Deuteronomy 4

Mosìs ɨ tebtɨ Ghelɨ na ghɨ na yvɨnɨ̂ Fɨyini

¹Zɨ̀ ghelɨ Isìlæ̀, yì faytɨ yvɨ̀tɨ tɨ̀saʼ tìtɨ̀ a ka mà fu sɨ̂ zɨ̀ lvɨ̂yn nô tɨ̀ jɨ̀m. Yì na yvɨnɨ̂ tɨ̀saʼ tɨ ateyn ta ka yì faŋ tɨ̀ kfɨ̀tɨ ɨ̀ læ̀ zɨ ɨ̀ lì ìlaʼ zɨ̀ a Bôbo Fɨyini ɨ Fɨyini fɨ ghɨ̂bo ghi nɨn fu sɨ̂ zɨ̀ ɨ̀ nà kelɨ-a. ²Ka yi n-choʼ iwo antêynɨ̀ tɨ̀saʼ nâ ghàyn, ka yi n-kfèynsɨ. Yì na yvɨnɨ̂ tɨ̀saʼ nâ tèyntɨ̀ a mɨ n-fu sɨ̂ zɨ̀. À n-ghɨ tɨ̀saʼ tɨ Bôbo Fɨyini ɨ Fɨyini fifɨ.

³Yi n-læ meyn yeyn ìwo zɨ̀ a Bôbo Fɨyini nɨn læ nì a kfɨ̂yn Bal Beyò kɨ̀ nô sɨ a yi a ngeŋsɨ. Wù n-læ meyn bebsɨ nô mɨ ndà vzɨ̂ a yi antêynɨ̀ a wu nà n-koʼsɨ fɨyini fɨ Bâl a kfɨ̂yn Beyò. ⁴Mɨtì zɨ̀ ghî nô ghɨ̀ jɨ̀m a yi n-faŋ ɨ nà koʼsɨ̂ kɨ Bôbo Fɨyini ɨ Fɨyini fifɨ na bu chî kɨ chi sɨ koʼ sɨ chem layn.

⁵Yì na kya na mà yèʼi zɨ̀ nɨ̀ tɨ̀saʼ tɨ ateyn tɨ nô tɨ̀ jɨ̀m kɨ̀ ighel ta Bôbo Fɨyini, ɨ Fɨyini femfɨ nɨn læ bè na mà yeʼi. Yì na yvɨnɨ̂ tɨ̀saʼ tɨ ateyn ta ka yì zɨ ilaʼ nâ ghàyn a yi n-kɨŋ sɨ zɨ ateyn tèyn ɨ̀ nà chî kɨ ta tɨ n-dyêyn. ⁶Yì na faytɨ̂ yvɨnɨ̂ tɨ̀saʼ tɨ ateyn sɨ dyèyn sɨ̂ ghelɨ tɨlaʼ tɨ mbzɨ na yi n-tofa fî yvɨ kelî àwo. Àŋena nì yvɨ ìwo kûm tɨ̀saʼ nâ tèyntɨ nô tɨ̀ jɨ̀m ɨ̀ nà bê na, “Samoʼ, ghelɨ ghèyn nɨn tofa fî kya àwo. À n-ghɨ nô ilaʼ i to-i.” ⁷À ti n-fî ghɨ nô ghelɨ ilaʼ ì kà a mbzɨ a ghɨ n-dvɨ̂ fî bem ta ghesɨ̀nà, mɨyini mɨ̀ àŋena lum baʼsɨ̂ kɨ sɨ̂ àŋena ta Bôbo Fɨyini ɨ fɨyini fɨ ghesɨ̀nà nɨn baʼsɨ sɨ̂ ghesɨ̀nà a? Ghesɨ̀nà nɨn jêm mɨ ɨlvɨ gha wu yvɨ-a, bêynsɨ̀-à. ⁸À n-fî dvɨ̂ bem nô ghelɨ ilaʼ ì kà a mbzɨ ta ghesɨ̀nà, kelɨ tɨ̀saʼ tɨ àŋena nô tɨ̀ jɨ̀m tɨ ghɨ kɨ àtì-ati ta tɨsaʼ tèyntɨ̀ a mɨ n-fu sɨ̂ zɨ̀ layn tèyn a?

