Exodus 20

Bôbo Fɨyini ɨ fu Tɨsaʼ ìvɨm

¹Fɨyini fɨ̀ nɨn taŋi meyn sɨ̂ ghelɨ Isìlæ̀ ɨ bè na,

²“À n-ghɨ mà Bôbo Fɨyini, ɨ Fɨyini fifɨ fì a fɨ n-læ fvɨ̀sɨ zɨ sɨ a ndo àkòs a Ijìb.”

³“Ka wùl nɨn læ̀ kòʼsɨ fɨyini fɨ lifɨ a bu kɨ mà.”

⁴“Ka wùl nɨn læ̀ fàytɨ ànfèʼsɨ̀ kɨ fɨsɨ̂ àfo kɨ ghɨ iyvɨ kèsa kɨ n-ghɨ a nse kèsa kɨ n-ghɨ a jvâ. ⁵Ka wùl nɨn læ̀ ngvɨ̀mlɨ fɨyini fɨ lifɨ, ka wùl nɨ̂n læ̀ kòʼsɨ fɨyini fɨ lifɨ bòm ta mà Bôbo Fɨyini ɨ Fɨyini fifɨ nɨn kôŋ wì na yì na koʼsɨ̂ fɨyini fɨ lifɨ a bu kɨ mà. À n-ghɨ mà Bôbo Fɨyini ɨ Fɨyini fifɨ. Mɨ n-zɨ̂tɨ̀ sɨ fu ngeʼ sɨ̂ woyn bòm mbɨsɨ ghɨ̂bo àŋena, ma læ fu sɨ̂ woyn ɨ fu sɨ̂ woyn woyn nɨ̀ woyn woyn woyn, ⁶mɨtì dyêyn ìkôŋ i mɨ̂kàyn nɨ̀ mà sɨ̂ woyn woyn ghelɨ ghì a ghɨ n-kôŋ ma fî lêm tɨ̀saʼ temtɨ, dyêyn ìkôŋ ateyn sɨ̂ woyn àŋena ghɨ taŋ lê ɨ̀tu.”

⁷Ka wùl nɨn læ̀ jàŋ ìzɨyn i Bôbo Fɨyini, ɨ Fɨyini fifɨ sɨ a ànkaŋ, bòm ta à jàŋ nô mɨ ndà sɨ a ànkàŋ, Bôbo Fɨyini bû faŋ tɨ̀ fù ngeʼ sɨ̂ ŋweyn.

⁸“Ka wùl nɨ̂n læ̀ fèl ìwo Achi a Bamnɨ-a nɨ̀ mà. Yì na faytɨ̂ lêm àchi ateyn sɨ a nyɨŋ. ⁹Yi n-kelɨ mɨchi ntufa ɨwe sɨ nà felɨ̀ awo à ki-a ateyn nô à jɨ̀m. ¹⁰Mɨtì à na ghɨ a mɨchi nsòmbo yi nà kya na à n-ghɨ Àchi a Bamnɨ-a nɨ̀ Bôbo Fɨyini ɨ Fɨyini fifɨ. À na gvì achi nâ ghàyn ka wùl sɨ̂ zɨ̀ nɨ̂n fèl àfo. Ka wâyn lûmnɨ̀ nɨ̀ zɨ̀ nɨ̂n fèl àfo kèsa wâyn wi. Ka wùl ɨ̀ felɨnɨ nɨ̀ zɨ̀ ɨ lûmnɨ̀ nɨ̂n fèl àfo kèsa wul ɨ̀ felɨnɨ nɨ̀ zɨ̀ ɨwi. Ka nô mɨ nyàm zɨ ì lì nɨ̂n fèl àfo. Ka ghelɨ ɨtum ghì a ghɨ n-chi a yi a ntèʼsɨ nɨ̂n fèl àfo. ¹¹Yì na nî tèyn bòm ta Bôbo Fɨyini nɨn læ faytɨ iyvɨ nɨ̀ nse nɨ̀ jvà baʼsɨ̂ nɨ̀ ɨ̀fwo vzɨ̀ a wu n-ghɨ ateyn nô ɨ̀ jɨ̀m sɨ a mɨchi ntufa ɨ yvɨ̀tɨ̀ a mɨchi nsòmbo. À ti iwo zɨ̀ a Bôbo Fɨyini nɨn læ boysɨ achi ɨtuʼ ilaʼ nâ kèynà ɨ lèm kɨ nà layna.”

¹²“Wa ngvɨmlɨ̂ bò vâ nɨ̀ nà vâ ta ka mɨ̀chi myâ dyebtɨ ilaʼ ghè a Bôbo Fɨyini, ɨ Fɨyini fifɨ nɨn fu sɨ̂ zɨ̀.”

¹³“Ka wùl nɨn læ̀ zuè wul.”

