Deuteronomy 22

¹Mosìs nɨn be meyn sɨ̂ ghelɨ Isìlæ̀ na, “Mbòŋ wâynà vâ kæ sɨ lè, kèsa à lè njɨ̀ ŋweyn, wà yeyn ka wa n-bùʼsɨ, wa lì ɨ ndù nɨ̀ ɨ̀nyeyn sɨ̂ ŋweyn. ²Wùl ɨ̀ vzɨ̀ a wù n-kelɨ nyam àteyn kæ nà chî baʼsɨ̂ wì sɨ̂ và, kèsa wà n-kya wi ŋweyn, wa li kfa nɨ̀ ɨ̀nyeyn a wa ndo, ɨ lèm wù læ̂ se sɨ kɨŋ sɨ gvì, wà kasi ɨ̀ fù sɨ̂ ŋweyn.” ³Njàkâs lê, kèsa à lè àwaf, kèsa à lè nô mɨ ghà sɨ̂ wâynà vâ, wà yeyn ka wa n-bùʼsɨ, wa gàmtɨ̀ ɨ li ɨ ndu fu sɨ̂ ŋweyn.

⁴Ka wùl sɨ̂ zɨ̀ nɨn læ̀ yèyn njàkâs wâynà ŋweyn kèsa mbòŋ ta yì fe a dzɨ ɨ̀ faŋ tɨ̀ gàmtɨ̀ sɨ làysɨ̀.

⁵Wùl ɨ wi nɨn kelɨ wi sɨ nà maʼ ndzɨsɨ wùl ɨ lûmnɨ̀, wùl ɨ lûmnɨ̀ ɨ kelɨ wi sɨ nà maʼ ɨsɨ wul ɨ wi bòm ta Bôbo Fɨyini ɨ Fɨyini fifɨ nɨn kôŋ wì wul wu nî ìnkì iwo nâ zɨ̀.

⁶Wùl sɨ̂ zɨ na jèlɨ̀ ndu-à, ɨ̀ yèyn ndô fɨ̀nyùyn, nɨ̀ woyn mɨ̂nyùyn ateyn, kèsa awum, nà àteyn ɨ duʼ atu àteyn, ka wû n-kùmtɨ woyn mɨnyùyn nâ ghì, bàʼsɨ nɨ̀ nà àteyn. ⁷Wù yeyn, wu kumtɨ kɨ woyn, ɨ visi nà àteyn ta ka Fɨyini fɨ boysɨ ŋweyn, ɨ̀ nì a mɨ̀chi mɨ̀ ŋweyn dyebtɨ, a awo a na ndù kɨ a jûŋ sɨ̂ và.

⁸Wùl ɨ̀ bâʼlɨ̀ ndo ɨ̀ lèm àlêʼ kì a ka ghɨ na koʼ dùʼì ateyn atû ndo, wu kɨ̀ŋtɨ̀ ɨ kal nɨ̀ àlêʼ ateyn a bu tì wùl ɨ̀ koʼ afu ɨ̀ fe, a yi na ghɨ na wà zue meyn wul.

⁹Ka wùl nɨn læ̀ tòʼ kfèynsɨ àfo a li-a a gvêyn gɨ̀lêbsɨ̀ nɨ̀ ŋweyn. Wù kæ mòm, a nô mɨ ghà a gvêyn afu na sɨ kelɨ Bôbo Fɨyini.

¹⁰Ka wùl nɨn læ̀ kulɨ mbòŋ baʼsɨ̂ nɨ̀ njàkâs, na sɨ na fèlà.

¹¹Ka wùl nɨn læ̀ màʼ dzɨsɨ ma ghɨ tɨm nɨ̀ tɨ̀nkì tɨ ambyèyn tɨ̀ bò tɨ.

¹²Yì na tas àwaf yi we jɨŋ kalɨ nɨ̀ njeŋlɨsɨ achfɨ̀ ateyn, ɨlwêʼ ɨ̀ kfæ̀.

