Deuteronomy 3

Ghelɨ Isìlæ̀ ɨ tɨm yɨ Ôg ɨ fòyn Bashàn

¹Ghesɨ̀nà nɨn fi meyn bèynlɨ̀ ɨ kasi nà koʼ a dzɨ ta yì n-ndû a Bashàn. Fòyn Ôg vzɨ̀ a wù nà n-saʼ Bashàn ɨ fvɨ ŋêyn sugèyʼsɨ ŋweynsɨ nô sɨ̀ jɨ̀m ɨ gvì sɨ nu ghesɨ̀nà a Edèyì. ²Bôbo Fɨyini ɨ bè sɨ̂ mà na, “Ka n-fàyn fòyn Ôg nâ wèyn, ma fu meyn ŋweyn nɨ̀ sugèyʼsɨ ŋweynsɨ nô sɨ̀ jɨ̀m baʼsɨ̂ nɨ̀ ìlaʼ i ŋweyni a wa awu. Ni kɨ iwo zɨ̀ sɨ̂ ŋweyn a wà tî nì sɨ̂ Sihòn ɨ fòyn ghelɨ Amò vzɨ̀ a wu nà n-saʼ a Heshbòn.”

³À ti ta Bôbo Fɨyini ɨ Fɨyini fɨ ghesɨ̀nà nɨ̀n læ boŋ fu Ôg ɨ fòyn Bashàn, baʼsɨ̂ nɨ̀ sugèyʼsɨ ŋweynsɨ nô sɨ̀ jɨ̀m a ghesɨ̀nà awu, ghesɨ̀nà ɨ zuetɨ àŋena nô ghɨ̀ jɨ̀m ɨ faŋ tɨ visi nô wul ɨ̀mòʼ. ⁴À ti ɨtuʼ vzɨ̀ a ghesɨ̀nà nɨn læ tɨm yɨ abâs a Agòb kì a fòyn Ôg nà n-saʼ a Bashàn nô à jɨ̀m ɨ fsɨtɨ ntèʼsɨ ŋweyn nô sɨ̀ jɨ̀m ɨ faŋ tɨ̀ vìsi nô ìmòʼ. Ntèʼsɨ ateynsɨ nà n-chɨ̂yntɨ̀ ghɨ mɨ̀vɨ̂m ntufa. ⁵Ntèʼ nâ sèynsɨ̀ nô sɨ̀ jɨ̀m nà n-ghɨ ma ghɨ tɨm meyn jɨ̀ŋ kal nɨ̀ mbàynsɨ̀, sɨ dyêblɨ̀ kɨ tèyn, mbàynɨ̀sɨ ateynsɨ ɨ kelɨ àchfɨ̂ ma ghɨ fi meyn dyàŋsɨ mbàŋsɨ̀ antêynɨ̀ àteyn. Mɨ̀ntèʼtɨ̂ ɨ̀n lì nà n-ghɨ kɨmɨ ghɨ dvɨ̂ kɨ tèyn, kelɨ wi mbàynsɨ̀. ⁶Ghesɨ̀nà nɨn læ meyn bebsɨ àŋena kɨ̀mɨ ta ghesɨ̀nà nɨn læ bebsɨ ghelɨ ilaʼ nɨ̀ fòyn Sihòn ɨ bebsɨ ntèʼsɨ nô sɨ̀ jɨ̀m, ɨ zuetɨ ghɨ̀lûmnɨ̀ nɨ̀ ghɨ̀ki baʼsɨ̂ nɨ̀ woynda. ⁷Ghesɨ̀nà nɨn læ zuetɨ ghelɨ mɨtì ɨ lì ɨ lù (kɨ lu) nɨ̀ nyamsɨ baʼsɨ̂ nɨ̀ ɨ̀fwo ɨlvɨ a ntèʼsɨ ghê a ghesɨ̀nà tɨm yɨ.

⁸À ti dzɨ zɨ̀ a ghesɨ̀nà nɨn læ ghaytɨ ɨ fsɨ ɨlwêʼ a Jodàn dzɨ abàs ghè a ɨchfɨ̂-iyvɨ nɨn sal ateyn sɨ̂ tɨ̀fôyn tɨ Amò nâ tèyntɨ̀ tɨ̀ bò ɨtuʼ nâ ghè, kɨ̀ sɨ zɨ̀tɨ̀ a Afoŋlɨ a Alnòn sɨ ndù sɨ chem a kfɨ̂yn Hemòn. ⁹(Hemòn nɨ̀n ghɨ tèyn ghelɨ Sidòn ɨ toŋtɨ̂ na Silìyòn, ghelɨ Amò ɨ toŋtɨ̂ na kfɨ̂yn Senìl). ¹⁰Ghesɨ̀nà nɨn læ meyn ghaytɨ fsɨ ntèʼ sîsɨ̀ a sɨ nà n-ghɨ ibal atû kfɨ̀yn nô sɨ̀ jɨ̀m nɨ̀ ɨ sîsɨ̀ a sɨ nà n-ghɨ a Gilèd nô sɨ̀ jɨ̀m, baʼsɨ̂ nɨ̀ ɨ sîsɨ̀ a sɨ n-ghɨ a Bashàn nô sɨ̀ jɨ̀m, sɨ ndù sɨ chem a Salekà nɨ̀ Edèyì, a ghɨ ntèʼsɨ fòyn Ôg vzɨ̀ a wu nà n-saʼ a Bashàn. ¹¹(Ghɨ n-læ zuetɨ ghelɨ Lefèm tì ɨ gvi zue gòʼsɨ̀ fòyn Ôg vzɨ̀ a wu nà n-saʼ a Bashàn ɨ lèm ìgvɨyn i ŋweyn a antayntayn kɨ dyêf chem ndû ntàmsɨ̀ kæ̀ ghaʼ chem ndû ntàmsɨ̀ bò ma ghɨ tsɨ nɨ̀ àkasa. Wà ndù nô mɨ layn a ntèʼ nɨ̀ ghelɨ Amòn ghì a ghɨ n-toŋtɨ na Labà, a wà yeyn antayntayn ateyn)

