Esther 4

Mòdèkayà ɨ tum Està sɨ̂ fòyn

¹A nà ghɨ ta Mòdèkayà yvɨ awo kì a kɨ gàyn nô àjɨ̀m, wu bàytɨ̀ ndzɨsɨ sɨ a ŋweyn ɨwùyn ɨ màʼ fɨ̀ntsɨ ɨ fi kfɨ̀m àbvɨ ichɨ a ŋweyn atu ɨ fvɨ ndù a ntèʼ ɨ byal dzɨ̀ nô nɨ̀ gyâ ì to nɨ̀ àtem a dɨlɨnɨ-a. ²Wu ndù mɨtì ɨ chem kɨ ɨchfɨ ntoʼ bòm ta wùl nà zɨ a ntoʼ nɨ̀ fɨ̀ntsɨfɨ ɨwùyn. ³Ghɨ nà n-jâŋ ìsaʼ zɨ̀ a fòyn chwòsɨ̀ nô mɨ abàs ilaʼ à kà ghelɨ Jûsɨ̀ ɨ fe kɨ nɨ̀ ìdzɨ-ì, ɨ nà dzɨ-à bam ɨ̀chfɨ̂, byal dzɨ-à kumî ɨ̀wuyn. Àŋena ghɨ dvɨnɨ nɨn læ meyn màʼ fɨ̀ntsɨ ɨ kfɨ̀m àbvɨ ichɨ à àŋena ɨtu.

⁴Ghelɨ ghɨ felɨnɨ nɨ̀ Està ghɨ lûmnɨ̀ nɨ̀ ghɨ̀ki ɨ gvì fèʼtɨ̀ dzɨ zɨ̀ a Mòdèkayà nɨ̀n ghɨ ateyn, iwo ateyn fu ngeʼ sɨ̂ Està nô sɨ a ŋaŋ, wu tum ndzɨsɨ sɨ̂ Mòdèkayà na wù kwo màʼ ɨ̀nseynsɨ ɨ̀ choʼ fɨ̀ntsɨ, mɨtì Mòdèkaya ɨ teyn na wu n-fsɨ wi ndzɨsɨ ateyn. ⁵Wu n-teyn tî Està ɨ jàŋ Hatàk ɨ wul ɨ̀ felɨnɨ nɨ̀ fòyn ɨ̀lvɨ ta ghɨ n-choʼ na wù na felɨ̀ sɨ̂ ŋweyn ɨ tum na wù ndu, yeyn nâ à gàyn ghà nà fu ngeʼ sɨ̂ Mòdèkayà a.

⁶Hatàk ɨ fvɨ ndu yeyn Mòdèkayà ɨchfɨ ayisi afî a kɨ nà n-ghɨ ɨchfɨ ntoʼ. ⁷Mòdèkayà nɨn feʼtɨ meyn àwo kì nô à jɨ̀m a kɨ gàyn sɨ̂ ŋweyn sɨ̂ Hatàk, baʼsɨ̂ nɨ̀ àkôyn ɨkwo kì a Hamàn chfɨ̀nɨ̀ sɨ fu sɨ zɨsɨ à alèʼ ghè a ghɨ n-lêm ɨfwo ntoʼ ateyn ta ka ghɨ zuetɨ ghelɨ Jûsɨ̀ nô ghɨ̀jɨ̀m. ⁸Wù n-fu meyn kɨmɨ ŋwàʼlɨ̀ zɨ̀ a ghɨ nyàʼ isaʼ ateyn na ghɨ zuetɨ ghelɨ Jûsɨ̀ nô ghɨ̀ jɨ̀m, ma ghɨ jaŋ meyn kɨ̀mɨ ŋwàʼlɨ̀ àteyn a ntèʼ ìghaʼnɨ a Suzà ɨ bè na Hatàk zɨ dyèyn sɨ̂ Està ɨ̀ fèʼtɨ̀ ìwo zɨ̀ a yi n-ghɨ ateyn. Wu n-fi meyn bè sɨ̂ Hatàk na wù zɨ wu bè sɨ̂ Està na wù ndu yeyn fòyn ɨ̀ chwòtɨ wù gamtɨ ghelɨ ŋweyn.