⁹Yì toʼnɨ kɨ nɨ̀ ngêŋ sisɨ ɨ̀ nà faytɨ̂ chi-à. Ka wùl nɨ̂n læ̀ lèsɨ̀ àwo kì a yì yeyn nɨ̀ àsɨ à ki-a. Ka wùl nɨ̂n læ̀ vìsi ìwo antêynɨ̀ àwo nâ ghàyn yi le sɨ a ŋweyn ikfàʼtɨ̀ sɨ yaʼi ta wù bu chi. Yì yeʼi awo ateyn sɨ̂ woyn ghi nɨ̀ woyn wôyn ghi. ¹⁰Ka yi n-læ̀ lèsɨ̀ àchi kì a yi n-læ timi asɨ nɨ̀ Bôbo Fɨyini ɨ Fɨyini fifɨ a kfɨ̂yn Holèb, wu bè sɨ̂ mà na, “Jàŋtɨ ghelɨ Isìlæ̀ àŋena gvi yvɨ iwo zɨ̀ a ka mà be ta ka àŋena yeʼi sɨ nà ngvɨmlɨ ma sɨ yaʼi ta àŋena bu chi ilaʼ afî a mɨ n-fu sɨ̂ àŋena ɨ̀ fì yèʼi woyn àŋena na ghɨ na chî kɨmɨ tì.” ¹¹Mɨ n-læ meyn jàŋ zɨ̀ yi gvi baʼsɨ a isas i kfɨyn nâ ghè, ɨvɨs ɨ balî ateyn koʼ chem nô iyvɨ, fɨleʼfɨ ɨ ghɨ ma fɨ jɨ̂ŋ meyn kàl kfɨyn àteyn ta mbàʼ, fɨ̂m kɨ tèyn tìk. ¹²Bôbo Fɨyini nɨn læ meyn nà taŋî gvîsɨ̀ sɨ̂ zɨ̀ antêynɨ̀ ɨ̀vɨ̀s nâ ghè yi yvɨ gyâ ŋweyn mɨtì yeyn wi ŋweyn. ¹³Wù n-læ meyn fèʼtɨ̀ àwo kì sɨ̂ zɨ̀ a ka yì na nì-à sɨ luynsɨ mɨkâyn mzɨ̀ a wù yɨ̀ zɨ̂ àŋena, a ghɨ tɨ̀saʼ tìtɨ̀ ìvɨm a wù n-læ nyàʼ ɨbyàŋ ɨ ngòʼsɨ̀ ghê ɨ̀ bwò. ¹⁴Bôbo Fɨyini nɨ̂n bè sɨ̂ mà ɨtuʼ nâ ghè na mà yeʼi zɨ nɨ̀ tɨ̀saʼ tɨ ateyn tɨ ta ka yì læ̂ zɨ ilaʼ afî a wù n-fu sɨ̂ zɨ̀ na yì na kelɨ-a ɨ̀ nà chî kɨ ta tɨ n-bê.

