Daniel 10

Jèm ɨ chɨ Danìyèl kûm wul

¹À nà n-ghɨ ta fòyn Saylùs nɨ̀n saʼ Besìyà na à na sɨ ghɨ bèŋsɨ̀ tal, Fɨyini fɨ ɨ dyeyn baynsɨ ìwo sɨ̂ Danìyèl. (Ghɨ nà n-toŋtɨ̂ kɨmɨ Danìyèl na Bèlteshazà.) Iwo ateyn i nà n-ghɨ kɨ samoʼ kûm ìwoŋ i bemnɨ-i, Fɨyini fɨ ɨ dyeyn baynsɨ ìwo ateyn sɨ̂ ŋweyn a jem.

²À nà n-ghɨ ɨtuʼ nâ ghè ma ma dzɨ meyn sɨ a tɨ̂we tɨ̀ tal. ³Mɨ n-bu læ nà fî yɨ ɨ̀fwo ɨ yɨnɨ ɨ jûŋ, kfɨlɨ wi njwò, nyvɨ wi mɨlûʼ, yisî wì nô mɨ ɨ̀wuyn nô ta ka tɨwe nâ tìtɨ̀ tɨ̀ tal mæ.

⁴A nà ghɨ a mɨchi mɨ̀vɨm ɨ̀m bò njvàsɨ̀ kæ̀ a njoŋ ɨyî àsɨ a bêŋ, ma ti a mbæ̀ jvà Tayglìs ɨ jva ighaʼnɨ, ⁵ɨ se sɨ ki sɨ koʼsɨ ɨ yeyn wul ma wù maʼ meyn ndzɨsɨ fɨfâsɨ̀ ɨ̀ kul akue ma ghɨ faytɨ nɨ̀ àso ɨkwo a baŋnɨ-a kɨ kelɨ wi ilɨŋ. ⁶Ɨwuyn ŋweyn nà n-jêyntɨ̀ kɨ ta mɨ̀ngòʼtɨ̀ ɨ̀n jùŋ, ikêʼ i ŋweyni ɨ myâyn ta ivɨ, asɨ a ŋweyna ɨ bayn ta ilemi ɨvɨ̀s, akœ a ŋweyn a nɨ̀ àfyeyn a ɨ ghɨ ta idyayn ɨlvɨ ta ghɨ fàytɨ yìsi, wù se sɨ taŋi a nà ku ta à n-taŋî ìnôyn i ghêl.

⁷À n-læ yeyn kɨ ma ɨ yeyn iwo nâ yèynì têyn ta mà yèyn a jem, ghelɨ ghì a ghesɨ̀ àŋena nà n-ghɨ amoʼ ɨ faŋ tɨ̀ yèyn mɨtì ifâyn i bemnɨ-i ɨ ku àŋena, àŋena ɨ leʼ ɨ ndu lèytɨ̀. ⁸Àŋena nɨ̂n lèytɨ tî, a faŋ kɨ ma afu ɨ nà yeyn àwo a kaynɨ-a kì a kɨ n-gâyn a jem nâ ghè, ɨ boli ikêʼ ì yemi ɨ kfɨnɨ ɨ nà fɨfɨ kɨ tèyn, iwo i ɨ bu ghɨ wi a ma ɨchfɨ̀, ⁹ma kæ yvɨ ta wùl nâ vzɨ̀ nɨn taŋi ɨ se sɨ yvɨtɨ, mbunisɨ ku ma, ma fe nɨ̀ ìkeʼì.

¹⁰Mɨ n-fe tî, awu a wul à ɨ ghal ɨ làysɨ̀ mà, ma nguʼ alvɨ ɨ tomtɨ ɨ̀wu wom a nse ɨ nà chɨŋtɨ̂ faynà. ¹¹Wùl àteyn ɨ bè sɨ̂ mà na, “Danìyèl Fɨyini fɨ nɨn kôŋ và nô sɨ a ŋaŋ. Làli iyvɨ ɨ faytɨ yvɨtɨ ìwo zɨ̀ a Fɨyini fɨ bè na mà be sɨ̂ và. Fɨyini fɨ tum meyn mà sɨ̂ và.” Wu n-bè tî ma saʼ làlì ɨ nà bu chɨŋ kɨ chɨŋ.

