Exodus 28

Ndzɨsɨ ngàŋ ndô Fɨyini i ngaŋtɨnɨ

¹Bôbo Fɨyini nɨn bê meyn sɨ̂ Mosìs na, “Bè na ghɨ li gvì nɨ̀ wâynà vâ Alòyn ŋêyn woyn ŋweyn, ɨ Nadàb nɨ̀ Abihù nɨ̀ Elezà nɨ̀ Itamà. Ma choʼ meyn àŋena antêynɨ̀ nɨ̀ ghelɨ Isìlæ̀ na ghɨ na fêl sɨ̂ mà ta ngàŋsɨ ndô Fɨyini. ²Tɨm ndzɨsɨ ngàŋ ndô Fɨyini sɨ̂ wâynà vâ Alòyn ta ka wù na maʼà wu na koʼnɨ-à fî dêŋsɨ-à ta ngàŋ ndô Fɨyini. ³Bè sɨ̂ ghelɨ ghì a mà fu itof sɨ̂ àŋena, àŋena na faytɨ̂ kya sɨ tas ndzɨsɨ na, ghɨ tɨm ndzɨsɨ sɨ̂ Alòyn ta ka ghɨ se sɨ yisi ŋweyn sɨ a ngàŋ ndô Fɨyini a wù maʼ. ⁴À ti ndzɨ sìsɨ̀ a ka ghɨ tas sɨ̂ ngàŋ ndô Fɨyini, ɨ fɨ̀bò fîfɨ̀ a ka fɨ na ghɨ atû àwaf a àngàŋtɨ̀ nɨ̀ ngàŋ ndô Fɨyini, nɨ̀ àwaf a nɨ̀ dàla nɨ̀ fɨ̀ ndzɨytɨ̂ fìfɨ̀ a ghɨ mâʼ antêynɨ̀ ma ghɨ tɨ̀m tɨm baʼsɨ̂ nɨ̀ àbâs a ndzɨsɨ kì a ghɨ n-lɨm atu nɨ̀ àkue awaf a. Àŋena nɨn tas ndzɨsɨ ngàŋ ndô Fɨyini nâ sèynsɨ̀ sɨ̂ wâynà vâ Alòyn nɨ̀ woyn ghɨ lûmnɨ̀ nɨ̀ ŋweyn ta ka àŋena na fêl sɨ̂ ma ta ngàŋsɨ ndô Fɨyini. ⁵Bè na àŋena tɨm ndzɨsɨ ateyn nɨ̀ àmbyèyn a kɨ bâŋ jôf kɨ tèyn ta aso ɨkwo nɨ̀ a nyemnɨ-a nɨ̀ akî a kɨ nyêm bâŋ ndû ndu kɨ̀mɨ nɨ akî a kɨ n-bɨ̂ylɨ̀ bâŋ baŋ nɨ̀ ndzɨsɨ a fɨfâ.”