⁹Hatàk ɨ kasi ndu fèʼtɨ̀ ìwo zɨ̀ sɨ̂ Està a Mòdèkayà bè. ¹⁰Està ɨ kæ be sɨ̂ Hatàk na wù kasi ndù bè sɨ̂ Mòdèkayà na, ¹¹“Ghelɨ ghɨ felɨnɨ nɨ̀ fòyn nô ghɨ̀ jɨ̀m baʼsɨ̂ nɨ̀ ghelɨ ghì a ghɨ n-ghɨ ɨbyàs ilaʼ afêyn nô ɨ̀ jɨ̀m nɨn kya na nô mɨ wul ɨ wi ɨ̀ kfà kèsa ɨ̀lûmnɨ̀ kæ sɨ zɨ sɨ yeyn fòyn a nsàŋ bula à jâŋ fòyn jàŋ ŋweyn, a iwo-i na ghɨ kɨ ìmòʼ na ghɨ zue ŋweyn. Ghɨ kàʼ a ghɨ faŋ kɨ tɨ̀ zue ŋweyn ɨlvɨ ta fòyn nàysɨ̀ mbàŋ tɨ̀fòyn nɨ̀ ŋweyn zɨ̀ a ghɨ lom nɨ̀ àso ɨkwo a baŋnɨ-a wùl àteyn ghal. Mɨ̀chi chwô meyn mɨ̀vɨm ɨ̀n tal ta fòyn tî jàŋ mà, ma ndu yeyn ŋweyn.”

¹²A nà n-ghɨ ta ghɨ ndù fèʼtɨ̀ awo kì a Està bè sɨ̂ Mòdèkayà, ¹³wu kasi tum na ghɨ ndu bè sɨ̂ Està na, “Ka wa n-kfâʼtɨ̀ na a n-bœ̂ kɨ và antêynɨ̀ nɨ̀ ghelɨ Jûsɨ̀ nô ghɨ̀ jɨ̀m bòm ta wà n-ghɨ a ntoʼ. ¹⁴Wà kæ sɨ chimi moŋ lvɨ̂yn a igâmtɨ̀ i lu alèʼ a kɨlu-à ɨ̀ gàmtɨ̀ fvɨ̀sɨ̀ ghelɨ Jûsɨ̀ sɨ a ngeʼ afêyn a àŋena nɨn ghɨ ateyn tèyn, mɨtì a zɨ̂ ghelɨ ndo nɨ̀ bò vâ kfɨtɨ. Wà ti kèli sɨ a gha na ghɨ bu tî lèm và sɨ a wî ntoʼ kɨ bòm ɨ̀lvɨ têyn ta ɨwêyn a?”

¹⁵Està ɨ yvɨ iwo ateyn ɨ kasi tum na ghɨ ndu bè sɨ̂ Mòdèkayà na, ¹⁶“Ndu yvɨ̀ŋtɨ ghelɨ Jûsɨ̀ ghî a ghɨ n-ghɨ a Suzà nô ghɨ̀ jɨ̀m, yì jem sɨ̂ mà ɨ̀ bam ɨchfɨ̂ sɨ a mɨchi ɨ̀n tal nɨ̀nchuè nɨ̀ntuʼ, wùl ɨ yɨ wi afo, nyvɨ wi nô mɨ nkàyn mù. Ghesɨ̀ ghelɨ ghɨ felɨnɨ nɨ̀ mà nɨn boŋ bam ɨ̀chfɨ̂ kɨ̀ ta yi n-bam. Ghɨ n-bam mèsì ɨ̀chfɨ̂ nô mɨ ɨlvɨ gha a mà ndu yeyn fòyn, nô mɨ ta isaʼi nɨn tuynsɨ. À kæ sɨ nà ghɨ ìkfɨ a mà kfɨ.”

¹⁷Esta nɨn bè tì Mòdèkayà ɨ kæ lù sɨ ndu sɨ nì nô mɨ ghà kɨ̀ ta wù bè.