Exodus 39

Ndzɨsɨ ngàŋ ndo Fɨyini i ngaŋtɨnɨ

¹Bèzalèl ŋêyn Oholìyàb nɨ̀ ghelɨ ghɨ felɨnɨ ghɨli nɨn læ meyn tɨm ndzɨsɨ sɨ̂ Alòyn ta ka wù na se sɨ fèl a fɨndo nɨ̀ Bôbo Fɨyini, wu màʼ. Àŋena nɨn læ tɨm nɨ̀ àmbyèyn a nyemnɨ-a nɨ a li-a kɨ nyêm bâŋ ndû ndu nɨ a li-a kɨ bɨ̂ylɨ̀ bâŋ baŋ kɨ̀ ighel ta Bôbo Fɨyini nɨn læ bè sɨ̂ Mosìs.

Awaf a ngàŋ ndô Fɨyini

²Àŋena nɨ̂n fàytɨ awaf a ngàŋ ndô Fɨyini nɨ̀ àmbyèyn afyeynɨ-a ma ghɨ faytɨ nɨ̀ aso ɨkwo a baŋnɨ-a nɨ̀ àmbyèyn a li-a kɨ nyêm nyêm nɨ̀ a li-a kɨ nyêm bâŋ ndû ndu kɨ̀mɨ nɨ̀ a li-a kɨ bɨ̂ylɨ̀ bâŋ baŋ nɨ̀ àbâs a ndzɨsɨ-a ma ghɨ faytɨ meyn tɨm nɨ̀ àmbyèyn a fyeynɨ-a. ³Àŋena nɨ̂n læ meyn leŋ mamtɨ àso ɨkwo a baŋnɨ-a ɨ fvɨsɨ kɨ a mbɨ̀yn a mbɨ̀yn ɨ bo ɨ fyes a àmbyèyn a nyemnɨ-a nɨ akî a kɨ nyêm bâŋ ndû ndu nɨ akî a kɨ n-bɨ̂ylɨ̀ bâŋ baŋ nɨ̀ àbâs a ndzɨsɨ-a ma ghɨ faytɨ meyn tɨm. Àŋena nɨn læ tɨm ɨfwo nâ wèyn kɨ̀ nô ta wul vzɨ̀ a wù n-faytɨ kya sɨ tɨm ɨfwo. ⁴Àŋena nɨn læ meyn faytɨ mɨ̀bâynɨ̀ mɨ̀ ɨ̀fwo ɨ we a mbèʼsɨ awaf nâ ghè a tɨghaŋ tɨ ateyn tɨ̀ bò ta ka ghɨ na ghal chfɨŋ ateyn. ⁵Àŋena nɨn læ meyn faytɨ tɨm akue awaf nâ kì kɨ nà ghɨ sɨ afo àmòʼ nɨ̀ ànkeyna. Àŋena nɨn læ faytɨ nɨ̀ aso ɨkwo a baŋnɨ-a, nɨ̀ àmbyeyn a kɨ nyêm nyem nɨ a li-a kɨ nyêm bâŋ ndû ndu nɨ a li-a kɨ bɨ̂ylɨ̀ bâŋ baŋ nɨ̀ àbâs a ndzɨsɨ-a ma ghɨ faytɨ meyn tɨm nɨ̀ àmbyeyn a fyeynɨ-a kɨ ighel ta Bôbo Fɨyini nɨn læ bè sɨ̂ Mosìs.

⁶Àŋena nɨn læ meyn baysɨ mɨ̀ngòʼtɨ̀ mɨ̀ onìks afo ma ghɨ fàytɨ nɨ̀ àso ɨkwo a baŋnɨ-a, ɨ̀ nyàʼ àzɨyn asas a ndo nɨ̀ Isìlæ̀ ateyn kɨ̀ ta ghɨ nî ghɨ nyàʼ afo isaʼ sɨ chwæ̀. ⁷Àŋena baysɨ mɨ̀ngòʼtɨ̀ nâ mzɨ̀ tì ɨ timi ghàŋtɨ̀ a mɨ̂kuènɨ̂ ghè a mɨ̀ nà n-ghaŋlɨ a mbèʼsɨ awaf tì kɨ̀ ighel ta Bôbo Fɨyini nɨn læ bè sɨ̂ Mosìs ta ka wù na lum bêtɨ̀ kɨ betɨ ghelɨ Isìlæ̀.

