Amos 8

Amos ɨ yeyn nkwò mɨ̀tam

¹Bobo Fɨyini vzɨ̀ a wù ngàŋtɨ chwò nɨn læ meyn fi nì iwo i fvɨ̀ a ma ikèʼ ta yi fvɨ̀ a jem. Ma yeyn nkwò nɨ̀ ɨntâm ateyn. ²Bobo Fɨyini ɨ toŋtɨ ma ɨ bɨf na, (quote) Amos, Wà n-yeyn ghà? Ma bè na mɨ n-yeyn nkwo mɨ̀tàm. Bobo Fɨyini ɨ bè sɨ̂ mà na, Ngòʼsɨ̂ ghelɨ Isɨlæ baʼsɨ meyn. Mɨ n-kelɨ sɨ fu ngeʼ sɨ̂ àŋena, bû ghɨ wi sɨ kfɨ̀nɨ ikfâʼtɨ̀ ìyemi. ³À læ̀ nà ghɨ achɨ nâ ghè, a njàŋ sîsɨ̀ a ghɨ visi njàŋ sìsɨ̀ a ghɨ n-yem a ndô Fɨyini ɨ̀ kàsi nà dzɨ̀ dzɨ. À læ̀ nà ghɨ mɨ wo, ghɨ mâʼ àkfɨ a wûl, ɨlwêʼ ɨ chi kɨ̀ têyn moŋ.

