Deuteronomy 2

Ghelɨ Isìlæ̀ ɨ jɨ̀ŋ a nse iyum

¹Ghesɨ̀nà nɨ̂n læ faŋ a Kadèsh tì ɨ læ lù sɨ afu ɨ kasi nà ndû nɨ̀ ìbam i dzɨ a nse iyum a dzɨ ta yì n-ndû a Jvâ ì Baŋnɨ kɨ̀ ta Bôbo Fɨyini nɨ̀n læ bè. Ghesɨ̀nà nɨn læ meyn jèl sɨ a ndyèyn, jɨ̂ŋ kalɨ kɨ ìlaʼ i kfɨynsɨ zɨ̀ a Seyì.

²Bôbo Fɨyini ɨ kæ bè sɨ̂ mà na, ³“Yi zɨnɨ meyn chwòsɨ̀, jɨ̂ŋ kal kɨ ìlaʼ i kfɨynsɨ yèynì nô sɨ a ndyèyn. Yì kasi nà koʼ dzɨ abàs ikuè. ⁴Bè sɨ̂ ghelɨ na, ‘Yì sɨ ghɨ sɨ toynɨ ilaʼ nɨ̀ woyn Esò ma à ti woynà ghi ghì a ghɨ n-chi a Seyì. Yi n-se sɨ chwò a àŋena na fàyn zɨ̀ mɨtì yì toʼnɨ. ⁵Ka yi n-sèʼ ìnû sɨ̂ àŋena bòm ta mɨ n-fu wi nô àlêʼ ilaʼ nɨ̀ àŋena sɨ̂ zɨ̀, nô mɨ fɨ̀lêʼnɨ̀ sɨ tom avɨ ateyn. Ma fu meyn ìlaʼ i kfɨynsɨ i Seyì nâ zɨ̀-ì sɨ̂ woyn Esò na àŋena na kelɨ-a. ⁶Yi se sɨ chwò ɨ̀ yeyn afo sɨ yɨ, kèsa sɨ nyvɨ, yi yuyn yuyn.’”

⁷Bôbo Fɨyini ɨ Fɨyini fifɨ boysɨ meyn zɨ̀ kɨ̀ dzɨ sɨ̀ jɨ̀m. Wù toʼnɨ meyn nɨ̀ zɨ̀ kɨ̀ sɨ ɨtuʼ ta yì zɨ̀tɨ̀ sɨ jèl a nse iyum afêyn. Bôbo Fɨyini ɨ Fɨyini fifɨ toʼnɨ meyn nɨ̀ zɨ̀ sɨ a bèŋsɨ̀ mɨ̀vɨm ɨ̀n kæ̀. Yi bû tìmi wo afo.

⁸Wù n-læ bè tî ghesɨ̀na ɨ toynɨ chwò ilaʼ nɨ̀ woynà ghesɨ̀nà ma à ti woyn Esò ghì a ghɨ nà n-chi a Seyì. Ghesɨ̀nà nɨn jelɨ meyn gvì ɨ visi dzɨ zɨ̀ a yì lù a ntèʼ Elàt nɨ̀ ntèʼ Ezon Gebà, chwò ibal i Alabà ɨ ndù dzɨ a dzɨ ghè a yì n-chwô a nse iyum a Mowàb

⁹Bôbo Fɨyini ɨ kæ be sɨ̂ mà na, “Ka yi n-sèʼlɨ̀ ghelɨ Mowàb. Ka yi n-sèʼ ìnû sɨ̂ àŋena bòm ta mɨ n-fu wi nô fɨ̀lêʼnɨ̀ ilaʼ nɨ̀ àŋena sɨ̂ zɨ̀. Ma fu meyn Âl sɨ̂ woyn Lôt na àŋena na kelɨ-a.”