Fɨ̀bò fîfɨ̀ a ka ngàŋ ndô Fɨyini na ghaŋsɨ̂ a àngàŋtɨ̀

⁸Àŋena nɨn læ meyn tɨm fɨ̀bò fîfɨ̀ a ngàŋ ndô Fɨyini na ghaŋsɨ̂ a ŋweyn a àngàŋtɨ̀ kɨ̀ nô tèyn ta wul vzɨ̀ a wù n-faytɨ kya sɨ tɨm ɨfwo. Àŋena nɨn tɨm kɨ a dzɨ afî a ghɨ tɨ̀m awaf ateyn nɨ̀ àmbyèyn a ma ghɨ faytɨ nɨ̀ àso ɨkwo a baŋnɨ-a nɨ̀ àmbyèyn a nyemnɨ-a nɨ̀ a li-a kɨ bâŋ nyêm ndû ndu nɨ̀ a li-a kɨ bɨ̂ylɨ̀ bâŋ baŋ nɨ̀ àbâs a ndzɨsɨ-a ma ghɨ faytɨ meyn tɨm nɨ̀ àmbyèyn a fyeynɨ-a. ⁹Àŋena nɨn læ faytɨ kɨ nà kelɨ ɨ̀byâs ɨ̀ kfæ̀, wu ghɨ kɨ ighel ighel, dyêf chem ndû àbeʼ a ntàm, ghaʼ chem ndû kɨmɨ àbeʼ a ntàm ma ghɨ buʼnɨ meyn ɨ̀ yòmtɨ. ¹⁰Àŋena nɨn læ faytɨ tî ɨ we mɨ̀ngòʼtɨ̀ ɨn jòfɨnɨ̂ ɨ̀n lì a mbaŋi sɨ̀ kæ̀, mbaŋi ɨ yî àsɨ ɨ kelɨ fɨ̀ngòʼtɨ̀ fɨ lubì nɨ̀ fɨ̀ngòʼtɨ̀ fɨ tobàz nɨ̀ fɨ̀ngòʼtɨ̀ fɨ belìlfɨ̀. ¹¹A nà ghɨ a ànkumtɨ̀ a mbaŋi, àŋena we fɨ̀ngòʼtɨ̀ fɨ tukìyòs nɨ̀ fɨ̀ngòʼtɨ̀ fɨ safayà nɨ̀ fɨ̀ngòʼtɨ̀ fɨ emelàd. ¹²A nà ghɨ a mbaŋi ì lì, àŋena we fɨ̀ngòʼtɨ̀ fɨ jasìn nɨ̀ fɨ̀ngòʼtɨ̀ fɨ agèt nɨ̀ fɨ̀ngòʼtɨ̀ fɨ ametìs, ¹³ɨ we fɨ̀ngòʼtɨ̀ fɨ klisolàt nɨ̀ fɨ̀ngòʼtɨ̀ fɨ onìks, nɨ̀ fɨ̀ngòʼtɨ̀ fɨ jasbàfɨ̀ a mbaŋi ì goʼsɨnɨ. Àŋena nɨn læ we mɨ̀ngòʼtɨ̀ nâ mèyn atû àfo ma ghɨ fàytɨ nɨ̀ àso ɨkwo a baŋnɨ-a. ¹⁴Mɨ̀ngòʼtɨ̀ mɨ̀ àteyn nà n-chɨ̂yntɨ̀ ghɨ njvàsɨ̀ bò nô mɨ fɨ̀ kà fɨ ɨ kelɨ ìzɨyn i wâyn Jàkôb ateyn. Ghɨ nà n-nyâʼ nô mɨ ìzɨyn ì kà kɨ̀ ta ghɨ nî ghɨ nyàʼ afo isaʼ sɨ chwæ̀.

