Exodus 34

Bôbo Fɨyini ɨ kasi nyàʼ tɨ̀saʼ a ɨbyàs ɨ ngòʼsɨ̀ ɨ fɨ

¹Bôbo Fɨyini nɨ̀n bê meyn sɨ̂ Mosìs na, “Chuyn ɨ̀byâs ɨ ngòʼsɨ̀ ɨlvɨ ɨ̀ bwò kɨ̀mɨ tèyn ta ɨvzɨ̂ a wà tî zuèlɨ tî, mà kasi nyàʼ tɨ̀saʼ tìtɨ̀ a tɨ tî nà ghɨ a ɨbyàs ɨ ngòʼsɨ̀ ɨ wu asɨ nâ ghè. ²Baʼtɨ ɨ bɨs ɨ koʼ ɨ gvi timi a ma asɨ atû kfɨ̂yn Sinày a libɨs. ³Ka wa n-kòʼ zɨ̂ wùl. Ka mɨ n-yèyn wul a ngùŋ kfɨ̀yn nâ ghàyn. Ka nô mɨ nyàm mbòloʼ kèsa bzɨ nɨn yɨ bàʼsɨ a ngùŋ kfɨ̀yn nâ ghàyn.” ⁴Bôbo Fɨyini ɨ bè tì, Mosìs ɨ chuyn ɨbyâs ɨ ngòʼsɨ̀ ɨ̀ bwò kɨ̀ têyn ta ɨ wu asɨ vzɨ̀ ɨ bɨs ɨ koʼ nɨ̀ ɨ̀ŋweyn atû kfɨ̂yn Sinày kɨ ighel ta Bôbo Fɨyini bè sɨ̂ ŋweyn.

⁵Mosìs ɨ koʼ a kfɨyn tî Bôbo Fɨyini ɨ suʼi ɨ kàli gvì antêynɨ̀ mbàʼsɨ̀ ɨ timi a ngùŋ nɨ̀ Mosìs ɨ toŋtɨ ìzɨyn i ŋweyn i na Bôbo Fɨyini. ⁶Wu n-tòŋtɨ tî, ɨ chwò asɨ nɨ̀ Mosìs ɨ fi toŋtɨ ìzɨyn i ŋweyn ɨ bè na, “À n-ghɨ mà Bôbo Fɨyini, à n-ghɨ mà Bôbo Fɨyini, kelɨ ìkoynsɨ isuyn kelɨ àtem a juŋa, nyâŋsɨ̀ nyôʼsɨ̀ wì ɨtoŋ, kelɨ ìkôŋ yi kfeynɨ-à, bê nô mɨ na gha, nî kɨ tì. ⁷Mɨ n-dyêyn ìkôŋ i mɨ̂kàyn nɨ̀ mà sɨ̂ ghelɨ kɨ̀ ajâŋ nɨ̀ àjaŋ a, lêsɨ̀ fu nchînɨ̀sɨ bɨsɨ, lêsɨ̀ fu ghelɨ ghì a ghɨ n-to nɨ̀ ɨ̀tu, fî lêsɨ̀ fu mbɨsɨ ghêl mɨtì kelɨ sɨ fu ngeʼ nô mɨ sɨ̂ ndà vzɨ̀ a wù nî mbɨ. Mɨ n-fu ngeʼ nô mɨ sɨ̂ ndà vzɨ̀ a wù nì mbɨ bàʼsɨ nɨ̀ woyn ŋweyn sɨ koʼ sɨ chem ɨjwàŋ ɨ̀ kfæ̀.” ⁸Bôbo Fɨyini nà n-taŋi mesì gvî tèyn Mosìs ɨ ngvɨmtɨ a nse ɨ koʼsɨ Fɨyini. ⁹Wù n-læ ngvɨmtɨ tî ɨ jèm ɨ bè na, “Mɨ n-chwotɨ̂ a Bôbo na, wà na saŋlɨ̂ sɨ̂ mà wa gvì ghesɨ̀nà ndu amoʼ. Nô mɨ ta ghelɨ ghèyn nɨn to nɨ̀ ɨtu, lèsɨ fu awo a bɨ-a nɨ̀ ghès nɨ̀ mbɨ̂ seysɨ ɨ lì ghès sɨ a ghêl nɨ̀ và.”

