Exodus 21

Tɨsaʼ Kûm Ɨ̀kôs

¹Bôbo Fɨyini nɨ̀n bê meyn sɨ̂ Mosìs na, “Ɨtêyntɨ̀ nɨn ghɨ tɨ̀saʼ tìtɨ̀ a ka wà fu sɨ̂ ghelɨ Isìlæ̀:

²“Wùl kæ sɨ yuyn akôs a lûmnɨ̀-à a ghɨ wul ɨ̀ Hibɨ̀lù, a kɨ fel sɨ̂ ŋweyn sɨ a bèŋsɨ ntufa. Mɨtì a à na ghɨ a bèŋsɨ̀ nsòmbo, a wù na kelɨ sɨ visi na kɨ lu bula kɨ lâʼ àfo. ³Akôs ateyn a kæ sɨ nà ghɨ ma kɨ n-læ gvì kelɨ wi wul ɨ wi, a kɨ lù kɨ nìnyɨŋ. Mɨtì a kæ sɨ nà ghɨ ma kɨ n-læ gvì kelɨ wul ɨ wi a ŋêyn ŋweyn lu kɨ̀ amoʼ. ⁴Bò ìfèl nɨ̀ ŋweyn kæ sɨ fu wul ɨ wi sɨ̂ ŋweyn ŋêyn ŋweyn bzɨ woyn ghɨ lûmnɨ̀ kèsa ghɨki a à na kelɨ bò ìfèl nɨ̀ ŋweyn wul ɨ wi àteyn baʼsɨ̂ nɨ̀ woyn ateyn, a akôs ateyn a lu kɨ nìnyɨŋ bula kɨ lâʼ àfo.

⁵“Mɨtì akôs ateyn a kæ sɨ bè nɨ̀ ɨ̀chfɨ ŋweyn na, ‘Mɨ n-kôŋ bò ìfèl nɨ̀ mà nɨ̀ wî wom baʼsɨ̂ nɨ̀ woyn ghem, kôŋ wì na wà visi mà lu,’ ⁶a bò ìfèl nɨ̀ ànkeyna na kelɨ sɨ lì sɨ ndù nɨ̀ ànkeyna ndô Fɨyini na kɨ timi bàʼsɨ iwuwu, ghɨ buʼ atuŋlɨ a ànkeyna nɨ̀ ìbuʼì ta ka kɨ faŋ kɨ̀ sɨ a akòs nɨ̀ ŋweyn samoʼ.”

⁷Wùl kæ sɨ beyʼlɨ wâyn ŋweyn ɨ wi sɨ akòs bò ìfèl nɨ̀ ànkeyna bu læ̀ vìsi na kɨ lu ta akôs alûmnɨ̀-à ibàm i bêŋsɨ̀ ntufa. ⁸Akôs aki-a nâ kì kæ sɨ nà bu kfeynɨ̂ wì sɨ̂ bò ìfèl nâ vzɨ̀ a wù tî yùyn akôs ateyn a, nà kɨŋ sɨ li sɨ a wi tì, a bò àteyn kasî yuyn atu a ànkeyna. Bò ìfèl nɨ̀ ànkeyna nɨn kelɨ wi adyaʼ sɨ beyʼlɨ akôs ateyn sɨ̂ wùl àtum a bu tì a à na ghɨ bula wù lêm ìchfɨ̂nɨ̀ zɨ̀ a àŋena nɨn chfɨ̀nɨ sɨ a nzɨ̀tɨ. ⁹Mɨtì bò ìfèl nâ vzɨ̀ kæ sɨ choʼnɨ sɨ fu akôs ateyn sɨ̂ wayn ŋweyn ɨ lûmnɨ̀ sɨ a wi, a wù na kelɨ sɨ li akôs ateyn kɨ ighel ta wù lì wâyn ŋweyn ɨ wi. ¹⁰Wùl kæ sɨ ndu kfeynsɨ wul ɨ wi ɨ̀lvì, a wù na bu yɨsɨ kɨ yɨsɨ wul ɨ wi àsɨ nɨ̀ ŋweyn fî labsɨ̂ ŋweyn, ŋêyn ŋweyn ɨ chî kɨ ighel ta ghɨ tî nà chî sɨ asɨ. ¹¹Wù kæ sɨ nà nî wi awo nâ kèynà tèyn à tal, wu visi wul ɨ wi àteyn lù bula ghɨ lâʼ ɨ̀kwo sɨ̂ wùl àteyn.