¹⁵Àŋena nɨn læ meyn lì àso ɨkwo a baŋnɨ-a kɨ kelɨ wi ilɨŋ ɨ botɨ àfo ateyn kɨ ghɨ ta nkfɨ̀ ɨ kul a fɨ̂bo fɨ angàŋtɨ̀ afî. ¹⁶Àŋena nɨn faytɨ meyn kɨmɨ ɨ̀fwo ɨ̀ bwò nɨ̀ àso ɨkwo a baŋnɨ-a, ɨ faytɨ mɨ̀nchaʼ ɨ̀m bò kɨ̀mɨ nɨ̀ àso ɨkwo a baŋnɨ-a ɨ timi ghàŋtɨ̀ mɨnchaʼ mɨ̀ ateyn a tɨghaŋtɨ fɨ̂bò fɨ angàŋtɨ̀ afî tɨ̀ bò. ¹⁷Àŋena nɨn chfɨŋ ɨfwo vzɨ̀ ɨ̀ bwò a ghɨ bo nɨ̀ àso ɨkwo a baŋnɨ-a tî a mɨnchaʼ afî a tɨghaŋ tɨ fɨ̂bò fɨ àngàŋtɨ̀ nâ ghè, ¹⁸ɨ timi ɨ ghàŋtɨ̀ àchfɨ̂ a li-a kì à bò a ɨfwo ghè a mbèʼsɨ̀ awaf a ghɨ fàytɨ nɨ̀ àso ɨkwo a baŋnɨ-a tî ɨ ghaŋsɨ dzɨ a asɨ. ¹⁹Àŋena nɨ̂n faytɨ meyn kɨmɨ mɨ̀nchaʼ ɨ̀m bò nɨ̀ àso ɨkwo a baŋnɨ-a ɨ timi ghàŋtɨ̀ a tɨ̂ghaŋ tɨlitɨ afî tɨ̀ bò a fɨ̂bò afî a àngàŋtɨ̀ tì dzɨ a antêynɨ̀, abàs itsɨyn a ngùŋ àwaf. ²⁰Àŋena nɨn faytɨ meyn kfeynsɨ mɨ̀nchaʼ ɨ̀m bò nɨ̀ àso ɨkwo a baŋnɨ-a, ɨ timi ghàŋtɨ̀ asas a mɨ̂bàynɨ̀ mɨ̀ ndzɨsɨ ghè a mɨ̀ n-ghɨ a mbèʼsɨ̀ asɨ awaf baʼsɨ̂ ndû a ntas ghè atû àkùʼtɨ awaf. ²¹Àŋena nɨn læ meyn kul mɨ̀nchaʼ mzɨ̀ a mɨ̀ n-ghɨ a fɨ̂bò fɨ a àngàŋtɨ̀ tì, nɨ̀ nkfɨ̀ ìnyemnɨ zɨ̀ a yì n-ghɨ akuʼtɨ awaf ta ka fɨ̀bò fɨ àngàŋtɨ̀ nâ fìfɨ̀ na ghaŋlɨ̂ wì sɨ a ngeŋ kɨ̀ ighel ta Bôbo Fɨyini nɨ̂n bè sɨ̂ Mosìs.

Ndzɨsɨ lisɨ sìsɨ̀ a ngàŋ ndô Fɨyini i ngaŋtɨnɨ nɨn mâʼ

²²Àŋena nɨn læ tas dàla zɨ̀ a ka Alòyn na mâʼ àwaf atû àteyn nɨ̀ ndzɨsɨ ma ghɨ tɨm kɨ nɨ̀ àmbyèyn a nyemnɨ-a. Àŋena nɨ̂n tɨm kɨ̀ nô ta wul vzɨ̀ a wù n-tɨm ɨfwo. ²³Dàla àteyn nà n-kelɨ ɨ̀mzɨ̂ ma ghɨ tɨm meyn kal nɨ̀ àmbyèna ta ka wu na ghɨ ma wu kàʼ wu bû bàsà. ²⁴Àŋena nɨn læ tas ndzɨsɨ ateyn ɨ faytɨ ɨ̀fwo ɨlvi wu ghɨ tèyn ta mɨtam mɨ̀ bòmeglanèt nɨ̀ àmbyèyn a nyemnɨ-a, nɨ̀ a li-a kɨ bâŋ nyêm ndû ndu nɨ a li-a kɨ bɨ̂ylɨ̀ bâŋ baŋ nɨ̀ àbâs a ndzɨsɨ-a ma ghɨ faytɨ meyn tɨm nɨ̀ àmbyèyn afyeynɨ-a, ɨ we ɨ jɨŋ kal isas i dàla nâ ghè. ²⁵Àŋena nɨn læ meyn faytɨ mbeŋlɨsɨ nɨ̀ àso ɨkwo a baŋnɨ-a kɨ kelɨ wi ilɨŋ, ɨ we fɨ̀ynɨ̀ nɨ̀ ɨ̀fwo vzɨ̀ a wu n-ghɨ ta mɨtam mɨ̀ bòmeglanèt tì isas ateyn. ²⁶Mbeŋlɨsɨ ateynsɨ nɨ̀ ɨ̀fwo vzɨ̀ a wu n-ghɨ têyn ta mɨtam mɨ̀ bòmeglanèt tì nà n-ghɨ ma ghɨ we fɨ̀ynɨ̀ fɨynɨ ɨ̀ jɨ̀ŋ kal isas i dàla nâ ghè ta ka ngàŋ ndô Fɨyini na se sɨ fèl wu màʼ kɨ ighel ta Bôbo Fɨyini nɨn læ bè sɨ̂ Mosìs.