Mosìs ɨ gwòtɨ̀ ɨ̀lwêʼ

¹²À nà n-ghɨ ta ghesɨ̀nà ghal fsɨ ilaʼ nâ yèynì, ma fu ɨlwêʼ wèyn têyn sɨ̂ ghelɨ ndo nɨ̀ Lubèn ŋêyn ghelɨ ndo nɨ̀ Gâd: Mɨ n-fu alêʼ kì a kɨ n-ghɨ a ngùŋ Alowà a mbæ̀ jvà Alnòn abàs ikuè sɨ̂ àŋena. Mɨ n-fu meyn kɨmɨ àbâs a ilaʼ i kfɨynsɨ a Gilèd baʼsɨ̂ nɨ̀ ntèʼ sîsɨ̀ a sɨ nà n-ghɨ afu sɨ̂ àŋena, ¹³ɨ fu mèsì abâs a Gilèd a li-a nɨ̀ Bashàn nô ì jɨ̀m sɨ̂ ghelɨ ndo nɨ̀ Mànasè ghɨ li. Ɨlwêʼ nâ wèyn nɨn ghɨ ma à nà n-saʼ fòyn Ôg nô ɨ̀ jɨ̀m. (Ghɨ n-læ nà toŋtɨ̂ àbâs a Agòb kì a kɨ nà n-ghɨ a Bashàn nô à jɨ̀m na Lefèm. ¹⁴Jayì ɨ wâyn Mànasè nɨn læ meyn tɨm yɨ abâs a Agòb nô à jɨ̀m sɨ ndù sɨ chem alèʼ ghè a ghelɨ Geshùl nà n-lêm ighami ateyn ŋêyn ghelɨ Makà. Wu n-læ tɨm yɨ tî ghɨ chfɨ̀ àlêʼ ateyn nɨ̀ ŋweyn. À ti iwo zɨ̀ a ghɨ lum toŋtɨ kɨ Bashàn na Havot Jayì sɨ koʼ sɨ chem layn.) ¹⁵Mɨ n-læ meyn fu Gilèd sɨ̂ ghelɨ ndo nɨ̀ Makì, ɨ wâyn Mànasè, ¹⁶ɨ fu abâs kì a kɨ nà n-zɨ̂tɨ̀ a Gilèd kalì chem Afoŋlɨ a Alnòn sɨ̂ ghelɨ Lubèn ŋêyn ghelɨ Gâd. (Ɨlwêʼ nâ wèyn nà n-lêm ìghami abàs itsɨyn antêynɨ̀ àfoŋlɨ). Mɨ n-fu ɨlwêʼ nâ vzɨ̀ sɨ̂ ghelɨ Lubèn ŋêyn ghelɨ Gâd ɨ ndu chem a jvâ Jabòk ighami nɨ̀ ghelɨ Amòn. ¹⁷Ighami àŋena abàs ghè a ɨchfɨ̂-iyvɨ i nɨn sœ ateyn nà n-ghɨ a jvâ Jodàn a Alabà, kɨ̀ sɨ zɨ̀tɨ̀ a Kinelèt sɨ ndù sɨ chem a Jvâ i Ghaʼnɨ a Alabà ma à ti Jvâ Fɨ̀ngvaŋ isas i kfɨynsɨ a Bisgà abàs ghè a ɨchfɨ̂-iyvɨ i nɨn sal ateyn.