¹²Wùl ɨ̀ nâ vzɨ̀ ɨ kæ be sɨ̂ mà na, “Danìyèl ka wa n-fì fàyn. Fɨyini fɨ yvɨ meyn ìjèm ì zæ kɨ̀ sɨ zɨ̀tɨ̀ achi ghè a wà n-læ choʼnɨ sɨ ngvɨmlɨ ngêŋ zyâ asɨ nɨ̀ Fɨyini fyafɨ, ɨ nà kɨŋ sɨ keli na jèm zɨ̂ a yì chɨ̀ vâ nɨ̀n bê na gha a. Fɨyini fɨ tum meyn mà na mà gvi nɨ̀ ìbêynsɨ̀ ateyn i. ¹³Ayvɨs kì a kɨ nà n-saʼ Besìyà nɨ̀n feyn meyn mà sɨ a mɨchi mɨ̀vɨm ɨ̀m bò njvà ì mòʼ, Maykèl, atu a nchìsɨ Fɨyini a li-a ɨ gvì ɨ gàmtɨ̀ mà, bòm ta ayvɨs a bɨ-a nâ kì nà n-ghɨ ma kɨ feyn meyn mà, ma faŋ kɨ̀ afu. ¹⁴Mà gvì lvɨ̂yn sɨ nì na wà keli iwo zɨ̀ a ka yi gayn sɨ̂ ghelɨ̀ ghya a mɨchi ghè a mɨ̀ n-koʼ gvì asɨ. Jèm nâ yèyn nɨn dyêyn ɨ̀lvɨ wu bu ghɨ sɨ jæ gvì.”

¹⁵À nà n-ghɨ ta wù n-bê iwo nâ yèynì sɨ̂ mà, ma chfɨŋsɨ àtu a nse, iwo i ɨ ghɨ wi a ma ɨchfɨ̀. ¹⁶Nchì Fɨyini zɨ̀ a yi nà n-kêʼ ta wul tì ɨ kum ɨ̀chfɨ̂ wom ma zɨ̀tɨ̀ sɨ taŋi, ɨ bè sɨ̂ wùl nâ vzɨ̀ a wù n-ti a ma asɨ tì na, “Bô, iwo yèynì a mà yèyn a jem nî meyn ma boli nà faynà, adyaʼa bu ghɨ wi a ma ɨwùyn. ¹⁷Wùl ɨ̀ felɨnɨ nɨ̀ và ti kàʼ wu taŋi ti sɨ̂ và a bôbo? Adyaʼ à kema mæ meyn ma na wo sɨ zuèsɨ̀?”

¹⁸Nchì Fɨyini zɨ̀ a yì n-kêʼ ta wul tì ɨ fi kùm mà, adyaʼa ɨ kasi gvì a ma ɨwùyn. ¹⁹Wù n-be meyn sɨ̂ mà na, “Ka wa n-fàyn bòm ta Fɨyini fɨ nɨn kôŋ và nô sɨ a ŋaŋ. Wa kelɨ mbôynɨ̀, wa to a.

Wu n-taŋi tî adyaʼ a ɨ gvì a ma ɨwùyn ma bè sɨ̂ ŋweyn na, “Taŋi sɨ̂ mà a bô, wà fu meyn àdyaʼ sɨ̂ mà.”

²⁰Nchì Fɨyini nâ zɨ̀ ɨ kæ bɨf sɨ̂ mà na, “Wà n-kya ìwo zɨ̀ a mà gvì sɨ yeyn vâ sɨ ateyn a? Mɨ n-kasi lû kɨ lvɨ̂yn ɨ̀ ndù tɨm yɨ ayvɨs a bɨ-a kì a kɨ n-saʼ Besìyà ɨ̀ lù a ayvɨs a bɨ-a kì a kɨ n-saʼ Gɨ̀lîs gvi nù mà. ²¹Mɨtì mɨ n-fèʼtɨ̀ ìwo zɨ̀ sɨ̂ và lvɨ̂yn a ghɨ nyàʼ a ŋwàʼlɨ̀ ghè a ghɨ n-nyàʼ awo ateyn kɨ ghɨ samoʼ. Nô wùl nɨ̀n ghɨ wi sɨ gàmtɨ ma a bu kɨ Maykèl ɨ nchì Fɨyini zɨ̀ a yì n-chi ghelɨ Isìlæ̀.