Exodus 17

Bôbo Fɨyini ɨ nì mû ɨ fvɨ̀ iwu

¹Ghelɨ Isìlæ̀ nô ghɨ̀ jɨ̀m nɨn læ meyn lù sɨ a nse ìyum a Sîn ɨ nà ndû kɨ àlêʼ nɨ̀ àleʼ à kɨ ighel ta Bôbo Fɨyini nɨn læ bè sɨ̂ àŋena. Àŋena nɨ̀n ndu meyn ɨ bɨ̀ a Lefidɨ̀m mɨtì mu nà ghɨ wi afu sɨ nyvɨ. ²Àŋena yòl sɨ̂ Mosìs ɨ bè na, “Fu mu ghèsɨ̀ nyvɨ.” Mosìs ɨ bèynsɨ̀ ɨ bɨf sɨ̂ àŋena na, “Yi n-yôl sɨ̂ mà bòm ghà? Bòm ghà ta yi n-môm Bôbo Fɨyini a?”

³Mosìs nà n-taŋi tì, ɨtoŋ mu ɨ yumtɨ̂ àŋena nô sɨ a ŋaŋ, àŋena nà sɨ ghâm Mosìs bɨf sɨ̂ ŋweyn na, “Bòm ghà ta wà tî lì fvɨ̀ koʼ nɨ̀ ghès sɨ a Ijìb na ghesɨ̀ wôyn ghesɨ, baʼsɨ̂ nɨ̀ nyâm seysɨ gvi kfɨ̀tɨ ɨ̀toŋ mu afêyn a?”

⁴Mosìs ɨ nà sɨ dzɨ̂ sɨ̂ Bôbo Fɨyini bɨfɨ na, “Mà ti n-nì nô ghà nɨ̀ ghelɨ ghèyn a? Àŋena sɨ kɨŋ sɨ tɨmlɨ ma nɨ̀ ngòʼsɨ̀?”

⁵Bôbo Fɨyini ɨ bè sɨ̂ Mosìs na, “Fvɨ ndu timi asɨ nɨ̀ ghelɨ ateyn. Wà se sɨ ndù wa lì mbàŋ zɨ̀ a wà tî lèŋ jvâ Nâyl ateyn tì. Lì chyeʼsɨ Isìlæ̀ sɨ lisɨ zɨ̂ àŋena ndu amoʼ. ⁶Wa kya na mɨ nì timî a wa asɨ atû ìwù a Holèb, a wà leŋ iwu ateyn nɨ̀ mbàŋ ta ka mû fvɨ a ghelɨ ateyn nyvɨ.” Mosìs ɨ ni kɨ tî asɨ nɨ̀ chyeʼsɨ Isìlæ̀sɨ̀. ⁷Mosìs ɨ fu izɨyn alèʼ nâ yèynì na Masà bòm ta ghelɨ Isìlæ̀ nɨn mòm Bôbo Fɨyini afu ɨ fi fu izɨyn ili na, Melibà bòm ta àŋena nà n-yôl sɨ̂ ŋweyn bɨf na, “Bôbo Fɨyini ti n-ghɨ ghesɨ̀na nɨ̀ àŋena amoʼ ma wù n-ghɨ wi a?”

Ghelɨ Isìlæ̀ ɨ tɨm yɨ ghelɨ Amalèk

⁸Ghelɨ Amalèk nɨ̀n læ meyn gvì sɨ nu ghelɨ Isìlæ̀ a Lefidɨ̀m. ⁹Mosìs ɨ bè sɨ̂ Joshwà na, “Choʼtɨ ghelɨ ghesɨ̀nà ghɨli zɨ̂ àŋena læ fvɨ̀ nù ghelɨ Amalèk a libɨs. Mà læ̀ koʼ timî atû kfɨ̀yn, ɨ̀ ghal mbàŋ zɨ̀ a Fɨyini fɨ tî bè ma lî tì.”

¹⁰Joshwà ɨ ni kɨ ta Mosìs bè ɨ ndu nà sɨ nû ghelɨ Amalèk ma Mosìs ŋêyn Alòyn nɨ̀ Hûl koʼ meyn tìmi atû kfɨ̀yn. ¹¹Mosìs nà n-lâysɨ̀ àkœ a ŋweyn iyvɨ nô mɨ ɨlvɨ gha, ghelɨ Isìlæ̀ ɨ nà tɨm yɨ ghelɨ Amalèk ɨ̀ nì sùʼsɨ, ghelɨ Amalèk ɨ nà tɨm yɨ ghelɨ Isìlæ̀. ¹²A ni nà ghɨ ta akœ a Mosìs à yvànɨ meyn, Alòyn ŋêyn Hûl ɨ lì ngòʼ ɨ tom Mosìs ɨ dùʼì ateyn, àŋena ghal ɨ làysɨ̀ àkœ a ŋweyn iyvɨ. Alòyn nɨn læ timi ɨkœ ɨ lvi, Hûl ɨ timi ateyn nɨ ɨlvi ɨ ghal akœ a Mosìs kɨ faŋ kɨ iyvɨ nô ta ka ɨchfɨ-iyvɨ nî sœ. ¹³À ti ta Joshwà nɨn tɨm yɨ ghelɨ Amalèk a iwòŋ.

¹⁴Bôbo Fɨyini ɨ kæ be sɨ̂ Mosìs na, “Nyàʼ ɨ lèm iwo nâ yèynì a ŋwàʼlɨ̀ ta ka ghɨ læ nà duʼa bêtɨ̀-à. Wà nyâʼ wa jàŋ Joshwà yvɨ bòm ta mɨ n-mèsì ghelɨ Amalèk nô ghɨ̀ jɨ̀m a nô wùl sɨ ateyn na bu kalɨ wi a mbzɨ.”

¹⁵Bôbo Fɨyini ɨ taŋi tì Mosìs ɨ bàʼlɨ àbaŋ ifu, ɨ fu izɨyn ateyn na, Bôbo Fɨyini nɨn ghɨ ndzɨ̀ ìwòŋ nɨ̀ mà. ¹⁶Mosìs nɨ̀n be meyn na, “Mà na to kɨ adyaʼ ghê a Bôbo Fɨyini fù sɨ̂ mà. Bôbo Fɨyini na lum nû kɨ nu ghelɨ Amalèk kɨ̀ ajâŋ nɨ̀ àjaŋ à.”