Exodus 16

Ghelɨ Isìlæ̀ ɨ nà ghâm Mosìs

¹Ghelɨ Isìlæ̀ nô ghɨ̀ jɨ̀m nɨ̀n læ meyn lù sɨ a Elìm ɨ ndù a nse iyum a Sîn, alèʼ ghè a Elìm nɨn lêm ighami ateyn ŋêyn Sinày. Àŋena nɨn læ se sɨ gvì sɨ chem a Sîn ma à sɨ ghɨ mɨchi njvàsɨ̀ tâyn a ànkùmtɨ̀ a njoŋ sɨ achi ta àŋena fvɨ̀ sɨ a Ijìb. ²Àŋena nɨn læ gvi chem a nse iyum tì ɨ nà sɨ ghâm Mosìs ŋêyn Alòyn, ³bê na, “Yi tî nà kwo jôf na Bôbo Fɨyini zuetɨ ghes a Ijìb. À tî nà ghɨ afu, ghèsɨ̀ kfe njwò seysɨ ɨ̀ kfɨla, yɨ nô mɨ ghà ta ghès nɨn kôŋ. Mɨtì yi lî gvì nɨ̀ ghès a nse iyum na jèŋ zuetɨ mèsì ghès.”

⁴Àŋena taŋi tì Bôbo Fɨyini ɨ bè sɨ̂ Mosìs na, “Lvɨ̂yn tèyn, mɨ n-suʼsɨ̂ ɨ̀fwo ɨ yɨnɨ sɨ̂ zɨ̀ iyvɨ. Wu na se sɨ suʼi, nô mɨ ndà ɨ nà ndû myêl kɨ ɨvzɨ a wù kàʼ a wù yɨ kfeyn achi nâ ghè. À ti dzɨ zɨ̀ a ka mà mom àŋena ateyn sɨ yeyn nâ àŋena nɨn lèm tɨ̀saʼ temtɨ ma ghɨ n-lèm wì a. ⁵À na ghɨ a mɨchi ntufa, àŋena myèl, ɨ kfè wu dvɨ̂ kfeyn sɨ yɨ sɨ a mɨchi ɨ̀m bò.”

⁶Bôbo Fɨyini ɨ taŋi tì Mosìs ŋêyn Alòyn ɨ bè sɨ̂ ghelɨ Isìlæ̀ nô ghɨ̀ jɨ̀m na, “A nì nà ghɨ aleŋ ɨlvɨ ikfa, a yì keli na à tî fvɨ̀sɨ̀ Bôbo Fɨyini fvɨ̀sɨ̀ zɨ̀ sɨ a Ijìb. ⁷Ɨtuʼ nɨn bɨs layna, a yì yeyn iŋwâʼ i Bôbo Fɨyini bòm ta wù yvɨ meyn ta yi n-ghâm ŋweyn. Ka yì na kfàʼ na yi n-ghâm ghès. Ghès ti n-ghɨ nô ghɨ̀ ndà na yì na ghâm ghes a?” ⁸Mosìs nɨ̂n fi meyn bè sɨ̂ àŋena na, “Yi nì kelî na yi n-ghâm Bôbo Fɨyini ɨlvɨ ta wù n-fu njwò sɨ̂ zɨ̀ aleŋ ɨlvɨ ikfa, ɨtuʼ bɨs ɨ̀ layn wu fu ɨfwo ɨ yɨnɨ sɨ̂ zɨ̀, yi yɨ kfeyn kɨ ta yi n-kôŋ. Wù yvɨ meyn ta yi n-ghâm ŋweyn. Yi n-ghâm wì ghes, yi n-ghâm Bôbo Fɨyini.”

⁹Mosìs ɨ taŋi tì ɨ bè sɨ̂ Alòyn na, “Bè sɨ̂ ghelɨ Isìlæ̀ nô ghɨ̀ jɨ̀m na àŋena gvi asɨ nɨ̀ Bôbo Fɨyini bòm ta wù yvɨ meyn ta àŋena nɨn ghâm ŋweyn.”

¹⁰A nà ghɨ ta Alòyn ndù nà taŋi sɨ̂ ghelɨ Isìlæ̀, àŋena se sɨ ki sɨ ndùsɨ̀ a nse iyum ɨ yeyn iŋwâʼ i Bôbo Fɨyini yi bayn antêynɨ̀ àtùŋ a mbàʼsɨ̀. ¹¹Bôbo Fɨyini ɨ bè sɨ̂ Mosìs na, ¹²“Ma yvɨ meyn ta ghelɨ Isìlæ̀ nɨn ghâm ma. Bè sɨ̂ àŋena na, ‘À na ghɨ aleŋ ɨlvɨ ikfa nô mɨ achi à kà yi kfɨl njwò, ɨtuʼ layn yi yɨ kfeyn kɨ ta yi n-kôŋ. Yi n-gàyn tèyn a yì keli na mɨ n-ghɨ Bôbo Fɨyini, ɨ Fɨyini fifɨ.’”

