Exodus 24
Ŋwàʼlɨ̀ Exodus
Ghelɨ Isìlæ̀ ɨ bɨmi mɨ̀kâyn mɨ̀ Bôbo Fɨyini
1À nà n-ghɨ ta Bôbo Fɨyini fù meyn tɨsaʼ sɨ̂ ghelɨ Isìlæ̀ wu bè sɨ̂ Mosìs na, “Lì Alòyn nɨ̀ Nadàb ŋêyn Abihù baʼsɨ̂ nɨ̀ chyeʼsɨ Isìlæ̀sɨ̀ mɨ̀vɨ̂m nsòmbo zɨ̂ àŋena koʼ gvì yèyn ma atû kfɨ̀yn afêyn. Àŋena nɨn koʼ gvi-à ɨ̀ tìmi kɨ̀ sɨ a nje ɨ̀ kòʼsɨ mà, 2mɨtì a à kɨŋtɨ bàʼsɨ kɨ̀ Mosìs sɨ̂ mà. Ghelɨ ghɨ li ghì isas i kfɨyn nɨn kelɨ wi sɨ koʼ sɨ baʼsɨ sɨ̂ àŋena, àŋena kelɨ wi sɨ gvì sɨ baʼsɨ sɨ̂ mà.”
3Mosìs ɨ kasi ndù ɨ fèʼtɨ̀ àwo kì a Bôbo Fɨyini bè nô à jɨm baʼsɨ̂ nɨ̀ tɨ̀saʼ tìtɨ̀ a wù fu sɨ̂ ghelɨ ateyn. Àŋena ɨ chɨyntɨ be kɨ ɨlvɨ ɨ̀mòʼ na, “Ghès nɨn nî nô mɨ ghà ta Bôbo Fɨyini bè.” 4Àŋena nɨn bè tî, Mosìs ɨ nyàʼ nô mɨ ghà ta Bôbo Fɨyini bè. Ɨtuʼ bɨs layn wu bàʼlɨ̀ àbaŋ ifu isas i kfɨyn ɨ tomtɨ ngòʼsɨ̀ njvàsɨ̀ bò afu, sɨ dyêyn àsas a ndosɨ nɨ̀ ghelɨ Isìlæ̀ njvàsɨ̀ bò. 5Wu n-bàʼlɨ tî ɨ tum tɨkuŋ tɨ Isìlæ̀ tɨ litɨ àŋena ndù ɨ fu ifu i nyoʼnɨ-i ateyn ɨ fi fu woyn nyamsɨ mbòloʼ sɨ lûmnɨ̀sɨ̀ sɨ a ifu sɨ̂ Bôbo Fɨyini sɨ nà chî nɨ̀ mbôynɨ̀. 6Mosìs ɨ gwònɨ̀ mɨ̀luŋ mɨ̀ nyamsɨ mzɨ̀ a ghɨ sɨ̀ tî, ɨ we ɨkfaŋ ɨ lì ɨmzɨ̂ a mɨ̀ faŋ ɨ mɨ̀sì abaŋ ifu nâ ghè. 7Wu n-mɨ̀sì tì ɨ̀ lì ŋwàʼlɨ̀ mɨ̀kàyn nɨ̀ Bôbo Fɨyini zɨ̀ ɨ jàŋ sɨ̂ ghelɨ ateyn, àŋena yvɨ ɨ bèynsɨ̀ ɨ bè na, “Ghès nɨn yvɨnɨ̂ Bôbo Fɨyini ɨ̀ nì nô mɨ ghà ta wù bè.”
8Mosìs ɨ kæ sɨ li mɨluŋ mzɨ̀ ɨkfaŋ tì, ɨ mɨ̀sì a àŋena iwùyn ɨ bè na, “Mɨ̀lûŋ mèyn nɨ̀n dyêyn àdyaʼ a mɨ̂kàyn mzɨ̀ a Bôbo Fɨyini yɨ̀ meyn zɨ̂ àŋena kɨ ighel ta wù bè.”
