Deuteronomy 12

Alêʼ kì a ghɨ n-kelɨ sɨ nà kòʼsɨ Bôbo Fɨyini ateyn

¹Mosìs nɨn læ meyn fi bè sɨ̂ ghelɨ Isìlæ̀ na, Ɨtêyntɨ̀ nɨn ghɨ tɨ̀saʼ tìtɨ̀ a yi n-kelɨ sɨ nà yvɨnɨ-à ilaʼ ghè a Bôbo Fɨyini ɨ Fɨyini fɨ ghɨ̀bo ghifɨ fù sɨ̂ zɨ̀, nô ta ka ghɨ̀ læ̂ ghɨ̀. ²Yi zɨ ɨ̀ sàŋ fvɨ̀sɨ̀ ghelɨ ghì a ghɨ n-chi a tɨlaʼ nâ ghè, yi bebsɨ ɨlwêʼ vzɨ̀ a àŋena nɨn koʼsɨ mɨyini mɨ̀ àŋena ateyn nô ɨ̀ jɨ̀m. Ɨlwêʼ ateyn nɨn ghɨ atû kfɨ̀yn sɨ ghaʼlɨnɨsɨ nɨ̀ sɨtelâsɨ̀, ghɨ kɨmɨ asas ɨnkàʼ a belɨnɨ-a. ³Yi n-bɨ̀ytɨ̀ ɨ̀bwaŋ ifu nɨ̀ àŋena, ɨ̀ leŋ zuelɨ ngòʼ sìsɨ̀ a àŋena nɨn koʼsɨ, ɨ̀ nyoʼ ɨtôʼ vzɨ̀ a Ashelà, ɨ fɨyini fɨ kifɨ nɨ̀ àŋena fɨ nɨn ti atu àteyn, ɨ̀ kòytɨ̀ ɨ̀nfyèʼsɨ àŋena. Yi n-chyeʼsɨ̂ àzɨyn a mɨyini nâ kì-à sɨ ɨlwèʼ nâ ghè nô ɨ̀ jɨ̀m (Ta ka nô wùl ɨ̀ læ̂ faŋ tɨ̀ fì tɨ̀ kòʼsɨ mɨyini mɨ̀ ateyn).

⁴Ka yî n-læ̀ kòʼsɨ Bôbo Fɨyini ɨ Fɨyini fifɨ a dzɨ ghè a àŋena nɨn koʼsɨ mɨyini mɨ̀ àŋena ateyn. ⁵Mɨtì yi n-kelɨ sɨ ndù sɨ nà koʼsɨ Bôbo Fɨyini ɨ Fɨyini fifɨ kɨ̀ alèʼ ghè a wu nì choʼ ilaʼ nâ ghè na yì na koʼsɨ̂ ŋweyn ateyn. ⁶Yi n-kelɨ sɨ nà fu tɨfu tɨ nyoʼnɨtɨ nɨ̀ zɨ̀ nɨ̀ tɨ̀fu tɨ isaʼtɨ, baʼsɨ̂ nɨ̀ ìfu i afo àmòʼ antêynɨ̀ ɨ̀fwo ìvɨm, kɨ̀mɨ nɨ̀ ìfu zɨ̀ a yì chòʼnɨ sɨ fu sɨ a yi a ngeŋ, nɨ̀ ìfu zɨ̀ a yì chfɨ̀nɨ̀ chfɨnɨ sɨ fu, baʼsɨ̂ nɨ̀ ìfu i mɨtam mɨ̀ àsɨ kɨ̀ alèʼ nâ ghè a Bôbo dyèyn. Yi n-kelɨ sɨ nà fu kɨmɨ woyn nyâm sɨ lûmnɨ̀ ɨ sɨ asɨsɨ nɨ̀ zɨ̀ kɨ̀ alèʼ nâ ghàyn. ⁷Zɨ̂ ghelɨ ndo nɨ̀ zɨ̀ na ndù alèʼ nâ ghàyn asɨ nɨ̀ Bôbo Fɨyini ɨ Fɨyini fifɨ, yi nà yɨ-a saŋlɨ-à kûm àwo kì a yì nî bòm ta Bôbo Fɨyini ɨ Fɨyini fifɨ boysɨ meyn zɨ̀.

