Deuteronomy 21

Iwo zɨ̀ a ghɨ n-kelɨ sɨ nì ɨlvɨ ta wùl ɨ̀ kfɨ ghɨ kya wi ntsɨyn

¹Mosìs nɨn læ meyn bè sɨ̂ ghelɨ Isìlæ̀ na, “Yì kæ yeyn igvɨyn i wûl a gvêyn ilaʼ ghè a Bôbo Fɨyini ɨ Fɨyini fifɨ nɨn fu na à na kelɨ kɨ nô zɨ̀, kya wi na à zuè nda wul àteyn a, ²ghelɨ ghɨ tisɨnɨ, nɨ̀ ghelɨ ghɨ saʼnɨ, ɨ fvɨ̀ ɨ gvi fèʼ sɨ yeyn na à n-baʼsɨ̂ ntèʼ ì kà sɨ̂ àlêʼ kì a igvɨyn nâ zɨ̀ nɨn nyɨŋ ateyn a.” ³Àŋena fêʼ, ɨ̀ yeyn a baʼsɨ̂ nô mɨ ntèʼ i kà afu, ghelɨ ghɨ tisɨnɨ a ntèʼ nâ ghè ɨ lì wâyn nyàm mbòloʼ bula ghɨ timi kùl afo ɨtoŋ nɨ̀ ɨ̀nyeyn baʼsɨ̂ nɨ̀ ìlì na yì fel iwo, ⁴ɨ kàlì nɨ̀ ɨ̀nyeyn ɨfyayn jvâ, yi lum kàlì kɨ kali, alèʼ bula ghɨ timi tòʼ afo ateyn, ɨ leŋ ɨ kòl ɨ̀toŋ ateyn afu. ⁵Ngàŋsɨ ndô Fɨyini, ma à ti woyn Levì nɨn kelɨ sɨ nà ghɨ kɨmɨ alèʼ nâ ghè bòm ta Bôbo Fɨyini ɨ Fɨyini fifɨ choʼ meyn àŋena na ghɨ na felɨ̀ sɨ̂ ŋweyn, jemà wu boysɨ̂ ghelɨ Isìlæ̀, fî saʼ nsaʼsɨ àŋena ɨlvɨ ta wùl ɨ̀ lèmsɨ wul./ Ngàŋsɨ ndô Fɨyini, ma à ti woyn Levì nɨn kelɨ sɨ nà boŋ ghɨ alèʼ nâ ghè bòm ta wùl ɨ̀ Isìlæ̀ nɨ̀n leŋ wâynì kèsa àŋena nù nu, a nà kelɨ ngàŋ ndô Fɨyini sɨ saʼ nsaʼ àteyn. Bôbo Fɨyini choʼ meyn àŋena na ghɨ na felɨ̀ sɨ̂ ŋweyn, jemà, wu boysɨ̂ ghelɨ Isìlæ̀. ⁶Ghɨ kôl ɨ̀toŋ wâyn nyàm nâ vzɨ̀, ghelɨ ghɨ tisɨnɨ nô ghɨ̀ jɨ̀m a ntèʼ nâ ghè ɨ sù ɨ̀wu àŋena atû wâyn nyàm nâ ghè bê na, ⁷“Mɨ̀luŋ mɨ̀ wùl ɨ̀ wèyn nɨn ghɨ wi a ghès awu, ghɨ bû nì se sɨ zue ghèsɨ yeyn. ⁸Lèsɨ fu ghelɨ Isìlæ̀, ɨ ghelɨ̀ ghya ghì a wa n-læ fvɨ̀sɨ sɨ a Ijìb a Bôbo Fɨyini. Ghès nɨn chwotɨ̂ na ka wa n-fu ngeʼ sɨ̂ ghès kûm ìkfɨ i wûl wèyn a ghɨ zuè têyn ghès ɨ kya wi ntsɨyn.” ⁹Yi kæ nì têyn, a yi na ghɨ àtì-ati asɨ nɨ̀ Bôbo Fɨyini a wù faŋ tɨ̀ fù ngeʼ sɨ̂ zɨ̀ kûm ìkfɨ i wûl ta ghɨ zue ghɨ kya wi na à zuè nda a.

Wul ɨ̀ wi ɨlvɨ ta ghɨ ghal ɨtwaʼ iwòŋ

¹⁰Mosìs nɨn læ meyn bè sɨ̂ ghelɨ Isìlæ̀ na, “Yì kæ seʼ iwoŋ, Bôbo Fɨyini gâmtɨ̀ yi tɨm yɨ mbàynɨ̀ sisɨ, ɨ̀ ghàytɨ ɨ̀ kfa nɨ̀ sɨ lisɨ, ¹¹wùl ɨ̀ sɨ̂ zɨ yeyn wul ɨ wi ateyn wu jofà, nà kôŋ sɨ li sɨ a wi, wu lì, ¹²ɨ kfa nɨ̀ ŋweyn ghɨ kom atu a ŋweyn, ɨ̀ sèli ngèsɨ ɨwu nɨ̀ ŋweyn.” ¹³Ghɨ seli, wu kfɨnɨ ndzɨ sìsɨ̀ a ghɨ nì ghalɨ̀ ŋweyn wu kelɨ a ŋweyn ɨwùyn. Wù kfɨnɨ, wu dzɨ̀ ìkfɨ i bò ŋweyn nɨ̀ nà ŋweyn sɨ a njoŋ jæ ta ka wùl ɨ̀ vzɨ̀ a wù nì yeyn wu jofà li ŋweyn sɨ a wi. ¹⁴Ŋêyn wùl ɨ wi àteyn chitɨ ɨ chem aleŋ a li-a, wù na bu kôŋ wì ŋweyn, wu bè wù lu ndu alèʼ ghè a wù n-kôŋ, ka wu n-bèyʼlɨ beyʼlɨ ŋweyn kèsa ɨ̀ kàsi ŋweyn sɨ akòs bòm ta wù sɨ ghɨ ma wù wumsɨ meyn ŋweyn.

