Exodus 40

Bôbo Fɨyini ɨ fèʼtɨ̀ àwo a goʼsɨnɨ-a kì a ka Mosìs ni.

¹À nà n-ghɨ ta ghelɨ Isìlæ̀ nì mèsì ìfêl, Bôbo Fɨyini ɨ bè sɨ̂ Mosìs na, ²“À na ghɨ achi a kɨ asɨ-a a njoŋ ɨyî àsɨ a bêŋ, wa làysɨ̀ ɨ tisɨ fɨ̀ndo fɨ Bôbo Fɨyini nɨ̀ ɨ̀two vzɨ̀ a fɨ n-ghɨ ateyn, ³ɨ lì ɨ zɨ nɨ̀ àntayntayn a mɨ̂kàyn nɨ̀ Bôbo Fɨyini, ɨ tom ateyn ɨ kɨ̀ŋtɨ̀ nɨ̀ ndzɨsɨ ghaŋsɨnɨsɨ. ⁴Li zɨ kɨmɨ nɨ̀ àbaŋ abayn ifu a ɨ lèm nô mɨ ghà vzɨ̀ a kɨ n-kelɨ sɨ nà ghɨ ateyn, ɨ zɨsɨ kɨmɨ àfo kì a ghɨ n-tomtɨ lâmsɨ̀ ateyn ɨ tomtɨ lâmsɨ ateyn atû ateyn. ⁵Tom abaŋ kì a ghɨ n-nyôʼ ileŋ atû àteyn ma ghɨ faytɨ nɨ̀ àso ɨkwo a baŋnɨ-a tî asɨ àntayntayn a mɨ̂kàyn nɨ̀ Bôbo Fɨyini, ɨ ghaŋsɨ àbâs a ndzɨsɨ a ɨchfɨ fɨndo nɨ̀ Bôbo Fɨyini.

⁶“Tom abaŋ ifu i nyoʼnɨ-i ɨchfɨ fɨndo nɨ̀ Bôbo Fɨyini, ⁷ɨ tom akaŋ a ghaʼnɨ-a antêynɨ̀ àntêynɨ̀ a fɨndo nɨ̀ Bôbo Fɨyini nɨ̀ àbaŋ ifu i nyoʼnɨ-i ɨ we mu ateyn. ⁸Ghaŋsɨ ɨ jɨŋ kal nɨ ndzɨsɨ ɨwe fɨndo nâ ghè ɨ ghaŋsɨ àbâs a ndzɨsɨ a li-a ɨchfɨ̀ ateyn.

⁹“Lì mɨ̀vɨl mzɨ̀ a ghɨ n-yisi ngàŋ ndô Fɨyini ateyn tì ɨ yoʼlɨ fɨ̀ndo fɨ Bôbo Fɨyini baʼsɨ̂ nô mɨ nɨ̀ gha ta kɨ n-ghɨ ateyn ɨ lèm sɨ a nyɨŋ ta ka fɨ na layna. ¹⁰Wà nî wa yisi àbaŋ ifu i nyoʼnɨ-i baʼsɨ̂ nɨ̀ ɨ̀fwo ateyn nô ɨ̀ jɨ̀m ta ka wu na ghɨ sɨ a nyɨŋ, layna. ¹¹Yisi akaŋ a ghaʼnɨ-a kì baʼsɨ̂ nɨ̀ afo kì a kɨ n-ti atû àteyn, ɨ lèm ɨ̀fwo nâ wèyn wu na ghɨ sɨ a nyɨŋ.

¹²“Wà nî, wa lì ɨ gvì nɨ̀ Alòyn ŋêyn woyn ŋweyn ghɨ lûmnɨ̀ ɨchfɨ fɨndo nɨ̀ Bôbo Fɨyini ɨ sù àŋena nɨ̀ mû. ¹³Wà sû, wa màʼ ndzɨsɨ ngàŋ ndô Fɨyini ɨwùyn nɨ̀ Alòyn ɨ yisi ŋweyn ɨ lèm ŋweyn sɨ a nyɨŋ ta ka wù na fèlɨ̀ sɨ̂ mà sɨ a ngàŋ ndô Fɨyini. ¹⁴Li gvi kɨmɨ nɨ̀ woyn ŋweyn ɨ màʼ ndzɨsɨ dyâ sìsɨ̀ ɨwuyn nɨ̀ àŋena. ¹⁵Yisi àŋena kɨ̀ ta wà yìsi bò àŋena ta ka àŋena na felɨ̀ sɨ̂ mà sɨ a ngàŋsɨ ndô Fɨyini. Wa n-yisî àŋena tî, a i asas i ndo nɨ̀ àŋena faŋ kɨ̀ sɨ a isas i ndo i ngàŋsɨ ndô Fɨyini, a nô mɨ àjâŋ à kà læ̂ nà koʼa, ngàŋsɨ ndô Fɨyinisɨ ɨ fvɨ̂ kɨ ateyn.” ¹⁶Mosìs nɨ̀n nî meyn nô mɨ ghà kɨ̀ ighel ta Bôbo Fɨyini nɨn læ bè na wù ni.