⁸Yi n-ndû ka yì na nì àwo kì a ghesɨ̀nà nɨn nî afêyn layn, nô mɨ ndà ɨ koʼsɨ̂ kɨ Fɨyini a dzɨ ghê a wù n-kôŋ ateyn. ⁹Yi n-nî tì bòm ta yì bu duʼ tɨ̀ zɨ a ilaʼ nâ ghè a Bôbo Fɨyini ɨ Fɨyini fifɨ nɨn fu sɨ̂ zɨ̀ ta ka yì na chî ateyn nɨ̀ mbôynɨ̀. ¹⁰Yi n-dyàŋ jvâ Jodàn ɨ̀ se sɨ chi ilaʼ ghè a Bôbo Fɨyini ɨ Fɨyini fifɨ fu na à na kelɨ kɨ nô zɨ̀ a wù na kɨ̂ŋtɨ̀ zɨ̀ sɨ̂ mbàynɨ̀ sisɨ yi chî nɨ̀ mbôynɨ̀. ¹¹Yi n-zɨ̂ ilaʼ nâ ghè, a Bôbo Fɨyini dyeyn alêʼ kì a yi n-kelɨ sɨ nà koʼsɨ ŋweyn ateyn, nɨ̀ ɨ̀fwo vzɨ̀ a mà fèʼtɨ̀ sɨ̂ zɨ̀ ma à ti ifu i nyoʼnɨ-i kɨ̀mɨ nɨ̀ ìfu afo àmòʼ antêynɨ̀ ɨ̀fwo ìvɨm nɨ̀ ìfu zɨ̀ a yì chòʼnɨ sɨ fu sɨ a yi a ngeŋ, nɨ̀ ìfu zɨ̀ a yì chfɨ̀nɨ̀ chfɨnɨ sɨ fu, baʼsɨ̂ nɨ̀ ìfu i mɨtam mɨ̀ àsɨ. ¹²Zɨ̂ woyn ghi ghɨki nɨ ghɨlûmnɨ̀ nɨ̀ ghelɨ ghɨ felɨnɨ nɨ̀ zɨ̀ ghɨki, nɨ ghɨlûmnɨ̀, baʼsɨ̂ nɨ̀ ghelɨ ndo nɨ̀ Levì ghì a ghɨ n-chi zɨ̂ àŋena læ̀ nà saŋlɨ-à ɨlvɨ ta yì ndù sɨ koʼsɨ Bôbo Fɨyini alèʼ nâ ghè. Yì na kya na ghelɨ ndo nɨ̀ Levì nɨn kelɨ wi alêʼ ta zɨ sɨ nà chi ateyn. ¹³Yì na tòʼnɨ̀-à ka yî n-læ̀ nà kolî nô mɨ wo, fu ifu i nyoʼnɨ-i nɨ̀ zɨ̀ afu. ¹⁴Yì na fu tɨ̀fu titɨ, nî àwo kì a mà bè nô à jɨ̀m kɨ̀ alèʼ ghè a Bôbo Fɨyini choʼ na yì na koʼsɨ̂ ŋweyn ateyn (antêynɨ̀ ɨ̀lwèʼ nɨ̀ zɨ̀).

