Exodus 26
Ŋwàʼlɨ̀ Exodus
Fɨtwotɨ̂ fɨ Bôbo Fɨyini
1Bôbo Fɨyini nɨ̀n fi meyn bè sɨ̂ Mosìs na, “Faytɨ fɨtwotɨ̂ nɨ̀ ɨ̀byâs ɨ ndzɨsɨ ìvɨm, ma ghɨ faytɨ meyn tɨm nɨ̀ àmbyèyn a fyeynɨ-a, kɨ nyêm nyêm, a li-a nyêm bâŋ ndû ndu, a li-a bɨ̂ylɨ̀ bâŋ baŋ ma ghɨ faytɨ meyn tɨm. Sɨ n-kelɨ sɨ nà ghɨ ma à tɨm wul faytɨ̂ kya ìfêl ta ka wù tɨm bàʼsɨ nɨ̀ chelùbsɨ̀ ateyn. 2Ɨbyâs ɨ ndzɨsɨ nâ vzɨ̀ nɨn kelɨ sɨ nà ghɨ kɨ ɨfyêʼ ɨ̀mòʼ. Nô mɨ àbâs à kà ɨ kelɨ sɨ nà dyêf chem ntàmsɨ̀ njvàsɨ̀ bò nɨ̀ àbeʼ a, ghaʼ chem ndû ntàmsɨ̀ bò. 3Wa n-lî ɨ̀byâs ɨlvi ɨ̀ twâyn ɨ̀ tas yùŋ kɨ̀ sɨ afo àmòʼ, ɨ̀ nì kɨ̀mɨ tì nɨ ɨ lvi vzɨ̀ ɨ̀ twâyn. 4Faytɨ mɨtôŋnɨ̀ nɨ̀ ɨbyâs ɨ ndzɨsɨ ɨ nyemnɨ ɨ we achfɨ̀ a ndzɨsɨ ghê a wà tas yùŋtɨ̀ tî. 5Wà nî wa we mɨ̀tôŋnɨ̀ mɨ̀vɨm ɨ̀n tâyn achfɨ̀ ɨbyàs ɨfwo nâ ghè a ghɨ yùŋtɨ̀ tî, ɨ lèm mɨ̀ keʼnɨ keʼnɨ. 6Wà nî wa faytɨ ɨ̀nghòf mɨ̀vɨm ɨ̀n tâyn nɨ̀ àso ɨkwo a baŋnɨ-a ta ka wu ghal ɨbyâs ɨ ndzɨsɨ vzɨ̀ a ghɨ ghàŋsɨ ta ka fɨtwotɨ̂ fɨ Bôbo Fɨyini nâ fèynfɨ̀ na ghɨ kɨ sɨ afo àmòʼ.”
