìt nɨn bê sɨ̂ ghelɨ. ²⁵Shevà nà n-ghɨ wul ɨ̀ nyàʼnɨ, Zadòk ŋêyn Abìyatà ɨ ghɨ ngàŋsɨ ndô Fɨ̀yinì. ²⁶Ilà ɨ wul ɨ̀ Jaylì nà n-ghɨ kɨmɨ ngàŋ ndô Fɨyini nɨ̀ Devìt ìlì.