Amos 6

¹Ngeʼ ighaʼnɨ nɨn ghɨ sɨ̂ zɨ̀ ghi a yi n-faytɨ chi a Zayon, yɨ ɨ̀wûyn vzɨ, nɨ̀ zɨ̀ ghî a yi n-chi atu kfɨ̂yn Samaliya, fâyn wi afo. Ba à n-ghɨ zɨ̀ ghelɨ ghɨ tisɨnɨ a Isɨlæ, nô mɨ ndà ɨ lî ìwo i ŋweyn, gvî bɨf kɨ sɨ̂ zɨ̀. ²Yì ndu a ntèʼ Kalne ɨ̀ fàytɨ̂ ki iwo zɨ̀ a yi tî gàyn afu. Yi fî ndu ki Gat ɨ ntêʼ Filisiya zɨ̀. Yi n-kfâʼ na àŋena tî nà chwô ìlaʼ i Juda nɨ̀ ìlaʼ i Isɨlæ a gha? Yi n-kfâʼ na ngeʼ nâ zɨ̀ tî gàyn sɨ̂ àŋena bòm ta àŋena tî nà ghaʼ chwô zɨ̀ ma? ³Yi n-bimî wì na achi a ngèʼ a nɨn gvi-à, mɨtì nî kɨ àwo kì a kɨ n-nî na achìʼ gvi mèsɨ̀. Ngeʼ i ghaʼnɨ nɨn gvî sɨ̂ zɨ̀ ghî a yi n-nyɨŋ a mɨ̂kùyn ma ghɨ nyotɨ meyn nɨ̀ àsoŋ a àtàm à, faytɨ̂ kfɨlɨ nò mɨ njwò ɨ̂kà kɨ̀ ta yi n-kôŋ. ⁵Yi n-kôŋ sɨ nà beti njàŋsɨ̀ yi nà yema, kfêytɨ̀ ìluŋ ta Fòyn David. ⁶Yi n-bɨm nyvɨ kɨ mɨ̀luʼ ta yi n-kôŋ, yisî mɨ̀yisi ɨ̀n lɨ̀mtɨnɨ̂ ɨ̀n jùŋ. Mɨtì dzɨ̂ wì Isɨlæ ma yì bef meyn mèsɨ̀. ⁷Yì na kya na ghɨ læ̀ ghaytɨ̂ kɨ zɨ̀ sɨ asɨ ɨ ndù lèm zɨ̀ ilaʼ atum. Yi n-mûtɨ̀ kɨ tèyn bàʼtɨ̂ àyɨ, ghɨ nà yɨ-a, bɨŋlɨ̂ a mɨ̂chɨ̀ ɨ̂n jûŋ, mɨtì iwo nâ zɨ̀-ì ɨ ghɨ sɨ læ̀ sɨ mæ̀. ⁸Bobo Fɨyini fîfɨ̀ a fɨ ngàŋtɨ chwò kàyntɨ̀ meyn ìwo yèyni ɨ leŋ fɨ̀dyòʼ ɨ̀ bè na, (poetry quote) Mɨ mbâyn ìghaŋsɨ iwuyn nɨ̀ ghelɨ Isɨlæ yèynì nô sɨ a ŋaŋ. Mɨ n-bâyn mbàyn sɨ ghaʼnɨ sèynsɨ̀ a àŋena kɨ̀ŋtɨ̀ ndosɨ àŋena nɨ̀ ɨ̀nyeynsɨ. Mɨ n-fu ntèʼ ighaʼnɨ nɨ̀ àŋena baʼsɨ nô mɨ nɨ̀ ghà ateyn sɨ̂ mbàynɨ̀ sɨ àŋena ⁹Ghɨ kæ gvì ghàytɨ ghelɨ a ntèʼ, ghelɨ gvî faŋ nô mɨ ɨvɨm abe nɨ̀ wùl, a ghɨ fî gvì zuètɨ mèsi kɨ̀ mesi àŋena. ¹⁰Ghɨ kæ zuetɨ tî, ghelɨ ndo nɨ̀ ghelɨ nâ ghì/àŋena (a zuètɨ ti) ɨ gvî zɨ sɨ li ghelɨ ateyn sɨ ndu sɨ gvɨ̀mɨ, ɨ̀mòʼ ɨ kâʼ a wù jaŋ bɨf nô mɨ sɨ̂ ndà vzɨ a wù bu duʼ taka ghɨ zue na, Wùl bu ghɨ a ndo afêyn zɨ̂ ŋwen a? A ɨvzɨ nâ vzɨ̀ a wù bu ghɨ ɨtwo tì be na, Ɨngaŋ, wùl bu ghɨ wi. Nô mɨ ɨlvɨ gha, a wù be kɨ̀ na, Wa chimi kɨ têyn moŋ, ka wùl sɨ̂ ghesɨ̀nà nɨ̂n fi tòŋtɨ ìzɨyn i Bobo Fɨyini, bu tì, a wù gvi ɨ̀ boŋ zuètɨ̂ ghesɨ̀nà. ¹¹Bobo Fɨyini bè na, ghɨ gvi saʼtɨ ndosɨ ghaʼnɨsɨ nɨ sɨ telâsɨ̀ kɨ̀ isàʼ isàʼ ¹²Nyamsɨ kfaŋ sɨ kàʼ sɨ bû nà nyɨŋ atû ngòʼsɨ̀. Wùl kàʼ wu bû nì, nyamsɨ na jûʼ gveyn atû jvà. Mɨtì yi na sɨ ghɨ ma yi li meyn àwo, kɨ kelɨ sɨ nà jêl àti ati ɨ̀ kàsi sɨ a nlef. Yi beynsɨ meyn nchînɨ̀ àtì ati, yì na ghɨ àtvɨ̀ŋatvɨŋ. ¹³Yi n-ghaŋsɨ̂ ɨ̀wuyn bê na, yi ti meyn ghalɨ sfɨ nteʼ Lodeba, kfɨ̂yn fɨ̀dyoʼ bê na, yi ti meyn sfɨ nteʼ Kanayim sɨ a dyaʼ. ¹⁴Bobo Fɨyini kæ sɨ nà be sɨ̂ zɨ̀ na, Woyn Isɨlæ, mɨ n-tum sugyèʼ sɨ ilaʼ ɨ yilu-ì, a sɨ gvi dyèyn ìwo sɨ̂ zɨ̀. Sɨ n-gvì fu ngeʼ sɨ̂ zɨ̀, kɨ̀ sɨ zɨ̀tɨ̀ ikuè a Lebo-Hamat sɨ kàlì sɨ chem a jvâ Alaba itsɨyn.