Exodus 29

Dzɨ̀ zɨ̂ a ka ghɨ na yisî ngàŋsɨ ndô Fɨyini ateyn.

¹Bôbo Fɨyini nɨn be meyn sɨ̂ Mosìs na, “Iyeynì nɨn ghɨ ìwo zɨ̀ a ka wà ni sɨ yisi Alòyn ŋêyn woyn ŋweyn ta ka àŋena na felɨ̀ sɨ̂ mà ta ngàŋsɨ ndô Fɨyini. Lì wâyn nyàm mbòloʼ ɨ lûmnɨ̀ baʼsɨ̂ nɨ̀ ɨ̀ywaʼ ɨ̀ bwò, nyam nâ sèynsɨ̀ ɨ kelɨ wi nseʼi. ²Li kɨmɨ ɨ̀nkfɨ̂ŋ mɨ̀ wît ma ghɨ gva meyn mɨ̀ faytɨ kfɨ ɨ nùʼ ɨ fàŋ tɨ we fɨ̀shɨ̀k ateyn. Wà nî wa lì ɨ̀n lì ɨ nyòʼ àbayn ateyn kɨ̀ tî, ɨ lì ɨ̀n lì ɨ fyes mɨvɨl mɨ̀ olìfsɨ̀ ateyn jæ ta ka wà nyoʼ, ɨ li ɨ̀n lì ɨ nyòʼ àbayn a li-a ateyn a mɨ̂bàŋnɨ̀ a mɨ̂bàŋnɨ̀ ɨ wàŋtɨ̀ mɨ̀vɨl mɨ̀ olìfsɨ̀ atû àteyn. ³Wà nî wa chɨ̀yntɨ̀ ɨ we kɨ a nkwò ìmòʼ ɨ gvi nɨ̀ ŋweyn sɨ̂ mà baʼsɨ̂ nɨ̀ wâyn nyàm mbòloʼ ɨ lûmnɨ̀ vzɨ̀ nɨ̀ ɨ̀ywaʼ vzɨ̀ ɨ̀ bwò. ⁴Wà nî wa lì ɨ gvì nɨ̀ Alòyn ŋêyn woyn ŋweyn a ɨchfɨ fɨndo nɨ̀ Bôbo Fɨyini ɨ sù àŋena nɨ̀ mû. ⁵Wà sû wa màʼ ndzɨsɨ ngàŋ ndô Fɨyini sîsɨ̀ ɨwuyn nɨ̀ Alòyn. Wa n-mâʼ fɨ̀ ndzɨytɨ̂ fɨ antêynɨ̀ ɨ̀wùyn fîfɨ̀, ɨ̀ màʼ dàla àwaf, nɨ̀ àwaf a bàʼsɨ nɨ̀ fɨ̂bò fɨ àngàŋtɨ̀ fîfɨ̀. Wà nî wa kul awaf ateyn nɨ̀ àkue ateyn kì a ghɨ fàytɨ tɨ̀m tî. ⁶Wà nî wa lì àbâs afo kì a ghɨ n-lɨm atu, ɨ kul a ŋweyn atu ɨ baysɨ fɨ̀bâŋnɨ̀ fɨ afo fɨ laynɨ fìfɨ̀ a ghɨ fàytɨ nɨ̀ àso ɨkwo a baŋnɨ-a tî. ⁷Wà mâʼ wa lì mɨ̀vɨl mzɨ̀ a ghɨ n-yisi ngàŋsɨ ndô Fɨyini ateyn ɨ sfɨ̀s a ŋweyn atu. ⁸Wà yisi ŋweyn, wa lì ɨ gvì nɨ̀ woyn ŋweyn ɨ màʼ ndzɨsɨ dyefɨnɨsɨ sɨ fɨfâsɨ̀ ɨwuyn nɨ̀ àŋena, ⁹ɨ lɨm ɨtu àŋena nɨ̀ ɨbyâs ɨfwo vzɨ̀ a ghɨ n-lɨm ɨtu ateyn. Wà nî wa kul ɨkue awaf asas nɨ̀ Alòyn ŋêyn woyn ŋweyn. À ti dzɨ zɨ̀ a wa n-yisi àŋena ateyn bòm ta ngàŋsɨ ndô Fɨyini sɨ̀ læ̀ na lum fvɨ̂ kɨ isas i ndo nâ ghàyn.”

