Exodus 23

Tɨsaʼ sɨ nà saʼ ghelɨ àtì-ati fî kelɨ ìkoynsɨ isuyn.

¹Ka wùl na wam ànkaŋ atu nɨ̀ wùl ɨ lvì. Ka wùl nɨ̂n læ̀ tìmi nchwò nsaʼ ànkaŋ sɨ̂ wùl ɨ bɨ. ²Ka wùl nɨ̂n læ̀ jùmtɨ̀ ànôyn a dvɨnɨ-a sɨ ni iwo i bzɨ-i. Wùl timi nchwò nsaʼ alèʼ a nsaʼ ka wu n-tòʼ ghelɨ ghɨ dvɨnɨ sɨ wam ànkaŋ na ka ghɨ saʼ nsaʼ àtì-ati. ³Ka wùl nɨ̂n tòʼ wul ànfɨf a nsaʼ kɨ bòm ta wù n-ghɨ wul ànfɨf. ⁴Wùl kæ sɨ yeyn mbòŋ kèsa njàkâs mbàynɨ̀ ŋweyn yi bɨm jêl kɨ jelɨ, wu ghal ɨ kasi ndu fu sɨ̂ ŋweyn. ⁵Wùl nɨ̀n bâyn vâ, wà yeyn njàkâs ŋweyn ma yì beʼi meyn ɨ̀fwo ɨ̀ fe, a wà na kelɨ sɨ gàmtɨ̀ sɨ ghal sɨ làysɨ̀, ka wa n-chwò kɨ̀ chwo.

⁶Ka yi n-læ̀ saʼ yèʼtɨ wul ànfɨf antêynɨ̀ nɨ̀ zɨ̀. ⁷Ka wùl nɨn læ̀ wam ànkaŋ atu nɨ̀ wùl. Ka wùl nɨn læ̀ zue wul wu kya wi iwo, chî nchînɨ̀ àtì-ati bòm ta à mòm nô mɨ ndà ìnki iwo nâ yèynì, ma bû lèysɨ̀ fu ŋweyn.

⁸Ka wùl nɨn læ̀ bɨ̀mi na ghɨ yuyntɨ ŋweyn jæ ta ka wù ni iwo bòm ta ghɨ n-yuyntɨ̂ wul wù bû fì yèyn samoʼ, wu nà saʼ yeʼtɨ̂ ghelɨ àtì-ati.

⁹Ka wùl nɨ̂n nyàblɨ̀ nɨ̀ wùl àtum bòm ta yi n-kya sɨ a yi a ngeŋsɨ ta ghelɨ ɨtum nɨn ku bòm ta yi n-læ meyn nà ghɨ ghelɨ ɨtum a Ijìb.

Tisaʼ kûm àchi ɨtuʼ ilaʼ.

¹⁰Yì na fêl koʼ nɨ̀ gvêyn sisɨ tôʼ ɨ̀fwo ateyn kfi-à sɨ a bèŋsɨ̀ ntufa, ¹¹à na ghɨ a bêŋsɨ̀ nsòmbo yi visi gveynsɨ ateyn sɨ chwotɨ ta ka ghelɨ anfɨf na sayn ɨ̀fwo vzɨ̀ a wu n-ghɨ ɨlwam yɨ-a, nyamsɨ ɨtwaʼsɨ ɨ yɨ ɨvzɨ̂ a wu faŋ. Yì na visî kɨmɨ gveynsɨ olìfsɨ̀ nɨ ɨsɨ gɨ̀lêbsɨ̀ sɨ chwôtɨ̀-à.

¹²Yì na fêl sɨ a mɨchi ntufa ɨwe, à na ghɨ a mɨchi nsòmbo ka yi n-fèl àfo ta ka mbòŋsɨ̀ nɨ̀ njàkâs sisɨ baʼsɨ̂ nɨ̀ ghelɨ ghɨ felɨnɨ ghì a ghɨ bzɨ a yi a ndosɨ kɨ̀mɨ nɨ̀ ghelɨ ɨtum bôŋ yvɨ̀tɨ̀ fì kèli àdyaʼ.

¹³Yì toʼnɨ sɨ nì nô àwo à jɨ̀m kì a mà bè sɨ̂ zɨ̀. Ka yi n-læ̀ jèm sɨ̂ mɨyini ɨn lì. Ka ghɨ n-læ̀ yvɨ̀ nô mɨ yvɨ izɨyn i fɨyini fɨ lifɨ ta yi n-toŋtɨ.