Bôbo Fɨyini ɨ fu kwelsɨ̀ baʼsɨ̂ nɨ̀ manà sɨ̂ woyn Isìlæ̀.

¹³A nà ghɨ aleŋ ɨlvɨ ikfa achi nâ ghè, mɨ̀nyuyn ɨ̀n lì ghɨ toŋtɨ̂ na kwelsɨ̀ ɨ gvɨ̀ kɨ ɨlwêʼ ɨ̀ jɨ̀m alèʼ ghè a àŋena nɨn bɨ̀ ateyn. Ɨtuʼ ni se sɨ layn àŋena yeyn ma amyâʼ a suʼi meyn kal alêʼ nâ ghè nô à jɨ̀m. ¹⁴Amyâʼ ateyn a ɨ se sɨ yum, mɨ̀bàŋnɨ̀ mɨ̀ ɨfwo ɨ̀n lì ɨ faŋ a nse, sayn fɨfɨ ndû tèyn ta awœ. ¹⁵Ghelɨ Isìlæ̀ ɨ yeyn tî ɨ nà bɨf kɨ sɨ a àŋena ngeŋsɨ na, “Akeynà ti n-ghɨ ghà?” Bòm ta àŋena nà n-ghɨ bula ghɨ timi yeyn afo nâ kì. Mosìs ɨ bè sɨ̂ àŋena na, “Ɨwêyn nɨn ghɨ ɨ̀fwo ɨ yɨnɨ ta Bôbo Fɨyini fu na yì yɨ. ¹⁶Bôbo Fɨyini chwosɨ meyn ìsaʼ na, ‘Nô mɨ ndà na myelà wu kfeyn kɨ ta ka wù yɨ kul. Wùl na kelɨ ghelɨ a ŋweyn ɨtwò, wu nà fêʼnɨ̀ myêl kɨ omà ìmòʼ sɨ̂ wùl.’”

¹⁷Ghelɨ Isìlæ̀ ɨ ni kɨ iwo zɨ̀ a Mosìs bè. Ghelɨ ghɨli nà myêl kɨ sɨ ilæ, ghɨli myêl sɨ a idvɨ̀. ¹⁸A nà ghɨ ta ghɨ n-fêʼ ɨfwo ɨ yɨnɨ ateyn a omàsɨ̀, ghɨ yeyn na ghelɨ ghì a ghɨ nì nà myêl sɨ a idvɨ̀ bû nì myèl ɨ̀ chwò ta ghɨ nì nà kelɨ sɨ myèl, ɨghî a ghɨ nì myèl sɨ ilæ ɨ ghɨ ma ghɨ ni meyn myèl wu boŋ kfeyn kɨ̀ a àŋena iyɨ. Nô mɨ ndà nà n-myelà wu kfeyn kɨ a ŋweyn iyɨ.

¹⁹Àŋena nɨn læ myèl tî, Mosìs ɨ bè sɨ̂ àŋena na, “Ka ɨtuʼ nɨ̂n layn kòli àfo ateyn.”

²⁰Wu n-bè mɨtì, ghelɨ ghɨli ɨ faŋ tɨ̀ yvɨ̀nɨ, ɨ yɨ bɨsɨ ɨlvi, ɨtuʼ se sɨ layn ma gvɨysɨ chwo meyn sɨ ateyn, wu nà sɨ lɨmà. Ɨtoŋ Mosìs ɨ yaf sɨ̂ àŋena.

²¹Nô mɨ nda nà n-bɨsɨ myêl ɨ̀fwo ɨ yɨnɨ ateyn wu kfeyn kɨ ta ka wù yɨ achi. Chuè nî bayn to, ɨvzɨ̂ a wu fàŋ a nse ɨ saŋi. ²²A nà ghɨ a mɨchi ntufa, ghelɨ ghɨ tisɨnɨ Isìlæ̀ ɨ yeyn ta nô mɨ ndà nɨn myêl ɨfwo ɨ yɨnɨ a omà sɨ̀ bò sɨ̂ wùl ɨ̀ mòʼ, àŋena ndù ɨ fèʼtɨ̀ sɨ̂ Mosìs. ²³Wu bè sɨ̂ àŋena na, “Bôbo Fɨyini ti meyn bè na, ‘Libɨs nɨn ghɨ àchi a yvɨtɨnɨ-a, a ghɨ àchi ɨtuʼ ilaʼ a layna nɨ̀ Bôbo Fɨyini. Yì myel ɨ̀ nyòʼ ɨvzɨ̂ a yi nyôʼ ɨ̀ kfè ɨvzɨ̂ a yi n-kfê, ɨ̀ bɨ̀sɨ ɨvzɨ̂ a ka yì læ yɨ̀ a libɨs.’”

