Exodus 30

Abaŋ sɨ nà nyoʼ ileŋ ateyn

¹Bôbo Fɨyini nɨ̀n be meyn sɨ̂ Mosìs na, “Bayn abaŋ nɨ̀ fɨ̀kâʼ fɨ àkasìyà fɨ̀ ta ka ghɨ na nyôʼ ìleŋ ateyn. ²Faytɨ ɨbyâs ateyn ɨ̀ kfæ̀ wu na ghɨ kɨ ighel ighel, kɨ dyêf chem ndû àbeʼ a ntàm, ghaʼ chem ndû kɨmɨ àbeʼ a ntàm, njetɨ̂ chem ndû ntàm ìmòʼ. Faytɨ mɨchoʼ a tɨ̂ghaŋ tɨ ateyn tɨ̀ kæ̀, mɨ ghɨ tèyn ta ndoŋsɨ nyâm, ghɨ kɨ sɨ afo àmòʼ nɨ̀ abaŋ ateyn a. ³Wà bayn ɨ̀ mèsì, wa yoʼ atu ateyn, ɨ yoʼ mbæ̀sɨ ateyn baʼsɨ̂ nɨ̀ mɨ̀choʼ mzɨ̀ a mɨ̀ n-ghɨ a tɨghaŋ tɨ ateyn tì ta ndoŋsɨ nyâm nɨ̀ àso ɨkwo a baŋnɨ-a kɨ kelɨ wi ilɨŋ, ɨ memtɨ ɨ kal kɨmɨ nɨ̀ àso ɨkwo a baŋnɨ-a a mbæ̀sɨ ateyn. ⁴Faytɨ mɨ̀nchaʼ ɨ̀m bò nɨ̀ àso ɨkwo a baŋnɨ-a, ɨ we isas alèʼ ghè a ghɨ mèmtɨ ɨ̀ kàl tî. We ɨbyâs ɨ̀ bwò mɨ̀ keʼnɨ keʼnɨ ta ka ghɨ tuŋ mbàŋsɨ̀ ateyn, nà ghal châʼsɨ̀ àbaŋ nâ kì ateyn. ⁵Kom mbàŋsɨ ateyn nɨ̀ fɨ̀kâʼ fɨ àkasìyà fɨ̀ ɨ yoʼ nɨ̀ àso ɨkwo a baŋnɨ-a. ⁶Tom abaŋ ateyn a asɨ abàs a ndzɨsɨ afî a kɨ n-gwôsɨ̀ alêʼ a laynɨ-a nɨ̀ àlêʼ kì a kɨ n-layn kfeynɨ, asɨ antayntayn a mɨ̂kàyn afî a ghɨ fàytɨ nchɨl àteyn nɨ̀ àso ɨkwo tî, alèʼ ghè a ka ghesɨ̀và koynɨ ateyn. ⁷Alòyn nɨ̀n kelɨ sɨ nà bɨsɨ nyôʼ ileŋ na yi na lɨ̂mtɨ̀ foma atû àbaŋ nâ ghè nô mɨ ɨlvɨ gha ta wù gvì sɨ kini lâm sɨ ateyn. ⁸Wù n-kelɨ sɨ nà nyôʼ kɨmɨ ìleŋ aleŋ ɨlvɨ ikfa nô mɨ ɨlvɨ gha ta wù zɨ sɨ dyayn lâmsɨ̀ ta ka ileŋ i na lum lɨmâ wì asɨ nɨ̀ Bôbo Fɨyini. À læ̀ nà koʼ nô mɨ àjâŋ à kà, kɨ nà nî kɨ tì. ⁹Ka wa n-læ̀ nyòʼ ìleŋ i yilû-ì ma bɨmî wì abaŋ ifu nâ ghàyn, kèsa ɨ̀ fu ifu i nyoʼnɨ-i, kèsà ifu ɨfwo ɨ yɨnɨ ateyn. Ka wa n-læ̀ màʼ mɨ̀lûʼ atû àbaŋ nâ ghàyn. ¹⁰Alòyn na fvɨ̀ nô mɨ a bêŋ ì kà, wu lì mɨ̀luŋ mɨ̀ nyàm ma ghɨ sɨ̀ sɨ a ifu na Fɨyini fɨ lesɨ fù mbɨsɨ ghêl, ɨ yoʼ a mɨ̀choʼ afî a mɨ̀ n-ghɨ têyn ta ndoŋsɨ nyâm tì, ta ka abaŋ ateyn a na layna. À læ̀ nà koʼ nô mɨ àjâŋ à kà kɨ nà nî kɨ tì. Abaŋ ateyn a nɨn layn kfeynɨ̂ sɨ̂ Bôbo Fɨyini.”

