Deuteronomy 24

¹Mosìs nɨ̀n be meyn kɨmɨ sɨ̂ ghelɨ Isìlæ̀ na, “Wùl ɨ̀ mala wul ɨ wi, nà bu fì kôŋ wì ŋweyn bòm ta wù yeyn na nchînɨ̀ ŋweyn nɨ̀n jofɨ̀ wì, wu nyàʼ ŋwàʼlɨ̀ ɨ fu sɨ̂ wùl ɨ wi ateyn yi dyêyn na wù saŋ meyn ŋweyn sɨ a ŋweyn.” ²Wùl ɨ wi àteyn kæ sɨ ndù ɨ̀ bɨ̀mi lum ɨ wûlù, ³lum àteyn læ nà bu fì kôŋ wì wul ɨ wi àteyn, ɨ̀ nyàʼ ŋwàʼlɨ̀ ɨ̀ fù sɨ̂ ŋweyn, yi dyêyn na wù saŋ meyn ŋweyn, wul àteyn kfɨ mɨ kfɨ, ⁴ka lum ɨwû àsɨ vzɨ̀ nɨn læ̀ fì mòm sɨ kasi sɨ li wul ɨ wi àteyn bòm ta wù sɨ ghɨ ma wù bebsɨ meyn ngêŋ ŋweyn nà bu layn wi ta isaʼi nɨn ndyêyn, a ghɨ ìwo i chaʼnɨnɨ-i asɨ nɨ̀ Bôbo Fɨyini. Ka wùl sɨ̂ zɨ̀ nɨn læ̀ nì mbɨ nâ yèyn ɨ̀ bèbsɨ ilaʼ nâ yèynì a Bôbo Fɨyini nɨ̀n fu sɨ̂ zɨ̀ têyn.

⁵Wùl ɨ̀ kæ nà ghɨ ma wù kùʼ ndù ndu wi, ka ghɨ n-læ̀ tùm ŋweyn ɨtwaʼ iwòŋ, kèsa sɨ bè na wù ndu fèl iwo i li sɨ̂ ntèʼ. Wùl ɨ̀ àteyn nɨn kelɨ wi sɨ fèl alèʼ a kɨ lu-à sɨ a bèŋ, wù n-kelɨ kɨ sɨ nà duʼ kɨ a ndo, tôʼnɨ̀ nɨ̀ wi ŋweyn vzɨ̀ a wù màla.

⁶Wùl ɨ̀ kæ samsɨ ɨkwo sɨ̂ wâynà ŋweyn, ka wu n-læ̀ ghal ɨ̀ lèm ìti abayn nɨ̀ wùl, kèsa ngòʼ àteyn, bòm ɨ̀kwo nâ vzɨ̀ a wù sàmsɨ bom ta ghelɨ ndo nɨ̀ ŋweyn nɨn chî kɨ bòm ìti nâ zɨ̀. Mɨtì, wù kâʼ a wù ghal ɨ̀ lèm àfo a kɨ lu-à.

⁷Wùl ɨ̀ kæ choŋ ɨ̀ lù nɨ̀ wùl ɨ̀ lvɨ̀, ndù bèyʼlɨ ŋweyn kèsa ɨ̀ lèm ŋweyn sɨ akòs, ghɨ ghal, ghɨ zue kɨ zue ta ka ghelɨ ghɨ bɨ mæ sɨ a yi antêynɨ̀.

⁸Wùl ɨ̀ na kelɨ ìkoʼi a ŋweyn ɨwùyn ma yi kàʼ a yi dyaŋ, wu nà nî nô mɨ ghà ta ngàŋ ndô Fɨyini, ɨ wul ɨ̀ ndo nɨ̀ Levì, bè na wù ni. Yì na tôʼnɨ̀ sɨ nà ni kɨ awo kì a mɨ n-læ bè sɨ̂ àŋena. ⁹Ka yî n-læ̀ lèsɨ̀ ìwo zɨ̀ a Bôbo Fɨyini ɨ Fɨyini fifɨ, nɨn læ ni sɨ̂ Meliyàm a dzɨ, ɨtuʼ ta yì n-læ fvɨ̀ a Ijìb, ɨ nà gvi-à.

