Esther 5

Està ɨ ndù asɨ nɨ̀ fòyn

¹À nà n-ghɨ ibàm i mɨchi ɨ̀n tal ta ghɨ bam mèsì ɨ̀chfɨ̂, Està ɨ màʼ ndzɨsɨ ghɨ̀ki ntoʼ ɨ zɨ ndu timi ɨchfɨ nsàŋ alèʼ ghè a fòyn nɨ̀n n-fsɨsɨ ghelɨ ateyn. Fòyn nà n-duʼ achɨ a tɨ̂fòyn nɨ̀ ŋweyn ma wù kèʼnɨ̀ ɨ̀chfɨ nsàŋ. ²A nà ghɨ ta wù yeyn Està, ma à ti wî ntoʼ wu ti ɨchfɨ nsàŋ, iwo ateyni ɨ fom sɨ̂ ŋweyn wu nàysɨ mbàŋ tɨ̀fòyn nɨ̀ ŋweyn zɨ̀ a ghɨ lom nɨ̀ àso ɨkwo a baŋnɨ-a, Està ɨ ndu kùm àtu a mbàŋ àteyn.

³Fòyn ɨ bɨf na, “À n-ghɨ ghà a wî ntoʼ? Wà n-kɨŋ ghà? Wà bɨ̀f nô mɨ àbâs ilaʼ a mà fu sɨ̂ và.

⁴“Està ɨ bèynsɨ̀ ɨ bè na, “Yi kæ sɨ nà kfeynɨ̂ sɨ̂ và a mbæ̀, zɨ̂ Hamàn ni gvì layn ɨ yɨ ɨfwo ɨ yɨnɨ ta mà kfè sɨ̂ và.”

⁵Fòyn ɨ bè na, “Yì jaŋ gvì nɨ̀ Hamàn kɨ̀ lvɨ̂yn ghesɨ̀ ŋweyn nì ìwo zɨ̀ a Està nɨ̀n bê.”

Fòyn ŋêyn Hamàn ɨ ndù sɨ yɨ ɨfwo ɨ yɨnɨ vzɨ̀ a Està kfè. ⁶A nà ghɨ ta àŋena nɨn yvɨtɨ mɨlûʼ, fòyn ɨ fi bɨf sɨ̂ Està na, “Nô lvɨ̂yn tèyn wà n-kɨŋ na mà ni gha sɨ̂ và a? Wà kæ nà kɨŋ nô mɨ àbâs ilaʼ nɨ̀ mà a mà fu sɨ̂ và.”

⁷Està ɨ bèynsɨ̀ ɨ bè na, “Mɨ n-chwotɨ a mbæ̀ na: ⁸Wà kæ nà kôŋ sɨ yvɨ sɨ ni iwo zɨ̀ a mɨ n-kɨŋ, zɨ̂ Hamàn ɨ læ fi gvì a libɨs ɨ yɨ ayɨ kì a mɨ n-baʼtɨ sɨ̂ fòyn a libɨs. Yì læ̀ gvi yɨ a mà kæ fèʼtɨ̀ iwo zɨ̀ a mɨ n-kɨŋ na wà ni sɨ̂ mà.

Hamàn ɨ baʼtɨ sɨ zue Mòdèkayà

⁹Hamàn nɨ̀n fvɨ̀ a ntoʼ achi nâ ghè saŋlɨ-à, atem a ŋweyn a ɨ foma. Mɨtì ɨ se sɨ fvɨ̀ ɨ yeyn Mòdèkayà ɨchfɨ ntoʼ, wu faŋtɨ̀ làlì iyvɨ ɨ̀ faŋ mɨ tɨ̀ ngvɨ̀mlɨ ŋweyn, iwo ateyni yaf ŋweyn nô sɨ̂ a ŋaŋ. ¹⁰Wu n-yaf mɨtì, Hamàn ɨ ghal ngêŋ ŋweyn ɨ kfa a ndo. Wu n-kfa tî ɨ jàŋ wî ŋweyn ɨ Zelèsh, ɨ jàŋtɨ̀ ghelɨ ijèl nɨ̀ ŋweyn, ¹¹ɨ taŋi nɨ̀ ìghaŋsɨ iwùyn i sɨ̂ àŋena kûm ìghaʼ i bemnɨ zɨ̀ a wù nà n-kelɨ, nɨ̀ woyn ŋweyn ta wù n-kelɨ ghɨ dvɨ-à. Wu n-fi meyn ghaŋsɨ taŋi kûm ɨ̀kfɨm vzɨ̀ a fòyn fù sɨ̂ ŋweyn fì lèm ŋweyn alèʼ wù na ngaŋtɨ̂ chwô ghelɨ ghɨ felɨnɨ ghɨ li nɨ̀ chyeʼsɨ. ¹²Hamàn nɨn taŋi tì ɨ fi bè na, “Awo ateyn a bû mæ̀ kɨ̀ têyn. Està ɨ wî ntoʼ nì jàŋ kɨ̀ ma na ghesɨ̀ fòyn ndû yɨ ɨfwo ɨ yɨnɨ vzɨ̀ a wù nì kfe. Wù fi meyn bè na ghesɨ̀ fòyn læ̂ fì gvì yɨ a libɨs.” ¹³Mɨtì awo nâ kèynà nô à jɨ̀m kàʼ kɨ bû nì mà na saŋlɨ-à bu ki yeyn Mòdèkayà ɨ wul ɨ̀ Jûsɨ̀ wèyn ta wù n-duʼ ɨchfɨ ntoʼ.”

¹⁴Zelèsh ɨ wî Hamàn baʼsɨ̂ nɨ̀ ghelɨ ijèl nɨ̀ ŋweyn ghì nô ghɨ̀ jɨ̀m ɨ be sɨ̂ ŋweyn na, “Bè-a ghɨ yɨs fɨkfɨ̂s fɨ dyêf chem ntàmsɨ̀ mɨ̀vɨm ɨ̀m bò, wà læ̂ ndù tàŋi zɨ̂ fòyn bɨsì bɨsì a libɨs wù be ghɨ shɨŋsɨ Mòdèkayà ateyn. Yi gàyn têyn a zɨ̂ fòyn ndu alèʼ ayɨ a wà na yɨ-a saŋlɨ-à.” Àŋena n-bè tî Hamàn ɨ nà saŋlɨ-à ɨ bè ghɨ yɨ̀s fɨ̀kfɨ̂s fɨ ateynfɨ.