Tɨsaʼ tɨ Malâ

¹³Mosìs nɨn læ meyn be kɨmɨ sɨ̂ ghelɨ Isìlæ̀ na, “Wùl ɨ̀ kæ mala wul ɨ wi, læ̀ nà bu fì kôŋ wì ŋweyn, ¹⁴nà sɨ jèlɨ̀ bebsɨ̂ ìzɨyn i ŋweyn wam bê na, mà tî se sɨ mala wul ɨ wi wèyn, ma wù ti meyn nà sɨ kya ghɨ̀lûmnɨ̀.” ¹⁵Yi gâyn tì, bò wi ŋêyn nà wi nâ vzɨ̀ ɨ ndu dyèyn ndzɨsɨ ɨkuyn sìsɨ̀ a mɨ̀lûŋ nɨn ndyêyn ateyn na wayn àŋena nɨn læ mala bu duʼ tɨ nà kya wùl ɨ lûmnɨ̀ sɨ̂ chyeʼsɨ ɨchfɨ mbàyn ntèʼ. ¹⁶Àŋena ndû, bò wayn ɨ wi àteyn ɨ bè sɨ̂ chyeʼsɨ ateynsɨ na, “Mà tî fù wâyn wom sɨ̂ wùl ɨ̀ wèyn sɨ a wi, wù na bu fì kôŋ wì ŋweyn. ¹⁷Wù sɨ jelɨ̀ bebsɨ̂ ìzɨyn i wâyn wom lvɨ̂yn wam bê na wù ti se sɨ mala ŋweyn ma wù sɨ kya ghɨ̀lûmnɨ̀. Mɨtì, ndzɨ sèynsɨ̀ nɨ̀ mɨ̀lûŋ ateyn nɨn ghɨ nchwæ sɨ dyèyn na wâyn wom tî nà bu duʼ tɨ nà kya ghɨ̀lûmnɨ̀.” Wù taŋi mèsì, wu yàs ɨ dyèyn ndzɨsɨ ateyn sɨ̂ chyeʼsɨ ntèʼ nâ sìsɨ̀. ¹⁸Wù dyêyn, chyeʼsɨ ateynsɨ ɨ ghal ɨ leŋ wùl ɨ lûmnɨ̀ nâ vzɨ̀ a wù wam ànkaŋ nâ kì ɨ bè wù fî chfɨ̀ njva. ¹⁹Ghɨ leŋ, wu chfɨ njva sɨ̂ bò wi nâ vzɨ̀ nɨ̀ ɨ̀byeʼlɨ aso ɨkwo a fɨfâ ɨvɨ, bòm ta wù bebsɨ meyn ìzɨyn i wâyn wùl ɨ̀ Isìlæ̀, bula wù timi nà kya wul ɨ lûmnɨ̀. Wu n-chfɨ njva nâ zɨ̀ tì, ɨ̀ kàsi ɨ̀ lì wul ɨ wi àteyn sɨ a ŋweyn a wi, ɨ̀ læ̀ faŋ tɨ̀ fì tɨ̀ saŋ ŋweyn nô ta ka wù læ̂ kfɨ.

²⁰À kæ nà ghɨ samoʼ ma wayn ɨ̀ wi àteyn ti meyn nà sɨ kya ghɨ̀lûmnɨ̀ jæ ta ka wù bɨmi lum, ²¹a ghɨ li ndù nɨ̀ ŋweyn a ɨchfɨ abe nɨ̀ àŋena, a ghɨ̀lûmnɨ̀ ntèʼ nɨ àŋena tɨmlɨ zue ŋweyn nɨ̀ ngòʼsɨ̀ bòm ta wù wumsɨ meyn ghelɨ Isìlæ̀. À n-ghɨ nkfɨm ta wù kwò ɨ̀ dzɨ̀sì nɨ̀ ɨ̀chfɨ̂, (a ghɨ ìwo i wuminɨ-i) sɨ chi ŋêyn wùl ɨ lûmnɨ̀ bu ghɨ kɨ a àŋena abe. Yì kæ nà ni tî, a awo a bɨ-a mæ sɨ a yi antêynɨ̀.

