Exodus 6

¹Bôbo Fɨyini ɨ bè sɨ̂ Mosìs na, “Sɨ zɨ̀tɨ lvɨ̂yn wa n-yeyn ìwo zɨ̀ a ka mà ni sɨ̂ fòyn Ijìb. Mɨ n-dyèyn àdyaʼ à kema sɨ̂ fòyn Ijìb a wù visi ghelɨ Isìlæ̀ a àŋena fvɨ. Àŋena nɨn se sɨ fvɨ̀ a wù na fî sâŋ nô saŋ àŋena sɨ a ŋweyn ilaʼ.”

²Fɨyini fɨ nɨn bê meyn kɨmɨ sɨ̂ Mosìs na, “À n-ghɨ mà Bôbo Fɨyini. ³Mɨ n-læ fvɨ̀ ikèʼ nɨ̀ Abɨ̀làhâm ɨ fvɨ̀ ikèʼ nɨ̀ Yisàk ɨ fi fvɨ̀ ikèʼ nɨ̀ Jàkôb ta Fɨyini fìfɨ̀ a fɨ n-kelɨ adyaʼ à jɨ̀m. Mɨtì mɨ n-bû læ nì na àŋena keli na izɨyn ì yemi nɨn ghɨ Bôbo Fɨyini. ⁴Ghesɨ̀ àŋena nɨn læ meyn yɨ kɨmɨ mɨ̀kâyn ma chfɨ̀nɨ̀ sɨ fu ilaʼ i Kenàn zɨ̀ a àŋena nɨn læ nà chi ateyn ta ghelɨ ghɨ gvinɨ tî sɨ̂ àŋena. ⁵Ma fi meyn yvɨ̀ ta ghelɨ Isìlæ̀ nɨn dzɨ̂ bòm ta ghelɨ Ijìb li àŋena sɨ a ɨkôs ɨ̀ kàsi kfàʼtɨ̀ mɨ̀kâyn mzɨ̀ a mɨ n-læ yɨ ghesɨ̀ ghɨ̀bo àŋena.

⁶“Ndù læ̂ ɨ bè sɨ̂ àŋena na, ‘À n-ghɨ mà Bôbo Fɨyini ghɨ sɨ suʼsɨ adɨli kì a ghelɨ Ijìb kòʼsɨ a yi atu. Mɨ fvɨ̀sɨ̀ zɨ̀ sɨ a ndô akòs nɨ̀ àŋena. Mɨ n-fu ngeʼ sɨ̂ àŋena nɨ̀ àdyaʼ a bemnɨ kì a mɨ n-kelɨ ɨ̀ bœ̀sɨ̀ zɨ̀. ⁷Mɨ n-ni-à a yì na ghɨ ghelɨ̀ ghem, ma ghɨ Fɨyini fifɨ ta ka yì keli na à n-ghɨ mà Bôbo Fɨyini, ɨ Fɨyini fifɨ fìfɨ̀ a fɨ n-fvɨ̀sɨ zɨ sɨ akòs a Ijìb. ⁸Mɨ n-lì zɨ̂ nɨ̀ zɨ̀ a ilaʼ afî a mɨ n-læ làysɨ awu à kema iyvɨ ɨ yɨ mɨkâyn sɨ fu sɨ̂ Abɨ̀làhâm sɨ fu sɨ̂ Yisàk sɨ fu sɨ̂ Jàkôb. Mɨ n-fu sɨ̂ zɨ̀ a yì na kelɨ sɨ a yi ilaʼ. À n-ghɨ mà Bôbo Fɨyini.’”

⁹Mosìs ɨ ndu fèʼtɨ̀ àwo nâ kèynà sɨ̂ ghelɨ Isìlæ̀, àŋena faŋ tɨ̀ yvɨ̀tɨ bòm ta mɨ̀tem mɨ̀ àŋena nà n-sɨ ghɨ ma mɨ̀ kosa meyn, àŋena fî felɨ̀ chwòsɨ̀.

¹⁰Bôbo Fɨyini ɨ kæ bè sɨ̂ Mosìs na, ¹¹“Kasi ndu bè sɨ̂ fòyn Ijìb na wù visi ghelɨ Isìlæ̀, àŋena fvɨ sɨ a ŋweyn ilaʼ.”

¹²Mɨtì Mosìs ɨ bè sɨ̂ Bôbo Fɨyini na, “Ghelɨ Isìlæ̀ ti kæ sɨ faŋ tɨ̀ yvɨ iwo zɨ̀ a mà bè, fòyn Ijìb ɨ yvɨ ti-a, ma kya wi sɨ taŋi a?”

¹³Bôbo Fɨyini nɨ̀n taŋi meyn ɨ bè sɨ̂ Mosìs ŋêyn Alòyn na, àŋena ndu bè sɨ̂ ghelɨ Isìlæ̀ ɨ̀ fì bè kɨ̀mɨ sɨ̂ fòyn Ijìb na, Bôbo Fɨyini be meyn na àŋena li fvɨ̀ nɨ̀ ghelɨ Isìlæ̀ sɨ a Ijìb.

Ghɨ̀bo Mosìs ŋêyn Alòyn

¹⁴Ɨghêyn nɨn ghɨ ghelɨ ghɨ li ghì a ghɨ n-læ ku asas a ndosɨ a Isìlæ̀, Mosìs ŋêyn Alòyn ɨ læ fvɨ̀ ateyn nɨ i li.