Mɨ̀chi mɨ̀ àyɨ ɨ̀nghaʼnɨ ɨ̀n tal a bêŋ

¹⁴Mɨchi ɨnghaʼnɨ̂ nɨn ghɨ ɨ̀n tal a bêŋ ta yi n-kelɨ sɨ nà yɨ-a koʼsɨ̂ mà ateyn.

¹⁵Yi n-kelɨ sɨ nà yɨ ayɨ abayn bula fɨ̀shɨ̀k. Ɨlvɨ ateyn na kfeyna a njôŋ Abìb yi nà yɨ àbayn bula ghɨ we fɨ̀shɨ̀k ateyn sɨ a mɨchi nsòmbo kɨ̀ ta mà tî bè sɨ̂ zɨ̀ bòm ta à n-ghɨ njoŋ zɨ̀ a yi n-fvɨ̀ sɨ a Ijìb ateyn. À nà ghɨ ɨlvɨ nâ ghàyn ka wùl nɨ̂n gvì a ma asɨ nɨ̀ ɨ̀wu ɨ yum.

¹⁶Yi n-kelɨ sɨ nà se sɨ kfi ɨfwo ɨ yɨnɨ, yi gvì nɨ̀ mɨ̀tam mɨ̀ àsɨ, ɨ yɨ ayɨ. Yi se sɨ yɨ ayɨ ateyn yi gvì nɨ̀ ɨ̀fwo vzɨ̀ a yì kfì a gvêynsɨ̀ nɨ̀ zɨ̀ sɨ asɨ. Yi kfi mèsì ɨ̀fwo vzɨ̀ a yì tî tòʼ, ɨ̀ kfa nɨ̀ ɨ̀ŋweyn, yi yɨ ayɨ ɨfwo kfinɨ a ngòʼsɨ bèŋ.

¹⁷“Ghɨ̀lûmnɨ̀ nô ghɨ̀ jɨ̀m nɨn kelɨ sɨ nà gvî asɨ nɨ̀ Bôbo Fɨyini, ɨ Fɨyini fɨngaŋtɨnɨ fɨ, koʼsɨ̂ ŋweyn a mɨchi mɨ̀ àyɨ nâ ghàyn ɨ̀n tal a bêŋ.”

¹⁸“Yi sɨ nyam, se sɨ fu mɨluŋ mɨ̀ ateyn sɨ a ifu sɨ̂ mà ka yi n-fu bàʼsɨ nɨ̀ àbayn a ma ghɨ we meyn fɨ̀shɨ̀k ateyn. Ka wùl nɨ̂n lèm ìso i nyâm zɨ̀ a ghɨ sɨ̀ fù sɨ a ifu sɨ̂ mà ɨlvɨ ayɨ ɨtuʼ layn kòli.”

¹⁹“Yì tetɨ ɨfwo ɨ jûŋ vzɨ̀ a yì kfì sɨ a asɨ a yi a gvêynsɨ̀ ɨ̀ gvì fù a ndo nɨ̀ Bôbo Fɨyini, ɨ Fɨyini fifɨ.”

“Ka wùl nɨ̂n kfè wâyn bzɨ nɨ̀ ìgheyn i nà àteyn i ta ghɨ kam.”