7“Wà nî wa faytɨ ɨ̀byâs ɨ ndzɨsɨ nɨ̀ ìwî i bzɨ-i ɨ chɨl fɨtwotɨ̂ nâ fìfɨ̀ ateyn. 8Ɨbyâs ɨ ndzɨsɨ nâ wêyn nɨn kelɨ sɨ nà ghɨ kɨ ɨfyêʼ ɨ̀mòʼ, nô mɨ à kà ɨ dyêf chem ndû ntàmsɨ̀ njvàsɨ̀ tal nɨ̀ àbeʼ a, ghaʼ chem ndû ntàmsɨ̀ bò. 9Wà nî wa lì ɨ̀byâs ɨ ndzɨsɨ ɨ̀ twâyn ɨ tas yùŋtɨ kɨ sɨ afo àmòʼ ɨ lì ɨlvi vzɨ̀ ntufa ɨ tas yùŋtɨ kɨ̀mɨ sɨ afo àmòʼ ɨ̀ ghàŋsɨ ɨ̀ se sɨ chem ɨchfɨ ɨtwò ɨ̀ ngvɨs yòmtɨ àbâs kì a kɨ fvɨ̀ gòʼsɨ̀. 10Wà nî wa we mɨ̀tôŋnɨ̀ mɨ̀vɨm ɨ̀n tâyn ɨchfɨ ndzɨsɨ afî a ghɨ yùŋtɨ̀ tî sɨ̀ tâyn ɨ we kɨmɨ tì ɨchfɨ ateyn nɨ ɨsîsɨ̀ a ghɨ yùŋtɨ̀ tî ntufa. 11Wà we tì wa faytɨ ɨ̀nghòf mɨ̀vɨm ɨ̀n tâyn nɨ̀ ìdyayn i ɨ ghòf a mɨ̂tòŋnɨ̀ nâ ghè ta ka fɨtwotɨ̂ fɨ ateynfɨ na ghɨ kɨ sɨ afo àmòʼ. 12Abâs a ndzɨsɨ kì a kɨ dyèf fvɨ̀nɨ̀ na ghɨ ànkeyn kì a ka kɨ njeŋlɨ sùʼi ibàm i fɨ̂twòtɨ̂ nâ ghè. 13Ɨbyâs ɨ ndzɨsɨ vzɨ̀ a wu dyèf fvɨ̀nɨ̀ ɨbyàs ɨ ndzɨsɨ nâ ghè nɨn kelɨ sɨ nà njeŋlɨ kalì a mbæ̀sɨ fɨndo nâ ghè kɨ ɨbyâs ɨ̀ jɨ̀m ta ka wu chɨytɨ mbæ̀sɨ fɨndo nɨ̀ Bôbo Fɨyini nâ fìfɨ̀. 14Yoʼ gvɨ àyaʼ yì na bâŋ baŋ, ɨ faytɨ àfo ɨ nà chɨytɨ̂ fɨ̀two nâ fèynfɨ̀ ateyn ɨ faytɨ a li-a nɨ̀ gvɨ nyàm i lì yi chî a jvâ ɨ chɨl atû àteyn.”
15“Faytɨ mɨkfɨ̂s nɨ̀ fɨ̀kâʼ fɨ àkasìyà fɨ̀ ta ka ghɨ tomtɨ a fɨtwòtɨ̂ nâ ghàyn. 16Fɨkfɨ̂s fɨ̀ mòʼ fɨ na dyèf chem ndû ntàmsɨ̀ kæ̀ nɨ̀ àbeʼa ghaʼ chem ndû ntàm ìmòʼ, 17nô mɨ fɨ̀kfɨ̂s fìkà fɨ ɨ kelɨ mɨ̀choʼ ɨ̀m bò mɨ kôynɨ̀ wì. Faytɨ nô mɨ fɨ̀kfɨ̂s fɨ̀ kà kɨ̀ a dzɨ nâ ghàyn. 