Exodus 35

Tɨsaʼ kûm àchi ɨtuʼ ilaʼ

¹Mosìs nɨn læ meyn jàŋtɨ̀ ghelɨ Isìlæ̀ nô ghɨ̀ jɨ̀m ɨ bè sɨ̂ àŋena na, “Akeynà nɨn ghɨ àwo kì a Bôbo Fɨyini bè na yì na nì-à: ²Yì na fêl sɨ a mɨchi ntufa ɨwe, à na ghɨ a mɨchi nsòmbo, yi bam bòm ta à n-ghɨ àchi ɨtuʼ ilaʼ, achi a yvɨtɨnɨ-a, layna sɨ̂ Bôbo Fɨyini. À fèl nô mɨ ndà iwo achi nâ ghàyn a ghɨ na kelɨ sɨ zue ŋweyn. ³À na ghɨ achi ɨtuʼ ilaʼ nâ ghàyn, ka yi n-kwò ɨ̀vɨs a ndosɨ nɨ̀ zɨ̀.”

Ɨfwo vzɨ̀ a ka ghɨ baʼlɨ fɨ̀ndo fɨ Bôbo Fɨyini ateyn

⁴Mosìs nɨ̀n bê meyn sɨ̂ ghelɨ Isìlæ̀ nô ghɨ̀ jɨ̀m na, “Iyeynì nɨn ghɨ ìwo zɨ̀ a Bôbo Fɨyini bè: ⁵Yì li tɨfu antêynɨ̀ ɨ̀fwo nɨ̀ zɨ̀ ɨ̀ fù sɨ̂ Bôbo Fɨyini. Nô mɨ ndà na kôŋ sɨ fu ifu sɨ̂ Bôbo Fɨyini, wu gvì nɨ̀ àso ɨkwo a baŋnɨ-a nɨ̀ àso ɨkwo a fɨfâ nɨ̀ ìdyayn i, ⁶nɨ̀ ndzɨsɨ ma ghɨ tɨm nɨ̀ àmbyèyn a nyemnɨ-a nɨ sɨ lisɨ ma ghɨ tɨm nɨ̀ àmbyeyn a kɨ bâŋ nyêm ndû ndû nɨ sɨ lisɨ ma ghɨ tɨm nɨ a li-a kɨ bɨ̂ylɨ̀ bâŋ baŋ nɨ̀ sɨ lisɨ ma ghɨ faytɨ meyn tɨm baʼsɨ̂ nɨ̀ sɨ lisɨ ma ghɨ fàytɨ nɨ̀ ìwî i bzɨ-i, ⁷nɨ̀ gvɨ àyaʼ ma ghɨ yoʼ meyn yì na bâŋ baŋ nɨ̀ gvɨ nyàm ì jùŋ ì lì yi fvɨ̂ a jvâ nɨ̀ fɨ̀kâʼ fɨ àkasìyà fɨ̀ ⁸nɨ̀ mɨ̀vɨ̂l mɨ̀ olìfsɨ̀ ta ka ghɨ na wê a lâmsɨ̀ nɨ̀ ɨfwo ɨ lɨmtɨnɨ ɨ jûŋ vzɨ̀ a ghɨ n-faytɨ mɨvɨl mzɨ̀ a ka ghɨ na yisî ghelɨ ateyn sɨ a ngàŋsɨ ndô Fɨyini, nɨ̀ ɨvzɨ̂ a ghɨ n-nyôʼ ta ka ɨlwêʼ na lɨ̂mtɨ̀ foma, ⁹nɨ̀ mɨ̀ngòʼtɨ̀ mɨ̀ onìks kɨmɨ nɨ̀ mɨ̀ngòʼtɨ̀ ɨ̀n lì sɨ nà baysɨ̂ awaf, baysɨ̂ kɨmɨ a fɨ̂bò afî a fɨ n-ghɨ a àngàŋtɨ̀ nɨ̀ ngàŋ ndô Fɨyini i ghaʼnɨ.”