Ɨkwo sɨ yuyn atu a wûl.

¹¹Bôbo Fɨyini nɨn fi meyn bè sɨ̂ Mosìs na, ¹²“Wa nì se sɨ taŋ ghelɨ Isìlæ̀, nà taŋ nô mɨ ndà wu nà kelɨ sɨ làʼ afo sɨ̂ Bôbo Fɨyini sɨ yuyn atu a ŋweyn ta ka ngeʼ faŋ tɨ̀ kòli ŋweyn. ¹³Wùl kæ sɨ lù bula ghɨ taŋ ŋweyn ɨ̀ chwò abàs nɨ̀ ghelɨ ma ghɨ taŋ meyn, a wù na kelɨ sɨ làʼ abeʼ a shekèl yi dɨlɨ̀ chem ndû kilò sɨ a ifu sɨ̂ Bôbo Fɨyini sɨ yuyn atu a ŋweyn kɨ ighel ta ɨfyêʼ ɨ ndô Fɨyini nɨ̀n dyêyn. ¹⁴Nô mɨ ndà vzɨ̀ a wù chwò abàs nɨ̀ ghelɨ ghì a ghɨ taŋ ma wù lèma meyn ɨ̀ chem bèŋ mɨ̀vɨm ɨ̀m bò sɨ ndù asɨ nɨn kelɨ sɨ fu ifu sɨ̂ Bôbo Fɨyini. ¹⁵Ghɨ se sɨ fu ifu nâ yèynì na Bôbo Fɨyini lesɨ fù mbɨ sisɨ, ka wul ɨ̀ ghaʼnɨ nɨ̂n fu ɨkwo wu dvɨ̂ chwô àbeʼ a shekèl, ka wul ànfɨf nɨ̂n fu wu læ̂ chwô àbeʼ a shekèl. ¹⁶Wà fsɨ ɨ̀kwo nâ wèyn a ghelɨ Isìlæ̀ fù sɨ yuyn ɨtu àŋena ateyn, wa nà naŋsɨ̂ àwo ateyn a fɨndo nɨ̀ Bôbo Fɨyini. Ghelɨ Isìlæ̀ na fu ɨ̀kwo nâ wèyn, Bôbo Fɨyini nà kfâʼtɨ̀ àŋena, kɨ̂ŋtɨ̀ àŋena sɨ a ngeʼsɨ.”

Akaŋ ma ghɨ faytɨ nɨ̀ ìdyayn i.

¹⁷Bôbo Fɨyini nɨ̀n be meyn sɨ̂ Mosìs na, ¹⁸“Faytɨ akaŋ a ghaʼnɨ-a baʼsɨ̂ nɨ̀ àfo kì a ka kɨ na ti atû ateyn nɨ̀ ìdyayn i. Wà faytɨ wa we mu ateyn ɨ tom ayemi afî a kɨ n-ghɨ antêynɨ̀ àntêynɨ̀ a fɨndo nɨ̀ Bôbo Fɨyini nɨ̀ abaŋ ifu a, ghɨ na sû ɨ̀wu ateyn nɨ̀ ɨ̀vɨ. ¹⁹Alòyn ŋêyn woyn ŋweyn na sû ɨ̀wu baʼsɨ nɨ̀ ɨ̀vɨ àŋena nɨ̀ mu mzɨ̀ a mɨ̀ n-ghɨ akaŋ nâ ghàyn. ²⁰Àŋena na se sɨ zɨ a fɨndo nɨ̀ Bôbo Fɨyini nô mɨ ɨlvɨ gha, àŋena sù ɨ̀wu a mu nâ ghàyn baʼsɨ̂ nɨ̀ ɨ̀vɨ, ɨ̀ se sɨ ndù sɨ fu ifu i nyoʼnɨ-i sɨ̂ Bôbo Fɨyini abaŋ ifu, àŋena fi sù ta ka àŋena faŋ tɨ̀ kfɨ̀tɨ. ²¹Àŋena na sû ɨ̀wu, sû ɨ̀vɨ ta ka àŋena faŋ tɨ̀ kfɨ̀tɨ. Isaʼ nâ yèynì nɨn faŋ kɨ faŋ sɨ̂ Alòyn ŋêyn woyn ŋweyn nɨ ɨghî a ghɨ læ̀ koʼ ibàm.”

