Esther 3

Hamàn ɨ nyòʼsɨ̀ ɨ̀toŋ sɨ̂ Mòdèkayà

¹À nà n-ghɨ sɨ ibàm awo nâ ghàyn, fòyn Zekzès ɨ fu achɨ a ngaŋtɨnɨ-a sɨ̂ Hamàn a ntoʼ wu nà ngaŋtɨ̂ chwô chyeʼ sɨ lisɨ. Hamàn nà n-ghɨ wâyn Hamedatà ɨ wul ɨ̀ Agàg. ²Ghelɨ ghɨ felɨnɨ nɨ̀ fòyn ghì a ghɨ nà nduʼ ɨchfɨ mbàyn nɨ̀ fòyn nô ghɨ̀ jɨ̀m nɨn nguʼ meyn àlvɨ ɨ ngvɨmlɨ Hamàn bòm ta fòyn nà n-ghɨ ma wù fu meyn ìsaʼ na àŋena na ngvɨmlɨ̂ ŋweyn a dzɨ nâ ghàyn. Mɨtì Mòdèkayà ɨ teyn na yi n-nguʼ wi alvɨ kèsa sɨ ngvɨmlɨ Hamàn.

³Wu n-nì tì, ghelɨ ghɨ felɨnɨ nɨ̀ fòyn ghì a ghɨ n-duʼ ɨchfɨ mbàyn nɨ̀ fòyn ɨ bɨf sɨ̂ ŋweyn na, “Bòm ghà ta wà n-yvɨnɨ wi isaʼi fòyn a?” ⁴Àŋena nà n-taŋî sɨ̂ Mòdèkayà kɨ̀ achi nɨ̀ àchi a mɨtì wu leʼ na wu nî wì iwo zɨ̀ a àŋena nɨn bê. Àŋena kæ fèʼtɨ̀ ìwo ateyn sɨ̂ Hamàn sɨ yvɨ na ghɨ ti kàʼ a ghɨ visi Mòdèkayà a wù na chî kɨ a dzɨ nâ ghàyn a. À nà ghɨ tì ma Mòdèkayà feʼtɨ meyn sɨ̂ àŋena na yi n-ghɨ wul ɨ̀ Jûsɨ̀.

⁵A nà ghɨ ta Hamàn yèyn na Mòdèkayà nɨ̀n nguʼ wi alvɨ sɨ, ngvɨmlɨ̂ ŋweyn, ɨtoŋ ŋweyn ɨ yaf. ⁶Hamàn nɨn yvɨ na Mòdèkayà nɨn ghɨ wulɨ̀ Jûsɨ wu yeyn na sɨ zue kɨ Mòdèkayà na koʼ kfeynɨ̂ wì iwo, wu kɨŋ dzɨ sɨ zuetɨ ghelɨ Jûsɨ̀ nô ghɨ̀ jɨ̀m ta ghɨ nà ghɨ ilaʼ i Besìyà.

⁷À nà ghɨ a njoŋ ɨyɨ̂ asɨ a bêŋ ma àti njôŋ Nisàn a bêŋ ghè a fòyn Zekzès nɨn saʼ Besìya na à na sɨ ghɨ bèŋ njvàsɨ̀ bò, Hamàn ɨ bè na ghɨ tɨm bèyʼ ɨ̀ yèyn nâ ghɨ kàʼ a ghɨ zuetɨ ghelɨ Jûsɨ̀ achi àkà a njoŋ ìka a.? Iwo ateyni fe a njôŋ njvàsɨ̀ bò ma à ti njôŋ Adà.

Hamàn ɨ baʼtɨ sɨ zuetɨ ghelɨ Jûsɨ̀, fòyn ɨ tòʼ

⁸Ghɨ nì tì Hamàn ɨ bè sɨ̂ fòyn Zekzès na, “Mbæ̀, ghelɨ ghɨ li nɨn ghɨ ma ghɨ waŋtɨ meyn kal kɨ ɨbyâs ilaʼ nɨ̀ và nô ì jɨ̀m. Àŋena nɨn chî a wa ilaʼ chî wì ta ghelɨ ghya nɨn chi. Àŋena nɨn yvɨnɨ̂ wì tɨsaʼ tɨ ilaʼ nɨ̀ và. Yi n-jofɨ̀ wì na wà visi àŋena na chi-à. ⁹Wà kæ nà koŋ a mbæ̀, wa chwòsɨ̀ ìsaʼ na ghɨ zuetɨ ghelɨ nâ ghèyn nô ghɨ̀ jɨ̀m. Mɨ n-fu lèm àso ɨkwo a fɨfâ sɨ ghelɨ ghì a ghɨ n-lêm ɨfwo a ntoʼ kɨ dɨ̀lɨ̀ chem kilùsɨ̀ nkam ighɨ ìtal nɨ̀ kilùsɨ̀ nkamsɨ mɨ̀vɨm kæ̀ sɨ̂ ghelɨ ghì a ghɨ nì ifêl nâ yeynì.