Awaf a ngàŋ ndô Fɨyini

⁶Bè na ghelɨ ghì a ghɨ n-faytɨ̂ kya ifêl tɨm awaf nɨ̀ àmbyèyn a fyeynɨ-a kɨ bâŋ jôf kɨ tèyn ta aso ɨkwo a baŋnɨ-a nɨ akî a kɨ nyêm nyêm nɨ akî a kɨ nyêm bâŋ ndû ndu kɨ̀mɨ nɨ akî a kɨ n-bɨ̂ylɨ̀ bâŋ baŋ. ⁷Awaf ateyn a na kelɨ mɨ̀bâynɨ̀ mɨ̀ ndzɨsɨ a mbèʼsɨ̀ ta ka ghɨ na ghal chfɨŋ ateyn. ⁸Ghɨ nî ghɨ faytɨ tɨm akue awaf nâ kì-à kɨ̀mɨ nɨ̀ àmbyèyn a nyemnɨ-a nɨ akî a kɨ nyêm bâŋ ndû ndu nɨ akî a kɨ n-bɨ̂ylɨ̀ bâŋ baŋ nɨ̀ akî a kɨ n-bâŋ jôf kɨ ta aso ɨkwo, ɨ tas ghàŋtɨ̀ kɨ na ghɨ kɨ sɨ afo àmòʼ nɨ̀ àwaf ateyn a. ⁹Wà nî wa lì mɨ̀ngòʼtɨ̀ mɨ̀ onìks ɨ̀m bò ɨ̀ nyàʼ azɨyn a woyn Isìlæ̀ ghî njvàsɨ̀ bò ateyn. ¹⁰Wà se sɨ nyàʼ azɨyn ateyn, wa nyaʼ kɨ sɨ a ibzɨ. Nyàʼ azɨyn ntufa a ngòʼ ìmòʼ ɨ̀ nyàʼ azɨyn ntufa ateyn nɨ̀ ìlì. ¹¹Bè sɨ̂ wùl ɨ̀ vzɨ̀ a wù n-faytɨ kya sɨ nyàʼ ɨfwo a ngòʼsɨ̀, wù nyaʼ azɨyn a mɨ̂ngòʼtɨ̀ nâ ghè ɨ̀m bò sɨ a nchwæ. Wù nyâʼ wa baysɨ afo ma ghɨ fàytɨ nɨ̀ àso ɨkwo a baŋnɨ-a, ¹²ɨ timi ghàŋtɨ̀ a mɨ̂bàynɨ̀ mɨ̀ ndzɨsɨ ghè a mɨ̀ n-ghɨ a mbèʼsɨ̀ a awaf, kɨ na dyèyn àsas a ndosɨ nɨ̀ ghelɨ Isìlæ̀ kì njvàsɨ̀ bò. Azɨyn nâ kèynà na lum ghɨ kɨ aghom nɨ̀ Alòyn sɨ a nchwæ ta ka Bôbo Fɨyini na lum bêtɨ̀ kɨ betɨ woyn Isìlæ̀. ¹³Bè na ghɨ faytɨ afo kì a ka ghɨ na baysɨ̂ ɨ̀fwo nâ wèyn ateyn kɨ nɨ̀ àso ɨkwo a baŋnɨ-a, ¹⁴ɨ botɨ ɨ̀fwo ɨ̀ bwò wu ghɨ ta nkfɨ̀ nɨ̀ àso ɨkwo a baŋnɨ-a kɨ kelɨ wi ilɨŋ ɨ kul ɨfwo nâ ghè a ghɨ bàysɨ mɨ̀ngòʼtɨ̀ mzɨ̀ ateyn.

