2 Samuel 21

Ghelɨ Gibìyòn ɨ sɨ̀sɨ̀ ìwo zɨ̀ a Sôl nɨ̂n nì sɨ̂ àŋena

¹A nà n-ghɨ ta Devìt nɨn ghɨ fòyn, jèŋ i bemnɨ ɨ ku Isìlæ̀ sɨ a bèŋsɨ̀ tal. Devìt ɨ jèm sɨ̂ Bôbo Fɨyini ɨ bɨf na, àŋena bèbsɨ ghà na jèŋ ku ilaʼ tèyn a. Bôbo Fɨyini ɨ be sɨ̂ ŋweyn na à n-ghɨ bòm tà Sôl ŋêyn ghelɨ ŋweyn nɨn læ zuetɨ ghelɨ Gibìyòn.

²Ghelɨ Gibìyòn nà n-laynsɨ̂ ghɨ wi ghelɨ Isìlæ̀. Àŋena nà n-ghɨ fɨ̀nôynɨ̀ antêynɨ̀ nɨ̀ ghelɨ Amò ma ghelɨ Isìlæ̀ nɨn læ meyn chfɨ̀nɨ̀ na ghɨ na tòʼnɨ̀ nɨ̀ àŋena mɨtì Sôl nɨ̀ ɨ̀wuyn ɨlumnɨ ɨ nà mômsɨ̀ sɨ zuetɨ àŋena nô ghɨ̀ jɨ̀m sɨ gàmtɨ ghelɨ Isìlæ̀ nɨ̀ Judà. Devìt nɨ̀n tum meyn na ghɨ ndu jàŋ gvì nɨ̀ àŋena. ³Àŋena gvì Devìt ɨ bɨf sɨ̂ àŋena na, “Yi n-kɨŋ na mà ni gha sɨ̂ zɨ̀ a? Yì feʼtɨ iwo zɨ̀-ì a ka mà ni ta ka yì jem Bôbo Fɨyini boysɨ ghelɨ ŋweyn.”

⁴Àŋena bèynsɨ̀ ɨ bè na, “Ghès nɨn kelɨ wi adyaʼ sɨ bɨf ikwo sɨ̂ Sôl kèsa sɨ̂ isas i ndo nɨ̀ ŋweyni, kelɨ wi adyaʼ sɨ zue wul a Isìlæ̀.”

Devìt ɨ fi bɨf na, “Yi n-kɨŋ na mà ni gha sɨ̂ zɨ̀ a?

^5-6Àŋena bèynsɨ̀ ɨ bè na, “Fu ghelɨ sɨ̂ ghès nsòmbo ma ghɨ fvɨ̀ isas i ndo nɨ̀ wùl vzɨ̀ a wù tî nà kɨŋ sɨ zuetɨ sɨ mèsi ghes sɨ̂ ilaʼi Isìlæ̀ ghès ndu zue ghaŋsɨ a ntèʼ nɨ̀ Sôl a Gibìyà, alèʼ ghè a ghɨ n-koʼsɨ Bôbo Fɨyini ateyn a ntèʼ Gibìyòn. Fòyn ɨ bɨmi ɨ bè na yi n-fu ghɨ̀lûmnɨ̀ nâ ghì nsòmbo.

⁷Fòyn Devìt nɨn bu læ visi Mèfiboshèt ɨ wâyn wâyn Sôl sɨ̂ àŋena na ghɨ zue bòm ìchfɨ̂nɨ̀ zɨ̀ a wù n-læ nà kelɨ ŋêyn Jonatàn ɨ bò Mèfiboshèt. ⁸Fòyn ɨ kwo lì Amonì ŋêyn Mèfiboshèt ɨ woyn Lizbà ɨ wâyn Ayì-à vzɨ̀ a wu n-bzɨ ŋêyn Sôl baʼsɨ̂ nɨ̀ woyn Milàb ɨ wâyn Sôl ghɨ̀ tâyn. Melàb nɨn bzɨ woyn nâ ghèyn ŋêyn Adlèl ɨ wâyn Bàzilà ɨ wul ɨ̀ Mèholà. ⁹Wù n-fu meyn ghelɨ nâ ghèyn nsòmbo sɨ̂ ghelɨ Gibìyòn, àŋena zuetɨ ɨ lèm tɨ̀gvɨyn tɨ àŋena atû kfɨ̀yn afî a àŋena nà n-koʼsɨ Bôbo Fɨyini ateyn. Ghɨ n-zuètɨ ghelɨ nâ ghèyn a ngàm ghè a ghɨ nà n-zɨ̂tɨ̀ sɨ nà sɨ asaŋ a balì ateyn.

