Exodus 25

Ifu sɨ bàʼlɨ ɨtwo Fɨyini

¹A nà n-ghɨ ta Mosìs nɨn ghɨ a kfɨyn, Bôbo Fɨyini ɨ bè sɨ̂ ŋweyn na, ²“Bè sɨ̂ ghelɨ Isìlæ̀ na àŋena gvi nɨ̀ tɨ̀futɨ ɨ̀ fu sɨ̂ mà. Ghɨ gvî nɨ̀n teyntɨ wa fsɨ nô mɨ ìfu i nda ta wù n-kôŋ sɨ fu. ³Bè na àŋena gvi nɨ̀ àso ɨkwo a baŋnɨ-a nɨ̀ a fɨfâ nɨ̀ ìdyayn i, ⁴nɨ̀ ndzɨsɨ ma ghɨ tɨm nɨ̀ àmbyèyn a nyemnɨ-a nɨ sɨ lisɨ ma ghɨ tɨm nɨ̀ àmbyeyn a kɨ bâŋ nyêm ndû ndû nɨ sɨ lisɨ ma ghɨ tɨm nɨ̀ a li-a kɨ bɨ̂ylɨ̀ bâŋ baŋ nɨ̀ sɨ lisɨ ma ghɨ faytɨ meyn tɨm baʼsɨ̂ nɨ̀ ndzɨsɨ ma ghɨ fàytɨ nɨ̀ iwî i bzɨ-i, ⁵nɨ̀ gvɨ àyaʼ ma ghɨ yoʼ meyn yì na bâŋ baŋ nɨ̀ gvɨ nyàm ì jùŋ ì lì yi fvɨ̂ a jvâ nɨ̀ fɨ̀kâʼ fɨ àkasìyàfɨ̀, ⁶nɨ̀ mɨ̀vɨ̂l mɨ̀ olìfsɨ̀ ta ka ghɨ na wê a lâmsɨ̀ nɨ̀ ɨfwo ɨ lɨmtɨnɨ ɨ jûŋ vzɨ̀ a ghɨ n-faytɨ mɨvɨl mzɨ̀ a ka ghɨ na yisî ngàŋsɨ ndô Fɨyini ateyn, nɨ̀ ɨvzɨ̂ a ghɨ n-nyôʼ ta ka ɨlwêʼ na lɨ̂mtɨ̀ foma, ⁷nɨ̀ mɨ̀ngòʼtɨ̀ mɨ̀ onìks kɨmɨ nɨ̀ mɨ̀ngòʼtɨ̀ ɨ̀n lì sɨ baysɨ awaf, baysɨ̂ kɨmɨ a fɨ̂bò afî a fɨ na ghɨ atû àwaf a àngàŋtɨ̀ nɨ̀ ngàŋ ndô Fɨyini i ghaʼnɨ.”

⁸“Àŋena gvî nɨ̀ ɨfwo nâ wèyn wa bè àŋena baʼlɨ fɨ̀ndo fɨ Bôbo Fɨyini, mà na ghɨ a àŋena antêynɨ̀. ⁹Yi n-bâʼlɨ̀ fɨ̀ndo fɨ ateyn, ɨ̀ fàytɨ ɨ̀fwo vzɨ̀ a ka yì lem ateyn nô ɨ̀ jɨ̀m kɨ̀ ighel ta mɨ n-dyèyn sɨ̂ và.”

Àntayntayn a Mɨ̂kàyn

¹⁰Bôbo Fɨyini ɨ fi bè sɨ̂ Mosìs na, “Bè na àŋena bayn àntayntayn nɨ̀ fɨ̀kâʼ fɨ àkasìyà fɨ̀ kɨ dyêf chem ntàm nɨ̀ àbeʼ a, ghaʼ chem ndû ntàm njetɨ̂ chem ntàm. ¹¹Àŋena bayn mèsì àntayntayn ateyn wa lom antêynɨ̀ ateyn baʼsɨ̂ nɨ̀ jɨm àteyn nɨ̀ àso ɨkwo a baŋnɨ-a ɨ memtɨ ɨ jɨŋ kal kɨ nɨ̀ àso ɨkwo a baŋnɨ-a kɨ kelɨ wi ilɨŋ. ¹²Wà nî wa buŋsɨ àso ɨkwo a baŋnɨ-a ɨ faytɨ mɨ̀nchaʼ ateyn ɨ baysɨ afyeyn antayntayn nâ ghàyn à kæ̀. Mɨ̀nchaʼ ɨ̀m bò na ghɨ abàs àmòʼ, ɨ̀m bò ɨ ghɨ abàs a li-a. ¹³Kom mbàŋsɨ̀ nɨ̀ fɨ̀kâʼ fɨ àkasìyà fɨ̀ ɨ tsɨsɨ nɨ̀ àso ɨkwo a baŋnɨ-a, ¹⁴ɨ tuŋtɨ ɨ zɨsɨ a mɨnchaʼ afî a mbæ̀sɨ antayntayn ta ka ghɨ na ghal châʼsɨ̀ ateyn. ¹⁵Ka wùl nɨ̂n læ̀ chòʼtɨ mbàŋsɨ ateyn sɨ a mɨnchaʼ nâ ghè. Sɨ n-kelɨ sɨ faŋ kɨ antayntayn afu. ¹⁶Wa n-faytɨ̂ mesì àntayntayn ateyn ɨ̀ we tɨ̀saʼ tɨ Mɨkàyn tìtɨ̀ a mɨ n-fu sɨ̂ và ateyn.”