Fɨ̀bò fîfɨ̀ a ka ngàŋ ndô Fɨyini na ghaŋsɨ a àngàŋtɨ̀

¹⁵Bôbo Fɨyini nɨn be meyn sɨ̂ Mosìs na “Bè na wùl vzɨ̀ a wù n-kya sɨ faytɨ sɨ tɨm ɨfwo, tɨm afo kɨ ghɨ tèyn ta fɨ̀bò nɨ̀ àmbyèyn a kɨ bâŋ kêʼ tèyn ta aso ɨkwo nɨ a nyemnɨ-a nɨ akî a kɨ n-bâŋ nyêm ndû ndu nɨ akî a kɨ n-bɨ̂ylɨ̀ bâŋ baŋ kɨ̀mɨ tèyn ta ghɨ tɨ̀m awaf kì, ta ka ngàŋ ndo Fɨyini na ghaŋsɨ̂ a àngàŋtɨ̀ kɨ gâmtɨ̀ ŋweyn na wù na kelî ìwo zɨ̀ a mɨ n-kɨŋ. ¹⁶Afo ateyn a na ghɨ ma ghɨ buʼnɨ meyn yòmtɨ kɨ na ghɨ kɨ ighel ighel ɨbyàs ɨ̀ jɨ̀m, nô mɨ abâs à kà ɨ ghaʼ chem ntàm àwu. ¹⁷Ghɨ nî, wa lì mɨ̀ngòʼtɨ̀ ɨ̀n jofɨnɨ̂ ɨ̀n lì, ɨ we a mbaŋi sɨ̀ kæ̀, mbaŋi ɨ yî àsɨ na kelɨ fɨ̀ngòʼtɨ̀ fɨ lubì nɨ̀ fɨ̀ngòʼtɨ̀ fɨ tobàz nɨ̀ belìl. ¹⁸À na ghɨ a ànkùmtɨ̀ a mbaŋi, a wà we fɨ̀ngòʼtɨ̀ fɨ tukìyòs nɨ̀ fɨ̀ngòʼtɨ̀ fɨ safayà nɨ̀ ɨ fɨ emelàdfɨ̀ ¹⁹A na ghɨ a mbaŋi ì lì a wà we fɨ̀ngòʼtɨ̀ fɨ jasìn nɨ̀ fɨ̀ngòʼtɨ̀ fɨ agèt nɨ̀ ɨ fɨ ametìs. ²⁰A à na ghɨ a mbaŋi ì gòʼsɨnɨ a wà we fɨ̀ngòʼtɨ̀ fɨ klisolàt nɨ̀ fɨ̀ngòʼtɨ̀ fɨ onìks bàʼsɨ nɨ ɨ fɨ jasbàfɨ̀. Wa n-wê mɨ̀ngòʼtɨ̀ nâ mèyn ɨ̀ bàysɨ afo ma ghɨ fàytɨ nɨ̀ àso ɨkwo a baŋnɨ-a. ²¹Mɨ̀ngòʼtɨ̀ mɨ̀ àteyn na ghɨ njvàsɨ̀ bò, nô mɨ fɨ̀ngòʼtɨ̀ fɨ̀kà ɨ kelɨ ìzɨyn i isas i ndo Isìlæ̀ ìmòʼ ateyn ta ghɨ nyàʼ sɨ a nchwæ.”

²²“Botɨ afo nɨ̀ àso ɨkwo a baŋnɨ-a kɨ ghɨ ta nkfɨ̀ ɨ kul afo afî a kɨ n-ghaŋlɨ a àngàŋtɨ̀ tì. ²³Wa n-faytɨ̂ mɨ̀nchaʼ ɨ̀m bò nɨ̀ aso ɨkwo a baŋnɨ-a ɨ̀ wèsɨ a tɨghaŋ tɨ fɨ̂bò nâ ghàyn tɨ̀ bò. ²⁴Wà nî wa lì ɨ̀fwo vzɨ̀ a ghɨ bo nɨ̀ àso ɨkwo a baŋnɨ-a tî ɨ̀ bwò ɨ chfɨŋ a mɨnchaʼ afî a tɨghaŋtɨ fɨbò fɨ angàŋtɨ̀ nâ ghè, ²⁵ɨ lì àchfɨ̂ a li-a kì à bò ɨ chfɨŋ ɨfwo ghè a ghɨ fàytɨ nɨ̀ àso ɨkwo a baŋnɨ-a tî a mbèʼsɨ̀ ɨ ghaŋsɨ dzɨ a asɨ. ²⁶Faytɨ kɨmɨ mɨ̀nchaʼ ɨ̀m bò nɨ̀ àso ɨkwo a baŋnɨ-a ɨ baysɨ a tɨghaŋ tɨ fɨbò afî a àngàŋtɨ̀ tì dzɨ a antêynɨ̀ abàs itsɨyn a ngùŋ àwaf. ²⁷Faytɨ kfeynsɨ kɨmɨ mɨ̀nchaʼ ɨ̀m bò nɨ̀ àso ɨkwo a baŋnɨ-a ɨ timi ghàŋtɨ̀ asas a mɨ̂bàynɨ̀ mɨ̀ ndzɨsɨ ghè a mɨ̀ n-ghɨ a mbèʼsɨ̀ asɨ awaf, baʼsɨ̂ a ntas atû àkuè awaf ma ghɨ faytɨ meyn tɨm. ²⁸Ghɨ na lî mɨ̀nchaʼ mzɨ̀ a mɨ̀ n-ghɨ a fɨbò fɨ àngàŋtɨ̀ tì ghɨ chɨ̀yntɨ kul yùŋ a nkfɨ̀ ì nyemnɨ afî a yì n-ghɨ akue awaf ta ka fɨ̀bò fɨ àngàŋtɨ̀ nâ fìfɨ̀ na ghaŋlɨ̂ wì sɨ a ngeŋ.”