Mosìs ɨ tuynsɨ na ka wùl læ̂ kòʼsɨ ànfèʼsɨ̀

¹⁵À n-læ nà ghɨ ta Bôbo Fɨyini nɨ̀n taŋi fvɨsɨ̀ gvî sɨ̂ zɨ̀ antêynɨ̀ ɨ̀vɨ̀s a kfɨ̂yn Holèb, yi n-bû læ yeyn ŋweyn nô sakos. Yì na tôʼnɨ̀ læ̂ nɨ̀ ngêŋ sisɨ! ¹⁶Yì na tòʼnɨ̀-à ka yi n-læ̀ nì mbɨ sɨ̂ Bôbo Fɨyini ɨ̀ fàytɨ ànfèʼsɨ̀ kɨ fɨsɨ̂ nô mɨ ghà ɨ̀ nà koʼsɨ-à, kèsa kɨ n-fɨsɨ̂ wùl ɨ lûmnɨ̀ a kèsa kɨ n-fɨsɨ wul ɨwi a. ¹⁷Ka yi n-læ̀ fàytɨ ànfèʼsɨ̀ kɨ fɨsɨ̂ àfo a li-a atû nse nô sakos kèsa à n-ghɨ nyam a kèsa à n-ghɨ fɨ̀nyùyn a. ¹⁸Ka yi n-læ̀ fàytɨ ànfèʼsɨ̀ kɨ fɨsɨ̂ àfo kɨ ŋâŋlɨ̀ a nse kèsa sfɨ a jvâ ɨ̀ nà koʼsɨ-à. ¹⁹Yi yeyn ɨ̀chfɨ̂ iyvɨ nɨ̀ njoŋ nɨ̀ mɨ̀njèyn nô mɨ nɨ̀ gha ta kɨ n-ghɨ iyvɨ, ka yi n-sèmtɨ ɨ̀ nà koʼsɨ-à. Bôbo Fɨyini nɨ̀n læ faytɨ ɨfwo nâ wèyn na à na koʼsɨ̂ ghelɨ tɨlaʼ tɨ litɨ, a ghɨ wi zɨ. ²⁰Bôbo Fɨyini nɨn læ kwo fvɨ̀sɨ zɨ sɨ ɨvɨ̀s ɨ bemnɨ a Ijìb ta ka yì na ghɨ ghelɨ sɨ a nyɨŋ sɨ̂ ŋweyn kɨ̀ nô ta yi n-ghɨ layn tèyn.

²¹Bôbo Fɨyini nɨ̀n læ meyn nyòʼsɨ ɨtoŋ sɨ̂ mà bòm àtu a tonɨ-a nɨ̀ zɨ̀ ɨ kàyn na mà læ̀ dyâŋ wì Jvâ Jodàn sɨ zɨ ilaʼ i juŋì ghê a wù n-fu na yì na kelɨ-a. ²²Mɨ n-dyàŋ wì jvâ Jodàn. Mɨ n-kfɨ kɨ ilaʼ afêyn, mɨtì yi dyâŋ ndû sɨ lì ìlaʼ i juŋì nâ zɨ̀ sɨ nà kelɨ-a. ²³Yì na tòʼnɨ̀-à ka yi n-læ̀ lèsɨ̀ mɨ̀kâyn mzɨ̀ a Bôbo Fɨyini ɨ Fɨyini fifɨ nɨ̀n læ yɨ zɨ̂ àŋena. Ka yi n-læ̀ fàytɨ ànfèʼsɨ̀ afo a li-a nô sakos ta Bôbo Fɨyini ɨ Fɨyini fifɨ tùynsɨ meyn sɨ̂ zɨ̀. ²⁴Ɨtoŋ ɨ yafɨnɨ nɨ̀ Bôbo Fɨyini ɨ Fɨyini fifɨ nɨn ghɨ ta ɨvɨs, nyôʼ nô mɨ ghà. Wù n-kôŋ wì na yì na koʼsɨ̂ fɨyini fɨ lifɨ a bu kɨ ŋweyn.