Iyeʼi baʼsɨ̂ nɨ̀ tɨ̀chfɨ̂nɨ̀ tɨ̀

²⁰Bôbo Fɨyini nɨn be meyn sɨ̂ Mosìs na, “Mɨ n-tum nchì yem a yì na chî zɨ̀ nô ta ta ka yì ndu zɨ alèʼ ghè a mà bàʼtɨ meyn lèm sɨ̂ zɨ̀. ²¹Yì na faytɨ̂ yvɨnɨ̂ ŋweyn kɨ̀ awo à jɨ̀m bòm ta ma fu meyn àdyaʼ à kema sɨ̂ ŋweyn nô à jɨ̀m. Ka wùl nɨn to nɨ̀ àtu a sɨ̂ ŋweyn bòm ta wu n-lêysɨ̀ fu wi wul ɨlvɨ ta wù to nɨ̀ àtu a sɨ̂ ŋweyn. ²²Mɨtì ma yì kæ sɨ yvɨnɨ ŋweyn kɨ̀ awo à jɨ̀m, ɨ̀ nì nô mɨ ghà ta mà bè, a mà na ghɨ mbàynɨ̀ sɨ̂ ghelɨ ghì a ghɨ n-bâyn zɨ, ɨ̀ fì fù ngeʼ nô mɨ sɨ̂ ndà vzɨ̂ a wù fù ngeʼ sɨ̂ zɨ̀. ²³Nchì yem nɨn ndù a yi asɨ ɨ̀ lì zɨ nɨ̀ zɨ̀ ilaʼ nɨ̀ ghelɨ Amò nɨ̀ ghelɨ Hît nɨ̀ ghelɨ Belìz nɨ̀ ghelɨ Kenàn nɨ̀ ghelɨ Hîv baʼsɨ̂ nɨ̀ ghelɨ Jebùs. Yi ndù zɨ̂ afu, a mà mesi àŋena nô ghɨ̀ jɨ̀m. ²⁴Ka yi n-læ̀ ngvɨ̀mlɨ, kèsa kòʼsɨ mɨyini mɨ̀ àŋena kèsa sɨ nì awo kì a àŋena nɨn kfâʼtɨ̀ na mɨyini mɨ̀ àŋena nɨn kɨŋ na ghɨ na ni-à. Yì kwo bèbsɨ mɨyini mɨ̀ àteyn ɨ̀ zuèlɨ ntom sìsɨ̀ a ghɨ tòmtɨ ɨlwèʼ ghè a àŋena nɨn koʼsɨ mɨyini mɨ̀ àŋena ateyn. ²⁵Yì kæ sɨ nà koʼsɨ̂ kɨ ma Bôbo Fɨyini ɨ Fɨyini fifɨ, a mà boysɨ zɨ ɨ̀ nì a yì na kelɨ ɨ̀fwo ɨ yɨnɨ nɨ̀ mû ɨ̀ fì nì a tɨkoʼi tɨ faŋ tɨ̀ kù zɨ, ²⁶a wùl ɨ wi na tsɨ̀ylɨ̀ wì, akayn à ɨ ghɨ wi antêynɨ̀ nɨ̀ zɨ̀, a mà fu ichi idya ì sɨ̂ zɨ̀.”

²⁷“Mɨ ni-à a ifayn i bemnɨ-i ku ghelɨ ghì a ghɨ n-nû zɨ ɨ̀ fì nì a mbàynɨ̀ sisɨ jɨŋi nô sɨ̀ jɨ̀m. Mɨ n-nì-a a mbàynɨ̀ sisɨ beynlɨ ɨ̀ leʼ kàsi sɨ sɨ a yi ibàm. ²⁸Mɨ nì nì ni-à a ifâyn i bemnɨ-i ku ghelɨ Hîv nɨ̀ ghelɨ Kenàn nɨ̀ ghelɨ Hît a àŋena leʼ sɨ a yi ibàm. ²⁹Mɨtì mɨ n-sàŋ fvɨsɨ̀ wi àŋena kɨ̀ a bêŋ ìmòʼ bula tì ɨtwaʼ ɨ koʼ ilaʼ nâ ghàyn a nyamsɨ ɨtwaʼsɨ bzɨ ɨ̀ dvɨ̀ chwòsɨ̀ ɨ̀ nà bebsɨ̂ ɨ̀fwô vzɨ. ³⁰Mà na sâŋ fvɨsɨ̀ àŋena kɨ̀ sɨ ilæ sɨ ilæ sɨ chem ta ka yì dvɨ kfèynɨ sɨ lì ilaʼ ateyn kɨ ì jɨ̀m.”

³¹“Mɨ n-lèm ìghami ì zɨ-i yi lû a Jvâ ì Baŋnɨ ndû chem a jvâ ì ghaʼnɨ nɨ̀ ghelɨ Fìlisìyà, fî lû a nse ìyum ndû chem a Jvâ Yuflèt. Mɨ n-fu ghelɨ ghì a ghɨ n-chi ilaʼ nâ ghàyn awu nɨ̀ zɨ̀ a yì saŋ fvɨ̀sɨ̀ àŋena. ³²Ka zɨ̂ ghelɨ nâ ghèyn nɨn yɨ mɨkâyn kèsa zɨ̂ mɨyini mɨ̀ àŋena. ³³Ka yi n-vìsi na ghelɨ nâ ghèyn na chî ilaʼ nɨ̀ zɨ̀, yì kæ visi a àŋena ni a yì ni mbɨ sɨ̂ mà. Yì kæ koʼsɨ mɨyini mɨ̀ àŋena, a à na ghɨ àtam a bemnɨ-a sɨ̂ zɨ̀.”