18Wa n-faytɨ̂ mɨ̀kfɨ̂s mɨ̀vɨm ɨ̀m bò ɨ̀ tòmtɨ abàs itsɨyn a fɨ̂twòtɨ̂ nâ ghè, 19ɨ̀ fàytɨ ɨ̀byâŋ ɨfwo mɨ̀vɨm ɨ̀n kæ̀ nɨ̀ àso ɨkwo a fɨfâ ɨ̀ tòmtɨ mɨ̀kfɨ̂s mɨ̀ àteyn atû àteyn. Nô mɨ fɨ̀kfɨ̂s fɨ̀ kà fɨ na kelɨ mɨ̀choʼ ɨ̀m bò nô mɨ fɨ̀choʼ fɨ̀ kà fɨ ɨ ti kɨ atû àbàŋ afo àmòʼ. 20Wà ndû abàs ikuè a fɨ̂twòtɨ̂ nâ ghè, wa faytɨ mɨ̀kfɨ̂s mɨ̀vɨm ɨ̀m bò, 21nɨ̀ ɨ̀byâŋ ɨfwo vzɨ̀ a ka mɨ̀ na ti atu àteyn mɨ̀vɨm ɨ̀n kæ̀ ma ghɨ fàytɨ kɨ̀mɨ nɨ̀ àso ɨkwo a fɨfâ, nô mɨ fɨ̀kfɨ̂s fɨ̀ kà fɨ ɨ ti atû ɨ̀byàŋ ɨfwo ɨ̀ bwò. 22Wà ndû abàs ghè a kɨ fvɨ̀ gòʼsɨ̀ a fɨ̂twòtɨ̂ nâ ghè, abâs ghè a ɨchfɨ̂-iyvɨ i nɨn sœ ateyn wa faytɨ mɨ̀kfɨ̂s ntufa, 23ɨ tomtɨ mɨ̀kfɨ̂s ɨ̀m bò a tîbvɨ afî a tɨ fvɨ̀ gòʼsɨ̀. 24Wà n-kelɨ sɨ nà baʼ baʼ mɨkfɨ̂s a tɨbvɨ nâ ghàyn tɨ̀ bò têyn, zɨ̂tɨ̀ kɨ a nse sɨ koʼ sɨ chem atu, mɨ koʼ zɨ̂ kɨ abùʼ a fɨnchaʼ àmòʼ. Faytɨ mɨkfɨ̂s nâ mèyn ɨ̀m bò kɨ̀ a dzɨ nâ ghàyn. 25À ti n-ghɨ na mɨ̀kfɨ̂s na ghɨ nfama, ɨbyâŋ ɨfwo vzɨ̀ a mɨ̀ n-ti atû ateyn ɨ ghɨ njvàsɨ̀ ntufa ma ghɨ faytɨ nɨ̀ àso ɨkwo a fɨfâ, nô mɨ fɨ̀kfɨ̂s fɨ̀ kà fɨ ɨ ti atû ɨ̀byàŋ ɨfwo ɨ̀ bwò.
26“Faytɨ kɨmɨ mbàŋsɨ dyaŋsɨnɨsɨ nɨ̀ fɨ̀kâʼ fɨ àkasìyà fɨ̀ ɨ tuŋtɨ ɨwuyn mɨ̂kfɨ̀s nâ ghè. Mbàŋsɨ ateynsɨ na ghɨ sɨ̀ tâyn abàs a fɨ̂ndo àmòʼ, 27ghɨ kɨmɨ sɨ̀ tâyn abàs a li-a, fî ghɨ kɨmɨ sɨ̀ tâyn sɨ̂ mɨ̀kfɨ̀s mzɨ̀ a mɨ̀ n-ghɨ abàs ghè a ɨchfɨ-iyvɨ i nɨn sœ ateyn abàs a fɨndo ghè a kɨ fvɨ̀ gòʼsɨ̀. 28Mbàŋ ì dyaŋsɨnɨ zɨ̀ a yì n-ghɨ antêynɨ̀ àntêynɨ̀ nɨn kelɨ sɨ lù abàs àmòʼ sɨ dyèf sɨ ndù sɨ chem abàs a li-a antêynɨ̀ àntêynɨ̀ mɨ̀kfɨ̀s nâ ghè. 29Yoʼ mɨkfɨ̂s mɨ̀ àteyn nɨ̀ àso ɨkwo a baŋnɨ-a ɨ faytɨ mɨ̀nchaʼ kɨ̀mɨ nɨ̀ àso ɨkwo a baŋnɨ-a mɨ̀ ghal mbàŋsɨ dyeblɨnɨ sìsɨ̀, ɨ yoʼ kɨmɨ mbàŋsɨ ateynsɨ nɨ̀ aso ɨkwo a baŋnɨ-a.”
30“Faytɨ fɨtwotɨ̂ nâ fèynfɨ̀ kɨ̀ ɨfyèʼ ghè a mà tî dyèyn sɨ̂ và a kfɨyn tî.”
