Deuteronomy 25

¹Mosìs nɨn læ meyn bè sɨ̂ ghelɨ Isìlæ̀ na, “Ghelɨ ghɨ̀ bo kæ nà kelɨ ngeʼ, ghɨ lì ɨ ndù nɨ̀ ɨ̀nyeyn a isaʼ. Ghelɨ ghɨ saʼnɨ saʼ, ghɨ visi wul ɨ vzɨ̀ a wù yɨ nsaʼ, ɨ ghal ɨvzɨ̂ a wù fe nsaʼ.” ²Yi kæ nà ghɨ na ghɨ n-kelɨ sɨ leŋ leŋ ɨvzɨ̂ a wù fe nsaʼ, wul ɨ̀ saʼnɨ ɨ bè wù nyiŋi kɨ̀ a ŋweyn asɨ, ghɨ leŋ akôyn a ngvàlìsɨ̀ kì a mbɨ̂ ŋweyn nɨn dyêyn na ghɨ leŋ./Ghɨ leŋ ŋweyn kɨ̀ ta isaʼi nɨn dyêyn. ³Mɨtì, ka ghɨ n-læ̀ lèŋ wul àteyn ɨ̀ chwò ngvàlìsɨ̀ mɨ̀vɨm ɨ̀n kæ̀ bu tì a à na ghɨ ma ghɨ wumsɨ meyn ŋweyn asɨ nɨ̀ ghelɨ.

⁴Ka wùl nɨn læ̀ kul ɨchfɨ mbòŋ yi chyeʼ àsaŋ.

⁵Woyn ghɨ̂ni kæ nà chî abe àmòʼ, ɨ̀mòʼ ɨ kfɨ, kelɨ wi wayn ɨ lûmnɨ̀, ka wî ŋweyn nɨn fvɨ̀ ndù màla isas i ndo i yilu-ì. Wâynà lum nɨ̀ ŋweyn nɨn kelɨ sɨ li ŋweyn sɨ a ŋweyn a wi na ŋêyn ŋweyn na chi-à. ⁶Wi nkfɨ nâ vzɨ̀ bzɨ wayn ɨ lûmnɨ̀ ɨwû àsɨ, ghɨ chfɨ̀ nɨ̀ ìzɨyn i lûm ŋweyn vzɨ̀ a wù tî kfɨ ta ka ɨzɨyn i ŋweyni faŋ tɨ̀ le sɨ a Isìlæ̀.

⁷Wùl ɨ̀ kæ nà kôŋ wì sɨ li wî nkfɨ nɨ̀ wâynà ŋweyn, wùl ɨ wi àteyn ɨ li ndù nɨ ìwo ateyn i asɨ nɨ̀ chyeʼsɨ afàf, ɨ bè na, “Wâynà lum wom leʼ meyn na izɨyn i wâynà ŋweyni nɨn faŋ wi a Isìlæ̀. Wù leʼ meyn na wu n-ni wi iwo zɨ̀ sɨ̂ mà a isaʼi nɨn bê.” ⁸Wù ndû fèʼtɨ, chyeʼsɨ ateynsɨ jàŋ wâynà lûm ŋweyn, ɨ taŋi sɨ̂ ŋweyn. Ghɨ taŋi wù faŋ tɨ̀ yvɨ, nà bu to kɨ na yi n-lì wì wî wâyna ŋweyn, ⁹a wî waynà ŋweyn nâ vzɨ̀ ndu ghalɨ̀ ŋweyn asɨ nɨ̀ chyeʼsɨ ɨ̀ chòʼ gvɨ àvɨ nɨ̀ ŋweyn, ɨ̀ chfɨ mɨnchya a ŋweyn ikèʼ ɨ̀ bè na, “À ti iwo zɨ̀ a ghɨ n-kelɨ sɨ ni sɨ̂ wùl ɨlvɨ ta wù lèʼ sɨ li wî wâynà ŋweyn.” ¹⁰Yi na gàyn tì ghelɨ Isìlæ̀ ɨ nà toŋtɨ̂ ìsas i ndo nɨ̀ wùl nâ vzɨ̀ na “Isas i ndo nɨ̀ mbû gvɨ àvɨ̀.”

¹¹Mosìs nɨn læ meyn be kɨmɨ sɨ̂ ghelɨ Isìlæ̀ na, “Ghɨ̀lûmnɨ̀ ghɨ̀ bò kæ nà nu-à, wî wùl ɨ̀ lvɨ fvɨ gvɨ̀ sɨ gwòsɨ̀ inû ateyn, ɨ se sɨ ghalɨ wùl ɨ lûmnɨ̀ vzɨ̀ a wù n-leŋ lûm ŋweyn, ɨ̀ ndù ghal dzɨ anam nɨ̀ ŋweyn, ¹²yi kaʼ teyn awu a wul ɨ wi nâ kì-à, ka yi n-kòynsɨ ìsuyn sɨ̂ ŋweyn.”

^13-14Ka wùl nɨ̂n læ̀ nà choŋ ghelɨ a mbêyʼlɨ̀, yuyn nɨ̀ ɨ̀fyêʼ ɨ ghaʼnɨ (sɨ keli sɨ idvɨ̀), beyʼlɨ̂ nɨ̀ ɨ̀fyêʼ ɨtwelâ. ¹⁵Yi n-kelɨ sɨ nà fêʼ ɨfwo kɨ̀ ɨfyèʼ ghè a isaʼi nɨn ndyêyn, feʼà wu luyna, ta ka mɨ̀chi mzɨ dyebtɨ a ilaʼ afî a Bôbo Fɨyini ɨ Fɨyini fifɨ fù sɨ̂ zɨ̀./Yi n-kelɨ sɨ nà fêʼ ɨfwo kɨ̀ ɨfyèʼ ghè a wu n-ghɨ àtì-ati, ta ka mɨ̀chi mzɨ dyebtɨ a ilaʼ afî a Bôbo Fɨyini ɨ Fɨyini fifɨ fù sɨ̂ zɨ̀. ¹⁶Bôbo Fɨyini, ɨ Fɨyini fifɨ nɨn kôŋ wì wul na wù n-wama fî nî ìnki awo a bɨ-a nâ kèynà.

¹⁷Ka yi n-læ̀ lèsɨ̀ ìwo zɨ̀ a ghelɨ Amalèk nɨn læ ni sɨ̂ ghɨ̀bo ghi a dzɨ, ɨtuʼ ta ghɨ n-fvɨ̀ a Ijìb. ¹⁸Àŋena nɨn bu læ nà fâyn Fɨyini, ɨ fvɨ̀ ɨ tɨm zuetɨ ghɨ̀bo ghi ghɨ li ghì a ghɨ nà n-jelɨ̀ gvî ibàm ma ghɨ bolɨ meyn. ¹⁹Bôbo Fɨyini, ɨ Fɨyini fifɨ, læ̂ gàmtɨ̀ zɨ̀ yi tɨm yɨ mbàynɨ̀ sisɨ sisɨ̀ a sɨ n-ghɨ ilaʼ afî a wù n-fu sɨ̂ zɨ̀ na à na kelɨ kɨ nô zɨ̀, ka yi n-lèsɨ̀ sɨ zuetɨ ghelɨ Amalèk nô ghɨ̀ jɨ̀m, ta ka ghɨ læ̂ faŋ tɨ̀ fì tɨ̀ yvɨ iwo kûm àŋena nô sakos.