Esther 2

Ghɨ choʼ Esta sɨ a wi ntoʼ

¹A nà n-ghɨ ta ghɨ chitɨ meyn koʼ ɨtoŋ yafɨnɨ nɨ̀ fòyn Zekzès ɨ bol, wu kfàʼtɨ̀ Vashtì ɨ kasi bètɨ̀ ìwo zɨ̀ a wu tî nì, baʼsɨ̂ nɨ̀ ìsaʼ zɨ̀ a nô ŋweyn nɨ̀ ngêŋ ŋweyn tî chwòsɨ̀ kûm Vashtì. ²Fòyn nɨn kfàʼtɨ̀ awo nâ kèynà tî, ghelɨ ghɨ felɨnɨ nɨ̀ ŋweyn ɨ kàŋtɨ̀ sɨ̂ ŋweyn na, “Mbæ̀, bè-a ghɨ kɨŋ ngòynsɨ jûŋsɨ̀, sɨ timî kya wi wul ɨ lûmnɨ̀ ɨ̀ gvì nɨ̀ àŋena sɨ̂ và. ³Mbæ̀ choʼtɨ ghelɨ ɨbyàs ilaʼ nɨ̀ và nô ɨ̀jɨ̀m ghɨ gvì nɨ̀ ngòyn sɨ jûŋ nâ sèynsɨ̀ a ndo afî a ghɨ̀ki nɨn chi ateyn a ntèʼ ì ghaʼnɨ a Suzà afêyn. Ghɨ gvî, ghɨ lèm àŋena sɨ̂ Hegày ɨ wul ɨ̀ felɨnɨ nɨ̀ và vzɨ̀ a wù n-tôʼnɨ̀ nɨ̀ ghɨ̀ki wù fu mɨyisi ɨ̀n jùŋ sɨ̂ àŋena ghɨ yisi nà jofà. ⁴Ghɨ nì tèyn a fòyn choʼ ngòyn zɨ̀ a yi n-jof sɨ̂ ŋweyn sɨ a wî ntoʼ alèʼ nɨ̀ Vashtì.” Iwo nâ yèynì ɨ fom sɨ̂ fòyn wu nì kɨ ta wul ɨ̀felɨnɨ nâ vzɨ̀ nì kàŋtɨ̀.

⁵À nà n-ghɨ tì wùl ɨ Jûsɨ̀ ɨ̀lvɨ̀ ɨ chî a ntèʼ ì ghaʼnɨ a Suzà ma wù fvɨ̀ isas i ndo nɨ̀ Benjamìn, izɨyn i ŋweyn i ɨ ghɨ Mòdèkayà. Mòdèkayà nà n-ghɨ wâyn Jayì, Jayì ɨ ghɨ wâyn Shemè, Shemè ɨ ghɨ wâyn Kîsh. ⁶Mòdèkayà nà ghɨ wul ɨ̀mòʼ antêynɨ̀ nɨ̀ ghelɨ ghì a Nèbùkànezà nɨn n-læ ghaytɨ a Jelusalèm baʼsɨ nɨ̀ Jèhòyachìn ɨ fòyn Judà ɨ ndù nɨ̀ àŋena a Babilòn. ⁷Mòdèkayà nà n-kelɨ jèmtɨ̀ ŋweyn ilì izɨyn i ŋweyn i ɨ ghɨ Hàdasà ghɨ toŋtɨ̂ kɨ mɨ na Està. Bò ŋweyn nɨ̀ nà ŋweyn nɨn læ kfɨ Mòdèkayà ɨ lì ŋweyn sɨ ŋweyn a wayn ɨ lemsɨ koʼ nɨ̀ ŋweyn. Està nà n-kelɨ ɨ̀wuyn ɨ jûŋ fî jofà.

⁸À nà n-ghɨ ta ghɨ jàŋ isaʼ zɨ̀ a fòyn nyàʼ, ghɨ gvì nɨ̀ ngòynsɨ̀ nô sɨ idvɨ̀ a ntèʼ ì ghaʼnɨ a Suzà ɨ lèm na Hegày na tôʼnɨ̀ nɨ̀ àŋena. Ghɨ n-li meyn ndu kɨmɨ nɨ̀ Està a ntoʼ ɨ fu nà Hegày vzɨ̀ a wu nà n-tôʼnɨ nɨ̀ ghɨ̀ki na tôʼnɨ̀ nɨ̀ ŋweyn. ⁹Hegày nɨn yeyn meyn Està ɨ nà kòŋà ɨ dyèyn àtem a juŋà sɨ̂ ŋweyn.Wu n-yeyn tî nô mɨ ɨlvɨ gha ɨ fu mɨyisɨ ɨ̀n jûŋ mzɨ̂ a ka wù yisi ɨ̀ nà jofà ɨ nà fî fu ɨ̀fwo ɨ yɨnɨ ɨ jûŋ sɨ̂ ŋweyn. Wù n-fi meyn choʼtɨ ghɨ̀kì ghɨ li nsòmbo a ntoʼ na ghɨ na tòʼnɨ̀ nɨ̀ Està ɨ fi lèm Està ŋêyn ghɨ̀kì nâ ghì a ndo ì jùŋ.