¹⁰Bôbo Fɨyini nɨn læ se sɨ fu ilaʼ nâ yèynì sɨ̂ ghelɨ Mowàb ma à n-læ nà chî ghelɨ Emì ateyn, a ghɨ ghelɨ dvɨ-à fî dyêblɨ̀ kɨ tèyn, kelɨ àdyaʼ kɨ̀ ta woyn Anàk. ¹¹Ghɨ nà n-lî àŋena na à n-ghɨ ghelɨ Lefèm kɨ̀mɨ ta ghɨ nà n-li woyn Anàk, mɨtì ghelɨ Mowàb ɨ toŋtɨ̂ kɨ àŋena na ghelɨ Emì. ¹²Ghelɨ Hôl nɨn læ nà chî a Seyì mɨtì woyn Esò ɨ læ gvi sàŋ ɨ fvɨ̀sɨ̀ àŋena. Àŋena nɨn sàŋ tî, ɨ bebsɨ ìlaʼ i Hôl nâ zɨ̀ ɨ nà sɨ chî ateyn kɨ̀ ighel ta ghelɨ Isìlæ̀ nɨn læ saŋ fvɨ̀sɨ ghelɨ Kenàn ɨ lì ìlaʼ zɨ̀ a Bôbo Fɨyini nɨ̀n læ fu sɨ̂ àŋena.

¹³Bôbo Fɨyini ɨ kæ be sɨ̂ ghesɨ̀nà na, “Yì lu ndù dyàŋ Àfoŋlɨ a Zelèd.” Ghesɨ̀nà ɨ ndù dyàŋ àfoŋlɨ ateyn.

¹⁴Ghès nɨn læ se sɨ dyàŋ afoŋlɨ a Zelèd ma à sɨ ghɨ bèŋsɨ̀ mɨ̀vɨm ɨ̀n tal njvàsɨ̀ nfama ta ghèsɨ̀ lù sɨ a Kadesh Banìyà. À nà n-ghɨ tì ma ajâŋ a sugèyʼsɨ̀ kî a kɨ nà n-nû sɨ asɨ kfɨ meyn mæ̀ nô à jɨ̀m kɨ̀ ta Bôbo Fɨyini nɨn læ lèm sɨ a ikàyntɨ̀. ¹⁵Bôbo Fɨyini nɨ̀n læ meyn fu ngeʼ sɨ̂ àŋena, àŋena nà sɨ kfɨtɨ̂ kɨ kfɨtɨ ɨ læ kfɨ mæ̀ sɨ alèʼ ghè a àŋena nɨn læ gvi bɨ̀ ateyn.

¹⁶A nà ghɨ ta ghelɨ nâ ghì a ghɨ nà n-tɨm iwoŋ kfɨ̀tɨ mèsì tì, ¹⁷Bôbo Fɨyini ɨ bè sɨ̂ mà na, ¹⁸“Yi n-kelɨ sɨ jèl sɨ toynɨ a Mowàb layn dzɨ a ntèʼ Âl. ¹⁹Yi ndû chèm ilaʼ nɨ̀ ghelɨ Amòn ka yi n-sèʼlɨ̀ àŋena, ka yi n-sèʼ ìnû sɨ̂ àŋena bòm ta mɨ n-fu wi nô fɨ̀lêʼnɨ̀ ilaʼ nɨ̀ àŋena sɨ̂ zɨ̀. Ma fu meyn ìlaʼ ateyn sɨ̂ woyn Lôt na àŋena na kelɨ-a.”