Tɨsaʼ kûm ìzue nɨ̀ mbɨsɨ lisɨ

¹²Wùl kæ leŋ zue wul, ghɨ boŋ zue ŋweyn. ¹³À kæ sɨ nà ghɨ bula wù baʼtɨ baʼtɨ sɨ zue wul àteyn mɨtì Fɨyini fɨ visi na yi gayn tî, wùl àteyn ɨ leʼ ndù lèytɨ̀ alèʼ ghè a ka mà dyeyn. ¹⁴Wùl kæ nyòʼsɨ ɨtoŋ ɨ̀ zuè wul ɨ̀ leʼ ndù tìmi a ngùŋ àbaŋ ifu nɨ̀ mà sɨ bœ̀, wa gùf ɨ fvɨ̀ nɨ̀ ŋweyn ɨ ndu zue.

¹⁵“Wùl kæ leŋ zue bò ŋweyn kèsa nà ŋweyn, a ghɨ na kelɨ sɨ zue ŋweyn.”

¹⁶“Wùl kæ sɨ choŋ sɨ lù nɨ̀ wùl ɨ lvì ɨ̀ ndù bèyʼlɨ kèsa wù ndù lèm lem, ghɨ ghal ŋweyn, ghɨ zue kɨ zue.”

¹⁷“Wùl kæ sɨ te bò ŋweyn kèsa nà ŋweyn a ghɨ na kelɨ sɨ zue ŋweyn.”

¹⁸“Ghelɨ kæ sɨ nà yolɨ̀-à wùl ɨ̀ tɨm ɨ̀lvì nɨ̀ ngòʼ kèsa wù kfɨ̀yn nɨ̀ fɨ̀nkàmfɨ̀ wù faŋ tɨ̀ kfɨ mɨtì nà koʼi-à, ¹⁹fvɨ̂ kɨ abe a mbàŋ, ghɨ bû fù ngeʼ sɨ̂ wùl vzɨ̀ a wù tî lèmsɨ ŋweyn mɨtì a ghɨ be a wù laʼ ɨlvɨ vzɨ̀ a wùl ɨ koʼinɨ tî nyɨ̀ŋi ɨkuyn ikoʼi ateyn fì tòʼnɨ̀ nɨ̀ ŋweyn sɨ chem ta ka wù to mèsì.”

²⁰Wùl kæ sɨ leŋ akôs a ŋweyn alûmnɨ̀-à kèsa aki-a nɨ̀ mbàŋ, kɨ kfɨ ghɨ fu ngeʼ sɨ̂ ŋweyn. ²¹Mɨtì ghɨ kelɨ wi sɨ fu ngeʼ sɨ̂ bò ìfèl nâ vzɨ̀ ɨlvɨ ta akôs ateyn a to ibàm i achi kèsa mɨchi ɨ̀ mbò bòm ta à n-ghɨ àkôs a ŋweyn.

²²Ghelɨ kæ sɨ nà nu-à ɨ̀ kfɨ̀yn nà wayn ɨ̀lvà wù bzɨ bula ɨlvɨ kfeyn mɨtì ngeʼ ì bemnɨ ìlì ɨ faŋ tɨ̀ gayn sɨ̂ ŋweyn a lûm wùl ɨ wi nâ vzɨ̀ feʼtɨ afo kì a wùl ɨ̀ vzɨ̀ a wù kfɨ̀yn ŋweyn laʼ kɨ̀ ighel ta ghelɨ ghɨ saʼnɨ bɨ̀mi. ²³À kæ sɨ nà ghɨ ma nà wayn ɨ̀lvà nâ vzɨ̀ keli meyn ngeʼ ìghaʼnɨ ìlì, ghɨ zue wul vzɨ̀ a wù kfɨ̀yn ŋweyn. ²⁴À kæ nà ghɨ ma wùl kfɨ̀yn lèmsɨ ìsɨ kèsa wù kfɨ̀yn choʼ isoŋ kèsa wù lèmsɨ àwu kèsa avɨ a, ²⁵kèsa wù nyòʼ àlêʼ ɨwuyn a kèsa wù kwòsɨ̀ àlêʼ ɨwuyn nɨ̀ wùl ɨ wi nâ wèyn, ghɨ ni kɨ̀mɨ tì sɨ̂ ŋweyn.