Ɨfwo vzɨ̀ a ka wu na ghɨ a fɨndo nɨ̀ Bôbo Fɨyini

¹⁰“Ghelɨ ghì a ghɨ n-faytɨ kya ifêl antêynɨ̀ nɨ̀ zɨ̀ nɨn kelɨ sɨ gvì sɨ faytɨ ɨfwo vzɨ̀ nô ɨ̀ jɨ̀m a Bôbo Fɨyini bè. ¹¹Àŋena nɨn kelɨ sɨ bàʼlɨ fɨ̀ndo fɨ Bôbo Fɨyini nɨ̀ ɨ̀two vzɨ̀ a ka fɨ na ghɨ ateyn, baʼsɨ̂ nɨ̀ àfo kì a ka ghɨ na chɨytɨ̂ ateyn nɨ̀ ɨ̀nghòf ateyn nɨ̀ mɨ̀kfɨ̀s mɨ̀ ateyn nɨ̀ mbàŋ sìsɨ̀ a ka ghɨ na dyaŋsɨ̂ ateyn, nɨ̀ ɨ̀tôʼ ateyn baʼsɨ̂ nɨ̀ ɨ̀fwo vzɨ̀ a ka wu na ti atû àteyn, ¹²nɨ̀ àntayntayn a mɨ̂kàyn à nɨ̀ mbàŋsɨ ateynsɨ nɨ̀ nchɨl àteyn nɨ̀ ndzɨ sìsɨ̀ a ka ghɨ na ghaŋsɨ kɨ̂ŋtɨ̀ àntayntayn a mɨ̂kàyn ateyn, ¹³nɨ̀ àbaŋ abayn a laynɨ-a nɨ̀ mbàŋsɨ abaŋ nâ sìsɨ̀, nɨ̀ ɨ̀fwo ɨ lvi vzɨ̀ a wu n-ghɨ atû àteyn, nɨ̀ àbayn kì a ghɨ n-fu sɨ̂ Bôbo Fɨyini. ¹⁴Àŋena nɨn faytɨ̂ kɨmɨ àfo kì a ghɨ na tom lâmsɨ̀ atû àteyn nɨ̀ ɨ̀fwo ateyn nô ɨ̀ jɨ̀m nɨ̀ lâmsɨ̀ nɨ̀ mɨ̀vɨ̂l mzɨ̀ a ghɨ n-we ateyn na sɨ na bali-à, ¹⁵nɨ̀ àbaŋ kì a ghɨ n-nyôʼ ileŋ atû àteyn nɨ̀ mbàŋsɨ ateynsɨ nɨ̀ mɨ̀vɨl mzɨ̀ a ghɨ n-yisi ngàŋsɨ ndô Fɨyini ateyn nɨ̀ ɨ̀fwo ɨ lɨmtɨnɨ ɨ jûŋ nɨ̀ àbâs a ndzɨsɨ kì a ka ghɨ na ghaŋsɨ̂ ɨchfɨ fɨndo nɨ̀ Bôbo Fɨyini, ¹⁶nɨ̀ àbaŋ ifu i nyoʼnɨ-i nɨ̀ àfo kì a ghɨ bo kɨ ghɨ ta nchèkèlèʼ ɨ̀ yoʼ nɨ̀ ìdyayn i tî, nɨ̀ mbàŋ sɨ ateynsɨ nɨ̀ ɨ̀fwo ateyn nô ɨ̀ jɨ̀m nɨ̀ àkaŋ a ghaʼnɨ-a ma ghɨ faytɨ nɨ̀ ìdyayn i baʼsɨ̂ nɨ̀ àfo kì a ghɨ n-tom akaŋ ateyn atû àteyn, ¹⁷nɨ̀ ɨ̀byâs ɨ ndzɨsɨ vzɨ̀ a ghɨ n-ghaŋsɨ kal a ɨwe fɨndo nɨ̀ Bôbo Fɨyini, nɨ̀ ɨ̀tôʼ ateyn nɨ̀ ɨ̀fwo vzɨ̀ a ghɨ n-tomtɨ ɨtôʼ nâ vzɨ̀ atû àteyn nɨ̀ ɨ̀byâs ɨ ndzɨsɨ vzɨ̀ a ghɨ n-ghaŋsɨ ɨchfɨ ɨwe fɨndo nâ ghàyn, ¹⁸nɨ̀ mɨ̀chôʼ mzɨ̀ a mɨ̀ n-ghal ɨtwo vzɨ̀ a fɨ̀ndo nâ fèynfɨ̀ nɨn ghɨ ateyn kɨ̀mɨ nɨ̀ mɨ̀chôʼ mzɨ̀ a mɨ̀ n-ghal mbàyn zɨ̀ a yì jɨ̀ŋ kàli ɨwe fɨndo nɨ̀ Bôbo Fɨyini nɨ̀ nkfɨ̀sɨ ateynsɨ, ¹⁹kɨ̀mɨ nɨ̀ ndzɨsɨ tɨmnɨsɨ sɨ̂ Alòyn ɨ ngàŋ ndô Fɨyini nɨ̀ sɨ lisɨ sɨ̂ woyn ŋweyn ta ka àŋena na se sɨ fèl a fɨndo nɨ̀ Bôbo Fɨyini ta ngàŋsɨ ndô Fɨyini, ghɨ màʼ.”