²⁰Ghɨ nà n-lî kɨmɨ na ilaʼ ateyn i nɨn ghɨ ìlaʼ i ghelɨ Lefèm, a ghɨ ghelɨ ghì a ghɨ nà n-chi ateyn sɨ asɨ, mɨtì ghelɨ Amòn ɨ toŋtɨ̂ kɨ àŋena na ghelɨ Zamzùm. ²¹Ghelɨ ateyn nɨn læ nà dvɨ-à, dyêblɨ̀ kɨ tèyn fî kelɨ àdyaʼ kɨ̀ ta woyn Anàk, mɨtì Bôbo Fɨyini ɨ bebsɨ àŋena ɨ nì ghelɨ Amòn ɨ sàŋ ɨ fvɨ̀sɨ̀ àŋena sɨ ilaʼ nâ ghè ɨ bɨ̀ ateyn. ²²Bôbo Fɨyini nɨn læ ni kɨ iwo zɨ̀ sɨ̂ ghelɨ Amò a wù n-læ nì sɨ̂ woyn Esò ghì a ghɨ nà n-chi a Seyì. Wù n-læ saŋ fvɨ̀sɨ ghelɨ Hôl ɨtuʼ nâ ghè, woyn Esò ɨ lì ìlaʼ ateyn ɨ nà chî ateyn sɨ koʼ sɨ chem layn. ²³À nà n-ghɨ kɨmɨ ìwo zɨ̀ a yi n-læ gàyn sɨ̂ ghelɨ Avì ghî a ghɨ nà n-chi a ntèʼsɨ kɨ̀ sɨ lù afu sɨ ndù sɨ chem a Gazà. Ghelɨ Kaftolìm ɨ læ fvɨ̀ a àŋena ilaʼ ɨ gvi zuetɨ àŋena ɨ lì ìlaʼ ateyn ɨ nà sɨ chî ateyn.

Ghɨ tɨm yɨ fòyn Heshbòn

²⁴Mosìs nɨ̀n fi meyn taŋi sɨ̂ ghelɨ Isìlæ̀ ɨ bè na, “À nà n-ghɨ ta ghesɨ̀nà lù a Mowàb, Bôbo Fɨyini ɨ bè sɨ̂ ghesɨ̀nà na, ‘Yì lu ɨ̀ ndù dyàŋ àfoŋlɨ a Alnòn. Yì na kya samoʼ na ma fu meyn Sihòn ɨ wul ɨ̀ Amò ma à ti fòyn Heshbòn sɨ̂ zɨ̀ baʼsɨ̂ kɨ nɨ̀ ìlaʼ i ŋweyni. Yì zɨtɨ sɨ nu ŋweyn ɨ̀ ghal fsɨ ilaʼ ateyn. ²⁵Mɨ nì-à a alɨmalɨm a na bâytɨ̀ ghelɨ a mbzɨ kɨ̀ tɨlaʼ tɨ̀ jɨ̀m bòm zɨ̀. Sɨ zɨ̀tɨ layn, àŋena na yvɨ ìwo kûm zɨ̀, àŋena nà chɨŋtɨ̂ faynà.’”

²⁶À nà n-ghɨ ta ghesɨ̀nà nɨn ghɨ a nse iyum a Kedemòt, ma tum ntum sɨ̂ fòyn Sihòn na yi n-jofɨ̀ na ghesɨ̀nà nɨ̀ àŋena na chî nɨ̀ mbôynɨ̀. Mɨ n-be meyn sɨ̂ ŋweyn na, ²⁷“Visi ghèsɨ̀ toynɨ chwò dzɨ a wa ilaʼ. Ghèsɨ̀ na jelɨ̀ kɨ a dzɨ i to. Ghèsɨ̀ nɨn fvɨ̀-à nà ndû kɨ àtì-ati ɨ̀ faŋ tɨ̀ bɨ̀ alèʼ. ²⁸Ghèsɨ̀ kæ se sɨ chwò ɨ̀ yeyn afo sɨ yɨ kèsa sɨ nyvɨ, a ghèsɨ̀ yuyn nɨ̀ ɨ̀kwo. Ghès nɨn chwotɨ̂ kɨ na wà visi ghesɨ̀ toynɨ̂ chwò a wa ilaʼ. ²⁹Visi ghèsɨ̀ chwo kɨ̀mɨ ta woyn Esò ghì a ghɨ n-chi a Seyì nɨ̀ ghelɨ Mowàb ghì a ghɨ n-chi a Âl nɨn læ visi ghèsɨ toynɨ chwò a àŋena tɨ̂laʼ. Ghès nɨn toynɨ̂ kɨ tèyn ndù dyàŋ jvâ Jodàn ɨ̀ zɨ ilaʼ ghè a Bôbo Fɨyini ɨ Fɨyini feyfɨ nɨn fu sɨ̂ ghès.” ³⁰Mɨ n-læ chwotɨ mɨtì, Sihòn ɨ fòyn Heshbòn ɨ leʼ na yi n-visî wì na ghesɨ̀nà toynɨ a ŋweyn ilaʼ. À nà n-ghɨ tì ma Bôbo ɨ Fɨyini fɨ ghesɨ̀nà ɨ tosɨ meyn àtem a ŋweyn ta ka wù fu ŋweyn sɨ̂ ghesɨ̀na.