Ngeʼ zì a yì n-gvî a Isɨlæ

⁴Zɨ̀ ghêyn a yi n-jêylɨ̀ ghelɨ ghɨ boli ilaʼ afêyn fî bebsɨ̂/nûʼ ghelɨ fɨfâ, yì yvɨtɨ. ⁵À n-ghɨ a yi ikfàʼtɨ̀, yi dzɨ̂ kɨ na, Ghɨ ti læ̀ yɨ njoŋ ɨfɨ achi àkà taka ghès beyʼlɨ wît yes a? Na, njoŋ ɨfɨ ti læ̀ gvî chwô nô achɨ àka taka ghès beyʼlɨ asaŋ àkesa a? Achi a bamnɨ-a ti læ̀ gvî chwô nô achi àkà taka ghès kasî zɨ̀tɨ̀ sɨ fèni wît yes a? Achi abamnɨ-a ti læ̀ gvî chwô nô achi àka taka ghès na lî àfo, kɨ læ̂ kɨ tèyn, sfɨ kɨ ɨ̀kwo ɨ dvɨnɨ atû àteyn a? Taka ghès na lɨsɨ̂ ghelɨ, koʼsɨ̂ ɨkwo asaŋ a? ⁶Achi a bamnɨ-a yaŋsɨ̂ gvî (achi a bamnɨ-a læ̀ gvî wì) taka wùl na sam àfo nà wo sɨ làʼ, ghès ɨ yuyn ŋweyn sɨ akos kɨ̀ sɨ a nkfɨ̂ ɨ̀kwo. Achi a bamnɨ nâ kì gvi chwò taka ghɨ na fu mɨ nkàyn gvɨsɨ ɨvɨ̀, sfɨ kɨ wul sɨ akòs. Achi a bamnɨ-a yaŋsɨ̂ gvì, ghès na lɨsɨ̂ ghelɨ, fyes ɨ̀fwo asaŋ a antêynɨ̀ àsaŋ, beyʼlɨ̂ kɨ beyʼlɨ. ⁷Bobo Fɨ̀yini, ma àti Fɨyini fɨ Isɨlæ fɨ kayn meyn iwo yèynì ɨ̀ kfɨ̀yn fɨ̀dyoʼ na, Ma læ̀ lêsɨ̀ wì awo abɨ-a kì a ghelɨ Isɨlae nì nô sakos. ⁸Nse læ neʼà kɨ ìjɨ̀m, nômɨ ndà læ̀ yvɨ mɨ̀lùmchuŋ. Nse ìlaʼ læ̀ neʼà kɨ ìjɨ̀m, nà selâ kɨ tèyn koʼ fvɨ̂ ɨchvɨ̀ ta jvâ Nayl. ⁹Bobo Fɨyini vzɨ̂ a wu ngàŋti chwò bè na, À læ̀ nà ghɨ achi nâ ghè a mà ni, a ɨchvɨ iyvɨ i soe nɨ̀nchuè, a abe fɨm kɨ̀ a ntô chuè. A n-taŋî mà Bobo Fɨyini vzɨ̂ a wù ngàŋtɨ chwò. ¹⁰Mà læ̀ ni à, a yì na baʼtɨ̂ ayɨ, kɨ chwo kasi kɨ sɨ alèʼ ikfɨ. A yì na sesɨ yem njàŋsɨ̀, saŋlɨ̂ sàŋlɨ, idzɨ̂ i ni fvɨ kɨ fvɨ. Yì læ̀ nà lum dùʼ kɨ nɨ̀ fɨ̀ntsɨfɨ a yi ɨwùyn, kom ɨ̀tu ikfɨ kɨ̀ mɨlvɨ ɨ̀njɨ̀m. Achi nâ kì læ̀ gvi à, a idzɨ ì na fvɨ̂ kɨ tèyn ta à kfɨ̀ wâyn wùl, wu kelɨ kɨ ŋweyn. Achi nâ kì læ̀ gvi à ɨ sesɨ chwò ma ngeʼ ikaynɨ gayn meyn. ¹¹Bobo vzɨ̀ a wù ngaŋtɨ̂ chò bè na, “Achi a nɨn gvɨ à taka mà tum jeŋ, a yì ku kɨ mbzɨ ìjɨ̀m. À læ̀ nà ghɨ wi jeŋ àfo ayɨnɨ a. Ɨtoŋ mù læ̀ nà yumî ghelɨ, a ghɨ wi ɨtoŋ mû mɨ̀ jvà. Jèŋ læ̀ nà yaf ghelɨ, ɨtoŋ mu yumî àŋena sɨ yvɨ iwo i Bobo Fɨyini. A n-taŋi mà, Bobo Fɨyini. ¹²Ghelɨ læ̀ nà lû a Jvâ Ìkfɨ, ghɨ jèlɨ kɨ têyn, ghɨ ndu chem a Jvâ Meditàlaniyà, bɨm jelɨ̀ kɨ jel. Ghelɨ læ̀ nà lû abàs ikuè ghɨ jelɨ kɨ têyn, ghɨ ndu chem abàs ichɨyn, bɨm zɨnɨ̂ jelɨ̀ kɨ jelɨ, kɨŋ alêʼ sɨ yvɨ ìwo i Fɨyini mɨtì ghɨ wi sɨ yeyn. ¹³À læ̀ nà ghɨ achi nâ ghè, a ɨtoŋ mu yumi woynda ngòynsɨ̀ ŋeyn tɨ̀kuŋtɨ ɨ̀ ndù chèm aleŋ ali a, a à na sɨ lî kɨ ikfɨ lì àŋena. ¹⁴À læ̀ nà ghɨ achi nà ghè, a ghelɨ ghì a ghɨ n-chfɨ̂nì mɨ ghà sɨ nì, kâyn mɨ̂yìnî mɨ̀ Samaliyà ɨ̂nwùminɨ̂ mzɨ̀, a àŋena kasî wûmi kɨ sɨ a àŋena ngeŋsɨ. Ghelɨ nâ ghì a n-baʼtɨ iwo sɨ nì, faŋ wi tɨ̀ kayn Fɨyini fɨ Dan sɨ bè na, Sɨ chem ta Fɨyini fɨ Dan fɨ bu chi, mɨ n-nì ìwo nâ yeynì a mà bè, ghɨ wi sɨ faŋ na felɨ à. Ghelɨ nâ ghèyn a ghɨ n-faŋ wi tɨ̀ nà bê na, Sɨ chem ta Fɨyini fɨ Beshiba fɨ̀ bu chi, mɨ n-nî iwo zɨ̀ a ma bè læ felɨ-à ɨ̀ læ̀ faŋ tɨ̀ fì tɨ̀ làli.