¹⁰“Wà nî, wa lì ɨ gvì nɨ̀ wâyn nyàm mbòloʼ ɨ lûmnɨ̀ zɨ̀ ɨchfɨ fɨndo nɨ̀ mà, Alòyn ŋêyn woyn ŋweyn lem ɨwu àŋena atu nɨ̀ nyeyn. ¹¹Àŋena lêm, wa lì nyam àteyn ɨ sɨ asɨ nɨ̀ Bôbo Fɨyini, ɨchfɨ fɨndo nɨ̀ ŋweyn nâ ghè. ¹²Wà sɨ wa lì mɨ̀luŋ mɨ̀ àteyn ɨ̀n lì nɨ̀ baŋ awu, ɨ yoʼ a mɨchoʼ afî a mɨ̀ n-ghɨ a tɨghaŋ tɨ abaŋ ifu ghɨ tèyn ta ndoŋsɨ tî, ɨ sfɨ̀s àbes ateyn isas abaŋ nâ ghè. ¹³Wà nî wa lì ìso zɨ̀ a yi chɨ̀ytɨ ɨfwo ɨlvà nô ì jɨ̀m, iso zɨ̀ a yi chɨ̀ytɨ ɨtwem ikuè nɨ̀ nfyeŋsɨ akɨŋ baʼsɨ̂ nɨ̀ ìso zɨ̀ a yi n-ghɨ ɨwùyn ateyn, ɨ nyòʼ atû àbaŋ ifu nâ ghè. ¹⁴Mɨ̀tì ɨ lì ɨ fvɨ̀ nɨ̀ njwò àteyn, nɨ̀ gvɨ àteyn baʼsɨ̂ nɨ̀ ɨfwo ɨlvà sɨ alèʼ ghè a ghɨ bɨ̀ ateyn ɨ kæ sɨ nyòʼ sɨ a ifu. Ifu ateyn i nɨn ghɨ ìfu sɨ nì na mà lesɨ fù mbɨsɨ ngàŋsɨ ndô Fɨyini.”

¹⁵“Lì ayaʼ a li-a ɨ bè Alòyn ŋêyn woyn ŋweyn lem ɨwu àŋena atû nɨ̀ nyàm àteyn, ¹⁶wà sɨ ɨ̀ mɨ̀sì mɨ̀luŋ mɨ̀ àteyn ɨwùyn abaŋ ifu kɨ̀ ɨbyâs ɨ̀ jɨ̀m. ¹⁷Wà nî, wa kaʼtɨ àyaʼ ateyn a tɨ̂kàʼ a tɨ̂kàʼ, ɨ sù ɨfwo ɨlvà bàʼsɨ nɨ̀ àfyeyn ateyn a, ɨ lèm ɨ baʼsɨ nɨ̀ àtu a, nɨ̀ tɨ̀kaʼ tɨlitɨ tìtɨ̀ kɨ̀ alêʼ àmòʼ. ¹⁸Wà nî, wa nyòʼ àyaʼ ateyn nô à jɨ̀m atû àbaŋ ifu nâ ghè. À n-ghɨ ìfu i nyoʼnɨ-i sɨ̂ Bôbo Fɨyini, yi lɨ̂mtɨ̀ jofà, ifu ma ghɨ nyòʼ nyoʼ sɨ̂ Bôbo Fɨyini.”