¹⁸Mɨ n-læ meyn be kɨmɨ sɨ̂ zɨ̀ ɨtuʼ nâ ghè na, “Bôbo Fɨyini, ɨ Fɨyini fɨ ghesɨ̀nà fu meyn ìlaʼ nâ yèynì sɨ̂ ghesɨ̀nà na ghesɨ̀nà na kelɨ-a. Mɨtì sugèyʼ si sisɨ̀ a sɨ n-kya sɨ nù, kelɨ ɨ̀fwo iwòŋ ɨ kelɨ sɨ chem asɨ nɨ̀ woynà ghi, ghelɨ Isìlæ̀, sɨ ndù sɨ dyaŋ jvâ Jodàn/Mɨtì asɨ nɨ̀ zɨ̀ nɨn kelɨ sɨ nà ndu sugèyʼ si sìsɨ̀ a sɨ n-kya sɨ nù nô sɨ̀ jɨ̀m, kelɨ ɨ̀fwo iwòŋ sɨ ndù sɨ dyaŋ jvâ Jodàn. ¹⁹Yi se sɨ ndù, ka yi n-lì ghɨ̀ki ghi nɨ̀ woyn ghi nɨ̀ nyam sisɨ, yi visi kɨ àŋena a ntèʼsɨ ghê a mà fu sɨ̂ zɨ̀. (Mɨ n-kya na yi n-kelɨ nyamsɨ sɨ dvɨ̂ kɨ tèyn.) ²⁰Yi n-kelɨ sɨ nà gâmtɨ̀ kɨ gamtɨ woynà ghi ghelɨ Isìlæ̀ sɨ chem ta ka Bôbo Fɨyini ɨ Fɨyini fifɨ ni a àŋena na chî nɨ̀ mbôynɨ̀ kɨ̀mɨ ighel ta wù nì sɨ̂ zɨ̀. Yì gamtɨ àŋena ta ka àŋena boŋ ghal ɨ̀ fsɨ ɨlwêʼ vzɨ̀ a Bôbo Fɨyini ɨ Fɨyini fifɨ nɨn fu sɨ̂ àŋena a injɨyn i Jvâ Jodàn. Yi gâmtɨ̀ àŋena ɨ̀ fsɨ ɨlwêʼ ateyn, nô mɨ ndà ɨ kasi kfa kɨ alèʼ ghè a mà tî fù sɨ̂ ŋweyn.”

Bôbo Fɨyini ɨ tuynsɨ na Mosìs nɨn zɨ̂ wì a Kenàn

²¹À nà n-ghɨ ɨtuʼ nâ ghè, ma bè sɨ̂ Joshwà na, “Wà yeyn meyn àwo kì a Bôbo Fɨyini nì sɨ̂ fòyn Sihòn ŋêyn fòyn Ôg kɨ̀ nô sɨ a wa ngeŋ. Wù na nì kɨ tì nô mɨ sɨ̂ fòyn ɨ̀ kfà ta yì zɨ a ŋweyn ilaʼ. ²²Ka yi n-fàyn àŋena bòm ta a nì nû Bôbo Fɨyini, ɨ Fɨyini fifɨ ɨ̀ nù sɨ̂ zɨ̀.”

²³Mɨ n-læ meyn jèm sɨ̂ Bôbo Fɨyini ɨtuʼ nâ ghè ɨ bè na, ²⁴“Bôbo Fɨyini, bò ɨdwaʼ ɨ̀ jɨ̀m, wà zɨtɨ meyn sɨ dyeyn sɨ̂ wùl ɨ̀ felɨnɨ nɨ̀ và na wà n-bema, fî kelɨ àdyaʼ a kaynɨ-a. Fɨyini fɨ lifɨ nɨn ghɨ wi iyvɨ ghɨ wi a nse a fɨ kàʼ a fɨ ni awo a kaynɨ-a kì a wà nì! ²⁵Mɨ n-chwotɨ̂ na wà visi mà dyaŋ ɨ̀ yeyn kɨ̀ nô yeyn nse ì jùŋ nɨ̀ ìlaʼ i Kfɨynsɨ i juŋì nâ zɨ̀ a Lebanòn injɨyn i Jodàn.”

²⁶Mɨ n-bè tî, Bôbo Fɨyini ɨ nyòʼsɨ̀ ɨ̀toŋ sɨ̂ mà ɨ faŋ tɨ̀ yvɨ̀tɨ iwo zɨ̀ a mà bè bòm zɨ̀ ɨ kwo be kɨ sɨ̂ mà na, “Ka mɨ n-fì yvɨ iwo a wa ɨchfɨ̀ kûm ìwo nâ yèynì. Ka wa n-læ̀ fì bè ìwo nâ zɨ̀ sɨ̂ mà! ²⁷Koʼ timi atû kfɨ̂yn Bisgà ɨ ki ndùsɨ kɨ ndusɨ nɨ̀ ìlaʼ ateyn i kɨ̀ ɨbyâs ɨ̀ jɨ̀m. Wà koʼ wa faytɨ ki koʼ ɨ ki kàlì bòm ta wà læ̀ dyâŋ wì jvâ Jodàn. ²⁸Kwo tebtɨ kɨ Joshwà ɨ nì wù keli atem a to-a bòm ta a n-lì ŋweyn ghelɨ Isìlæ̀ ɨ̀ dyàŋ nɨ̀ àŋena ilaʼ nâ ghè ɨ̀ nì a àŋena na kelɨ ìlaʼ nâ zɨ̀ a ka wà yeyn.” ²⁹Bôbo Fɨyini nɨn læ taŋi tî, ghesɨ̀na faŋ kɨ afoŋlɨ afî a kɨ n-baʼsɨ ibal afî a ngùŋ ntèʼ Bet Beyò tì.