²⁴Àŋena nɨn læ meyn bɨsɨ kɨ ta Mosìs bè ta ka ɨtuʼ layn a àŋena yɨ, gvɨysɨ ɨ faŋ tɨ̀ chwò ateyn, wu faŋ tɨ̀ nà lɨmà. ²⁵Ɨtuʼ ɨ layn achi nâ ghè Mosìs ɨ bè na, “Yì yɨ ɨfwo ɨ yɨnɨ vzɨ̀ a yì tî bɨ̀sɨ iyoni bòm ta layn nɨn ghɨ àchi ɨtuʼ ilaʼ, ghɨ kelɨ kɨ sɨ nà koʼsɨ Bôbo Fɨyini ateyn. Yì kæ fvɨ̀ layn, yi bû yèyn afo afu. ²⁶Yi ti n-dyêyn na yì na ni-à ɨ̀ myèl koʼ nɨ̀ ɨfwo ɨ yɨnɨ ateyn sɨ a mɨchi ntufa, ɨtuʼ layn a mɨchi nsòmbo achi ɨtuʼ ilaʼ nɨ̀ Bôbo Fɨyini, yi bû yèyn afo.”

²⁷Mosìs nɨn læ taŋi nô mɨ tì, ɨtuʼ ɨ layn a mɨchi nsòmbo, ghelɨ ghɨ li ɨ fi fvɨ seʼ kɨ imyêl i ɨfwo ɨ yɨnɨ mɨtì ɨ faŋ tɨ̀ yeyn afo. ²⁸Ghelɨ nâ ghì ɨ fvɨ ndù tì Bôbo Fɨyini ɨ bè sɨ̂ Mosìs na wù bɨf sɨ̂ ghelɨ Isìlæ̀ na, “Yi ti n-to nɨ̀ àtu a sɨ̂ mà ndù chèm wo jæ ta ka yì na lèm tɨ̀saʼ temtɨ, fî nî àwo kì a mɨ n-bê sɨ̂ zɨ̀ a?” ²⁹Mosìs ɨ taŋi tì ɨ fi bè sɨ̂ àŋena na, “Yì na kya na Bôbo Fɨyini fu meyn àchi ɨtuʼ ilaʼ sɨ̂ zɨ̀. À ti iwo zɨ̀ a wù n-fu ɨfwo ɨ yɨnɨ mɨchi ɨ̀m bò sɨ̂ zɨ̀ a mɨchi ntufa. Nô mɨ ndà nɨn kelɨ sɨ faŋ kɨ alèʼ ghè a wù n-ghɨ ateyn a mɨchi nsòmbo, wùl ɨ ghɨ wi sɨ fvɨ̀ abe.” ³⁰Mosìs nɨn taŋi tî, ghelɨ Isìlæ̀ ɨ nà felɨ̀ wì iwo a mɨchi nsòmbo.

Ghelɨ Isìlæ̀ ɨ lèm ɨ̀fwo ɨ yɨnɨ ɨlvi na woyn àŋena læ̂ koʼ yeyn.

³¹Ghelɨ Isìlæ̀ nɨ̂n læ nà toŋtɨ̂ ɨ̀fwo ɨ yɨnɨ nâ vzɨ̀ a àŋena nà n-fvɨ̂ myêl a nse tì na manà. Wu nà n-fɨf kêʼ tèyn ta mɨsaŋ mɨ̀ ɨ̀nfùʼ mɨ̀ kòlìyandà, ku ɨchfɨ̀ tèyn ta abo abayn ɨlvɨ ta ghɨ yòʼ ɨlû ateyn. ³²Mosìs ɨ fèʼtɨ̀ ìsaʼ zɨ̀ sɨ̂ ghelɨ Isìlæ̀ a Bôbo Fɨyini fu ɨ bè na, “Yì myel manà ì lì a omà ìmòʼ, ɨ̀ lèm wôyn ghi læ̂ koʼ yeyn na à ti ɨfwo ɨ yɨnɨ vzɨ̀ a mɨ n-læ fu sɨ̂ zɨ̀ a nse iyum ta mɨ n-læ fvɨ̀sɨ zɨ sɨ a ilaʼ i Ijìb.”

³³Mosìs ɨ taŋi tì, ɨ bè sɨ̂ Alòyn na, “Fèʼ omà manà ìmòʼ ɨ we a bom ìghaʼnɨ, ɨ tom asɨ nɨ̀ Bôbo Fɨyini ta ka à læ̂ nà koʼ mɨ àjâŋ à kà yeyn a.”

³⁴Alòyn ɨ lì ntòyn manà àteyn kɨ ighel ta Bôbo Fɨyini nɨn bè sɨ̂ Mosìs ɨ tom asɨ antayntayn a mɨkâyn nɨ̀ Bôbo Fɨyini ta ka ghɨ faytɨ lèm. ³⁵Ghelɨ Isìlæ̀ nɨn læ nà yɨ kɨ manà nâ yèyn sɨ a bèŋ mɨ̀vɨm ɨ̀n kæ̀ sɨ chem ta ka àŋena jel ndù zɨ alèʼ ghè a ghelɨ nà n-chi ateyn, ighami nɨ̀ Kenàn.

³⁶Omà sìsɨ̀ a ghɨ nà n-fêʼ manà ateyn tì nà n-zɨ̂ a efà ìvɨ̀m.