Chyeʼsɨ Isìlæ̀sɨ̀ mɨ̀vɨm nsòmbo ɨ kòynɨ̀ nɨ̀ Bôbo Fɨyini.
9Mosìs ŋêyn Alòyn nɨ̀ Nadàb ŋêyn Abihù baʼsɨ̂ nɨ̀ chyeʼsɨ Isìlæ̀sɨ̀ mɨ̀vɨm nsòmbo ɨ koʼ a kfɨyn. 10Àŋena nɨn kòʼ tî, ɨ yeyn Fɨyini fɨ Isìlæ̀, afo a li-a ɨ ghɨ a ŋweyn isas ɨvɨ ghɨ tèyn ta dzɨ ɨlvɨ ta ghɨ fàytɨ nɨ̀ ngòʼsɨ njeyntɨnɨ sɨlisɨ sɨ jôf kɨ tèyn ghɨ toŋtɨ̂ na safayà, dzɨ ateyn ɨ nyêm kêʼ tèyn ta iyvɨ.
11Ghelɨ ghɨ tisɨnɨ nɨ̀ ghelɨ Isìlæ̀ nâ ghèyn nɨn yeyn nô mɨ Fɨyini tì, wu faŋ tɨ fu ngeʼ sɨ̂ àŋena mɨtì àŋena yɨ ɨ fi nyvɨ asɨ nɨ̀ ŋweyn.
Mosìs a kfɨ̂yn Sinày
12Bôbo Fɨyini ɨ bè sɨ̂ Mosìs na, “Koʼ gvi yeyn ma a kfɨyn afêyn ɨ chitɨ mà fu tɨsaʼ baʼsɨ̂ nɨ̀ àwo kì a ka wà yeʼi ghelɨ Isìlæ̀ nɨ̀ ànkeyna ma mà nyàʼ ɨbwaŋ ngòʼsɨ.”
13Mosìs ɨ kæ sɨ lu ŋêyn Joshwà ɨ wul ɨ̀ fèlɨnɨ nɨ̀ ŋweyn sɨ koʼ atû kfɨ̀yn nɨ̀ Fɨyini fɨ. 14Wu n-læ se sɨ lù ɨ bè sɨ̂ chyeʼsɨ Isìlæ̀sɨ̀ na, “Yì duʼi nà chîtɨ̀ kɨ ghès afêyn sɨ chem ta ka ghès kasi gvì yèyn zɨ. Alòyn ŋêyn Hûl na ghɨ zɨ̂ àŋena. À keli mɨ ndà angùmnɨ̀ ŋêyn wùl, wu ndu yeyn àŋena.”
15À nà n-ghɨ ta Mosìs kòʼ a kfɨyn nâ ghè, mbàʼsɨ̀ ɨ chɨl kfɨyn àteyn. 16Iŋwâʼ i Bôbo Fɨyini ɨ suʼi ɨ gvɨ̀ a kfɨ̂yn Sinày, mbàʼsɨ̀ ɨ chɨl kfɨyn àteyn sɨ a mɨchi ntufa, a nà ghɨ a mɨchi nsòmbo, Bôbo Fɨyini ɨ jàŋ ɨ gvìsɨ̀ nɨ̀ Mosìs antêynɨ̀ mbàʼsɨ̀ nâ ghè. 17Ghelɨ Isìlæ̀ nà n-yeyn ìŋwâʼ i Bôbo Fɨyini yi kêʼ kɨ tèyn ta ɨvɨs a wu n-bali a kfɨyn nâ ghè. 18Mosìs ɨ fi koʼ ndù atû kfɨ̀yn ɨ limi antêynɨ̀ mbàʼsɨ̀ ɨ nà yisî kɨ tèyn kfâ chi-à sɨ a mɨchi mɨ̀vɨm ɨ̀n kæ̀.