²⁵Yì kæ læ̀ chi ilaʼ nâ ghè, nà sɨ kelɨ woyn nɨ̀ woyn woyn ɨ̀ kàsî bèbsɨ ngêŋ sisɨ ɨ̀ fàytɨ nô mɨ ìnkì i ànfèʼsɨ̀ ì kà ɨ̀ nà koʼsɨ-à, ma yì ti nì mbɨ asɨ nɨ̀ Bôbo Fɨyini ɨ Fɨyini fifɨ, a wù nyoʼsɨ ɨtoŋ. ²⁶Mɨ n-taŋî sɨ̂ zɨ̀ layn tèyn, nse yèyn nɨ̀ ìyvɨ i ɨ ghɨ nchwò nsaʼ nɨ̀ mà. Yì kæ læ̀ chàs Bôbo Fɨyini ilaʼ nâ ghàyn a yi n-dyâŋ ndû injɨyn i Jodàn sɨ lì sɨ nà kelɨ têyn, yi bû læ̀ chìtɨ afu, a Bôbo ni a yì kfɨtɨ. ²⁷Yì kæ læ̀ chas Bôbo Fiyini a wù sasɨ zɨ a yì gwosɨ ɨ̀ ndù a tɨlaʼ tɨ lûtɨ̀ ɨ̀ kfɨ̀tɨ nô ghɨ̀ jɨ̀m ɨ̀ faŋ kɨ̀ sɨ ilæ a tɨlaʼ nâ ghè. ²⁸Yì kæ læ̀ chàs Bôbo ɨ̀ gwòsɨ̀ ndù a tɨ̂laʼ nâ ghè, a yì na sɨ koʼsɨ̂ kɨ mɨyini ma à fàytɨ ghelɨ, ɨ̀n lì ɨ ghɨ ma ghɨ chuf nɨ̀ ɨ̀nkàʼ, ɨ̀n lì ɨ ghɨ ma ghɨ chuf nɨ̀ ngòʼsɨ̀, ɨfwo nâ wèyn ɨ yeyn wi ɨlwêʼ, yvɨ wi awo, lɨ̂mtɨ̀ wì àfo. ²⁹Mɨtì yi læ̂ kàsi kɨŋ ndù nɨ̀ Bôbo Fɨyini ɨ Fɨyini fifɨ, a yì yeyn ŋweyn kɨ̀ ɨlvɨ ta yì se sɨ kɨŋ nà kɨŋ nɨ̀ àtem à ki-a à jɨ̀mà nɨ̀ àyvɨs à ki-a à jɨ̀mà. ³⁰À læ̀ nà ghɨ ta yì yvɨ mɨ̀lùmnchuŋ nâ mzɨ̀, awo nâ kì ɨ gâyn sɨ̂ zɨ̀, a mɨ̀chi koʼ kfeyn a yì beynlɨ ɨ̀ kàsî kɨŋ ndù nɨ̀ Bôbo Fɨyini ɨ Fɨyini fɨfɨ ɨ̀ nà yvɨnɨ̂ ŋweyn. ³¹Yi læ̀ gâyn tèyn bòm ta Bôbo Fiyini ɨ Fɨyini fifɨ nɨn ghɨ Fɨyini fɨ isuyn i kolanɨ-i, ghɨ wi sɨ læ̀ sɨ màʼi zɨ, ghɨ wi sɨ læ̀ sɨ bebsɨ zɨ, ghɨ wi sɨ læ̀ sɨ lèsɨ mɨkâyn mzɨ̀ a wu n-læ yɨ ŋêyn ghɨ̀bo ghi.

Bôbo Fɨyini, nɨ̀n ghɨ Fɨyini sɨ a nyɨŋ

³²Yì kasî kfàʼtɨ̀ ndù kɨ̀ sɨ a nzɨ̀tɨ ta Bôbo Fɨyini nɨn læ faytɨ ghelɨ a mbzɨ sɨ koʼ sɨ chem layn nɨ̀ àwo kì a kɨ n-læ gàyn nô sɨ asɨ. Yì bɨf kɨ̀ mbzɨ ì jɨ̀m na iwo i timi meyn gàyn ta iyeyn nâ yèynì, bem tèyn a? Wùl ɨ̀ timi meyn yvɨ nô mɨ yvɨ ìnkì iwo nâ yèynì a? ³³Wùl ɨ̀ bû tìmi yvɨ̀ ta Fɨyini fɨ nɨn taŋî gvîsɨ̀ antêynɨ̀ ɨ̀vɨ̀s ta yì sɨ ghɨ ma yi yvɨ meyn tèyn ɨ̀ nà bu chi-à. ³⁴Fɨyini fɨ lifɨ nɨn ghɨ a fɨ tìmi mòmsɨ̀ kɨ̀ nô momsɨ sɨ fvɨ̀sɨ ghelɨ ilaʼ i li sɨ ateyn nɨ ili sɨ lem sɨ a ŋweyn a ghêl ta Bôbo Fɨyini ɨ Fɨyini fifɨ nɨn læ fvɨ̀sɨ̀ zɨ sɨ a ilaʼ i Ijìb a? Wù n-læ se sɨ fvɨ̀sɨ zɨ ɨ nà môm àwo kɨ bem kɨ tèyn, dyêyn nchwæsɨ awo nɨ̀ àwo ɨchfɨ̀ ɨ yumnɨ-a a li-a. Wù n-læ meyn tɨm iwoŋ ɨ dyèyn àdyaʼ a bemnɨ-a kì a wù n-kelɨ ɨ fi mòm àwo a kaynɨ-a. Wù n-læ nà môm àwo nâ kèyna, yi yeyn kɨ nô yeyn.