²⁷Àŋena nɨn læ meyn tas ndzɨsɨ dyefɨnɨsɨ sɨ̂ Alòyn ŋêyn woyn ŋweyn nɨ̀ ndzɨsɨ ma ghɨ faytɨ meyn tɨm. Àŋena nɨn tɨm kɨ nô tèyn ta ghelɨ ghì a ghɨ n-tɨm ɨfwo, ²⁸ɨ fi faytɨ àfo kì a Alòyn nɨn lɨm a ŋweyn atu nɨ̀ ɨ̀fwo vzɨ̀ a ka woyn ŋweyn na lɨm a àŋena ɨtu, nɨ̀ ndzɨ sìsɨ̀ a ghɨ n-mâʼ antêynɨ̀ ndzɨsɨ ma ghɨ faytɨ meyn tɨm nɨ̀ àmbyèyn a fyeynɨ-a. ²⁹Àŋena nɨ̂n fàytɨ akue awaf nɨ̀ àbâs a ndzɨsɨ-a ma ghɨ faytɨ meyn tɨm nɨ̀ àmbyèyn afyeynɨ-a nɨ̀ àmbyèyn a nyemnɨ-a nɨ̀ a li-a kɨ bâŋ nyêm ndû ndu kɨmɨ nɨ a li-a kɨ bɨ̂ylɨ̀ bâŋ baŋ. Àŋena nɨn tɨm kɨ nô tèyn ta ghelɨ ghì a ghɨ n-tɨm ɨfwo, kɨ ighel ta Bôbo Fɨyini nɨn læ bè sɨ̂ Mosìs.

³⁰Àŋena nɨn faytɨ meyn fɨ̀bâynɨ̀ fɨ afo fɨ laynɨfɨ nɨ̀ àso ɨkwo a baŋnɨ-a kɨ kelɨ wi ilɨŋ ɨ nyàʼ ateyn ta ghɨ nyàʼ a afo isaʼ sɨ a chwæ̀ na, “À SƗ KELƗ BÔBO FƗYINI.” ³¹Àŋena nɨn læ nyàʼ tî ɨ kul nkfɨ̀ ìnyemnɨ ateyn ɨ timi ghàŋtɨ̀ a abàs afo ghè a ghɨ n-kul atu tì kɨ ighel ta Bôbo Fɨyini nɨn læ bè sɨ̂ Mosìs.