¹⁰Mosìs ɨ taŋi tì, Bôbo Fɨyini ɨ bè na, “Ghesɨ̀nà nɨn yɨ mɨ̀kâyn lvɨ̂yn. Mɨ n-nî àwo a kaynɨ-a asɨ nɨ̀ ghelɨ̀ ghya nô ghɨ̀ jɨ̀m bula ma timi nì ilaʼ i li a mbzɨ. Ghelɨ ghì a zɨ̂ àŋena nɨn chi nɨn yeyn ìfêl i kaynɨ-i zɨ̀ a ka mà Bôbo Fɨyini ni sɨ̂ zɨ̀. ¹¹Yì lem tɨsaʼ tìtɨ̀ a mɨ n-fu sɨ̂ zɨ̀ layn. Mɨ n-sâŋ fvɨsɨ̀ ghelɨ Amò nɨ̀ ghelɨ Kenàn nɨ̀ ghelɨ Hît nɨ̀ ghelɨ Belìz nɨ̀ ghelɨ Hîv baʼsɨ nɨ̀ ghelɨ Jebùs sɨ a yi asɨ. ¹²Yì toʼnɨ ka yi n-læ̀ yɨ mɨkâyn zɨ̂ ghelɨ ghì a ghɨ n-chi ilaʼ afî a yi n-ndû ateyn bula tì, a yì fe atam. ¹³Yi ndû yi kwo bɨ̀ytɨ̀ ɨ̀bwaŋ ifu vzɨ̀ a àŋena nɨn koʼsɨ mɨyini mɨ̀ àŋena ateyn, ɨ leŋ zuelɨ ngòʼ sìsɨ̀ a àŋena nɨn koʼsɨ, ɨ kòs ntòʼ sìsɨ a Ashelà, ɨ fɨyini fɨ kifɨ nɨ̀ àŋena fɨ nɨn ti atu àteyn. ¹⁴Ka yi n-læ̀ kòʼsɨ Fɨyini fɨ lifɨ a bu kɨ mà Bôbo Fɨyini bòm ta mɨ n-kôŋ wì na wùl fî kòʼsɨ fɨyini fɨ lifɨ a bu kɨ mà.”

¹⁵“Yì na toʼnɨ̀-à ka yɨ n-læ̀ yɨ mɨkâyn zɨ̂ ghelɨ ghì a ghɨ n-chi ilaʼ nâ ghàyn bula tì a àŋena na se sɨ jèl sɨ fu tɨfu sɨ̂ mɨyini mɨ̀ àŋena, ghɨ làʼì zɨ̀ yi ndu na yɨ ɨfwo ɨ yɨnɨ ma àŋena fu meyn sɨ̂ mɨyini mɨ̀ àŋena. ¹⁶Yì kæ sɨ li woyn ghɨ kì nɨ̀ àŋena sɨ a ghɨkì nɨ̀ wôyn ghi, a àŋena na se sɨ koʼsɨ mɨyini mɨ̀ àŋena, woyn ghi ghɨ lûmnɨ̀ ɨ nà boŋ koʼsɨ-à.”

¹⁷“Ka yi n-læ̀ bùŋsɨ àkas ɨ̀ fàytɨ ànfèʼsɨ̀ ateyn nà koʼsɨ-à.”

¹⁸“Yì na yɨ àyɨ kì a ghɨ n-yɨ abayn ateyn bula fɨ̀shɨ̀k tì. Ɨlvɨ ateyn na gvî kfeyna, a njôŋ Abìb yi yɨ abayn sɨ a mɨchi nsòmbo bula fɨ̀shɨ̀k ateyn kɨ̀ ta mà bè sɨ̂ zɨ̀ bòm ta yi n-læ fvɨ̀ sɨ a Ijìb a njoŋ nâ ghàyn.”