³⁵Fɨyini fɨ nɨn læ dyèyn awo nâ kèynà sɨ̂ zɨ̀ têyn ta ka yì yeyn nà kya na à n-ghɨ ŋweyn Bôbo Fɨyini, Fɨyini fɨ lifɨ bu fì ghɨ wi. ³⁶Wù n-læ nà taŋi-à, ghɨ iyvɨ yi yvɨ gyâ ŋweyn, ghɨ a nse. Wù n-dyeyn meyn ɨ̀vɨs ɨ bemnɨ nɨ̀ ŋweyn sɨ̂ zɨ̀ a kfɨ̂yn Sinày, yi yvɨ gyâ ŋweyn ta yì n-fvɨ gvî antêynɨ̀ ɨ̀vɨ̀s nâ ghè. Wu n-læ nà nî àwo nâ kì tî kɨ̀ sɨ tisɨ zɨ na yì na jèlɨ̀ àtì-ati. ³⁷Wù n-læ fvɨ̀sɨ zɨ sɨ a Ijìb kɨ̀ nô sɨ a ŋweyn a ngeŋ nɨ̀ àdyaʼ a bemnɨ-a nɨ̀ ŋweyn a. Wù n-læ fvɨ̀sɨ zɨ bòm ìkôŋ zɨ̀ a wù nà n-kelɨ sɨ̂ ghɨ̀bo ghi ɨ choʼ woyn àŋena sɨ a ŋweyn a ghêl. ³⁸Wu n-læ meyn saŋ fvɨ̀sɨ̀ ghelɨ sɨ a àŋena tɨ̂laʼ, ghɨ to chwò zɨ̀ fî dvɨ̂ chwô zɨ̀ sɨ fu ilaʼ ateyn sɨ̂ zɨ̀ na yì na kelɨ-a kɨ̀ ta yi n-kelɨ layn tèyn.

³⁹Bòm àwo nâ kèyn a Bôbo Fɨyini nì sɨ̂ zɨ̀ têyn, yì bɨmi layn ɨ̀ nà kya samoʼ na à n-ghɨ kɨ ŋweyn Fɨyini fìfɨ̀ a fɨ n-ghɨ iyvɨ, ghɨ a nse, Fɨyini fɨ lifɨ bu fì ghɨ wi. ⁴⁰Yì na lèm tɨ̀saʼ tɨ ŋweyn tìtɨ̀ a mɨ n-fu sɨ̂ zɨ̀ layn nô tɨ̀ jɨ̀m ta ka ngeʼ læ̂ faŋ tɨ̀ kòli zɨ, læ̀ faŋ tɨ̀ kòli woyn ghi ghì a ghɨ n-læ̀ koʼ a ibàm, a mɨ̀chi mzɨ dyebtɨ a ilaʼ nâ ghè a Bôbo Fɨyini ɨ Fɨyini fifɨ nɨn fu sɨ̂ zɨ̀ kɨ̀ samoʼ.