¹⁰Lizbà ɨ wâyn Ayì-à ɨ lì fɨ̀ntsɨ ɨ zɨ̀sɨ̀ atu ìwù alèʼ nâ ghè ɨ faŋ kɨ afu kɨ ta ghɨ n-zɨtɨ̀ isɨ i balì sɨ koʼ sɨ chem ta bèŋ nɨ̀n chfɨ̂ gvî. Wu nà n-visî wì na fɨnyuynfɨ kum igviyn ateyn nɨ̀nchuè, visî wì na nyàm ɨ̀twaʼ gvi afu nɨ̀ntuʼ. ¹¹Wul ɨ ndu feʼtɨ̀ iwo nâ yèynì sɨ̂ fòyn Devìt a Lizbà nì, ¹²wu lù ɨ ndù ɨ fsɨ ɨvɨf ɨ Sôl ŋêyn Jonatàn sɨ̂ ghelɨ ntèʼ Jabèsh ilaʼi Gilèd. Ghelɨ nâ ghèyn nɨn læ choŋ ɨvɨf ateyn afàf a Bet Shàn alèʼ ghè a ghelɨ Fìlisìyà nɨn zue ghaŋsɨ ɨgvɨyn i Sôl ateyn a ntèʼ Gilbwà. ¹³Devìt nɨn bè ghɨ lì ɨ̀vɨf ɨ Sôl ŋêyn Jonatàn baʼsɨ̂ nɨ̀ ɨ̀vɨf ɨ ghelɨ ghɨli ghì nsòmbo a ghɨ n-zuètɨ ɨ lèm atû ìwù. ¹⁴Ghɨ n-gvɨ̀mi ɨvɨf ɨ Sôl nɨ ɨwu wâyn ŋweyn Jonatàn isè afî a ghɨ n-gvɨ̀mi Kîsh ɨ bò Sôl ateyn a ntèʼ Zelà a ilaʼi Benjamìn ɨ nì nô mɨ ghà ta fòyn Devìt nɨn læ bè na ghɨ ni. Fɨyini fɨ ɨ kæ bèynsɨ̀ ijêm zɨ̀ a ghelɨ Isìlæ̀ nà n-jêm sɨ̂ Ilaʼi àŋena.

Ghelɨ Isìlæ̀ ɨ nù ghelɨ ndo ìwòŋ ghɨ to nɨ̀ Fìlisìyà

¹⁵Ghelɨ Fìlisìyà nɨ̀ ghelɨ Isìlæ̀ nɨn fi meyn zɨ̀tɨ̀ ìwoŋ, Devìt ɨ seʼ ɨtwaʼ iwòŋ ŋêyn sugèyʼsɨ ŋweynsɨ ɨ ndu nù ɨ bol. ¹⁶Wulɨ̀ Fìlisìyà ɨ̂lvɨ̀ izɨyn i ŋweyni ghɨ Ishbi-Benòb ɨ wul ìsas i ndo nɨ̀ Lafà ɨ kɨŋ sɨ zue Devìt. Wu nà n-kelɨ ìfô igvèleŋ ifɨ-i, nɨ̀ ìwoŋi, atu ateyn a ɨ ghɨ ma ghɨ fàytɨ nɨ̀ idyani kɨ dɨ̂l chem ndû kilùsɨ̀ tal nɨ̀ abeʼa. ¹⁷Abishà ɨ wâyn Zèluwà ɨ gvì ɨ bœ̀sɨ̀ Devìt ɨ zue wul ɨ̀ Fìlisìyà nâ vzɨ̀. Sugèyʼsɨ fòyn Devìtsɨ̀ ɨ bè sɨ̂ ŋweyn na, “Ghès læ bu visî wì na wà seʼ ɨtwaʼ iwòŋ ghesɨ̀nà bùla tì a ɨvɨsɨ lima sɨ a Isìlæ̀.”

¹⁸Ghɨ chitɨ kɨ têyn, iwoŋi fi làli, ghelɨ Fìlisìyà ɨ nà nû ghelɨ Isìlæ̀ a ntèʼ Gôb. Ghɨ se sɨ nù Sìbekày ɨ wul ɨ̀ Hushà ɨ zue wul ìsas i ndo nɨ̀ Lafà ɨ̂lvɨ̀ ghɨ toŋtɨ na Sâf.

¹⁹Iwoŋ ili ɨ fi làlì antêynɨ̀ nɨ̀ ghelɨ Isìlæ̀ nɨ̀ ghelɨ Fìlisìyà kɨ̀mɨ a ntèʼ Gôb, Elhanàn ɨ wâyn wul ɨ̀ Betɨ̀lèhêm ɨ̂lvɨ̀ a ghɨ nà n-toŋtɨ na Jale-Olègîm ɨ zue Gòliyàt ɨ wul ɨ̀ Gât. Goliyàt nà n-kelɨ ɨfyayn iwòŋ wu ghɨ ta ɨkoʼ vzɨ̀ a ghɨ n-bo bòsɨ̀ ateyn.

²⁰A nà ghɨ kɨmɨ iwòŋ ili a ntèʼ Gât, wùl ɨ̂lvɨ̀ ɨ ghɨ afu ghaʼ kɨ tèyn fî dyefà, nô mɨ àwu a ŋweyn à kà ɨ kelɨ baŋsɨ ɨwu ntufa, ɨvɨ ɨ ŋweyn ɨ kelɨ kɨmɨ tì. Wù nà n-chɨ̂yntɨ̀ kelɨ baŋsɨ ɨwu nɨ̀ baŋsɨ ɨvɨ̀ mɨ̀vɨm ɨ̀m bò njvàsɨ̀ kæ̀, a ghɨ kɨmɨ wul ìsas i ndo nɨ̀ Lafà. ²¹A nà ghɨ ta wù zɨ̀tɨ̀ sɨ lùʼsɨ ghelɨ Isìlæ̀, Jonatàn ɨ wâyn wâynà Devìt ɨ Shimìyà ɨ zue ŋweyn.

²²Ghelɨ nâ ghèyn ghɨ̀kæ̀ a sugèyʼsɨ Devìtsɨ̀ nɨn læ zuetɨ a ntèʼ Gât tèyn nà n-ghɨ ghelɨ isas i ndo nɨ̀ Lafà.