¹⁷Mosìs nɨ̂n nì tî, ɨ làysɨ̀ fɨ̀ndo fɨ Bôbo Fɨyini nâ fèynfɨ̀ achi a kɨ asɨ-a a njoŋ yî asɨ a ànkùmtɨ̀ a bêŋ. ¹⁸À nà n-ghɨ ta Mosìs nɨn lâysɨ fɨndo fɨ Bôbo Fɨyini nâ fìfɨ̀, wu lèm ɨ̀byâŋ ɨfwo vzɨ̀ a ka mɨ̀kfɨ̂s na ti atû àteyn ɨ tomtɨ mɨ̀kfɨ̂s mɨ̀ àteyn, ɨ dyaŋsɨ mbàŋsɨ̀ ateyn, ɨ tomtɨ ɨ̀tôʼ. ¹⁹Wu n-nì tî, ɨ lì ɨ̀byâs ɨfwo vzɨ̀ a ghɨ fàytɨ nɨ̀ ìwî i bzɨ i tî, ɨ chɨl atû fɨ̀ndo nɨ̀ Bôbo Fɨyini nâ ghè, ɨ fi lì gvɨsɨ nyâm ɨ chɨl kfeynsɨ atû àteyn kɨ ighel ta Bôbo Fɨyini nɨn læ bè sɨ̂ ŋweyn.

²⁰Wù n-læ meyn lì ɨbyâs ɨ ngòʼsɨ̀ vzɨ̂ a ghɨ n-læ nyàʼ tɨsaʼ ateyn tì, ɨ we a antayntayn a mɨ̂kàyn ɨ tuŋtɨ mbàŋsɨ ateyn ɨ chɨl. ²¹Wù n-læ chɨl àntayntayn a mɨ̂kàyn ateyn tì, ɨ lì ɨ zɨ nɨ̀ ànkeyna a fɨndo nɨ̀ Bôbo Fɨyini, ɨ kɨ̀ŋtɨ̀ nɨ̀ ndzɨsɨ ghaŋsɨnɨsɨ kɨ̀ ighel ta Bôbo Fɨyini nɨn læ bè sɨ̂ ŋweyn.

²²Mosìs nɨ̀n læ tom abaŋ abayn ifu a fɨndo nɨ̀ Bôbo Fɨyini dzɨ abàs ikuè, asɨ abàs a ndzɨsɨ afî a kɨ kɨ̀ŋtɨ̀ alêʼ a laynɨ-a, ²³ɨ lèm àbayn ifu atû àteyn asɨ nɨ̀ Bôbo Fɨyini kɨ ighel ta Bôbo Fɨyini nɨn læ bè sɨ̂ ŋweyn.

²⁴Wù n-læ meyn tom afo kì a ghɨ n-tomtɨ lâmsɨ̀ atu àteyn a fɨndo nɨ̀ Bôbo Fɨyini dzɨ abàs itsɨyn kɨ kèʼnɨ̀ keʼnɨ abaŋ abayn ifu, ²⁵ɨ tomtɨ lâmsɨ̀ atû àteyn asɨ nɨ̀ Fɨyini fɨ, kɨ̀ ighel ta Bôbo Fɨyini nɨn læ bè sɨ̂ ŋweyn.

²⁶Mosìs nɨn læ meyn lì àbaŋ kì a ghɨ n-nyôʼ ileŋ atû àteyn ma ghɨ faytɨ nɨ̀ àso ɨkwo a baŋnɨ-a tî, ɨ tom a fɨndo nɨ̀ Bôbo Fɨyini asɨ abàs a ndzɨsɨ afî a kɨ n-kɨ̂ŋtɨ̀ alêʼ a laynɨ-a, ²⁷ɨ nyòʼ ɨ̀fwo ɨlɨmtɨnɨ atû àteyn kɨ̀ ighel ta Bôbo Fɨyini nɨn læ bè sɨ̂ ŋweyn. ²⁸Wù n-læ ni tî, ɨ ghaŋsɨ àbâs a ndzɨsɨ a ɨchfɨ fɨndo nâ ghè.