¹⁹“Wà nî, wa lì àyaʼ a li-a kì ɨ fi bè Alòyn ŋêyn woyn ŋweyn lem ɨwu àŋena atu nɨ̀ nyàm àteyn. ²⁰Àŋena lêm, wa li àyaʼ ateyn ɨ sɨ, ɨ lì mɨ̀luŋ mɨ̀ àteyn ɨn lì ɨ yoʼ ɨtùŋlɨ ɨkœ ɨ two nɨ̀ Alòyn ŋêyn woyn ŋweyn, ɨ yoʼ ɨ̀n lì a lumsɨ ɨwu ɨkœ ɨ two nɨ̀ àŋena, ɨ yoʼ ɨ̀n lì a lumsɨ ɨvɨ̀ ɨkœ ɨ two nɨ̀ àŋena. Wà yoʼ mèsì, wa lì àbes ateyn ɨ mɨ̀sì a mbæ̀sɨ abaŋ ifu nâ ghè kɨ̀ ɨbyâs ɨ̀ jɨ̀m. ²¹Wà sfɨ̂s, wa lì mɨ̀luŋ mɨ̀ àteyn ɨ̀n lì atû àbaŋ ifu, baʼsɨ̂ nɨ̀ mɨ̀vɨ̂l mzɨ̀ a ghɨ n-yisi ngàŋsɨ ndô Fɨyini nɨ̀ ɨ̀mêyn ɨ mɨ̀sì ɨwuyn nɨ̀ Alòyn nɨ̀ ndzɨsɨ ŋweynsɨ. Wa mɨ̀sì kɨmɨ ɨ̀n lì ɨwùyn nɨ̀ woyn ŋweyn nɨ̀ ndzɨsɨ àŋena. Wa nì ti, a àŋena nɨ̀ ndzɨsɨ àŋena na ghɨ sɨ a nyɨŋ sɨ̂ mà.”

²²“Wa n-fvɨ̀sɨ̀ ìso sɨ ayaʼ nâ ghàyn, li ɨ̀nkùyn ɨ kuylɨnɨ ateyn vzɨ̀ nɨ̀ ìso ateyn i, ɨ̀ fvɨsɨ̀ ìso zɨ̀ a yi n-chɨytɨ ɨfwo ɨlvà, ɨ fvɨ̀sɨ ìso zɨ̀ a yi chɨ̀ytɨ ɨtwem ikuè nɨ izɨ-ì a yi n-chɨytɨ nfyeŋsɨ akɨŋ nɨ izɨ-ì a yi n-chɨytɨ abî ɨkœ ɨ two. Ayaʼ nâ kèynà nɨn ghɨ a kî a wa n-yisi ngàŋ ndô Fɨyini ateyn. ²³Wà nî wa fvɨ̀sɨ̀ àbayn a nkwò ɨ̀byayn afî a wu n-kelɨ wi fɨ̀shɨ̀k, ti asɨ nɨ̀ Bôbo Fɨyini tì. Fvɨ̀sɨ̀ akî a ghɨ nyòʼ kɨ̀ tî bula ghɨ fyes mɨ̀vɨ̀l ateyn, ɨ fvɨ̀sɨ̀ akî a ghɨ fyès mɨvɨl ateyn, nɨ akî a ghɨ nyòʼ a mɨ̂bàŋnɨ̀ a mɨ̂bàŋnɨ̀. ²⁴Wà fvɨsɨ, wa chɨ̀yntɨ̀ fu ɨfwo nâ wèyn nô ɨ̀ jɨ̀m ɨwu nɨ̀ Alòyn ŋêyn woyn ŋweyn ɨ̀ bè àŋena laysɨ kòʼsɨ iyvɨ sɨ a ifu sɨ a nyɨŋ sɨ̂ mà. ²⁵Àŋena lâysɨ̀, wa kasi fsɨ ɨ nyòʼ abaŋ ifu baʼsɨ̂ nɨ̀ ìfu i nyoʼnɨ-i i li zɨ̀ sɨ̂ mà ta ka yi na jofà, lɨ̂mtɨ̀ foma sɨ̂ mà. ²⁶Wà nî wa lì nkumtɨ àyaʼ zɨ̀ a wà sɨ sɨ yisi Alòyn, ɨ làysɨ̀ ɨ koʼsɨ iyvɨ sɨ a ifu sɨ̂ Bôbo Fɨyini. À n-kelɨ và alêʼ nâ kì-à.”