¹⁵Mɨtì ma wùl ɨ̀ kàʼ a wù sɨ nyam nô mɨ wo ɨ̀ kfɨl kɨ̀ ta wù n-kôŋ kɨ̀ ighel ta wù n-nî wu kfɨl nyam ɨ̀twaʼ tèyn ta fɨchue nɨ̀ ngwo, nô mɨ ndà ɨ sɨ kɨ ta Bôbo Fɨyini boysɨ ŋweyn. Wùl ɨ̀ kæ nà layna ta isaʼ i nɨn dyêyn kèsa wù n-layn wi, wù kàʼ a wù boŋ kfɨl. ¹⁶Wùl ɨ̀ sɨ nyam ta ɨzɨ nâ zɨ̀, wu sfɨ̀s ɨ màʼì mɨ̀luŋ mɨ̀ àteyn, ka wu n-kfɨl. ¹⁷Ka wùl sɨ̂ zɨ̀ nɨn læ̀ lì àfo ma ghɨ fu meyn sɨ̂ Bôbo Fɨyini, ɨ̀ kfa sɨ yɨ a ŋweyn a ntèʼ, kèsa à n-ghɨ ìfu afo àmòʼ antêynɨ̀ ɨ̀fwo ìvɨm ma à n-ghɨ ìfu i mɨtam mɨ̀ àsɨ-a, kèsa à n-ghɨ ìfu ma wù chfɨ̀nɨ̀ chfɨnɨ sɨ fu sɨ̂ Bôbo a, ma ifu ta wù chòʼnɨ sɨ fu kɨ sɨ a ŋweyn a ngeŋ a. ¹⁸Yi n-kelɨ sɨ nà yɨ ɨfwo nâ wèyn zɨ̂ woyn ghi, nɨ̀ ghelɨ ghɨ felɨnɨ nɨ̀ zɨ̀, baʼsɨ̂ nɨ̀ ghelɨ isas i ndo nɨ̀ Levì ghì a ghɨ n-chi zɨ̂ àŋena, kɨ̀ alèʼ ghè a Bôbo Fɨyini, ɨ Fɨyini fifɨ, choʼ na yì na koʼsɨ̂ ŋweyn ateyn. Yi n-kelɨ sɨ nà ni awo nâ kèyna nô à jɨ̀m kɨ nɨ̀ ìsaŋlɨ i asɨ nɨ̀ Bôbo Fɨyini. ¹⁹Ka yi n-læ̀ lèsɨ̀ sɨ nà toʼnɨ nɨ̀ ghelɨ ndo nɨ̀ Levì ghì a ghɨ n-chi zɨ̂ àŋena.

²⁰Bôbo Fɨyini ɨ Fɨyini fifɨ læ̂ kfèynsɨ ilaʼ ì zɨ-i ta wu n-chfɨ̀nɨ, sem na kfɨ zɨ̀ sɨ kfɨlɨ njwò nô mɨ ɨlvɨ gha, yi kfɨl kfeyn kɨ ta yi n-kôŋ. ²¹Alêʼ kì a Bôbo Fɨyini lèm na ghɨ na koʼsɨ ŋweyn ateyn kæ sɨ nà baʼsɨ̂ wì sɨ̂ wùl, wu sɨ nyam antêynɨ̀ nyàmsɨ̀ ghê a Bôbo Fɨyini bòysɨ ŋweyn nɨ̀ ɨ̀nseynsɨ a ŋweyn a ntèʼ, ɨ kfè, ɨ kfɨl kɨ̀ ta mà bè sɨ̂ zɨ̀. ²²Yì na sɨ nyam àteyn, yi kfɨl kɨ a dzɨ ghè a yi n-sɨ fɨchue nɨ̀ ngwo, yi kfɨl ateyn, ma nô mɨ ndà kaʼ a wù kfɨl, kèsa wù layn ta isaʼ i nɨn dyêyn, ma wù n-layn wi-a. ²³Mɨtì ka wùl nɨ̂n læ̀ kfɨl mɨluŋ mɨ̀ àteyn bòm ta nyàm nɨ̀n chi kɨ bòm mɨ̀luŋ. Yi n-kelɨ wi sɨ kfɨl nyam sɨ baʼsɨ nɨ̀ mɨ̀luŋ mɨ̀ àteyn. ²⁴Ka wùl sɨ̂ zɨ̀ nɨn læ̀ kfɨ̀l mɨluŋ mɨ̀ nyàm. Yì na sɨ nyam sɨ kfɨl, yi sfɨ̀s ɨ màʼì mɨ̀luŋ mɨ̀ àteyn. ²⁵Yì kæ nà lêm isaʼ nâ yèynì, nî àwo kì a Bôbo Fɨyini bè na kɨ n-ghɨ àtì-ati, a awo a na jèlɨ̀ kɨ a jûŋ sɨ̂ zɨ̀ nɨ̀ woyn ghi.