²⁹Wù n-læ meyn tom baʼsɨ àbaŋ ifu i nyoʼnɨ-i ɨchfɨ fɨndo nɨ̀ Bôbo Fɨyini, ɨ fu ifu i nyoʼnɨ-i nɨ̀ ìfu i ɨfwo ɨ yɨnɨ atû àteyn, kɨ̀ ighel ta Bôbo Fɨyini nɨn læ bè sɨ̂ ŋweyn.

^30-31Wù n-læ meyn tom akaŋ a ghaʼnɨ-a antêynɨ̀ àntêynɨ̀ a fɨndo nɨ̀ Bôbo Fɨyini nɨ̀ àbaŋ ifu i nyoʼnɨ-i ɨ we mu ateyn, ta ka Mosìs baʼsɨ̂ nɨ̀ Alòyn ŋêyn woyn ŋweyn na sû ɨ̀wu àŋena nɨ̀ ɨ̀vɨ àŋena ateyn. ³²Àŋena nà n-se sɨ zɨ a fɨndo nɨ̀ Bôbo Fɨyini nô mɨ ɨlvɨ gha, àŋena sù ɨ̀wu àŋena baʼsɨ̂ nɨ̀ ɨ̀vɨ, ɨ̀ se sɨ ndù sɨ fu ifu atû àbaŋ àŋena sù, kɨ ighel ta Bôbo Fɨyini nɨn læ bè.

³³Mosìs nɨn nì tî, ɨ faytɨ ɨ̀we wu jɨŋ kali fɨ̀ndo fɨ Bobo Fɨyini nâ fìfɨ̀ baʼsɨ̂ nɨ̀ àbaŋ ifu i nyoʼnɨ-i, ɨ kɨ̀ŋtɨ̀ ɨ kal ɨwe ateyn nɨ̀ ɨ̀byâs ɨ ndzɨsɨ ɨ fi ghaŋsɨ àbâs a ndzɨsɨ a ɨchfɨ ɨwe nâ ghè. À ti dzɨ zɨ̀ a Mosìs nɨn læ mèsi ifêl nâ yèynì ateyn.

Mbàʼsɨ̀ ɨ chɨl fɨ̀ndo fɨ Bôbo Fɨyini

³⁴Mosìs nà n-mesì gvî kɨ nɨ̀ ìfêl ateyn i têyn, mbàʼsɨ̀ ɨ suʼi, ɨ chɨl fɨ̀ndo fɨ Bôbo Fɨyini nâ fìfɨ̀, iŋwâʼ i Bôbo Fɨyini ɨ luyn a fɨ̂ndo nâ ghè, ³⁵Mosìs ɨ nà ghɨ ma wù kàʼ wu bû zɨ a fɨndo nɨ̀ Bôbo nâ ghè bòm ta mbàʼsɨ nà n-ghɨ ma sɨ chɨytɨ meyn, iŋwâʼ i Bôbo Fɨyini luyn ateyn.

³⁶Sɨ zɨ̀tɨ̀ achi nâ ghàyn, ghelɨ Isìlæ̀ ɨ nà sɨ jelɨ̀ ndu-à, ɨ̀ bɨ̀ alèʼ, mbàʼsɨ nî làlì sɨ a atû fɨ̀ndo nɨ̀ Bôbo Fɨyini nô mɨ ɨlvɨ gha, àŋena boŋ làlì ɨ lu kɨ lu. ³⁷Mɨtì mbàʼsɨ̀ ateynsɨ nî faŋ tɨ̀ làli sɨ a atû fɨ̀ndo nɨ̀ Bôbo Fɨyini, àŋena nà ghɨ kɨ afu nô ta ka sɨ læ̂ làlì. ³⁸Yi ti n-dyêyn na ghelɨ Isìlæ̀ nà n-ndû nô mɨ awo, mbàʼ nâ sèynsɨ̀ a sɨ nà n-dyêyn na Bôbo Fɨyini nɨn ghɨ ŋêyn àŋena têyn ɨ nà ghɨ atû fɨ̀ndo nɨ̀ Bôbo Fɨyini. Mbàʼ nâ sèynsɨ nà n-nî sɨ nà ghɨ atû fɨ̀ndo nɨ̀ Bôbo Fɨyini nɨ̀nchuè, à nî nà ghɨ nɨ̀ntuʼ, ɨvɨsɨ nà balî antêynɨ̀ àteyn àŋena yeyna.