¹⁰Wu n-bè tî fòyn ɨ choʼ fɨ̀nchaʼfɨ tɨ̂fòyn sɨ a ŋweyn awu ɨ fu sɨ̂ Hamàn ɨ wâyn Hamedatà ɨ wulɨ̀ Agàg. Hamàn nà n-ghɨ mbàynɨ̀ ghelɨ Jusɨ̀. ¹¹Fòyn ɨ beynsɨ ɨ bè sɨ̂ Hamàn na, “ Lem ɨkwo ateyn ɨ nì ìwo zɨ̀ a wà n-kôŋ nɨ̀ ghelɨ nâ ghèyn.”

¹²A nà ghɨ a mɨchi njvàsɨ̀ tal a njoŋ iyî àsɨ a bêŋ Hamàn ɨ jàŋtɨ̀ ghelɨ ghɨ nyaʼnɨ nɨ̀ fòyn, ɨ fèʼtɨ̀ ìwo zɨ̀ aka àŋena, àŋena nyàʼ ghɨ tum kɨ ɨbyâs ilaʼ ɨ̀jɨ̀m. Ghɨ nà nyâʼ nô mɨ sɨ̂ àbas ilaʼ àkà kɨ̀ ìtaŋi nɨ̀ àŋena tum sɨ̂ ghelɨ ghɨ tisɨnɨ baʼsɨ̂ nɨ̀ ghɨ̀bo ntèʼ ghì a ghɨ nà n-tisɨ inôyn a ghêl ɨlweŋ ɨlweŋ. Ghɨ n-nyàʼ ŋwàʼlɨ̀ nâ sèynsɨ̀ izɨyn nɨ̀ fòyn Zekzès ɨ nchwæ̀ nɨ̀ nchwæ fɨ̀nchaʼfɨ awu nɨ̀ ŋweyn. ¹³Ghɨ n-fu ŋwàʼlɨ̀ sɨ ateyn sɨ̂ ghelɨ ntum na àŋena jel gwòtɨ̀ kɨ̀ ɨbyâs ilaʼ ɨ̀ jɨ̀m vzɨ̀ a fòyn nà nsaʼ. Isaʼ zɨ̀ a ghɨ n-nyàʼ a ŋwàʼlɨsɨ nâ ghè nɨn fu meyn àdyaʼ na ghɨ zuetɨ ghelɨ Jûsɨ̀ nô ghɨ̀ jɨ̀m kɨ̀ achi àmòʼ. Yi nà ndyêyn na ghɨ zuetɨ ghɨ̀lema nɨ̀ ngvâʼ wùl nɨ̀ ghɨ̀ki baʼsɨ̂ nɨ̀ woynda a mɨchi njvàsɨ̀ tal a njoŋ Adà, ɨ̀ kùmtɨ ɨ̀fwo àŋena. ¹⁴Ghɨ na kelɨ sɨ jàŋ sɨ fèʼtɨ isaʼ zɨ̀ a yi ghɨ a ŋwàʼlɨ̀ nâ ghàyn sɨ̂ ghelɨ kɨ̀ ɨbyâs ilaʼ ɨ̀jɨ̀m ta ka àŋena na gvɨ̀tɨ̀ sɨ ni kɨ ta isaʼ ateyn nɨ̀n bê achi nâ ghè.

¹⁵Fòyn n-læ meyn bè ghelɨ ntum nâ ghì ɨ nyàŋsɨ fvɨ ndù nɨ̀ ŋwàʼlɨ̀ sɨ ateynsɨ kɨ̀ ɨbyâs ilaʼ ɨ̀jɨ̀m. Ghɨ njaŋ meyn ŋwàʼlɨ̀ àteyn ìlì a ntèʼ ìghaʼnɨ a Suzà. Ghɨ n-jàŋ tî fòyn ŋêyn Hamàn ɨ dùʼì ɨ nà nyvɨtɨ̂ mɨ̀lûʼ mɨtì iwo ateyn i fu ngeʼ sɨ̂ ghelɨ ntèʼ Suzà nô sɨ a ŋaŋ.