²⁹“Alòyn na se sɨ zɨ Alèʼ a Laynɨ-a nô mɨ ɨlvɨ gha, ghaŋsɨ fɨ̀bò fîfɨ̀ a ghɨ nyàʼ azɨyn a woyn Isìlæ̀ ateyn njvàsɨ̀ bò, fɨ nî nà wù na kelî ìwo zɨ̀ a Bôbo Fɨyini nɨn kɨŋ ta ka Bôbo Fɨyini læ̂ nà lum bêtɨ̀ kɨ betɨ woyn Isìlæ̀. ³⁰Wà n-kelɨ kɨmɨ sɨ we Yùlîm nɨ̀ Tùmîm a fɨ̂bò afî a àngàŋtɨ̀ ta ka fɨ na ghɨ kɨ a àngàŋtɨ̀ nɨ̀ Alòyn nô mɨlvɨ gha ta wù n-zɨ asɨ nɨ̀ Bôbo Fɨyini. Ɨfwo nâ wèyn na gâmtɨ̀ Alòyn wu kelî ìwo zɨ̀-ì a Bôbo Fɨyini nɨn kɨŋ na ghelɨ Isìlæ̀ ni.”

Ndzɨsɨ lisɨ sìsɨ̀ a ngàŋ ndô Fɨyini i ngaŋtɨnɨ na màʼ

³¹Bôbo Fɨyini nɨ̀n be meyn sɨ̂ Mosìs na, “Bè na ghɨ tas dàla zɨ̀ a ka Alòyn na mâʼ àwaf atû àteyn nɨ̀ ndzɨsɨ ma ghɨ tɨm kɨ nɨ̀ àmbyèyn a nyemnɨ-a. ³²Ndzɨsɨ ateynsɨ na kelɨ ɨ̀mzɨ̂ antêynɨ̀ àntêynɨ̀ ma ghɨ tɨm meyn kal nɨ̀ àmbyèyn a ta ka wu na ghɨ ma wu kàʼ wu bû bàsà ɨlvɨ ta wù n-mâʼ. ³³Ghɨ n-tas ndzɨsɨ ateyn ɨ̀ tɨm ɨfwo ɨlvi achfɨ̀ ateyn wu ghɨ tèyn ta mɨtam mɨ̀ bòmeglanèt nɨ̀ àmbyèyn a kɨ nyêm nyem, nɨ akî a kɨ n-bâŋ nyêm ndû ndu nɨ̀ akî a kɨ n-bɨ̂ylɨ̀ bâŋ baŋ ɨ̀ we fɨ̀ynɨ̀ nɨ̀ mbeŋlɨsɨ ma ghɨ fàytɨ nɨ̀ àso ɨkwo a baŋnɨ-a. ³⁴Ghɨ na wê mbeŋlɨ sɨ ateynsɨ, fɨ̂ynɨ̀ nɨ̀ ɨ̀fwo nâ vzɨ̀ a wu n-ghɨ ta mɨtam mɨ̀ bòmeglanèt tì isas i dàla nâ ghè. ³⁵Alòyn na se sɨ fèl a ndo nɨ̀ ma wu màʼ ndzɨ nâ sèynsɨ̀. Wù na se sɨ zɨ Alèʼ a Laynɨ-a asɨ nɨ̀ Bôbo Fɨyini, mbeŋlɨsɨ ateynsɨ nà kumà, ɨ̀ nì se sɨ fvɨ̀, sɨ nà kumà ta ka wù faŋ tɨ kfɨ.”

