Exodus 18

Jetɨ̀lò ɨ seʼ sɨ mùtɨ Mosìs

¹Jetɨ̀lò ɨ ngàŋ ndô Fɨyini nɨ̀ ghelɨ Midìyàn, a ghɨ kɨmɨ bò wi nɨ̀ Mosìs nɨn læ meyn yvɨ awo kì a Fɨyini fɨ nì sɨ̂ Mosìs ŋêyn ghelɨ Isìlæ̀ nɨ̀ nfeynfɨ, ɨ fi yvɨ dzɨ zɨ̀ a Bôbo Fɨyini fvɨ̀sɨ àŋena ateyn sɨ a Ijìb.

²Mosìs nà n-ghɨ ma wù n-be meyn wî ŋweyn Zìbolà kasi ɨ̀ ndù a àŋena abe, bò ŋweyn fsɨsɨ ŋweyn, ³ŋêyn woyn ŋweyn ghɨ lûmnɨ̀ ghɨ̀ bò. Mosìs nɨn chfɨ̀ wayn ɨlwema na Geshòm bê na, “Mà sɨ ghɨ wul àtum ilaʼ atum,” ⁴ɨ chfɨ̀ ɨ̀lvì na, “Elizà” bê na, “Fɨyini fɨ bò wom fɨ ti meyn gàmtɨ̀ mà, ɨ̀ bœ̀sɨ̀ ma sɨ a awu nɨ̀ fòyn Ijìb.”

⁵Jetɨ̀lò ɨ bò wi nɨ̀ Mosìs ɨ lì wî Mosìs ŋêyn woyn woyn ghɨ lûmnɨ̀ nɨ̀ Mosìs ɨ gvì sɨ mùtɨ Mosìs a nse ìyum alèʼ ghè a wù tî bɨ̀ ateyn a ngùŋ kfɨyn nɨ̀ Fɨyini fɨ. ⁶Wu nà n-sɨ ghɨ ma wù tum meyn ɨ̀ bè sɨ̂ Mosìs na, “Mɨ n-gvî ghesɨ̀ wî vâ nɨ̀ woyn woyn ghɨ lûmnɨ̀ nɨ̀ ŋweyn ghɨ̀bò sɨ mùtɨ vâ.”

⁷Àŋena ɨ ndu chem a nse iyum, Mosìs ɨ fvɨ ndù sɨ kòynɨ nɨ̀ ŋweyn ɨ ngvɨmtɨ a ŋweyn asɨ ŋêyn ŋweyn ɨ baʼnɨ, ɨ toŋtɨ ngeŋsɨ ɨ kæ sɨ zɨ ɨtwò. ⁸Mosìs ɨ fèʼtɨ koʼ nô mɨ nɨ̀ ghà sɨ̂ bò wi nɨ̀ ŋweyn ta Bôbo Fɨyini nì sɨ̂ fòyn Ijìb baʼsɨ̂ nɨ̀ ghelɨ Ijìb bòm ghelɨ Isìlæ̀. Wù n-fi meyn fèʼtɨ ta Bôbo Fɨyini gàmtɨ̀ ghelɨ Isìlæ̀ sɨ a ngeʼsɨ afî nô sɨ̀ jɨ̀m a àŋena kèli a dzɨ.

⁹Jetɨ̀lò ɨ yvɨ awo a jûŋ kì nô a jɨ̀m a Bôbo Fɨyini nì sɨ bœ̀sɨ ghelɨ Isìlæ̀ sɨ awu nɨ̀ ghelɨ Ijìb ɨ nà saŋlɨ̂ nô sɨ a ŋaŋ. ¹⁰Wu n-bè na, “Ikoʼsɨ-i nɨn ndû sɨ̂ Bôbo Fɨyini fifɨ̀ a fɨ tî bœ̀sɨ̀ vâ fì bœ̀sɨ̀ ghelɨ Isìlæ sɨ awu nɨ̀ ghelɨ Ijìb baʼsɨ̂ nɨ̀ fòyn àŋena. ¹¹Ma keli meyn lvɨ̂yn samoʼ na Bôbo Fɨyini nɨn kelɨ àdyaʼ chwô mɨyini nô ɨ̀n jɨ̀m bòm ta wù ti meyn bœ̀sɨ̀ ghelɨ Isìlæ̀ sɨ a awu nɨ̀ ghelɨ Ijìb ghì a ghɨ tî nà ghaŋsɨ ɨwuyn, nyâblɨ̀ nɨ̀ ghelɨ Isìlæ̀.” ¹²Jetɨ̀lò ɨ bò wi nɨ̀ Mosìs ɨ taŋi tì ɨ li gvì nɨ̀ ìfu i nyoʼnɨ-i baʼsɨ̂ nɨ̀ tɨ̀fu tɨlitɨ sɨ̂ Fɨyini fɨ. Alòyn ŋêyn chyeʼsɨ Isìlæ̀sɨ̀ nô sɨ̀ jɨ̀m ɨ gvi sɨ yɨ ŋêyn bò wi nɨ̀ Mosìs asɨ nɨ̀ Fɨyini fɨ.