Mɨ̀vɨ̂l mzɨ̀ a ghɨ na yisi ngàŋsɨ ndô Fɨyini ateyn

²²Bôbo Fɨyini nɨn fi meyn taŋi sɨ̂ Mosìs ɨ bè na, ²³“Li ɨfwo ɨ lɨmtɨnɨ ɨ jûŋ ma ghɨ gva meyn wu faytɨ kfɨ, ɨ mæ̂ musɨ yi chem shekèlsɨ̀ ighɨ ì tâyn nɨ̀ shekèlsɨ sinamòn ighɨ ì bò nɨ̀ mɨ̀vɨm ɨ̀n tâyn nɨ̀ shekèlsɨ fɨfùʼ fɨ lɨmtɨnɨ fɨ lifɨ ighɨ ì bò nɨ̀ mɨ̀vɨm ɨ̀n tâyn fɨ kelɨ nseʼsɨ ²⁴nɨ̀ shekèlsɨ kasìyà ighɨ ì tâyn kɨ ighel ta ɨfyêʼ ɨ ndô Fɨyini nɨn dyêyn, nɨ̀ litàsɨ mɨvɨl mɨ̀ olìfsɨ̀ sɨ chem ndû sɨ̀ kæ̀. ²⁵Wa n-fêʼ ɨ̀fwo nâ wèyn ɨ̀ fàytɨ mɨ̀vɨl ɨ̀n laynɨ̂ mzɨ̀ a ghɨ na yisi ngàŋsɨ ndô Fɨyini ateyn. Mɨ̀vɨ̂l nâ mèyn nɨn kelɨ sɨ nà lɨ̂mtɨ̀ foma ma ghɨ fàytɨ kɨ̀ nô ta ghelɨ ghì a ghɨ n-faytɨ mɨyisi ɨ̀n lɨ̀mtɨnɨ̂. Ghɨ na yisî ngàŋsɨ ndô Fɨyini nɨ̀ mɨ̀vɨ̂l nâ mzɨ̀. ²⁶Wà faytɨ tì wa nà yisî ɨwuyn fɨndo nɨ̀ Bôbo Fɨyini, yisî àntayntayn a mɨ̂kàyn, ²⁷yisî kɨmɨ àbaŋ kì a ghɨ n-lêm abayn ateyn asɨ nɨ̀ Bôbo Fɨyini nɨ̀ ɨ̀fwo vzɨ̀ a wu n-ghɨ atû àbaŋ nâ ghè nô ɨ̀ jɨ̀m nɨ̀ àfo kì a ghɨ n-tomtɨ lâmsɨ̀ ateyn baʼsɨ̂ nɨ̀ ɨ̀fwo vzɨ̀ a wu n-ghɨ a ngùŋ àteyn nɨ̀ àbaŋ kì a ghɨ n-nyôʼ ileŋ atû àteyn, ²⁸nɨ̀ àbaŋ kì a ghɨ n-fu ifu i nyoʼnɨ-i atû àteyn baʼsɨ̂ nɨ̀ ɨfwo ɨ felɨnɨ vzɨ̀ a wu n-ghɨ a ngùŋ àteyn nô ɨ̀ jɨ̀m nɨ̀ àkaŋ kì a ghɨ n-we mu ateyn tì baʼsɨ̂ nɨ̀ àfo kì a akaŋ ateyn a nɨn ti atu àteyn. ²⁹Wa n-lêm ɨ̀fwo nâ wèyn sɨ a nyɨŋ sɨ̂ Fɨyini fɨ ta ka wu na layn kfeynɨ-à, a kûm nô mɨ ghà ɨfwo ateyn kɨ gayn kɨ sɨ afo a laynɨ-a.