²⁶Mɨtì yì na ndù nɨ̀ tɨ̀fu tɨ laynɨtɨ nɨ̀ zɨ̀, nɨ̀ ɨtîtɨ̀ a yì chfɨ̀nɨ̀ sɨ a yi a ngeŋsɨ sɨ fu sɨ̂ Bôbo Fɨyini alèʼ ghè a Bôbo Fɨyini nɨn choʼ na yì na koʼsɨ̂ ŋweyn ateyn. ²⁷Yì na ndù nɨ̀ njwò ìfu i nyoʼnɨ-i nɨ̀ zɨ̀ baʼsɨ̂ nɨ̀ mɨ̀luŋ mɨ̀ àteyn atû àbaŋ ifu nɨ̀ Bôbo Fɨyini ɨ Fɨyini fifɨ. Yi sɨ nyam ìfu zɨ̀ a yì kàʼ a yì kfɨl njwò àteyn, yi sfɨ̀s mɨ̀luŋ mɨ̀ àteyn a ngùŋ àbaŋ ifu nɨ̀ Bôbo Fɨyini ɨ Fɨyini fifɨ. ²⁸Yì na faytɨ̂ lêm tɨ̀saʼ nâ tèyntɨ̀ nô tɨ̀ jɨ̀m a mà fù sɨ̂ zɨ̀ têyn, ta ka awo na jelɨ̀ kɨ a jûŋ sɨ̂ zɨ̂ woyn ghi, bòm ta yi n-nî awo kì a kɨ n-jôf, ghɨ àtì-ati asɨ nɨ̀ Bôbo Fɨyini, ɨ Fɨyini fifɨ.

²⁹Bôbo Fɨyini ɨ Fɨyini fifɨ nî gàmtɨ̀ zɨ̀, yi tɨm yɨ ghelɨ tɨlaʼ ghì a yi n-zɨ ndû ateyn tèyn, ɨ̀ sàŋ fvɨ̀sɨ̀ àŋena nà chî a àŋena ilaʼ, ³⁰ka yi n-fe atam sɨ nà koʼsɨ mɨyini mɨ̀ àŋena. Ka yî n-mòm sɨ nà kya iwo kûm mɨyini mɨ̀ àŋena bɨfɨ nâ, “Àŋena nɨn koʼsɨ̂ ti mɨyini mɨ̀ àŋena? Ghès nɨn kɨŋ sɨ nà koʼsɨ kɨmɨ tì.” ³¹Ka yi n-læ̀ nà koʼsɨ Bôbo Fɨyini ɨ Fɨyini fifɨ a dzɨ ghè a àŋena nɨn koʼsɨ mɨyini mɨ̀ àŋena ateyn, bòm ta àŋena nɨn nî àwo a chaʼnɨnɨ-a sɨ nɨ̀ Bôbo Fɨyini, wu kôŋ wì. Àŋena nɨn nyôʼ woyn àŋena ghɨki nɨ ghɨ lûmnɨ̀ sɨ ifu sɨ̂ mɨyini mɨ̀ àŋena.

³²“Yì na yvɨnɨ̂ tɨ̀saʼ nâ tèyntɨ̀ a mɨ n-fu sɨ̂ zɨ̀ têyn. Ka yi n-fàbtɨ̀ kèsa kfèynsɨ ìwo ateyn nô ìmòʼ.”