²²“Yi ku wul ɨ̀ lûmnɨ̀ wu chî nɨ̀ wî wùl, yi zue wul ɨ̀ lûmnɨ̀ àteyn ɨ baʼsɨ kɨ nɨ̀ wùl ɨ wi nâ vzɨ̀. Yì kæ nà ni têyn, a awo a bɨ-a mæ sɨ a Isìlæ̀.”

²³Wùl ɨ̀ kæ chi nɨ̀ wayn ɨ wi a ntèʼ ma wùl ɨ wûlù fu meyn àfo a ŋweyn atu, ²⁴yi li ɨ ndù nɨ̀ àŋena ɨchfɨ mbàyn a ntèʼ, ɨ tɨmlɨ zuetɨ àŋena nɨ̀ ngòʼsɨ̀. Yi n-kelɨ sɨ zue wâyn ɨ wi bòm ta ghɨ nì se sɨ chi nɨ̀ ŋweyn wù faŋ tɨ̀ byal sɨ dzɨ̀ na ghɨ gvi gàmtɨ̀ ŋweyn. Kelɨ sɨ zue wùl ɨ lûmnɨ̀ bòm ta wù ghal ɨ̀ chi nɨ̀ wî wùl. Yì na nî têyn, ta ka awo a bɨ-a mæ sɨ a yi antêynɨ̀.

²⁵Wayn ɨ wi kæ fvɨ̀, ɨ̀ sèʼ ɨtwaʼ, ma ghɨ fu meyn àfo a ŋweyn atu, wùl ɨ lûmnɨ̀ ghal ɨ̀ chi nɨ̀ ŋweyn, a ghɨ na kelɨ sɨ zue kɨ wùl ɨ lûmnɨ̀ àteyn sɨ visi wayn ɨ wi. ²⁶Yi n-kelɨ wi sɨ kùm wâyn ɨ wi àteyn bòm ta wù bû nì mbɨ ì lì ta ka ghɨ zue ŋweyn. Wù n-ghɨ kɨmɨ ta wul ɨlvɨ ta ghɨ gvɨ̀ a dzɨ, ɨ̀ leŋ zue. ²⁷Yi n-dyêyn na wùl ɨ̀ àteyn nì ghàlɨ̀ wayn ɨ wi nâ vzɨ̀ ɨtwaʼ sɨ adyaʼ, wù byal, mɨtì wùl ɨ baʼsɨ̂ wì sɨ gàmtɨ ŋweyn.

²⁸Wùl kæ yeyn wayn ɨ wi bula wùl ɨ̀ fu àfo a ŋweyn atu, ɨ̀ ghalɨ chi nɨ̀ ŋweyn sɨ adyaʼ, ghɨ ku àŋena, ²⁹a wùl ɨ lûmnɨ̀ na kelɨ sɨ fu afo atu nɨ̀ wayn ɨ wi a ghɨ ɨ̀byeʼlɨ aso ɨkwo mɨ̀vɨm ɨ̀n tâyn, sɨ li wayn ɨ wi àteyn sɨ a wi bòm ta wù sɨ ghɨ ma wù chi meyn nɨ̀ ŋweyn. Wùl ɨ̀ àteyn nɨn kelɨ sɨ li wayn ɨ wi àteyn sɨ a wi ma wù kàʼ wu bû læ̀ sàŋ ŋweyn nô ta ka wù læ̂ kfɨ.

³⁰Ka wùl nɨn læ̀ lì wî bò ŋweyn sɨ a wi, ka wùl nɨn læ̀ yɨ̀ a kel nɨ̀ bæ̀.