³⁶“Wà nî wa faytɨ fɨ̀bâynɨ̀ fɨ afo kɨ nɨ̀ àso ɨkwo a baŋnɨ-a kɨ kelɨ wi ilɨŋ, ɨ nyàʼ ateyn na: À SƗ KELƗ BÔBO FƗYINI. ³⁷Wà nî wa we nkfɨ̀ ì nyemnɨ ateyn ɨ kul abàs afo ghè a ka wù na lɨm atu nɨ̀ ŋweyn kɨ nà ghɨ dzɨ a asɨ. ³⁸Afo ateyn a na ghɨ ɨchfɨ̀ atu nɨ̀ Alòyn dyêyn na nô mɨ mbɨ ì kà ta ghelɨ Isìlæ̀ nì ɨlvɨ ta àŋena nɨn fu ifu i laynɨ-i sɨ̂ mà nɨn ghɨ a ŋweyn atu. Kɨ na lum ghɨ kɨ ghɨ ɨchfɨ atu nɨ̀ Alòyn ta ka mà Bôbo Fɨyini na fsɨ tɨ̀fu tɨ ghelɨ Isìlæ̀.”

³⁹“Wa n-tɨm dàla nɨ̀ ndzɨsɨ fɨfâsɨ̀ baʼsɨ̂ nɨ̀ àbâs afo kì a wù na lɨm atu. Wùl vzɨ̀ a wù n-tɨm ɨfwo nɨn tɨm àkue awaf.”

Ndzɨsɨ woyn Alòyn

⁴⁰Bôbo Fɨyini nɨn fi meyn bè sɨ̂ Mosìs na, “Bè na ghɨ faytɨ ndzɨsɨ dyefɨnɨ sɨ fɨfâsɨ̀ sɨ̂ woyn Alòyn nɨ̀ ɨ̀kue ɨwaf baʼsɨ̂ nɨ̀ ɨ̀byâs ɨfwo vzɨ̀ a ka àŋena na lɨm atu ta ka àŋena na maʼà, ghɨ nà koʼnɨ-à fî dêŋsɨ-à. ⁴¹Wà nî wa màʼ ndzɨsɨ ateyn ɨwùyn nɨ̀ wâynà vâ Alòyn ŋêyn woyn ŋweyn, ɨ sfɨ̀s mɨ̀vɨl mɨ̀ olìfsɨ̀ a àŋena ɨtu ɨ yisi àŋena ta ka àŋena na ghɨ sɨ a nyɨŋ fêl sɨ mà sɨ a ngàŋsɨ ndo nɨ̀ mà. ⁴²Wa n-faytɨ̂ ndzɨ sìsɨ̀ a ka àŋena na tuŋ antêynɨ̀ ndzɨsɨ sɨ lû kɨ akuʼtɨ kalì chem kɨ ɨbzɨ̀ ta ka sɨ na kɨ̂ŋtɨ̀ àsas a àŋena. ⁴³Alòyn ŋêyn woyn ŋweyn na se sɨ zɨ a fɨndo nɨ̀ Bôbo Fɨyini nô mɨ ɨlvɨ gha, kèsa ghɨ n-zɨ̂ sɨ fu ifu abaŋ ifu a, àŋena nà kelɨ sɨ tuŋ bùla tì a àŋena ni mbɨ, ɨ̀ kfɨ̀tɨ. Isaʼ nâ yèynì nɨn faŋ kɨ faŋ sɨ̂ Alòyn ŋêyn woyn ŋweyn nɨ̀ woyn ghì a ghɨ n-læ̀ koʼ ibàm.”