Amos 4

¹Zɨ ghɨ̀kì ghêyn a yi n-chi atû kfɨ̂yn Samaliya tèyn; zɨ̀ ghêyn a yì yɨ ɨ̀ nà ghaʼlɨ̂ bem tèyn ta nyamsɨ bòloʼ a Bashan. Yi n-yeʼtɨ̂ ghelɨ ghɨ bolɨ, nûʼ ghelɨ ànfɨf, bɨm bêynsɨ̀ bê kɨ sɨ̂ ghɨ̀lûm ghi na ghɨ na gvî nɨ̀ mɨ̀lùʼ, yi nyɨ-a! ²Yì na kya na Bobo Fɨyini vzɨ̂ a wù ngàŋtɨ chwò nɨ̀n layna. Wù chfɨnɨ meyn na, mɨ̀chi nɨn koʼ gvi-à taka ghɨ ghobtɨ nô zɨ ghɨ̀jɨ̀m ɨ̀ gùf fvɨ̀sɨ̀ gvì nɨ̀ zɨ̀; taka ghɨ na gufɨ̀ fvɨsɨ̀ kɨ zɨ̀ tèyn ta ghɨ gùfɨ̀ sfɨsɨ ɨlvɨ ta sɨ lì a fɨ̂làm. ³Ghɨ laè nà gûfɨ̀ kɨ wul tèyn ndù chem a abùʼ ɨwùyn mbàyn ghè a kɨ n-baʼsɨ alèʼ ghè a ghɨ lì ŋweyn ateyn, ghɨ laŋ fvɨ̀sɨ̀ ŋweyn abe ⁴(para) Bobo Fɨyini vzɨ̀ a wù ngàŋtɨ chwò bè sɨ̂ zɨ̀ ghelɨ Isɨlae na, Yi gvi alèʼ a laynɨ-a a Betel ɨ̀ tòʼ nì mbɨ. Yì kali gvì a Gilgal ɨ nì mbɨ nô nɨ̀ àdyaʼ aki-a àjɨ̀mà. Ɨtuʼ na layn mɨ achi àkà, yi gvì nɨ̀ nyamsɨ ɨ sɨ ɨ fu sɨ sɨ̂ Fɨyini fɨ̀. Mɨ̀chi na chwô ɨ̀n tal, yi gwòtɨ̀ ɨ̀fwo vzɨ ɨlwêʼ ɨvɨm, yi fu àmoʼ sɨ̂ Fɨyini fɨ̀. ⁵Yì gvi nɨ̀ ɨ̀fwo ɨ yɨnɨ ɨ fu àyòŋnɨ̀ a Fɨyini ateyn. Yì toʼ ghaŋsɨ ɨwuyn ɨ̀ dyèyn na yi n-kya sɨ fu nô ajûŋ! Ba tèyn nɨ̀n ghɨ àwo kì a yi n-kôŋ sɨ nà ni-à? ⁶(para) A n-lae màʼ ma jeŋ a yi a ntèʼsɨ nô sɨ̀jɨ̀m, jèŋ ɨ nà yaf zɨ̀ nô ghɨ̀jɨ̀m. Mɨtɨ yi leʼ na yi n-kasi gvî wì sɨ̂ mà. ⁷Mɨ n-lae meyn ghal ivɨ na ka yi suʼi, a ghɨ tì njoŋsɨ bu duʼ sɨ̀ tal taka ɨfwo yɨnɨ bi sɨ a gvêynsɨ̀. Mɨ nà n-tum ìvɨ a ntèʼ afêyn, ma ghal na ka yi sùʼi a ntèʼ afi. Ivɨ i nà n-suʼi a gvêyn î lì, ɨfwo ɨ yɨnɨ yum a gvêyn î lì bòm ìvɨ ta yi faŋ tɨ̀ sùʼi ateyn. ⁸Ɨtoŋ mu nà n-yum ghelɨ, àŋena boli, ghɨ nà ndu kɨ a ntèʼ a ntêʼ mɨtì yeyn mu mɨ dvɨ̂ kfeynɨ̂ wì sɨ nyvɨ. Mɨ n-lae ni mɨtì yi faŋ tɨ̀ kàsi sɨ gvi sɨ̂ mà ⁹Mɨ n-lae meyn tum afyef a lûm, kɨ nì ɨfwo ɨ yɨnɨ yum sɨ a yi a gvêynsɨ̀ ɨ tum gumisɨ, sɨ kfɨl tɨfvɨ tɨ ɨnkàʼ mɨ̀ ɨ̀ntam nɨ̀ zɨ̀ nô tɨ̀jɨ̀m baʼsɨ̂ nɨ̀ tɨfvɨ ɨnkaʼ mɨ̀ fîgsɨ̀ nɨ tɨfvɨ tɨ ɨnkàʼ mɨ̂ Olìfsɨ̀. Ta ma ni mɨ tì, yi fi leʼ kɨ leʼ na yi n-kasî gvî wì sɨ̂ mà. (verse 11)Mɨ n-lae meyn tum tɨkoʼi sɨ̂ zɨ kɨ̀mɨ ta ɨtîtɨ̀ a mɨ̂ n-lae tum sɨ̂ ghelɨ Ijib, yi keʼ kɨ têyn. Mɨ n-lae meyn zuetɨ woyn ghɨlûmnɨ̀ nɨ̀ zɨ ɨtwaʼ iwòŋ ɨ nì mbàynɨ̀ sisɨ ghaytɨ nyamsɨ kfaŋ nɨ̀ zɨ̀ ɨ kfa nɨ ɨ̀nseynsɨ. Mɨ n-lae meyn nì yi na duʼ mɨ ɨlvɨ gha yvɨ kɨ àlɨ̂m a ghêl ta ghɨ kfɨ̀tɨ ɨ̀ foè alèʼ ghe a yì bɨ̀ ateyn. Mɨtì yi fi leʼ kɨ leʼ na yi n-kasî gvî wì sɨ̂ mà. ¹¹Mɨ n-lae meyn bebsɨ zɨ ghɨli kɨ̀ a dzɨ ghê a mɨ n-lae bebsɨ ghelɨ Sodom nɨ̀ ghelɨ Gomola ateyn. Zɨ ghî a yi n-lae boe nɨ̂n lae nà ghɨ kɨmɨ tèyn ta ɨnkâʼ ɨlvɨ ta ɨvɨsɨ sesɨ bali ghɨ sâʼ fvɨ̀sɨ̀ ichɨ na ka mɨ̀ fɨ mèsɨ̀. Mɨtì yi leʼ kɨ leʼ na yi kasî gvî wì sɨ̂ ma. À tàŋi Bobo Fɨyini. ¹²Yi ti n-dyêyn a ghelɨ Isɨlae na mɨ n-fu ngeʼ sɨ̂. Yì na gvɨ̂tɨ sɨ keʼ Fɨyini fifɨ a ghelɨ Isɨlae! ¹³(poetry) A n-lae faytɨ ma kfɨynsɨ ɨ faytɨ àfyef. A n-dyêyn baynsɨ̂ ma ikfâʼtɨ iyemi sɨ̂ ghelɨ. A ghɨ mà vzɨ̂ a mɨ n-jɨsɨ ɨtuʼ kɨ̀ a ntô chuè. Mɨ n-sesɨ jèl ma nà laysɨ̀ àvɨ atû kfɨ̀yn tum kɨ atû kfɨyn. Izɨyn ìyemi nɨn ghɨ Bobo Fɨyini Fîfɨ̀ a fɨ Ngaŋtɨ Chwò.