¹⁷“Wa nì wê tì ɨ̀ fàytɨ nchɨl àteyn kɨ nɨ̀ àso ɨkwo a baŋnɨ-a kɨ kelɨ wi ilɨŋ a yì na dyêf chem ntàm nɨ̀ àbeʼ a fî ghaʼ chem ndû ntàm. ¹⁸Wà faytɨ nchɨl àteyn wa leŋ mamtɨ àso ɨkwo a baŋnɨ-a ɨ faytɨ chelùb sɨ̀ bò a tɨghaŋ tɨ nchɨl nâ ghè. ¹⁹Faytɨ chelùb a ighaŋ i nchɨl ìmòʼ ɨ faytɨ ìlì ighaŋ i li. Chelùb nâ sèynsɨ̀ nɨ̀ nchɨl àteyn na ghɨ kɨ sɨ afo àmòʼ. ²⁰Faytɨ tɨwô tɨ chelùb nâ tèyntɨ̀ tɨ lali kòʼ iyvɨ ɨ̀ chɨ̀ytɨ nchɨl àteyn. Chelùb nâ sèynsɨ̀ na ghɨ ma sɨ kèʼnɨ̀ keʼnɨ ki suʼsɨ̂ nɨ̀ nchɨl àteyn. ²¹Wà faytɨ mèsì wa lì tɨ̀saʼ tɨ Mɨ̂kàyn tìtɨ̀ a mɨ n-fu sɨ̂ và ɨ we antêynɨ̀ àntayntayn nâ ghè ɨ chɨytɨ. ²²Ghesɨ̀và ɨ nì kôynɨ̀-a, a mà na taŋî suʼsɨ̂ sɨ̂ và a nfaynɨsɨ nɨ̀ chelùb sìsɨ̀ atû àntayntayn nâ ghè, a mà fu tɨsaʼ temtɨ sɨ̂ ghelɨ Isìlæ̀.”

Abaŋ abayn a laynɨ-a

²³Bôbo Fɨyini nɨn fi meyn bè sɨ̂ Mosìs na, “Faytɨ kɨmɨ àbaŋ nɨ̀ fɨkâʼ fɨ àkasìyà fɨ̀ kɨ dyêf chem ndû ntàm ìmòʼ, ghaʼ chem ndû àbeʼ a ntàm, njetɨ̂ chem ndû ntàm ìmòʼ. ²⁴Wà faytɨ, wa yoʼ nɨ̀ àso ɨkwo a baŋnɨ-a kɨ kelɨ wi ilɨŋ ɨ memtɨ ɨ jɨŋ kal kɨmɨ nɨ̀ àso ɨkwo a baŋnɨ-a a mbæ̀ sɨ ateyn. ²⁵Bayn kal nɨ̀ àfo a mbæ̀sɨ ateyn kɨ ghaʼ ghɨ ta awu a wûl. Wà nî tì wa memtɨ ɨ jɨŋ kal nɨ̀ àso ɨkwo a baŋnɨ-a achfɨ̀ ateyn. ²⁶Faytɨ Mɨ̀nchaʼ ɨ̀n kæ̀ nɨ̀ àso ɨkwo a baŋnɨ-a ɨ wesɨ a tɨ̂ghaŋ tɨ abaŋ nâ ghè tɨ̀ kæ̀ ɨlwèʼ ghè a afyeyn a nɨn ghɨ ateyn. ²⁷Wà nî wa kom mbàŋsɨ̀ ɨ tuŋtɨ a mɨ̂nchaʼ afî a mbæ̀sɨ ta ka ghɨ na ghal châʼsɨ̀ àbaŋ ateyn. ²⁸Wa n-kom mbàŋsɨ ateyn nɨ̀ fɨ̀kâʼ fɨ àkasìyà fɨ̀ ɨ̀ yoʼ nɨ̀ àso ɨkwo a baŋnɨ-a, a ghɨ na ghal châʼsɨ̀ àbaŋ nâ kì ateyn. ²⁹Faytɨ ɨkfaŋ ɨ lelinɨ nɨ̀ ɨ̀kfaŋ ɨ mbvɨktɨnɨ baʼsɨ̂ nɨ̀ ɨ̀kfaŋ ɨ ghaʼlɨnɨ nɨ̀ ngɨ̀sɨ̀ ta ka ghɨ na wê mɨ̀lûʼ mɨ̀ ìfu ateyn. Faytɨ ɨfwo nâ wèyn kɨ nɨ̀ àso ɨkwo a baŋnɨ-a kɨ kelɨ wi ilɨŋ. ³⁰Wà n-kelɨ sɨ nà lêm abayn kì a ghɨ n-fu sɨ̂ Bôbo Fɨyini atû àbaŋ nâ ghàyn kɨ̀ mɨlvɨ ɨ̀n jɨ̀m.”