Ghelɨ Isìlæ̀ ɨ gvì nɨ̀ tɨ̀futɨ sɨ̂ Bôbo Fɨyini

²⁰À nà n-ghɨ ta Mosìs tàŋi mèsì, ghelɨ Isìlæ̀ nô ghɨ̀ jɨ̀m ɨ lù sɨ a ŋweyn a ngùŋ. ²¹Nô mɨ ndà ta wù yvɨ iwo nâ yèynì, nà saŋlɨ-à, kôŋ sɨ fu, ɨ gvì nɨ̀ ìfu i sɨ̂ Bôbo Fɨyini ta ka ghɨ baʼlɨ fɨ̀ndo fɨ Bôbo Fɨyini, fì nì nô tɨ̀fêl tɨ̀ jɨ̀m a fɨndo nâ ghè, nɨ̀ ɨ̀fwo vzɨ̀ a ka ghɨ tas ndzɨsɨ ngàŋ ndô Fɨyini ateyn. ²²Nô ghɨ̀lûmnɨ̀ ghɨ̀ jɨ̀m nɨ̀ ghɨ̀kì ghî a ghɨ nà n-kôŋ sɨ fu ɨ gvì nɨ̀ nchaʼsɨ ma ghɨ faytɨ nɨ̀ àso ɨkwo a baŋnɨ-a kɨ tɨ̀nki tɨ̀ jɨ̀m: ɨ ɨ̀nghòf, nɨ̀ mɨ̀yèli, nɨ̀ tɨ̀fwotɨ, nɨ̀ mɨ̀nchaʼ mɨ̀ àwu. Àŋena nɨn læ li ɨfwo nâ wèyn a ghɨ fàytɨ nɨ̀ àso ɨkwo a baŋnɨ-a têyn, ɨ làysɨ̀ ɨ koʼsɨ iyvɨ sɨ a ifu sɨ̂ Bôbo Fɨyini. ²³Nô mɨ ndà vzɨ̂ a wu nà n-kelɨ ndzɨsɨ ma ghɨ tɨm nɨ̀ àmbyèyn a nyemnɨ-a kèsa ghɨ tɨm nɨ̀ àmbyeyn a kɨ bâŋ nyêm ndû ndu, kèsa a kî a kɨ n-bɨ̂ylɨ̀ bâŋ baŋ kèsa nɨ̀ ndzɨsɨ ma ghɨ faytɨ meyn tɨm, kèsa nɨ̀ ndzɨsɨ ma ghɨ faytɨ nɨ̀ ìwî i bzɨ-i, kèsa nɨ̀ gvɨsɨ ayaʼ ma ghɨ yoʼ meyn sɨ na bâŋ baŋ kèsa gvɨ nyàm ì lì yi chî a jvâ, ɨ gvì nɨ̀ ɨfwo nâ wèyn. ²⁴Ghelɨ ghì a ghɨ nà n-kelɨ aso ɨkwo a fɨfâ nɨ̀ ìdyayn i ɨ gvì nɨ̀ ɨ̀ŋweyn ɨ fu sɨ a ifu sɨ̂ Bôbo Fɨyini. Nô mɨ ndà ta wu na n-kelɨ fɨkâʼ fɨ àkasìyà ɨ gvì nɨ̀ ɨ̀nfeynfɨ ta ka ghɨ kàʼ a ghɨ ni nô mɨ ìfêl ì kà ateyn. ²⁵Nô mɨ wul ɨ wi ɨ̀ kfà ta wù nà n-faytɨ kya sɨ fyeyn ɨfwo ɨ gvì nɨ̀ àmbyèyn a kɨ nyêm nyem nɨ a li-a kɨ bâŋ nyêm ndû ndu kɨmɨ nɨ a li-a kɨ bɨ̂ylɨ̀ bâŋ baŋ baʼsɨ̂ nɨ̀ ndzɨsɨ ma ghɨ faytɨ meyn tɨm. ²⁶Nô mɨ wul ɨ wi ɨ̀ kfà ta wu nà n-kya sɨ fyeyn ɨfwo, kôŋ sɨ fyeyn, ɨ fyeyn iwî i bzɨ. ²⁷Ghelɨ ghɨ tisɨnɨ a Isìlæ̀ ɨ gvì nɨ̀ mɨ̀ngòʼtɨ̀ mɨ̀ onìks baʼsɨ̂ nɨ̀ mɨ̀ngòʼtɨ̀ ɨ̀n jùŋ ɨ̀n lì na ghɨ baysɨ a awaf, ɨ̀ bàysɨ a fɨ̂bò afî a fɨ n-ghɨ a àngàŋtɨ̀ nɨ̀ ngàŋ ndô Fɨyini i ghaʼnɨ. ²⁸Àŋena nɨ̀n gvi meyn kɨmɨ nɨ̀ ɨ̀fwo ɨ lɨmtɨnɨ ɨ jûŋ nɨ̀ mɨ̀vɨl mɨ̀ olìfsɨ̀ ta ka ghɨ na wê a lâmsɨ̀ fî faytɨ̂ àyisi kì a ka ghɨ na yisî ngàŋsɨ ndô Fɨyini ateyn nɨ̀ ɨ̀fwo vzɨ̀ a ka ghɨ na nyòʼà wu nà lɨ̂mtɨ̀ foma. ²⁹Ghelɨ Isìlæ̀ nô ghɨ̀ jɨ̀m, ghɨ lûmnɨ̀ nɨ ghɨki ta ghɨ nà n-kôŋ sɨ fu ɨ choʼnɨ sɨ a àŋena ngeŋsɨ sɨ gvi nɨ̀ tɨ̀futɨ na ghɨ ni ifêl zɨ̀ a Bôbo Fɨyini nɨ̂n bè sɨ Mosìs.