Woyn ghɨ lûmnɨ̀ nɨ̀ Lubèn ɨ wâyn àsɨ nɨ̀ Jàkôb, læ nà ghɨ Hanòk nɨ̀ Balù nɨ̀ Hezlòn nɨ̀ Kamì. À ti asas a ndosɨ kì a kɨ n-fvɨ̀ ɨntweŋ ndo nɨ̀ Lubèn.

¹⁵Woyn ghɨ lûmnɨ̀ nɨ̀ Simìyòn nɨn læ nà ghɨ Jemwèl nɨ̀ Jamìn nɨ̀ Ohàd ŋêyn Jakìn nɨ̀ Zohà nɨ̀ Shôl vzɨ̀ a nà ŋweyn nà n-ghɨ wul ɨ̀ Kenàn tì. À ti asas a ndosɨ kì a kɨ n-læ fvɨ̀ ɨntweŋ nɨ̀ Simìyòn.

¹⁶Akeynà nɨn ghɨ àzɨyn a woyn ghɨ lûmnɨ̀ nɨ̀ Levì kɨ sɨ a ibzɨ ta ghɨ n-læ nyaʼ lèm. À nà n-ghɨ Geshòn nɨ̀ Kohàt ŋêyn Mèlalì. Levì nɨn læ chi bèŋ ɨvɨ nɨ̀ bèŋsɨ̀ mɨ̀vɨm ɨ̀n tal njvàsɨ̀ nsòmbo.

¹⁷Woyn ghɨ lûmnɨ̀ nɨ̀ Geshòn kɨ̀ ɨntweŋ ɨntweŋ nà n-ghɨ Libnì nɨ̀ Shimè.

¹⁸Woyn ghɨ lûmnɨ̀ nɨ̀ Kolàt nà n-ghɨ Amlàm nɨ̀ Izà ŋêyn Heblòn nɨ̀ Uzìyèl. Kohàt nɨn læ chi bèŋ ɨvɨ nɨ̀ bèŋsɨ̀ mɨ̀vɨm ɨ̀n tal njvàsɨ̀ tal.

¹⁹Woyn ghɨ lûmnɨ̀ nɨ̀ Mèlalì nà n-ghɨ Malì nɨ̀ Mushì.

Akeynà nɨn ghɨ àsas a ndosɨ kì a kɨ n-læ fvɨ̀ ɨntweŋ nɨ̀ Levì ta ghɨ læ nyaʼ lèm.

²⁰Amlàm nɨn læ li Jochebèd ɨ jêmtɨ̀ bò ŋweyn sɨ a wi ŋêyn ŋweyn bzɨ Alòyn ŋêyn Mosìs. Amlàm nɨn læ chi bèŋ ɨvɨ nɨ̀ bèŋsɨ̀ mɨ̀vɨm ɨ̀n tal njvàsɨ̀ nsòmbo.

²¹Woyn ghɨ lûmnɨ̀ nɨ̀ Izà nà n-ghɨ Kolà nɨ̀ Nefèk ŋêyn Ziklì.

²²Woyn ghɨ lûmnɨ̀ nɨ̀ Uzìyèl nà n-ghɨ Mishèl nɨ̀ Elzafàn ŋêyn Sitlì.

²³Alòyn nɨn læ meyn lì Elishebà ɨ wâyn Àminadàb sɨ a wi. Elishebà nà n-ghɨ jêmtɨ̀ Nashòn. Alòyn ŋêyn Elishebà ɨ bzɨ Nadàb nɨ̀ Abihù nɨ̀ Elezà ŋêyn Itamà.

²⁴Woyn ghɨ lûmnɨ̀ nɨ̀ Kolà nà n-ghɨ Asì nɨ̀ Elkanà nɨ̀ Abìyasàf. À ti n-ghɨ àsas a ndosɨ kì a kɨ n-fvɨ̀ ɨntweŋ nɨ̀ Kolà.

²⁵Elezà ɨ wâyn Alòyn ɨ lì wâyn Butèl ɨ̀lvì sɨ a wi ŋêyn ŋweyn ɨ bzɨ Finehàs.

À ti ghelɨ ghì a ghɨ n-læ ku asas a ndosɨ nɨ̀ Levì kɨ̀ ɨntweŋ ndo ɨntweŋ ndo.

²⁶Alòyn nâ wèyn ŋêyn Mosìs nà n-ghɨ ghelɨ ghì a Bôbo Fɨyini nɨn bè sɨ̂ àŋena na, “Yì li fvɨ̀ nɨ̀ ghelɨ Isìlæ̀ sɨ a Ijìb àŋena jel kɨ̀ a inòyn inòyn ta sugèyʼsɨ̀.” ²⁷À n-ghɨ kɨmɨ Alòyn ŋêyn Mosìs a ghɨ n-bè sɨ̂ fòyn Ijìb na wù visi ghelɨ Isìlæ̀ lu.

Alòyn ɨ taŋi alèʼ nɨ̀ Mosìs

²⁸À nà n-ghɨ achi ghè a Bôbo Fɨyini tàŋi sɨ̂ Mosìs a Ijìb, ²⁹ɨ bè sɨ̂ ŋweyn na, “À n-ghɨ mà Bôbo Fɨyini. Ndu fèʼtɨ awo kì nô à jɨ̀m sɨ̀ fòyn Ijìb a ma bè sɨ̂ và.”

³⁰Mɨtì Mosìs ɨ bè sɨ̂ Bôbo Fɨyini na, “Fòyn Ijìb ɨ nì yvɨ ti iwo zɨ̀ a mɨ n-bê, ma kya wi sɨ taŋi a?”