Afo kì a ghɨ n-tom lâm ateyn

³¹“Faytɨ àfo kì a ghɨ n-tom lâm ateyn nɨ̀ aso ɨkwo a baŋnɨ-a, kɨ kelɨ wi ilɨŋ ma ghɨ kfɨyn meyn màmtɨ. Faytɨ isas ateyn nɨ̀ ɨ̀wuyn ateyn nɨ̀ ɨlwêʼ vzɨ̀ a ka ghɨ na tomtɨ̂ lâmsɨ̀ ateyn wu ghɨ tèyn ta flawà ɨlvɨ ta yì bùs. Nsaynsɨ ateynsɨ nɨ̀ ɨ̀tu vzɨ̀ a ka ghɨ na tomtɨ̂ lâmsɨ̀ ateyn na ghɨ kɨ sɨ afo àmòʼ. ³²Akœ na fvɨ̂ ɨwùyn ateyn ntufa ɨbyâs ɨ̀ bwò, nô mɨ àbâs à kà ɨ kelɨ àkœ à tal. ³³Faytɨ bom sɨ̀ tal sɨ̀ tal, nô mɨ ɨ̀kœ ɨ̀ kfà sɨ ghɨ tèyn ta flawà fɨ̀kàʼ fɨ almòn nɨ̀ tɨ̀nchoʼ tɨ ateyn tɨ ɨlvɨ ta fɨ bùs. Yi ti ndyêyn na akœ nâ kèynà ntufa ɨwùyn afo nâ ghàyn na kelɨ bom sɨ̀ tal sɨ̀ tal nô mɨ ɨkœ ɨ̀kfà. ³⁴Afo ateyn a nɨn kelɨ sɨ nà kelɨ bom sɨ̀ kæ̀ ɨwùyn ateyn sɨ ghɨ tèyn ta flawà fɨ̀kàʼ fɨ almòn nɨ̀ tɨ̀nchoʼ tɨ ateyn tɨ ɨlvɨ ta yì bùs. ³⁵À na ghɨ isas akœ à bò a kɨ asɨ-a ta kɨ n-fvɨ̂ ɨwùyn afo nâ ghè a ghɨ n-tomtɨ lâmsɨ̀ ateyn, ìnchoʼ i flawà ɨ ghɨ ateyn. Ìnchoʼ i na ghɨ isas i ànkùmtɨ̀ akœ, fî ghɨ isas akœ a goʼsɨnɨ-a. Yi ti n-dyêyn na akœ ateyn a na chɨ̂yntɨ̀ ghɨ ntufa. ³⁶Tɨ̀nchoʼ tɨ ateyn tɨ nɨ̀ àkœ ateyn a na ghɨ kɨ sɨ afo àmòʼ nɨ̀ àfo kì a ghɨ n-tomtɨ lâmsɨ̀ ateyn ma ghɨ fàytɨ nɨ̀ àso ɨkwo a baŋnɨ-a ta ghɨ leŋ màmtɨ kɨ kelɨ wi ilɨŋ.” ³⁷Wà nî, wa faytɨ lâmsɨ̀ nsòmbo ɨ tomtɨ ateyn ta ka sɨ na kâʼsɨ̀ àsɨ ateyn. ³⁸Faytɨ afo kì a ka ghɨ na bâʼ lìsì àbvɨ sɨ a nkfɨ̀sɨ lâm ateyn nɨ̀ àfo kì a ka ghɨ na wê àbvɨ nâ kì ateyn nɨ̀ àso ɨkwo a baŋnɨ-a kɨ kelɨ wi ilɨŋ. ³⁹Afo nâ kèyna a ghɨ nà n-tomtɨ lâmsɨ̀ ateyn tèyn baʼsɨ̂ nɨ̀ ɨ̀fwo ateyn nô ɨ̀ jɨ̀m nɨn kelɨ sɨ li aso ɨkwo a baŋnɨ-a kɨ dɨlɨ̀ chem kilùsɨ̀ mɨ̀vɨm ɨ̀n tal njvàsɨ̀ kæ̀ kelɨ wi ilɨŋ. ⁴⁰Wà n-kelɨ sɨ fèl nô mɨ ghà na kɨ na ghɨ kɨ a dzɨ ghê a mà dyèyn sɨ̂ và a kfɨyn afêyn.