Ghɨ mèsì ìfêl i Fɨndo nɨ̀ Bôbo Fɨyini

³²À ti ta abâʼlɨ̀ a fɨndo nɨ̀ Bôbo Fɨyini nô à jɨm nɨn læ mæ. Ghelɨ Isìlæ̀ nɨn læ nì nô àwo à jɨ̀m kɨ ighel ta Bôbo Fɨyini nɨn læ bè sɨ̂ Mosìs. ³³Àŋena nɨn læ mèsi fɨ̀ndo fɨ Bôbo Fɨyini nâ fìfɨ̀ ɨ fu sɨ̂ Mosìs. A nà n-ghɨ fɨ̀twotɨ̂ fìfɨ̀ baʼsɨ̂ nɨ̀ ɨ̀fwo vzɨ̀ a wu n-ghɨ ateyn nô ɨ̀ jɨ̀m nɨ̀ ɨ̀nghòf ɨ̀ kɨ̀mɨ nɨ̀ mɨ̀kfɨ̀s, nɨ̀ mbàŋsɨ dyaŋsɨnɨsɨ nɨ̀ ɨ̀tôʼ baʼsɨ̂ nɨ̀ ɨ̀byâŋ ɨfwo vzɨ̀ a wu n-ti atû àteyn, ³⁴nɨ̀ gvɨsɨ ayaʼ ma ghɨ yoʼ meyn sɨ na bâŋ baŋ nɨ̀ gvɨsɨ nyâm sɨ lisɨ sɨ chi a jvâ, nɨ̀ àbâs a ndzɨsɨ kì a kɨ n-kɨ̂ŋtɨ àntayntayn a mɨ̂kàyn, ³⁵nɨ̀ àntayntayn a mɨ̂kàynà nɨ̀ mbàŋsɨ ateynsɨ nɨ̀ nchɨl àteyn, ³⁶nɨ̀ àbaŋ abayn ifu a baʼsɨ̂ nɨ̀ ɨ̀fwo ateyn nô ɨ̀ jɨ̀m nɨ̀ àbayn ifu a, ³⁷nɨ̀ afo kì a ghɨ n-tomtɨ lâmsɨ̀ atû àteyn ma ghɨ faytɨ nɨ̀ àso ɨkwo a baŋnɨ-a nɨ̀ lâm sìsɨ̀ a ghɨ n-tomtɨ atû àteyn baʼsɨ̂ nɨ̀ ɨ̀fwo ateyn nô ɨ̀ jɨ̀m, nɨ̀ mɨ̀vɨ̂l mzɨ̀ a ghɨ n-we a lâmsɨ̀ ta ka sɨ na bayna, ³⁸nɨ̀ àbaŋ kì a ghɨ n-nyôʼ ileŋ atû àteyn ma ghɨ faytɨ nɨ̀ àso ɨkwo a baŋnɨ-a, nɨ̀ mɨ̀vɨ̂l mzɨ̀ a ghɨ n-yisi ngàŋ ndô Fɨyini ateyn, nɨ̀ ɨ̀fwo ɨlɨmtɨnɨ ɨ jûŋ nɨ̀ àbâs a ndzɨsɨ kì a ghɨ ghàŋsɨ ɨchfɨ fɨtwòtɨ̂, ³⁹kɨ̀mɨ nɨ̀ àbaŋ ifu kì a ghɨ fàytɨ nɨ̀ ìdyayn i nɨ̀ àfo ateyn kì a kɨ n-ghɨ ta nchèkèlèʼ tì ma ghɨ faytɨ kɨ̀mɨ nɨ̀ ìdyayn i nɨ̀ mbàŋsɨ ateynsɨ baʼsɨ̂ nɨ̀ ɨ̀fwo ateyn nô ɨ̀ jɨ̀m nɨ̀ àkaŋ a ghaʼnɨ-a kì nɨ̀ àfo kì a ghɨ n-tom akaŋ nâ kì atû ateyn, ⁴⁰kɨ̀mɨ nɨ̀ àbâs a ndzɨsɨ kì a ghɨ n-ghaŋsɨ ɨwe baʼsɨ̂ nɨ̀ ɨ̀tôʼ ateyn nɨ̀ ɨ̀byâŋ ɨfwo vzɨ̀ a wu n-ti atû àteyn nɨ̀ àbâs a ndzɨsɨ kì a ghɨ n-ghaŋsɨ ɨchfɨ ɨwe Fɨndo nɨ̀ Bôbo Fɨyini, baʼsɨ̂ nɨ̀ nkfɨ̀sɨ ateynsɨ nɨ̀ mɨ̀chôʼ mɨ̀ fɨ̀twòtɨ̂ nâ mzɨ̀ nɨ̀ ɨ̀fwo vzɨ̀ a wu n-ghɨ a fɨ̀ndo nɨ̀ Bôbo Fɨyini, ⁴¹kɨ̀mɨ nɨ̀ ndzɨsɨ tɨmnɨsɨ sɨ̂ Alòyn ɨ ngàŋ ndô Fɨyini nɨ̀ sɨ lisɨ sɨ̂ woyn ŋweyn ta ka àŋena na se sɨ fèl a ndô Fɨyini, ghɨ màʼ.

⁴²Ghelɨ Isìlæ̀ nɨn læ nì nô àwo à jɨ̀m kɨ ighel ta Bôbo Fɨyini nɨn læ bè sɨ̂ Mosìs. ⁴³Mosìs ɨ ki ifêl ateyn ɨ yeyn ma àŋena ni meyn kɨ ighel ta Bôbo Fɨyini nɨn læ bè, wu boysɨ àŋena.