Amos 7

¹Bobo Fɨyini fɨ̂fɨ̀ a fɨ ngaŋtɨ chwò nɨ̀n lae meyn nì, awo ali-a fvɨ̀ a ma ikèʼ tèyn ta kɨ fvɨ̀ a jem. ²Mɨ n-yeyn meyn ta wù n-baʼtɨ sɨ tum ngumisɨ ilaʼ nô sɨ idvɨ̀. À nà n-ghɨ tì ma ghɨ kùʼ tem kɨ̀ tem gveynsɨ fòyn nɨ̀ lùm ɨ̀ toʼ, ɨ̀nfùʼ kasî zɨ̂tɨ̀ kɨ̀ zɨ̀tɨ sɨ koʼ. ³Ma fi yeyn ta ngumi sìsɨ kfɨl nô mɨ àtu afo à kà (ta kɨ bu ghɨ). Ta mà yèyn tî ɨ̀ kae dzɨ sɨ̂ Bobo ɨ bè na, Bobo Fɨyini fîfɨ̀ a fɨ ngàŋtɨ chwò, lèsɨ fu mbɨsɨ ghelɨ Isɨlæ nɨ̀ và. Iwo yèynì kæ gàyn, woyn Isɨlæ gheyn bû boè bòmta àŋena nɨn læ̂ nô sɨ a ŋaŋ, kelɨ wi adyaʼ nô sɨ akos. ⁴(para) Bobo Fɨyini vzɨ̂ a wù ngàŋtɨ chwò ɨ fi nì, iwo i li fvɨ̀ a ma ikèʼ ta yi fvɨ a jem. Ma yeyn ta wù n-baʼtɨ sɨ fu ngèʼ sɨ̂ ghelɨ nɨ̀ ɨ̀vɨsɨ. Ɨvɨs ateyn ɨ bali ɨ nì, jvasɨ ghaʼnɨsɨ yum têyn, nse ɨ zɨ̀tɨ̀ sɨ fɨ. ⁵Ma bè sɨ̂ Bobo Fɨyini vzɨ̂ a wù ngàŋtɨ̂ chwò na, Ka wa n-mòm a Bobo. Iwo yèynì kæ gàyn, woyn Isɨlæ gheyn bû boè bòmta àŋena nɨn læ nô sɨ a ŋaŋ, kelɨ wi adyaʼ nô sɨ akos. ⁶Bobo Fɨyini ɨ fi kfɨnɨ ìkfaʼtɨ̀ i ŋweyn ɨ kæ bè na, Nomɨ ìwo nâ yèynì nɨn bu gâyn wì ⁷(section) Ma fi yeyn Bobo Fɨyini, wu ti baʼsɨ̂ ɨwùyn ndo, ma ghɨ se meyn sɨ bàʼlɨ̀ ɨwuyn ndo nâ vzɨ̂ ɨ̀ fàytɨ fèʼ nɨ̀ ìchɨ zɨ̀ a ghɨ nî ghɨ na tisɨ̂ àbâʼlɨ̀ nɨ̀ ìnyeyni. A ghɨ tì ichɨ ateyni ghɨ a ŋweyn awu. ⁸Wu toŋtɨ mà ɨ bɨf sɨ̂ mà na, Wà n-yeyn ghà a Amos? Ma bè na, Mɨ n-yeyn ìchɨ zɨ̀ a ghɨ n-feʼ ɨfwo ateyn. Wu bè na. À n-ghɨ ìchɨ zɨ̀ a mɨ n-fêʼ ghelɨ ateyn sɨ dyèyn na àŋena nɨn ghɨ ta ɨwuyn ndo ɨlvɨ ta wu tèŋà ɨ̀ nà ghɨ wi àtì ati. Mà kàʼ ma bû fì kfɨ̀nɨ ìkfâʼtɨ̀ ì yemi. Mɨ n-kelɨ kɨ sɨ fu ngeʼ sɨ̂ àŋena. ⁹Mɨ n-bebsɨ̂ ɨ̀lwêʼ vzɨ̀ a woyn ndo nɨ̀ Yishak nɨn koʼsi