³¹Bôbo Fɨyini ɨ kæ be sɨ̂ mà na, “Yì na kya na ma zɨtɨ meyn sɨ fu fòyn Sihòn nɨ̀ ìlaʼ i ŋweyni sɨ̂ zɨ̀. Yì zɨtɨ sɨ nu lvɨ̂yn, ɨ̀ ghal ɨ̀ fsɨ ilaʼ i ŋweyn ɨ̀ nà kelɨ-a.”

³²Sihòn ŋêyn sugèyʼsɨ ŋweynsɨ nô sɨ̀ jɨ̀m ɨ fvɨ̀ a ntèʼ Heshbòn ɨ gvì sɨ nu ghesɨ̀nà a ntèʼ Jahàz, ³³Bôbo Fɨyini, ɨ Fɨyini fɨ ghesɨ̀na ɨ nì ghesɨ̀nà ɨ tɨm yɨ ŋweyn, baʼsɨ̂ kɨ nɨ̀ woyn ŋweyn nɨ̀ sugèyʼsɨ ŋweynsɨ nô sɨ̀ jɨ̀m. ³⁴À nà n-ghɨ ɨtuʼ nâ ghè, ghesɨ̀nà ɨ nù ɨ fsɨtɨ ntèʼsɨ àŋena nô sɨ̀ jɨ̀m ɨ zuetɨ ghɨ̀lûmnɨ̀ nɨ̀ ghɨ̀ki nɨ̀ woynda nô ghɨ̀ jɨ̀m. Nô wùl ɨ̀ mòʼ nɨn bu læ faŋ. ³⁵Ghesɨ̀nà nɨn læ zuetɨ ghelɨ nô mɨ̀tì ɨ lì ɨ lu kɨ lu nɨ̀ nyamsɨ baʼsɨ̂ nɨ̀ ɨ̀fwo ɨlvɨ a ntèʼsɨ ghê a ghesɨ̀nà tɨm yɨ. ³⁶Nô ntèʼ nɨn bu læ to ghaʼ ghesɨ̀nà kɨ̀ sɨ zɨ̀tɨ̀ a ntèʼ Alowà a Afoŋlɨ a Alnòn nɨ̀ ntèʼ zɨ̀ a yi nà n-ghɨ afoŋlɨ nâ ghè sɨ ndù sɨ chem a ntèʼ Gilèd. Bôbo Fɨyini ɨ Fɨyini fɨ ghesɨ̀nà nɨn læ meyn we àŋena nô ghɨ̀ jɨ̀m a ghesɨ̀nà awu. ³⁷Wu n-læ we nô mɨ ntèʼ nâ sìsɨ̀ a ghesɨ̀nà awu tì, ghesɨ̀nà ɨ faŋ tɨ zɨ alèʼ a kelɨ ghelɨ Amòn nô àmòʼ. Ghesɨ̀nà nɨn bu læ zɨ ɨlwèʼ ghè a wu nà n-ghɨ a mbæ̀ jvà Jabòk ɨ faŋ tɨ zɨ a ntèʼsɨ ghê a sɨ n-ghɨ atû kfɨynsɨ. Ghesɨ̀nà nɨn læ jèlɨ kɨ ta isaʼ i Bôbo Fɨyini ɨ Fɨyini fɨ ghesɨ̀nà nà n-ndyêyn.