Exodus 11

Woyn ghɨ lûmnɨ̀ ɨ ghɨ asɨ nɨ̀ ghelɨ Ijìb ɨ kfɨtɨ

¹À n-læ nà ghɨ ɨlvɨ nâ ghàyn ma Bôbo Fɨyini bè meyn sɨ̂ Mosìs na, “Mɨ n-fì mâʼ kfeynsɨ ngeʼ ìlì atu nɨ̀ fòyn Ijìb ŋêyn ilaʼi ŋweyni a à na ghɨ ibàm ateyn a wù visi a yì lu. Wu nì visi-à ɨ̀ jùm zɨ̀ kɨ̀ samoʼ. ²Bè sɨ̂ ghelɨ Isìlæ na woyn ghɨ lûmnɨ̀ nɨ̀ ghɨki nô ghɨ jɨ̀m na bɨf ɨfwo sɨ̂ ghelɨ Ijìb ghì a ŋêyn àŋena nɨn chi baʼsɨ, ma ghɨ faytɨ nɨ̀ àso ɨkwo a fɨfâ nɨ ɨvzɨ̂ a ghɨ faytɨ nɨ̀ àso ɨkwo a baŋnɨ-a.” ³À nà n-ghɨ tì ma Bôbo Fɨyini ni meyn ghelɨ Ijìb na kôŋ ghelɨ Isìlæ̀. Chyeʼsɨ ntoʼ Ijìbsɨ̀ nɨ̀ ghelɨ Ijìb nà n-ki Mosìs wu koʼnɨ̂ nô sɨ a ŋaŋ. ⁴Mosìs ɨ bè sɨ̂ fòyn Ijìb na, “Bôbo Fɨyini bè na, a nì nà ghɨ antêynɨ̀ nɨ̀ntuʼ a mà jel ɨ̀ tòynɨ ìlaʼ i Ijìb kɨ ì jɨ̀m, ⁵a nô mɨ wayn ɨ lûmnɨ̀ ɨwû àsɨ ɨ̀kfà isas i ndo nɨ̀ wùl ɨ̀ Ijìb kfɨ, zɨtɨ̀ kɨ nɨ wâyn fòyn Ijìb, sɨ kàlì sɨ chem ateyn nɨ ɨwû wayn ɨ wi ɨ̀ felɨnɨ vzɨ̀ a wù n-gvâ ɨfwo a iti baʼsɨ̂ nɨ̀ woyn nyâm sɨ lûmnɨ̀sɨ̀ ɨ ghɨ asɨ. ⁶Ghɨ n-yvɨ ìdzɨ̂ ikaynɨ-i kɨ̀ ilaʼ i Ijìb ì jɨ̀m, bula ghɨ timi yvɨ̀ achi a li-a, ghɨ wi sɨ læ̀ sɨ fì sɨ yvɨ. ⁷Mɨtì a à na ghɨ alèʼ ghè a ghelɨ Isìlæ̀ nɨn chi ateyn a nô mɨ bɨ faŋ tɨ̀ buf sɨ̂ wùl, kèsa sɨ̂ nyàm. À ti ta ka fòyn Ijìb nî yeyn kèli na Bôbo Fɨyini nɨn lî ghelɨ Isìlæ̀ sɨ a nyiŋ sɨ ghelɨ Ijìb. ⁸Chyeʼ shya sèynsɨ̀ nô sɨ̀ jɨ̀m nɨn gvî tɨm àlvɨ a ma asɨ ɨ̀ nà chwotɨ̂ mà na mà li ghelɨ̀ ghem ghesɨ̀ àŋena lu, sɨ a ibàm ateyn, a mà lu.” Mosìs ɨ taŋi tì ɨ lù sɨ asɨ nɨ̀ fòyn Ijìb ma ɨtoŋ ŋweyn yaf meyn nô sɨ a ŋaŋ. ⁹À nà n-ghɨ mɨ tì ma Bôbo Fɨyini be meyn sɨ̂ Mosìs na, “Fòyn Ijìb nɨn yvɨ wi iwo zɨ̀ a wa n-bè ta ka mà fî tòʼ nì àwo a kaynɨ-a nɨ̀ mà a Ijìb.” ¹⁰Mosìs ŋêyn Alòyn nɨn læ nì awo a kaynɨ-a nâ kèynà nô à jɨ̀m asɨ nɨ̀ fòyn Ijìb mɨtì Bôbo Fɨyini ɨ tosɨ kɨ tosɨ atem a fòyn Ijìb, wu faŋ tɨ̀ vìsi na ghelɨ Isìlæ̀ lu sɨ a ŋweyn ilaʼ.