Jetɨ̀lò ɨ tebtɨ Mosìs

¹³Ɨtuʼ layn Mosìs ɨ ndu dùʼì ɨ nà saʼ fu nsaʼ sɨ ghêl, ghelɨ ɨ nà gvî kɨ gvi nɨ̀ nsaʼsɨ wu saʼa ɨtuʼ ɨ ni jɨ. ¹⁴A nà ghɨ ta bò wi nɨ̀ Mosìs yèyn awo kì a Mosìs nɨn nî sɨ̂ ghelɨ nâ ghì nô à jɨ̀m, ɨ bɨf sɨ̂ ŋweyn na, “À n-ghɨ ghà wêyn a wà n-nî sɨ̂ ghelɨ ghèyn teyn a? Wà n-saʼ nsaʼsɨ kɨ̀ vâ nìnyɨŋ bòm ghà, ghelɨ ghèyn ɨ bɨsɨ gvì timî a wa asɨ, ɨtuʼ ni jɨ àŋena ti kɨ ti a?”

¹⁵Mosìs ɨ bèynsɨ̀ ɨ bè sɨ̂ ŋweyn na, “À n-ghɨ bòm ta ghelɨ ateyn nɨn gvî na mà feʼtɨ iwo zɨ̀ a Fɨyini fɨ nɨn kɨŋ na àŋena ni. ¹⁶Ghelɨ ghɨ̀ bò nɨn kelî àngùmnɨ̀ antêynɨ̀ nɨ̀ àŋena nô mɨ ɨlvɨ gha, ghɨ gvì sɨ̂ mà, ma saʼ sɨ̂ àŋena ɨ fèʼtɨ̀ tɨ̀sàʼ tɨ Fɨyini nɨ̀ ìyeʼi zɨ̀ a Fɨyini fɨ fù sɨ̂ àŋena.”

¹⁷Jetɨ̀lò ɨ bè sɨ̂ ŋweyn na, “Iwo zɨ̀ a wà nî nɨn jofɨ̀ wì. ¹⁸Zɨ̂ ghelɨ nâ ghèyn nɨn zuetɨ̂ kɨ ngêŋ sisɨ. Ifêl nâ yèynì nɨn dvɨ̂ nô sɨ a ŋaŋ ma wà kaʼ wà bû nì kɨ̀ vâ nìnyɨŋ. ¹⁹Yvɨtɨ itebtɨ zɨ̀ a ka mà fu sɨ̂ và lvɨ̂yn, a ka Fɨyini fɨ gamtɨ vâ. À na lî kɨ nô và alêʼ a ghêl asɨ nɨ̀ Fɨyini fɨ, fêʼtɨ̀ ngeʼsɨ àŋena sɨ̂ ɨ̀nfeynfɨ. ²⁰Wà n-kelɨ sɨ nà yeʼi àŋena nɨ̀ àwo kì a Fɨyini fɨ nɨn kɨŋ, nɨ̀ tɨ̀saʼ tɨ Fɨyini tɨ̀, fî dyêyn dzɨ zɨ̀ a Fɨyini fɨ nɨn kɨŋ na àŋena na chi ateyn, nɨ̀ àwo kì a àŋena nɨn kelɨ sɨ nà ni-à. ²¹Mɨtì, choʼtɨ ghelɨ ghɨ kfeynɨ-a, fâyn Fɨyini, ghelɨ samsɨ̂ àŋena, a ghɨ ghelɨ bê samoʼ ma ghɨ kàʼ ghɨ bû yùyntɨ àŋena, ɨ lèm ghɨ na tisɨ̂ inôyn i ghêl nkamsɨ, ghɨli ɨ tîsɨ̂ ìnôyn ighɨ, ghɨli tisɨ̂ ìnôyn mɨ̀vɨm ɨ̀n tâyn, ghɨli tisɨ̂ ìnôyn ìvɨm. ²²Visi à na saʼ kɨ àŋena saʼ nsaʼsɨ ghêl. Bè sɨ̂ àŋena na ghɨ na saʼ kɨ nsaʼ sɨ bolsɨ, mɨtì gvî nɨ̀ ɨsîsɨ̀ a sɨ n-to ghaʼ àŋena sɨ̂ và. Wà nì têyn, a ifêl ì zæ yaŋsɨ bòm ta àŋena na gâmtɨ̀ và. ²³Wà kæ sɨ ni têyn, a ghɨ ìwo zɨ̀ a Fɨyini fɨ nɨn kɨŋ, a ɨ̀nkfɨ̀yn na ghɨ wi ateyn, a ghelɨ nâ ghèyn na gvî nɨ̀ ngeʼsɨ sɨ̂ và ghɨ nà kfâ nɨ̀ ìsaŋlɨ i.”

²⁴Mosìs ɨ yvɨ iwo zɨ̀ a bò wi nɨ̀ ŋweyn bè, ɨ ni kɨ ta wù bè, ²⁵ɨ choʼtɨ ghɨ̀lûmnɨ̀ kɨ̀ Isìlæ̀ ì jɨ̀m, ghɨ kfeynɨ-à, ɨ lèm àŋena na ghɨ na tisɨ̂ ìnôyn i ghêl nkamsɨ, ghɨli tisɨ̂ ìnôyn ighɨ, ghɨli tisɨ̂ ìnôyn mɨ̀vɨm ɨ̀n tâyn ghɨli tisɨ̂ ìnôyn ìvɨm. ²⁶Ghelɨ nâ ghèyn ɨ nà sɨ ghɨ kɨ ghelɨ ghɨ saʼnɨ, ndû kɨ nɨ̀ nsaʼ sɨ̂ Mosìs ɨlvɨ ta yì to ghaʼ àŋena mɨtì ɨsîsɨ̀ a sɨ n-boynɨ àŋena saʼa.

²⁷Mosìs ɨ kæ sɨ tsɨynsɨ bò wi nɨ̀ ŋweyn Jetɨ̀lò na wù kasi kfa sɨ a ŋweyn ilaʼ.