¹⁰À nà n-ghɨ tì bula Està fêʼtɨ̀ ìlaʼ zɨ̀ a wù lù ateyn nɨ̀ isas i ndo zɨ̀ a wù fvɨ̀ ateyn bula wù fêʼtɨ̀ na wu n-ghɨ wulɨ̀ Jûsɨ̀ bòm ta Mòdèkayà nà n-ghɨ ma wù kayn meyn na ka wû n-læ̀ fèʼtɨ̀. ¹¹À nà ghɨ nô mɨ achi àka Mòdèkayà ndû ghaynɨ̂ kal a ngùŋ alèʼ ghè a ghɨ̀ki nà n-chi ateyn sɨ yvɨ nâ Està ti n-ghɨ a jûŋa, ghɨ tôʼnɨ̀ nɨ̀ ŋweyn a. ¹²Ɨlvɨ nà se sɨ kfeyn nô mɨ sɨ̂ wayndà ngòyn ɨ̀kfà na wu zɨ a nchi nɨ̀ fòyn Zekzès a nà ghɨ ma wù yisi meyn mɨ̀yisi ɨ̀n jùŋ sɨ a bèŋ kɨ̀ ighel ta ghɨ n-lèm na ghɨ̀kì nâ ghèyn na yisi-à. Aŋena nà n-kelɨ sɨ nà yisî mɨvɨl mɨ̀ mœ̂ sɨ a njoŋsɨ ntufa ghɨ yisi ɨ̀fwo ɨ lɨmtɨnɨ vzɨ̀ a wu nî na ɨwuyn àŋena na jofà kɨ̀mɨ sɨ a njoŋsɨ ntufa. ¹³Ɨlvɨ nà kfeyn na wayndà ngòyn zɨ a nchi nɨ̀ fòyn, wù bɨf nô mɨ ghà ta wù n-kôŋ alèʼ nâ ghè, ghɨ fu, wu zɨ nɨ̀ akeyna. ¹⁴Waynda ngòyn nà n-zɨ̂ a nchi nɨ̀ fòyn aleŋ ɨlvɨ ikfa ɨ̀ chɨ ɨtuʼ ɨ layn wu fvɨ̀ ndù kɨ dzɨ abàs a ghè a ghɨ̀ki ibàm nɨ̀ fòyn nɨn n-chi ateyn a tôʼnɨ̀ nɨ̀ Shasgàz ɨ wul ɨ̀ fèlɨnɨ nɨ̀ fòyn, tôʼnɨ̀ nɨ̀ ghɨ̀ki afu. Waynda ngòyn nà n-fvɨ̂ a nchi nɨ̀ fòyn wu nà kelɨ wi sɨ fì sɨ zɨ a bu kɨ na fòyn yeyn meyn ŋweyn nà koŋà ɨ̀ jàŋ ŋweyn kɨ̀ nô a ŋweyn izɨyn.

¹⁵À nà n-ghɨ ta ɨlvɨ kfeyn na Està (ɨ wâyn ɨ wi vzɨ̀ a Mòdèkayà nɨ̀n læ lemsɨ a ghɨ wâyn Àbihèl ɨ lùmsɨ nà ŋweyn) zɨ a nchi nɨ̀ fòyn, Està ɨ faŋ tɨ̀ bɨf afo. Wù læ zɨ kɨ nɨ̀ àfo kì a Hegày ɨ wul ɨ̀ fèlɨnɨ nɨ̀ fòyn vzɨ̀ a wù nà n-tôʼnɨ̀ nɨ̀ ghɨ̀ki bè na wù zɨ nɨ̀ ànkeyna. Nô mɨ ndà nà n-yeyn Està wu nà kôŋ kɨ koŋ. ¹⁶Ghɨ n-læ li ndù nɨ̀ ŋweyn a nchi nɨ̀ fòyn Zekzès a njôŋ Tebèt a ghɨ a njoŋsɨ ìvɨ̀m a bêŋ ghè a fòyn nà n-saʼ na à na sɨ ghɨ bèŋsɨ̀ nsòmbo.