Ɨfwo vzɨ̀ a wayn ɨ lûmnɨ̀ ɨwû àsɨ nɨn kelɨ sɨ yɨ

¹⁵Mosìs nɨn fi meyn bè sɨ̂ ghelɨ Isìlæ̀ na, “Wùl ɨ̀ kæ nà kelɨ ghɨ̀ki ghɨ̀ bò, kôŋ ɨ̀mòʼ chwô ta wù n-koŋ, àŋena ghɨ̀ jɨ̀m bzɨ woyn ghɨ lûmnɨ̀, wayn ɨlwema ɨ ghɨ wâyn wùl ɨ wi vzɨ̀ a wù n-tôʼ koŋ wì tî, ¹⁶wù læ̂ se sɨ tef ɨfwo ŋweyn, wù kâʼ wu bû fu afo a wayn ɨlwema sɨ̂ wâyn wùl ɨ wi vzɨ̀ a wù n-kôŋ tî bòm ta wù n-ghɨ wi wayn ɨ lwema.” ¹⁷Wù n-kelɨ sɨ fu sɨ yomtɨ ɨfwo sɨ̂ wayn ŋweyn ɨ lwema, ɨ wâyn wùl ɨ wi vzɨ̀ a wù n-tôʼ koŋ wi tî bòm ta à n-ghɨ wayn ɨ̀kuŋ nɨ̀ ŋweyn.

Wayn ɨ lûmnɨ̀ vzɨ̀ a wù n-to nɨ̀ àtu a

¹⁸Mosìs nɨn fi meyn bè sɨ̂ ghelɨ Isìlæ̀ na, “Wùl ɨ̀ kæ nà kelɨ wayn ɨ lûmnɨ̀ wu to nɨ̀ àtu a, yvɨnɨ̂ wi bò ŋweyn nɨ̀ nà ŋweyn, ghɨ leŋa, wu yvɨ wi iwo, ¹⁹nà ŋweyn ŋêyn bò ŋweyn ɨ li ndù nɨ̀ ŋweyn sɨ̂ chyeʼsɨ ɨchfɨ ayisi, a ntèʼ afî a àŋena nɨn chi ateyn.” ²⁰Àŋena ndû, ghɨ bè sɨ̂ chyeʼsɨ ateynsɨ na, “À n-ghɨ wayn wes têyn, to nɨ̀ àtu a nô abɨ, yvɨ wi iwo. Wù n-yɨ chwôsɨ̀-à, a fî ghɨ kɨ nô àkum a mɨ̂lùʼ.” ²¹Àŋena bê, ghɨ̀lûmnɨ ntèʼ nâ ghì nô ghɨ̀ jɨ̀m ɨ tɨmlɨ ɨ zue ŋweyn nɨ̀ ngòʼsɨ̀, ta ka ghelɨ Isìlæ̀ yvɨ iwo ateyn, ɨ̀ se sɨ fàyn, a awo a bɨ-a mæ sɨ a yi antêynɨ̀.

Isaʼ kûm ìgvɨyn i wûl àwo a bɨ-a

²²Mosìs nɨn be meyn kɨmɨ sɨ ghelɨ Isìlæ̀ na, “Wùl ɨ̀ kæ bebsɨ iwo, yi dyêyn na ghɨ zue ŋweyn, ɨ̀ ghaŋsɨ ìgvɨyn i ŋweyn atû fɨ̀kàʼ, ghɨ zue, ghɨ ghaŋsɨ.” ²³Ghɨ ghaŋsɨ ka ɨtuʼ nɨ̂n layn kòli ìgvɨyn ateyn atû fɨ̀kàʼ nâ ghè. Yi n-kelɨ sɨ gvɨ̀mi ìnkì i wûl nâ yèynì kɨ̀ achi ghè a wù kfɨ̀ ateyn bòm ta ghɨ n-ghaŋsɨ̂ wul atû fɨ̀kàʼ, a nà ghɨ ndoyn Fɨyini ɨ ghɨ a ŋweyn atu. Igvɨyn ateyn i kæ chi atû fɨ̀kàʼ, a ndòyn Bôbo Fɨyini ɨ Fɨyini fifɨ na ghɨ ilaʼ ghè a wù n-fu sɨ̂ zɨ̀ na à na kelɨ kɨ nô zɨ̀.