²⁷“Wà nî wa fu ɨlwêʼ nyâm vzɨ̀ a ghɨ sɨ, sɨ yisi ngàŋ ndô Fɨyini ateyn sɨ̂ Fɨyini fɨ. Nkumtɨ zɨ̀ a ghɨ nì lâysɨ̀ iyvɨ baʼsɨ̂ nɨ̀ àbi-à, nɨn kelɨ Alòyn ŋêyn woyn ŋweyn. ²⁸Ghelɨ Isìlæ̀ læ̀ nà lum fu kɨ fu ɨlwêʼ nâ wèyn sɨ̂ Alòyn ŋêyn woyn ŋweyn. À n-ghɨ ìwo zɨ̀ a ghelɨ Isìlæ̀ na lum nî nô mɨ ɨlvɨ gha ta àŋena fù tɨfu sɨ̂ Bôbo Fɨyini sɨ nà chi nɨ̀ mbôynɨ̀.”

²⁹“Alòyn læ̂ kfɨ, ghɨ lì ndzɨsɨ ngàŋ ndô Fɨyini sìsɨ̀ a wù n-mâʼ nî ifêl ateyn, ɨ màʼ ɨwuyn nɨ̀ wayn ŋweyn vzɨ̀ a wu n-læ̀ lî alêʼ a ŋweyn, ɨ yisi ŋweyn. ³⁰Wàyn vzɨ̂ a ka wù læ̂ lì àlêʼ a ŋweyn ta ngàŋ ndo Fɨyini, ɨ̀ nà zɨ̂ a fɨndo nɨ̀ Bôbo Fɨyini sɨ fèl Alèʼ a Laynɨ-a læ̀ mâʼ ndzɨ nâ sèynsɨ̀ sɨ a mɨchi nsòmbo.”

Ɨfwo ɨ yɨnɨ vzɨ̀ a ghɨ n-fu sɨ̂ Fɨyini

³¹“Wa n-lî àyaʼ kì a ghɨ sɨ ta ghɨ n-yisi ngàŋ ndô Fɨyini ɨ̀ kfè njwò àteyn alèʼ ghè a ghɨ lèm sɨ nà koʼsɨ̂ Bôbo Fɨyini ateyn ³²Wà kfê, Alòyn ŋêyn woyn ŋweyn ɨ timi kɨ ɨchfɨ fɨndo nɨ̀ Bôbo Fɨyini ɨ kfɨl njwò àteyn, ɨ yɨ abayn kì a kɨ bɨ̀sɨ a nkwò afî tì. ³³Àŋena nɨn yɨ ɨfwo ɨ yɨnɨ nâ wèyn a ghɨ n-fu na Bôbo Fɨyini lesɨ fù mbɨsɨ àŋena ta ghɨ n-yisi àŋena sɨ fì sɨ lem àŋena sɨ a nyɨŋ sɨ a ngàŋsɨ ndô Fɨyini, mɨtì ka wùl àntsɨ nɨn yɨ bòm ta à n-ghɨ ɨ̀fwo ɨ yɨnɨ ɨ laynɨ. ³⁴Njwò nâ yèyn kèsa abayn nâ kèynà kæ sɨ bɨsɨ, ɨ̀ chi ɨtuʼ layn, wa nyoʼ kɨ nyoʼ. Ka wùl nɨ̂n fì yɨ bòm ta ghɨ fu meyn sɨ̂ mà.”

³⁵“Wa n-nì nô mɨ ghà sɨ̂ Alòyn ŋêyn woyn ŋweyn ta mà bè sɨ̂ và, ɨ̀ lî mɨchi nsòmbo sɨ yisi àŋena. ³⁶À na ghɨ nô mɨ achi à kà antêynɨ̀ mɨ̀chi nâ ghàyn nsòmbo, wa sɨ wâyn nyàm mbòloʼ ɨ lûmnɨ̀ sɨ a ifu sɨ̂ mà ta ka mà lesɨ fù mbɨsɨ àŋena, ɨ̀ làynsɨ àbaŋ ifu. Wà nî, wa lì mɨ̀vɨl mɨ̀ olìfsɨ̀ ɨ yisi àbaŋ ateyn sɨ nì na kɨ na layna. ³⁷Wa nî tèyn sɨ a mɨchi nsòmbo a abaŋ ifu nâ kèynà na layn kfeynɨ-à, a kûm nô mɨ ghà abaŋ ateyn, kɨ nà layna.