¹⁷Fòyn nɨ̀n yeyn meyn Està ɨ nà kôŋ ŋweyn chwô ta wu nà n-kôŋ ghɨ̀kì ntoʼ ghɨ li. Està nà n-jofɨ̀ sɨ̂ fòyn nô sɨ a ŋaŋ chwô ghɨ̀kì ghɨ li ghì a ghɨ n-kya wi wul ɨ lûmnɨ̀ tì, wu kæ sù àfol a ghɨkì ntoʼ a ŋweyn atu ɨ lèm ŋweyn sɨ a wî ntoʼ alèʼ nɨ̀ Vashtì. ¹⁸Fòyn ɨ baʼtɨ àyɨ a ghaʼnɨ-a sɨ ngvɨmlɨ Està ɨ làʼì chyeʼsɨ ŋweyn nô sɨ̀ jɨ̀m baʼsɨ̂ nɨ̀ ghelɨ ghɨ felɨnɨ nɨ̀ ŋweyn nô ghɨ̀ jɨ̀m. Wu n-bê meyn na achi nâ ki-à na ghɨ àchi a yvɨtɨnɨ-a kɨ̀ ɨbyâs ilaʼ nɨ̀ ŋweyn ɨ̀ jɨ̀m ɨ gwòtɨ̀ ɨ̀fwo sɨ̂ ghelɨ kɨ̀ sɨ a idvɨ̀ kɨ̀ ta wù lum gwôtɨ̀.

Mòdèkayà ɨ yvɨ ta ghɨ n-baʼtɨ̂ sɨ zue fòyn

¹⁹À nà n-ghɨ ta ghɨ̀kì ghî a ghɨ nà sɨ ghɨ ma ghɨ zɨ meyn a nchi nɨ̀ fòyn n-fî yvɨ̀ŋtɨ̀ alèʼ ghè a ghɨ̀ki ibam nɨ̀ fòyn nà n-chi ateyn, ma Mòdèkayà sɨ ghɨ wul ɨ̀felɨnɨ a ntoʼ. ²⁰À nà n-ghɨ ti Està ɨ ghɨ a ntoʼ wùl ɨ kya wi na wù n-ghɨ wul isas i ndo nɨ̀ Mòdèkayà, kya wi na wù n-ghɨ wùlɨ̀ Jûsɨ̀. Està nà n-lemâ Mòdèkayà ɨ bê sɨ ŋweyn na ka wu n-læ̀ fèʼtɨ̀ na yi n-ghɨ wulɨ̀ Jûsɨ̀. Està nà bu yvɨnɨ̂ kɨ Mòdèkayà ta wu nà yvɨnɨ ta wù n-lema.

²¹A nà ghɨ achi a li-a Mòdèkayà ɨ fêl ɨchfɨ mbàyn nɨ̀ fòyn, Bigtanà ŋêyn Telèsh ɨ ghelɨ ghɨ̀ a ghɨ nà n-chî ɨchfɨ̂ mbàyn nchi nɨ̀ fòyn ɨ nyòʼsɨ̀ ɨ̀toŋ sɨ̂ fòyn Zekzès ɨ nà kulɨ mɨ̀nàŋ sɨ zue ŋweyn. ²²Mɨtì Mòdèkayà ɨ yvɨ iwo ateyn ɨ fèʼtɨ̀ sɨ̂ Està ɨ wî ntoʼ, wu ndu fèʼtɨ̀ sɨ̂ fòyn, ɨ nì na fòyn na kya na à fèʼtɨ̀ Mòdèkayà sɨ̂ zɨ̀. ²³A nà ghɨ ta fòyn kɨŋ yeyn na iwo ateyn i nɨn ghɨ samoʼ, ghɨ shɨ̀ŋsɨ̀ ghelɨ ghɨ felɨnɨ nâ ghɨ̀ ghɨ̀ bò a mɨ̂kfɨ̀s. Ghɨ n-shɨ̀ŋsɨ tî ɨ nyàʼ àwo nâ kèynà nô à jɨ̀m a ŋwàʼlɨ̀ mɨ̀tɨtɨ̂ ghè a ghɨ nyâʼ awo ilaʼ ateyn fòyn ɨ yeyna.