¹⁹“À n-kelɨ mà nô mɨ wayn ɨ̀ lûmnɨ̀ ɨ̀ kfà ta ghɨ bzɨ sɨ asɨ antêynɨ̀ nɨ̀ zɨ̀, kèsa à n-ghɨ wayn wùl, kèsa à n-ghɨ wayn nyàm mbòloʼ kèsa à n-ghɨ wayn bzɨ. ²⁰Njàkâs bzɨ wayn àsɨ, yi yuyn atu ateyn nɨ̀ wâyn njɨ̀. Yi na ghɨ wi sɨ yuyn atu ateyn, yi kòl ɨ̀mzɨ̂ ɨ wâyn njàkâs àteyn. Yi n-kelɨ sɨ nà bzɨ nô mɨ wayn ɨ lûmnɨ̀ ɨwû àsɨ ɨ̀kfà, yi yuyn atu a ŋweyn nɨ̀ wâyn njɨ̀.”

“Ka wùl nɨn læ̀ gvì a ma asɨ, kelɨ wi ifu.”

²¹“Yi n-kelɨ sɨ nà fêl sɨ a mɨchi ntufa ɨwe mɨtì à na ghɨ a mɨchi nsòmbo, yi nà kelɨ sɨ yvɨ̀tɨ̀, kèsa à n-ghɨ ɨlvɨ ɨ felɨnɨ kèsa à n-ghɨ ɨlvɨ ɨ kfinɨ.”

²²“Yì na zɨ̀tɨ̀ sɨ sɨ wît, yi gvì nɨ̀ mɨ̀tam mɨ̀ àsɨ ɨ yɨ ayɨ, ɨ̀ nì kfì mèsì ɨ̀fwo ɨ yɨnɨ, yi yɨ ayɨ a ghaʼnɨ-a a ngòʼsɨ̂ bèŋ. ²³Ghɨ̀lûmnɨ̀ ɨ Isìlæ̀ nô ghɨ̀ jɨ̀m nɨn kelɨ sɨ nà gvî asɨ nɨ̀ Bôbo Fɨyini fɨ ngaŋtɨnɨ fɨ, ɨ Fɨyini fɨ Isìlæ̀ ìngal ì tal a bêŋ. ²⁴Mɨ n-sâŋ fvɨsɨ̀ tɨ̀laʼ tìtɨ̀ a tɨ n-ghɨ asɨ nɨ̀ zɨ̀, ɨ̀ ghàʼsɨ ìlaʼ ì zɨ-i a nô wul ɨ̀mòʼ læ̂ faŋ tɨ̀ ghal sɨ fsɨ ilaʼ ateyn ɨlvɨ nâ ghàyn a yi n-koʼ ìngal ì tal a bêŋ tèyn sɨ koʼsɨ Bôbo Fɨyini, ɨ Fɨyini fifɨ.”

²⁵“Ka wùl nɨ̂n læ̀ sɨ̀ nyam ɨ̀ se sɨ fu sɨ̂ mà, ɨ̀ bàʼsɨ àfo ma ghɨ we meyn fɨ̀shɨ̀k ateyn. Ka yi n-læ̀ bɨ̀sɨ nô àfo àmòʼ ta ghɨ fù sɨ̂ ma achi iyaʼsɨ ɨtuʼ layn ɨ̀ kòli.”

²⁶“Yì tetɨ ɨfwo ɨ jûŋ vzɨ̀ a yì kfì sɨ a asɨ a yi a gvêynsɨ̀ ɨ̀ gvì fu mɨtam mɨ̀ àsɨ ateyn a ndo nɨ̀ Bôbo Fɨyini, ɨ Fɨyini fifɨ.”