Fɨyini ateyn. Mɨ n-sâʼtɨ̀ ɨ̀lwêʼ vzɨ̀ a woyn Isɨlæ nɨn koʼsɨ Fɨyini ateyn. Mɨ n-nû ghelɨ fòyn Jelobwàm ɨ̀ mèsì kɨ̀ mesi àŋena. ¹⁰(section) Amazaya vzɨ̀ a wu nà n-ghɨ ngàŋ ndô Fɨyini a Bethel ɨ tum ntum sɨ̂ fòyn Jelobwàn a Isɨlæ ɨ bè na ghɨ ndu bè sɨ̂ ŋweyn na, Amos nɨ̀n kul mɨ̀nàŋ kɨ̀ nô a Isɨlæ, kɨŋ na ghɨ zue và. Wu n-bebsɨ̂ ìlaʼ nɨ̀ àwo kì a kɨ n-fvɨ̂ a ŋweyn ɨchfɨ̀. ¹¹Wù n-bê na, (quote within quote) Fòyn Jelobwàm ɨ nì kfɨ ɨtwaʼ iwòŋ, a ghɨ kumtɨ woyn Isɨlæ ɨ ndù lèm àŋena ilàʼ atum. ¹²Amazyæ̀ ɨ taŋi tì ɨ fi kasi bè sɨ̂ mà na, lù sɨ a afêyn a avɨ̂ŋ kèyn (nfèʼtɨ̀ wèyn). Kasi ndù a Juda ɨ nà fêʼtɨ̀ ntûm nâ sèynsɨ̀ afu, ghɨ lâʼ và. ¹³Ka wa n-fi fèʼtɨ ìwo a Betèl afêyn. Afêyn nɨ̀n ghɨ àlêʼ kì a fòyn nɨ̀n koʼsɨ Fɨ̀yini ateyn. A n-ghɨ alêʼ ki a ndô Fɨyini ìlaʼ afêyn nɨ̀n ghɨ ateyn. ¹⁴Mà Amos ɨ kae bè sɨ̂ Amazaya na, ¹⁵Mɨ n-ghɨ tèyn, yɨ wi ifèl i nfèʼtɨ nâ ghàyn ta wà n-kfâʼtɨ̀. Mɨ n-ghɨ wi nô mɨ wâyn nfèʼtɨ̀. Mà n-læ nà ghɨ nchì mbzɨsɨ fî kinɨ̂ ɨ̀nkâʼ mɨ Sìkamò nɨ̀ mà. Mɨtì Bobo Fɨyini lisì mà sɨ atu ìfèl nɨ̀ mà nâ ghè ɨ tum ma na mà gvi fèʼtɨ̀ ntum ŋweyn sɨ̂ ghelɨ ŋweyn a Isɨlæ. ¹⁶Ma na bê lvɨ̂yn sɨ̂ va a Amazaya na wà faytɨ yvɨtɨ ìwo zɨ̀ a Bobo Fɨ̀yini bè: Wà n-bê kɨ nâ, ka ghɨ fî fèʼtɨ̀ ìwo zɨ̀ Bobo bè, na Isɨlæ ni meyn soè. Wà n-bê na ka ghɨ fî fèʼtɨ̀ na ghelɨ ndo nɨ̀ Yishak ɨ ni meyn soè. ¹⁷Mà Bobo kæ sɨ nà bê sɨ̂ và na, (quote) Wî vâ ɨ nì kasî sɨ a àkfàlà a ntèʼ. Ghɨ nì zuetɨ̂ woyn ghɨ̂lûmnɨ nɨ̀ và nɨ̀ woyn ghɨ̂ki. Ghelɨ nì fêʼ nse zyâ ɨ̀ tèyntɨ ɨ̀ gwòtɨ̀ ɨ̀ lì ndù nɨ̀ và ilaʼ atum, a wà læ̂ jèl kfɨ kɨ̀ afu. Ghɨ læ kumtɨ̂ lû nɨ̀ woyn Isɨlæ̀ sɨ a àŋena ilaʼ ɨ̀ ndù lèm ilàʼ atum.