¹⁴“Ka wùl nɨn læ̀ chi nɨ̀ wî wùl kèsa ŋêyn lûm wùl.”

¹⁵“Ka wùl nɨn læ̀ choŋ.”

¹⁶“Ka wùl nɨn læ̀ tìmi nchwò nsaʼ ànkaŋ atu nɨ̀ wâynà ŋweyn.”

¹⁷“Ka wùl nɨ̂n læ̀ sèmtɨ ɨ̀fwo ɨ ndo nɨ̀ wùl. Ka wùl nɨ̂n læ̀ sèmtɨ wî wùl. Ka wùl nɨ̂n læ̀ sèmtɨ wul ɨ felɨnɨ nɨ̀ wùl kèsa à n-ghɨ wul ɨ̀ felɨnɨ ɨ lûmnɨ̀ a kèsa à n-ghɨ wul ɨ̀ felɨnɨ ɨ wi a. Ka wùl nɨ̂n læ̀ sèmtɨ nyam yi felɨ̀ sɨ̂ wùl wùl ɨ wûlù, kèsa à n-ghɨ mbòŋ a kèsa à n-ghɨ njàkâs a. Ka wùl nɨ̂n læ̀ sèmtɨ nô mɨ àfo a li-a, a kelɨ wul ɨ wûlù.”

¹⁸À nà n-ghɨ ta ghelɨ Isìlæ̀ yèyn ta ivɨ i nɨn myâyntɨ̀ fî byaytɨ-à, fì yvɨ̀ ta ghɨ n-toŋ ndoŋ àyaʼ, ɨ̀ yèyn fɨleʼ fɨ koʼ a kfɨ̂yn Sinày, àŋena nà chɨŋtɨ̂ faynà ɨ timi kɨ sɨ a nje. ¹⁹Àŋena timi tì ɨ bè sɨ̂ Mosìs na, “Taŋi kɨ vâ sɨ̂ ghès, ghèsɨ̀ yvɨ, ɨ̀ nì ìwo zɨ̀ a wà bè. Ka wa n-vìsi na à taŋi Fɨyini sɨ̂ ghès bùla tì a ghèsɨ̀ kfɨtɨ.”

²⁰Mɨtì Mosìs ɨ bè sɨ̂ àŋena na, “Ka yi n-fàyn. Fɨyini fɨ gvì sɨ mom zɨ sɨ ni na yì na fâyn ŋweyn, ngvɨmlɨ̂ ŋweyn, bu fì nî wì mbɨ.”

²¹Ghelɨ Isìlæ̀ ɨ timi kɨ sɨ a nje, a ndu kɨ Mosìs ɨ baʼsɨ a ntuʼ mbàʼsɨ fɨmnɨsɨ afî a Fɨyini fɨ nà n-ghɨ ateyn.

Tɨsaʼ kûm ɨ̀bwaŋ ifu

²²Bôbo Fɨyini nɨ̀n be meyn sɨ̂ Mosìs na, “Bè sɨ̂ ghelɨ Isìlæ̀ na, ‘Yi yvɨ meyn kɨ̀ nô sɨ a yi a ngeŋsɨ ta mà tàŋi sùʼsɨ sɨ̂ zɨ̀ iyvɨ na, ²³ka wùl nɨn læ̀ fàytɨ fɨyini fɨ lifɨ nɨ̀ àso ɨkwo a baŋnɨ-a kèsa a fɨfâ sɨ baʼsɨ sɨ̂ mà ɨ̀ nà koʼsɨ-à.’

²⁴“Yì baʼlɨ abaŋ ifu sɨ̂ mà nɨ̀ àchaʼ a, nà fu tɨ̀fu tɨ nyoʼnɨtɨ ateyn nɨ̀ tɨ̀futɨ sɨ nà chî nɨ̀ mbôynɨ̀. Yì na fu bzɨsɨ nɨ̀ nyamsɨ mbòloʼsɨ. Mɨ nì boysɨ zɨ̀ nô mɨ wo ta mà chòʼnɨ na yì na koʼsɨ̂ mà afu. ²⁵Yi kæ sɨ nà bâʼlɨ̀ àbaŋ ifu sɨ̂ mà nɨ̀ ngòʼsɨ, ka yi n-chuyn bòm ta yì kæ sɨ chuyn nɨ̀ àfo a, ɨ̀ bàʼlɨ̀, a kɨ na layn kfeynɨ̂ wì sɨ nà koʼsɨ ma atû àteyn. ²⁶Yi se sɨ bàʼlɨ̀ abaŋ ifu ateyn ka yi n-lèm mbaŋisɨ sɨ nà koʼ ateyn bu tî a wùl na se sɨ koʼ isas i ŋweyn i nà kêʼ a ndayn.”