Abâs a ndzɨsɨ kì a kɨ n-gwôsɨ fɨtwotɨ̂ fɨ Fɨyini.
31Faytɨ tɨm abâs a ndzɨsɨ nɨ̀ àmbyeyn a kɨ nyêm nyêm, nɨ a li-a kɨ bâŋ nyêm ndû ndu kɨ̀mɨ nɨ a li-a kɨ bɨ̂ylɨ̀ bâŋ baŋ nɨ àbâs a ndzɨsɨ-a ma ghɨ faytɨ meyn tɨm nɨ̀ àmbyèyn a fyeynɨ-a. À n-kelɨ sɨ tɨm wul faytɨ̂ kya ìfêl ta ka wù tɨm chelùbsɨ̀ ateyn. 32Faytɨ ɨtôʼ ɨ̀ kfæ̀ nɨ̀ fɨ̀kâʼ fɨ àkasìyà fɨ̀ ɨ yoʼ nɨ̀ àso ɨkwo a baŋnɨ-a ɨ tom atû ɨ̀byàŋ ɨfwo ma ghɨ fàytɨ nɨ̀ àso ɨkwo a fɨfâ. Wà tom tì wa we ɨ̀nghòf ateyn ma ghɨ fàytɨ nɨ̀ àso ɨkwo a baŋnɨ-a ɨ ghaŋsɨ abàs a ndzɨsɨ nâ kì ateyn. 33Ghaŋsɨ ndzɨsɨ ateyn ɨ ghal nɨ̀ mɨ̀nfâynɨ̀ ɨ lì àntayntayn a mɨ̂kàyn ɨ lèm ibàm ateyn. Abâs a ndzɨsɨ nâ kì-à na gwôsɨ̀ àlêʼ a laynɨ-a sɨ ateyn nɨ akî a kɨ layn gòʼsɨ̀. 34Wà tom wa chɨytɨ ɨ̀chfɨ̂ ateyn nɨ̀ nchɨl àntayntayn a mɨ̂kàyn alèʼ nâ ghè a kɨ layn gòʼsɨ̀. 35Wà nî wa fvɨ̀ sɨ a alèʼ ghè a kɨ layn gòʼsɨ̀ tî ɨ tom abaŋ abayn a laynɨ-a nɨ̀ Fɨyini fɨ abàs ikuè a fɨndo nɨ̀ Bôbo ɨ tom afo kì a ghɨ n-tom lâm ateyn abàs itsɨyn kɨ keʼnɨ abaŋ ateyn.
36Bè na wùl vzɨ̀ a wù n-tɨm ɨfwo tɨm abâs a ndzɨsɨ kì a ka ghɨ ghaŋsɨ ɨchfɨ fɨ̂twòtɨ̂ nâ ghè nɨ̀ àmbyeyn a kɨ nyêm nyêm, nɨ a li-a kɨ bâŋ nyêm ndû ndu kɨ̀mɨ nɨ a li-a kɨ bɨ̂ylɨ̀ bâŋ baŋ baʼsɨ̂ nɨ̀ àbâs a ndzɨsɨ-a ma ghɨ faytɨ meyn tɨm nɨ̀ àmbyèyn a fyeynɨ-a. 37Faytɨ ɨ̀nghòf vzɨ̂ a ka ghɨ ghaŋsɨ ɨbyâs ɨ ndzɨsɨ nâ vzɨ̀ ateyn ɨ faytɨ mɨ̀kfɨ̂s ɨ̀n tâyn nɨ̀ fɨ̀kâʼ fɨ àkasìyà fɨ̀ ɨ yoʼ nɨ̀ àso ɨkwo a baŋnɨ-a. Faytɨ ɨbyâŋ ɨfwo ɨ̀ twâyn nɨ̀ ìdyayn i, ɨ tomtɨ mɨ̀kfɨ̂s nâ mzɨ̀ atu àteyn.