Mosìs ɨ fèʼtɨ̀ ghelɨ ghì a ka ghɨ baʼlɨ fɨ̀ndo fɨ Bôbo Fɨyini

³⁰À nà n-ghɨ ta ghɨ gvi nɨ̀ tɨ̀fu nâ tèyntɨ̀, Mosìs ɨ bè sɨ̂ ghelɨ Isìlæ̀ na, “Yì yeyna, Bôbo Fɨyini choʼ meyn Bèzalèl ɨ wâyn Yulì ɨ wâyn Hûl ɨ wul ìsas i ndo nɨ̀ Judà, ³¹ɨ̀ luynsɨ ŋweyn nɨ̀ àyvɨs a Fɨyini-à, nɨ̀ ìtof i ta ka wù na nî kɨ tɨ̀nkì tɨ tɨ̂fèl kɨ tɨ̀ jɨ̀m. ³²Wù nì tèyn ta ka wù na kya sɨ kfàʼtɨ̀ afo, sɨ fèl sɨ fvɨ̀sɨ̀ nɨ̀ àso ɨkwo a baŋnɨ-a, nɨ̀ àso ɨkwo a fɨfâ, kɨ̀mɨ nɨ̀ ìdyayn i, ³³kya sɨ chuyn ngòʼsɨ̀ sɨ nyàʼ ɨfwo ateyn, kya sɨ chuf ɨfwo nɨ̀ ɨ̀nkàʼ, kya sɨ faytɨ nô mɨ ìn kì afo a jûŋ à kà. ³⁴Bôbo Fɨyini fu meyn ìtof sɨ̂ Bèzalèl ɨ̀ fu kɨmɨ sɨ̂ Oholìyàb ɨ wâyn Ahisamàk ɨ wul ìsas i ndo nɨ̀ Dân, ta ka àŋena na kya sɨ yeʼi ghelɨ ghɨ li. ³⁵Wù fu meyn ìtof ta ka àŋena na kya sɨ faytɨ tɨ̀nkì tɨ ɨfwo kɨ tɨ̀ jɨ̀m, kya sɨ kfàʼtɨ̀ afo sɨ fèl sɨ fvɨ̀sɨ̀, kya sɨ tɨm ɨfwo nɨ̀ àmbèyn a nyemnɨ-a nɨ akî a kɨ nyêm bâŋ ndû ndu nɨ akî a kɨ n-bɨ̂ylɨ̀ bâŋ baŋ, kya sɨ faytɨ sɨ tɨm ndzɨsɨ, fî kya sɨ bo ɨfwo. Àŋena ghɨ̀ jɨ̀m nɨn ghɨ ghelɨ faytɨ̂ kelɨ kɨ nô ìtof iwo a fî a àŋena nɨn nî, kya sɨ faytɨ sɨ kfàʼtɨ̀ afo sɨ fèl sɨ fvɨ̀sɨ̀.