Deuteronomy 13

Isaʼ kûm Mɨ̀yìnì ɨ̂n lì

¹Mosìs nɨn læ meyn bè sɨ̂ ghelɨ Isìlæ̀ na, “Wùl ɨ̀ kæ læ̀ fvɨ̀ a yi antêynɨ̀ ɨ̀ bè na yi n-ghɨ nfèʼtɨ̀ ighaʼnɨ, kèsa wul fêʼtɨ̀ ìwo zɨ̀ a jemsɨ nɨn bê, ɨ̀ bè na iwo i kaynɨ-i nɨn gàynà, ²Wù kæ bè, yi gâyn, wù bê na yì gvi zɨ̂ àŋena na koʼsɨ̂ mɨyini ɨ̂n lì bula yi timi nà koʼsɨ-à, ³ka yi n-yvɨ̀tɨ ìwo zɨ̀ a wùl àteyn nɨn bê.” Yi yeyn ìnkì iwo nâ zɨ̀, yi nà kya na à n-môm Bôbo Fɨyini ɨ Fɨyini fifɨ môm zɨ̀, sɨ yeyn na yi n-kôŋ ŋweyn nɨ̀ àtem (mɨtem ɨ̀mzɨ̂ ɨ̀n jɨ̀m) à ki-a à jɨ̀mà, nɨ̀ ìkfâʼtɨ̀ ì zɨ-i ì jɨ̀mì a. ⁴Yi n-kelɨ sɨ nà jelɨ̀ kɨ ta Bôbo Fɨyini ɨ Fɨyini fifɨ nɨn kɨŋ, fâyn kɨ ŋweyn. Yì na lêm tɨ̀saʼ tɨ ŋweyn, yvɨnɨ̂ ŋweyn, felɨ̀ kɨ sɨ̂ ŋweyn, yeʼtɨ̂ kɨ ɨ̀wùyn nɨ̀ ŋweyn. ⁵Ìnkì i nfèʼtɨ̀ nâ zɨ̀, kèsa wul ɨ vzɨ̀ a wù n-fêʼtɨ̀ iwo zɨ̀ a jemsɨ nɨn bê kæ fvɨ̀ a yi antêynɨ̀, yi ghal ɨ zue kɨ zue bòm ta wù n-yeʼî zɨ̀ na yì na to nɨ̀ àtu a sɨ̂ Bôbo Fɨyini, ɨ Fɨyini fifɨ fì a fɨ n-læ fvɨ̀sɨ zɨ sɨ a ndo àkòs a Ijìb. Yi n-jôf na yì na yeyn ìnkì i wûl nâ zɨ̀ a yi antêynɨ̀, yi zue kɨ zue bòm ta wù n-kɨŋ kɨ na yì na to nɨ̀ àtu a sɨ̂ Bôbo Fɨyini ɨ Fɨyini fifɨ.

⁶Wâynà wùl, kèsa wayn, kèsa wi, kèsa suyn mɨ̀kàyn nɨ̀ ŋweyn kæ gvì nà nyaʼtɨ̂ bê sɨ̂ ŋweyn na, “Gvi ghesɨ̀và na koʼsɨ̂ mɨyini ɨ̂n lì,” a ghɨ mɨyini bula zɨ̂ ghɨ̀bo ghi timi nà kya, ⁷a ghɨ mɨyini mɨ̀ ghèl, ghɨ chî baʼsɨ̂ sɨ̂ zɨ̀, kèsa ghɨ n-chî a ndyèyn, ⁸ka wu n-nì ìwo zɨ̀ a wù bè kèsa yvɨ̀tɨ mɨ yvɨtɨ sɨ̂ wùl àteyn. Yi yeyn ìnkì i wûl nâ zɨ̀, ka yî n-kòynsɨ ìsuyn sɨ̂ ŋweyn, ka yi n-lèytɨ̀ ìwo zɨ̀ a wù n-bê. ⁹Yi n-kelɨ sɨ zue kɨ zue ìnkì i wûl nâ yèynì. Wùl ɨ̀ vzɨ̀ a wù nì nà lɨsɨ ŋweyn na wù na koʼsɨ̂ mɨyini ɨ̂n lì na kelɨ sɨ tɨm ngòʼ ɨyî àsɨ a ŋweyn ɨwùyn jæ na ghelɨ ghɨ li tɨmlɨ. ¹⁰Yì tɨmlɨ zuè ŋweyn nɨ̀ ngòʼsɨ̀, bòm ta wù n-kɨŋ sɨ jɨ̀ŋsɨ zɨ, na ka yì na koʼsɨ̂ Bôbo Fɨyini ɨ Fɨyini fifɨ fì a fɨ n-læ fvɨ̀sɨ zɨ sɨ a ndo àkòs a Ijìb. ¹¹Yì kæ zue ŋweyn, a ghelɨ Isìlæ̀ nô ghɨ̀ jɨ̀m yvɨ, a ifayn ì ku àŋena, a wùl sɨ ateyn læ̂ faŋ tɨ̀ fì tɨ̀ mòm inki iwo nâ zɨ̀.

¹²Yì kæ yvɨ ghɨ bê nô mɨ a ntèʼ ì kà ìlaʼ ghè a Bôbo Fɨyini ɨ Fɨyini fifɨ nɨn fu sɨ̂ zɨ̀ na yì na chî ateyn, ¹³na ghelɨ ghɨ bɨ ghɨ li lali meyn nà jɨ̂ŋsɨ̀ ghelɨ a ntèʼ na ghɨ na koʼsɨ̂ mɨyini ɨ̂n lì bula yi timi nà koʼsɨ-à, ¹⁴yi faytɨ ɨ ki iwo ateyn. Yi kæ nà ghɨ samoʼ ma ghelɨ mom meyn ìnkì iwo nâ yèynì a yi antêynɨ̀, ¹⁵yi zuetɨ ghelɨ a ntèʼ nâ ghè nô ghɨ̀ jɨ̀m, baʼsɨ kɨ nɨ̀ nyamsɨ àŋena sɨ. ¹⁶Yi zuetɨ yi yvɨ̀ŋtɨ̀ ɨ̀fwo àŋena afàf, ɨ nyòʼ nô ɨ̀ jɨ̀m baʼsɨ kɨ nɨ̀ ntèʼ àteyn sɨ ifu i nyoʼnɨ-i sɨ̂ Bôbo Fɨyini ɨ Fɨyini fifɨ. Yi nyôʼ ntèʼ àteyn, ka yi n-læ̀ fì bàʼlɨ̀. ¹⁷Yi se sɨ nyòʼ ɨfwo nâ vzɨ̀, ka wùl nɨ̂n lì àfo ateyn. Yi kæ ni têyn, a Bôbo Fɨyini faŋ tɨ̀ fì tɨ̀ nyòʼsɨ̀ ɨtoŋ, ɨ̀ kèli ìkoynsɨ isuyn, ɨ̀ dyèyn àtem a juŋà sɨ̂ zɨ̀, ɨ̀ nì a yì fî bzɨ ɨ̀ dvɨ̀ ndù kɨ̀ ta wu n-læ chfɨ̀nɨ sɨ̂ ghɨ̀bo ghi. ¹⁸Bôbo Fɨyini ɨ Fɨyini fifɨ nɨn læ̀ nî àwo nâ kèynà sɨ̂ zɨ̀, ɨlvɨ ta yi n-yvɨnɨ ŋweyn, nî àwo kì a wù bè, fî lêm tɨ̀saʼ tɨ ŋweyn tìtɨ̀ a mà fù sɨ̂ zɨ̀ layn kɨ tɨ̀ jɨ̀m.