³⁸“À na ghɨ nô mɨ achi à kà antêynɨ̀ mɨ̀chi nâ ghàyn nsòmbo, wa sɨ woyn njɨ̀ ghɨ̀ bò abaŋ ifu nâ ghàyn sɨ̂ mà, ma sɨ chem kɨ bèŋ. ³⁹Wa fu ìmòʼ bɨsì bɨsì, wa ni fu ìmòʼ aleŋ ɨlvɨ ikfa. ⁴⁰Wà na se sɨ fu wâyn njɨ̀ ɨ yî àsɨ, wa fèʼ ɨ̀nkfɨ̂ŋ mɨ̀ wît a fɨfùʼlɨ̀, ma ghɨ gva meyn mɨ̀ faytɨ̂ kfɨ, ɨ gwòtɨ̀ ɨlwêʼ ìvɨm, ɨ lì àlêʼ àmòʼ, ɨ lì lità mɨ̀vɨl mɨ̀ olìfsɨ̀ ta ghɨ kam, ɨ gwòtɨ̀ ɨlwêʼ ɨ̀ kfæ̀, ɨ lì àlêʼ àmòʼ, ɨ lì lità mɨ̀lùʼ ɨn to, ɨ gwòtɨ̀ ɨlwêʼ ɨ̀ kfæ̀ ɨ lì àlêʼ àmòʼ ɨ baʼsɨ ateyn ɨ fu sɨ a ifu sɨ̂ mà. ⁴¹À na ghɨ aleŋ ɨlvɨ ikfa, wà se sɨ fu wâyn njɨ̀ ɨ̂ lvɨ̀ vzɨ̂, wa baʼsɨ kɨmɨ ɨ̀nkfɨ̂ŋ mɨ̀ wît, nɨ̀ mɨ̀lùʼ ɨn to kɨ̀ ta wà nì bɨs ɨ̀ nì. À n-ghɨ ìfu i nyoʼnɨ-i, yi jofà, lɨ̂mtɨ̀ fom sɨ̂ Bôbo Fɨyini.”

⁴²“Ɨjwâŋ vzɨ̀ a wu n-læ̀ koʼ ibàm læ̀ nà lum fu kɨ fu ifu i nyoʼnɨ-i nâ yèynì ɨchfɨ fɨndo nɨ̀ Fɨyini fɨ, asɨ nɨ̀ Bôbo Fɨyini. À n-ghɨ àlêʼ kì a mà na kòynɨ̀ nɨ̀ ghelɨ ghem ateyn, ma taŋi sɨ̂ và. ⁴³Mɨ n-kôynɨ̀ nɨ̀ ghelɨ Isìlæ̀ alèʼ nâ ghàyn, a iŋwâʼ ì yemi ni a alêʼ ateyn a na layna.”

⁴⁴“Mɨ nì tèyn, a fɨ̀ndo fɨ Fɨyini fɨ nɨ̀ àbaŋ ifu a na layn kfeynɨ-à, ɨ̀ fì nì a Alòyn ŋêyn woyn ŋweyn na layn kfeynɨ-à sɨ nà felɨ sɨ̂ mà sɨ a ngàŋsɨ ndô Fɨyini. ⁴⁵Mɨ n-faŋa nà ghɨ antêynɨ̀ nɨ̀ ghelɨ Isìlæ̀, ghɨ Fɨyini fɨ àŋena. ⁴⁶Àŋena nì kelî na mɨ n-ghɨ Bôbo Fɨyini, ɨ Fɨyini fɨ àŋena fìfɨ̀ a mà tî fvɨ̀sɨ̀ àŋena sɨ a ilaʼi Ijìb ta ka mà faŋ nà ghɨ a àŋena antêynɨ̀. À n-ghɨ mà Bôbo Fɨyini, ɨ Fɨyini fɨ àŋena.”