³⁰“Yisi Alòyn ŋêyn woyn ŋweyn ɨ lèm àŋena sɨ a nyɨŋ ta ka àŋena na fêl sɨ̂ mà sɨ a ngàŋ sɨ ndô Fɨyini. ³¹Bè sɨ̂ ghelɨ Isìlæ̀ na, ‘Ɨmêyn nɨn ghɨ mɨ̀vɨl ɨ̀n laynɨ̂ nɨ̀ mà mzɨ̀ a ka ghɨ na yisî ngàŋ sɨ ndô Fɨyini ateyn sɨ chem ɨjwàŋ afî a wu n-læ̀ koʼ ibàm. ³²Ka wùl nɨn læ̀ yìsi wul àntsɨ nɨ̀ mɨ̀vɨ̂l nâ mèyn. Ka wùl nɨn læ̀ fàytɨ mɨ̀vɨl ɨ̀n lì a dzɨ ghè a ghɨ n-faytɨ mɨvɨl nâ mèyn ateyn bòm ta à n-ghɨ mɨ̀vɨl ɨ̀n laynɨ, ghɨ mɨ̀vɨl sɨ a nyɨŋ. ³³À kæ sɨ faytɨ nô mɨ ndà ayisi a lɨmtɨnɨ-a têyn ta akeyn nâ kèynà, ɨ̀ yìsi ɨwuyn nɨ̀ wùl a ghɨ wi ngàŋ ndô Fɨyini, a mà na kelɨ sɨ fvɨ̀sɨ ŋweyn sɨ a antêynɨ̀ nɨ̀ ghelɨ̀ ghem.’”

Ileŋ i Fɨyini

³⁴Bôbo Fɨyini ɨ fi bè sɨ̂ Mosìs na, “Lì ɨfwo ɨ lɨmtɨnɨ ɨ jûŋ ma à ti mɨghayn mɨ̀ fɨ̀kàʼ fɨ lesìn nɨ̀ onichà nɨ̀ gàlbanùm nɨ̀ flankinsèn î jùŋ, kɨ ighel ighel, ³⁵wùl ɨ̀ vzɨ̀ a wù n-faytɨ kya sɨ faytɨ mɨyisi ɨ̀n lɨmtɨnɨ̂ fyes nɨ̀ ìleŋ i ɨ̀ fàytɨ ìleŋ i Bôbo Fɨyini ateyn, we fɨ̀ngvaŋ ateyn yi na jòfà, ghɨ sɨ a nyɨŋ sɨ̂ mà. ³⁶Wà nî wa gvà ɨ̀fwo nâ wèyn ɨ lvi wu na ghɨ ɨnkfɨ̀ŋ ɨnkfɨ̀ŋ, ɨ lèm asɨ antayntayn a mɨ̂kàyn a fɨndo nɨ̀ Bôbo Fɨyini, alèʼ ghè a ghesɨ̀và nɨn kòynɨ̀ ateyn. Ileŋ nâ yèyn ì nɨn layn kfeynɨ̂ nô mɨ sɨ̂ ndà a yi antêynɨ̀. ³⁷Ka wùl sɨ̂ zɨ̀ nɨn læ̀ fàytɨ ìleŋ i ngeŋ nɨ̀ ŋweyn a dzɨ nâ ghàyn a ghɨ n-faytɨ ileŋ i Bôbo Fɨyini nâ yèynì ateyn. Yì na kya na ileŋ nâ yèynì nɨn ghɨ sɨ a nyɨŋ a kelɨ Bôbo Fɨyini. ³⁸À kæ sɨ faytɨ nô mɨ ndà ileŋ têyn ta iyeyn nâ yèynì ta ka yi na lɨ̂mtɨ̀ fom sɨ̂ ŋweyn, a mà fvɨsɨ ŋweyn sɨ antêynɨ̀ nɨ̀ ghelɨ̀ ghem.”