“Ka wùl nɨ̂n kfè wâyn bzɨ nɨ̀ ìgheyn i nà àteyn i ta ghɨ kam.”

²⁷Bôbo Fɨyini ɨ taŋi tì, ɨ fi bè sɨ̂ Mosìs na, “Nyàʼ awo nâ kèynà bòm ta mɨ n-yɨ mɨ̀kâyn ghesɨ̀và baʼsɨ̂ nɨ̀ ghelɨ Isìlæ̀ toynɨ̂ awo nâ ghàyn a mà bè têyn.” ²⁸Mosìs nɨn læ chi a kfɨyn nâ ghè ŋêyn Bôbo Fɨyini sɨ a mɨchi mɨ̀vɨm ɨ̀n kæ̀, yisî kɨ tèyn kfâ chi-à, yɨ wi afo nyvɨ wi mu. Wù n-læ nà chi tì nyâʼ tɨ̀saʼ tɨ mɨ̂kàyn, ma à ti tɨsaʼ tìtɨ̀ ìvɨm ɨbyàs ɨ ngòʼsɨ̀ afî.

Mosìs ɨ kasi kàli sɨ a kfɨyn Sinày

²⁹Mosìs nà n-kasî kàlì sɨ a kfɨyn Sinày nɨ̀ ɨ̀byâs ɨ ngòʼsɨ̀ vzɨ̂ ɨ̀ bwò a ŋweyn awu, kya wi na wù tàŋi meyn ŋêyn Bôbo Fɨyini tì ikêʼ i ŋweyni na bayn a. ³⁰A nà ghɨ ta Alòyn ŋêyn ghelɨ Isìlæ̀ nô ghɨ̀ jɨ̀m yèyn ta ikêʼ i Mosìs nɨn bayn, àŋena nà fâyn sɨ kɨŋtɨ sɨ baʼsɨ a ŋweyn a ngùŋ. ³¹Mɨtì Mosìs ɨ jàŋtɨ̀ àŋena, Alòyn ŋêyn ghelɨ ghɨ tisɨnɨ a Isìlæ̀ nô ghɨ̀ jɨ̀m ɨ kæ sɨ kɨŋtɨ sɨ gvì a ŋweyn a ngùŋ na wù taŋi sɨ̂ àŋena. ³²Ghelɨ Isìlæ̀ nô ghɨ̀ jɨ̀m nɨ̂n kɨ̀ŋtɨ ɨ baʼsɨ a ŋweyn a ngùŋ, wu fu tɨsaʼ tìtɨ̀ nô tɨ̀ jɨ̀m a Bôbo Fɨyini fu sɨ̂ ŋweyn a kfɨyn Sinày.

³³A nà ghɨ ta Mosìs tàŋi ɨ̀ mèsì sɨ̂ àŋena nô mɨ ɨlvɨ gha, ɨ lì àbâs a ndzɨsɨ ɨ chɨytɨ ìkêʼ i ŋweyn ateyn. ³⁴Wu nà n-chɨytɨ̂ tì, ɨ̀ nì se sɨ zɨ asɨ nɨ̀ Bôbo Fɨyini sɨ taŋi ŋêyn ŋweyn nô mɨ ɨlvɨ gha, wu lìsì àbâs a ndzɨsɨ ateyn nô ta ka wu nî kàsi ɨ̀ fvɨ̀ ɨ̀ fèʼtɨ̀ àwo kì a Bôbo Fɨyini bè sɨ̂ ŋweyn. ³⁵Wù nà n-se sɨ fèʼtɨ̀, ghɨ yeyn ikêʼ i ŋweyn yi bayn a. Wù fêʼtɨ̀ mèsì wu kasi ɨ chɨytɨ kɨ chɨytɨ ikêʼ i ŋweyn nɨ̀ abâs a ndzɨsɨ nâ kì-à nô sɨ chem ta ka wù nî nà fî zɨ̂ sɨ taŋi ŋêyn Bôbo Fɨyini.