Mosìs ɨ choʼtɨ ntèʼ sɨ lisɨ ta ka ghɨ na leʼ ndù lêytɨ̀ ateyn

⁴¹À n-læ nà ghɨ ta Mosìs tàŋi mèsì sɨ̂ ghelɨ Isìlæ, wu choʼtɨ ntèʼ sɨ lisɨ sɨ̀ tal injɨyn i jvâ Jodàn abàs ghè a ɨchfɨ̂-iyvɨ i nɨn sal ateyn na ghelɨ na leʼ ndù lêytɨ̀ ateyn. ⁴²Wù n-læ lem ntèʼ nâ sèynsɨ̀ na wùl na jas zue zue wâynà ŋweyn bula ŋêyn ŋweyn nî nà kelɨ ngeʼ ì lì, wu leʼ ndu lèytɨ̀ ateyn. À nà n-ghɨ ntèʼsɨ ma iwo i gàyn tî, wùl ɨ̀ kâʼ a wù leʼ ndù lèytɨ̀ ateyn na ka ghɨ bôŋ zuè ŋweyn. ⁴³Wù n-læ choʼ ntèʼ Bezà ibal atû kfɨ̀yn a nse ìyum sɨ̂ ghelɨ ndo nɨ̀ Lubèn ɨ choʼ ntèʼ Lamòt a Gilèd sɨ̂ ghelɨ ndo nɨ̀ Gâd ɨ choʼ ntèʼ Golàn a Bashàn sɨ̂ ghelɨ ndo nɨ̀ Mànasè.

Mosìs ɨ zɨ̀tɨ̀ sɨ fu tɨsaʼ tɨ Bôbo Fɨyini

⁴⁴Ɨtêyntɨ̀ nɨn ghɨ tɨ̀saʼ tìtɨ̀ a Mosìs nɨn læ fu sɨ̂ ghelɨ Isìlæ̀. ⁴⁵Mosìs nɨ̀n læ meyn fèʼtɨ̀ àwo kì a ka àŋena na ni-à ɨ fu tɨsaʼ tɨ dyêyn dzɨ sìsɨ̀ nô sɨ̀ jɨ̀m a ka àŋena na chî ateyn ɨtuʼ ghê a àŋena fvɨ̀ sɨ a Ijìb. ⁴⁶À nà n-ghɨ tì ma àŋena fvɨ̀ sɨ a Ijìb ɨ̀ gvì bɨ̀ afoŋlɨ a Bet Beyò injɨyn i jvâ Jodàn, abàs ghè a ɨchfɨ̂-iyvɨ i nɨn sal ateyn. Bet Beyò nà n-ghɨ ilaʼ nɨ̀ fòyn Sihòn vzɨ̀ a wù nà n-saʼ ghelɨ Amò, chî a Heshbòn, Mosìs ŋêyn ghelɨ Isìlæ̀ ɨ læ fvɨ̀ a Ijìb ɨ gvi tɨm yɨ ŋweyn. ⁴⁷Àŋena nɨ̀n læ tɨm yɨ fòyn Sihòn tì ɨ ghal ɨ fsɨ abâs ilaʼ nɨ̀ ŋweyn ɨ fi ghal ɨ fvɨ kɨmɨ àbâs ilaʼ nɨ̀ Ôg ɨ fòyn Bashàn. Tɨfôyn nâ tèyntɨ nà n-ghɨ tɨ̀fôyn tìtɨ̀ tɨ̀ bò a tɨ nà n-saʼ ilaʼ i Amò injɨyn i jvâ Jodàn, abàs ghè a ɨchfɨ̂-iyvɨ i nɨn sal ateyn. ⁴⁸Ɨlwêʼ nâ wèyn a ghɨ n-læ ghaytɨ fsɨ nà n-zɨ̂tɨ̀ kɨ a Alowà a mbæ̀ Àfòŋlɨ a Alnòn ndû chem a kfɨyn Siyòn ma à ti a Hemòn. ⁴⁹Ibal i Alabà i nà n-ghɨ kɨmɨ àbâs a Amò a li-a injɨyn i jvâ Jodàn nâ ghè. Ɨlwêʼ ateyn nà n-ndû kɨ tèyn chem a Jvâ ì Ghaʼnɨ a Alabà, isas i kfɨynsɨ a Bisgà.