¹⁰Wùl ɨ̀ samsɨ àfo sɨ̂ wâynà ŋweyn, wù tisɨ nɨ̀ ndzɨ sìsɨ̀ a wù n-chɨytɨ, ka wu n-læ̀ zɨ a ndo nɨ̀ wâynà ŋweyn sɨ fsɨ. ¹¹Wù ndû sɨ fsɨ ndzɨsɨ ateyn, wu timi kɨ abe, wâynà ŋweyn li fvɨ̀ fù sɨ̂ ŋweyn. ¹²Wùl ɨ̀ vzɨ̀ a wù sam afo na ghɨ wul ànfɨf, ka n-vìsi na ndzɨ sìsɨ̀ a wù tìsɨ chi sɨ̂ và. ¹³Ɨtuʼ na se sɨ jɨ nô mɨ achi à kà, wa kasi ɨ ndu fu ndzɨsɨ ateyn ta ka wù chî chɨ̀ytɨ, ɨ̀ se sɨ bemsɨ vâ, a à na ghɨ ìwo i àtì-ati sɨ Bôbo Fɨyini ɨ Fɨyini fyafɨ.

¹⁴Wùl ɨ̀ lî wul ɨ̀ felɨnɨ, a ghɨ wul ànfɨf, ka wù na nyàblɨ̀ nɨ̀ ŋweyn, kèsa à n-ghɨ wul ɨ̀ Isìlæ̀, kèsa à n-ghɨ wul àtum ta wù n-chi a yi a ntèʼ. ¹⁵Wù lî, wu nà lâʼ ŋweyn nô mɨ achi à kà jæ ta ka wù kfa, bòm ta wù n-kelɨ wi afo, lutɨ̂ yeʼtɨ̂ kɨ ɨkwo afî a wù n-lâʼ ŋweyn ateyn. Wù kæ faŋ tɨ̀ làʼ, wùl ɨ̀ àteyn dzɨ̂ sɨ̂ Bôbo Fɨyini a wù fu ngeʼ sɨ̂ ŋweyn bòm mbɨ zɨ̀ a wù nì.

¹⁶Ka ghɨ n-læ̀ zue bò wàyn kèsa nà wàyn bòm mbɨ̂ wàyn. Ghɨ n-kelɨ sɨ zue nô mɨ ndà kɨ bòm mbɨ ŋweyn./Ka bò wàyn nɨ̂n læ̀ kfɨ a mbɨ nɨ̀ wàyn. Nô mɨ ndà na kfɨ kɨ a ŋweyn a mbɨ.

¹⁷Ka wùl nɨn læ̀ saʼ fyèʼtɨ nsaʼ wâyn nkfɨ, kèsa nsaʼ wùl àtum. Ka wùl nɨn læ̀ fsɨ̀ ndzɨsɨ wî nkfɨ ta wù n-tìsɨ sɨ sam afo. ¹⁸Yì na kya na yi n-læ nà ghɨ ɨ̀kôs a Ijìb, Bôbo Fɨyini, ɨ Fɨyini fifɨ ɨ bœ̀sɨ̀ zɨ̀. À ti iwo zɨ̀ a mɨ n-fu isaʼ nâ yèynì sɨ̂ zɨ̀.

¹⁹Wùl ɨ̀ seʼ kfì àsaŋ, ɨ̀ kùmtɨ ɨ̀ lèsɨ̀ a li-a, ka wû n-kàsî seʼ sɨ lì bòm ta akî a kɨ faŋ a gvêyn nɨn kelɨ ɨ̀tum, nɨ̀ woyn nkfɨ, nɨ̀ ghɨ̀ki nkfɨ. Yi n-ni tî, a Bôbo Fɨyini ɨ Fɨyini fifɨ na boysɨ̂ nô mɨ ghà ta yi n-nî. ²⁰Yi na kœ̀ ndû nɨ̀ mɨ̀tam mɨ̀ olìfsɨ̀ nɨ̀ zɨ̀, ɨ̀n lì faŋ, ka yi n-fì kàsi ndù sɨ kœ̀. Yì visi ɨmzɨ̂ a mɨ̀ faŋ atu ɨ̀nkàʼ sɨ̂ ɨ̀tum nɨ̀ woyn nkfɨ, baʼsɨ̂ nɨ̀ ghɨ̀ki nkfɨ, àŋena gvi sàyntɨ. ²¹Yì na kœ̂ ndû nɨ̀ mɨ̀tam mɨ̀ gɨ̀lêbsɨ̀ nɨ̀ zɨ̀ ɨ̀n li faŋ, ka yi n-fì kàsi ndù sɨ kœ̀. Yì visi ɨmzɨ̂ a mɨ̀ faŋ atû ɨ̀nkàʼ sɨ̂ ghelɨ ɨtum, nɨ̀ woyn nkfɨ, nɨ̀ ghɨ̀ki nkfɨ àŋena gvi sàyntɨ. ²²Yì na kya na yi n-læ nà ghɨ ɨ̀kôs a Ijìb. À ti iwo zɨ̀ a mɨ n-fu isaʼ nâ yèynì sɨ̂ zɨ̀.