²⁶Wùl kæ sɨ leŋ zue isɨ akòs alûmnɨ̀-à nɨ̀ ŋweyn kèsa akôs aki-a wu visi kɨ lu bula kɨ lâʼ àfo ta ka à na ghɨ na wù laʼ meyn ìsɨ ateyn. ²⁷Wùl kæ sɨ leŋ choʼ isoŋ akòs alûmnɨ̀-à nɨ̀ ŋweyn kèsa aki-a wu visi kɨ lu bula kɨ lâʼ àfo ta ka à nà ghɨ na wù laʼ meyn ìsoŋ ateyn.

Tɨsaʼ kûm ngeʼ sìsɨ̀ a nyamsɨ nɨn nî.

²⁸Nyàm mbòloʼ ilûmnɨ̀ kæ kfɨ̀yn zuè wùl ɨ lûmnɨ̀ kèsa ɨ wi nɨ̀ ndoŋsɨ, a ghɨ na kelɨ sɨ tɨmlɨ sɨ zue nyam àteyn nɨ̀ ngòʼsɨ̀. Ghɨ zue ka wùl nɨn kfɨl njwò àteyn, mɨtì ka ghɨ n-fù ngeʼ sɨ̂ wùl ɨ̀ vzɨ̀ a wù n-kelɨ nyam àteyn. ²⁹À kæ sɨ nà ghɨ ma nyàm àteyn ti meyn nà sɨ kfɨ̀ynlɨ̀ ghelɨ, ghɨ taŋi-à wùl ɨ̀ vzɨ̀ a wù n-kelɨ nyam àteyn ɨ wê wì a mbàyn yì fî zuè wul, ghɨ tɨmlɨ zue nyam àteyn ɨ zue kɨmɨ wul vzɨ̀ a wù n-kelɨ nyam àteyn. ³⁰Mɨtì ghɨ kæ nà kɨŋ na wùl ɨ̀ vzɨ̀ a wù n-kelɨ nyam àteyn laʼ afo, wu làʼ nô mɨ ghà ta ghɨ bɨ̀f sɨ yuyn atu a ŋweyn. ³¹Isaʼ nâ yèynì nɨn ghɨ kɨmɨ tì sɨ̂ wâyn lûmnɨ̀ kèsa ɨ wi ɨlvɨ ta nyàm fèyn zuè ŋweyn. ³²Nyam àteyn kæ sɨ kfɨyn zue akôs alûmnɨ̀-à nɨ̀ wùl kèsa aki-a, a wùl vzɨ̀ a wù n-kelɨ nyam àteyn na kelɨ sɨ làʼ mɨbêʼnɨ̀ mɨ̀ àso ɨkwo a fɨfâ kɨ chem mɨ̀vɨm ɨ̀n tal sɨ̂ wùl vzɨ̀ a wù n-kelɨ akôs ateyn a ghɨ fî tɨ̀mlɨ zuè nyam àteyn.

³³Wùl kæ sɨ choʼ sɨ visi ɨchfɨ̂ ibɨ kèsa wù tɨ̀m tɨm ibɨ, ɨ̀ faŋ tɨ̀ chɨ̀yntɨ ɨchfɨ̂ ateyn, mbòŋ kèsa njàkâs wùl gvî fe ateyn ɨ̀ kfɨ, ³⁴a wùl vzɨ̀ a wù n-kelɨ ibɨ ateyn na kelɨ sɨ laʼ sɨ̂ wùl ɨ̀ vzɨ̀ a wù n-kelɨ nyam àteyn sɨ li akfɨ a nyâm nâ kì.

³⁵Nyàm mbòloʼ ilûmnɨ̀ nɨ̀ wùl kæ sɨ lemsɨ ɨyî wul ɨ̀lvì yì kfɨ, a ghelɨ nâ ghì ghɨ̀ bo beyʼlɨ nyam zɨ̀ a yì zue ìlì ɨ̀ gwòtɨ̀ ɨ̀kwo ateyn ɨ̀ lì ìkfɨnɨ zɨ̀ ɨ̀ gwòtɨ̀ kɨ ighel ighel. ³⁶Mɨtì à kæ sɨ nà ghɨ ma nyàm ateyn sɨ lum fêyn ghelɨ ghɨ fêʼtɨ̀ sɨ̂ wùl ɨ̀ vzɨ̀ a wù n-kelɨ nyam àteyn wu wê wì a mbàyn, a wù laʼ nyam nɨ̀ nyàm i to ɨ̀ lì àkfɨ a nyâm nâ kì.