Exodus 7

¹Mosìs ɨ taŋi tì Bôbo Fɨyini ɨ bè sɨ̂ ŋweyn na, “Wa kya na ma ni meyn na wà na ghɨ ta Fɨyini sɨ̂ fòyn Ijìb. Wâynà vâ ɨlwema ɨ Alòyn na ghɨ wul ɨ̀ ntum nɨ̀ và kɨ̀ têyn ta nfèʼtɨ̀ ìghaʼnɨ nɨn ghɨ sɨ̂ mà. ²Wa n-bê nô mɨ ghà ta mà bè sɨ̂ và, a wâynà vâ Alòyn feʼtɨ sɨ̂ fòyn Ijìb, a wù visi ghelɨ Isìlæ̀ a àŋena fvɨ sɨ a ŋweyn ilaʼ. ³Mɨtì mɨ n-tosɨ̂ àtem a fòyn ɨ̀ nì a nchwæsɨ awo a kaynɨ-a gayn a Ijìb nô sɨ idvɨ̀, ⁴a wù faŋ tɨ̀ yvɨ̀nɨ iwo zɨ̀ a yi n-bê. Wu nì faŋ tɨ̀ yvɨ, a mà kæ dyeyn adyaʼ à kema sɨ fù ngeʼ ìghaʼnɨ sɨ̂ ghelɨ Ijìb sɨ lì sɨ fvɨ nɨ̀ ghelɨ̀ ghem kɨ̀ inòyn inòyn. ⁵À na ghɨ nô mɨ ɨlvɨ gha ta mà dyèyn àdyaʼ à kema sɨ̂ ghelɨ Ijìb ɨ̀ lì fvɨ̀ nɨ̀ ghelɨ Isìlæ̀ sɨ a ilaʼ afu, a ghelɨ Ijìb yeyn kèli na mɨ n-ghɨ Bôbo Fɨyini.”

⁶Bôbo taŋi tì Mosìs ŋêyn Alòyn ɨ nì nô mɨ ghà kɨ ighel ta Bôbo Fɨyini bè sɨ̂ àŋena. ⁷Àŋena nɨn se sɨ taŋi sɨ̂ fòyn Ijìb ma Mosìs sɨ ghɨ bèŋ mɨ̀vɨ̂m nfama, Alòyn ɨ ghɨ bèŋ mɨ̀vɨ̂m nfama njvàsɨ̀ tal.

Mbàŋ Alòyn ɨ kasi sɨ a mbam

⁸Bôbo Fɨyini nɨ̀n bê meyn sɨ̂ Mosìs ŋêyn Alòyn na, ⁹“Fòyn Ijìb kæ sɨ bè sɨ̂ zɨ̀ na yì ni iwo i, wa bè Alòyn maʼ mbàŋ ŋweyn a nse asɨ nɨ̀ fòyn a ka yì kasi sɨ a mbam.”

¹⁰Bôbo Fɨyini ɨ taŋi tì Mosìs ŋêyn Alòyn ɨ lu ndù asɨ nɨ̀ fòyn ɨ ni kɨ ighel ta Bôbo Fɨyini bè. Alòyn ɨ màʼ mbàŋ ŋweyn asɨ nɨ̀ fòyn ŋêyn chyeʼsɨ ŋweynsɨ, yi kasi sɨ a mbam. ¹¹Fòyn ɨ yeyn tî ɨ tum jàŋtɨ̀ ghelɨ ghɨ tofɨnɨ nɨ̀ ghelɨ ghɨ kuʼnɨ nɨ̀ ghelɨ mɨnyaʼ, àŋena gvì ɨ ni kɨmɨ ìwo nâ zɨ̀. ¹²Nô mɨ ndà a àŋena antêynɨ̀ ɨ nà mâʼ mbàŋ ŋweyn yi kasî kɨ sɨ a mbam. Mɨtì mbàŋ Alòyn ɨ mzɨ̀ mbàŋsɨ àŋenasɨ. ¹³Yi n-gàyn mɨ tì fòyn ɨ fi tosɨ ndu kɨ nɨ̀ àtem a ŋweyn asɨ ɨ faŋ tɨ̀ yvɨ̀tɨ iwo zɨ̀ a Mosìs ŋêyn Alòyn bè, kɨ ighel ta Bôbo Fɨyini nɨn læ bè.

Jvâ Nâyl ɨ kasi sɨ a mɨ̂lùŋ

¹⁴Bôbo Fɨyini ɨ kæ bè sɨ̂ Mosìs na, “Atem a fòyn Ijìb à nɨn to ndû kɨ asɨ, wu bɨmî wì sɨ visi na ghelɨ Isìlæ̀ lu. ¹⁵Ɨtuʼ bɨsɨ̀ layn, wa ndu yeyn fòyn Ijìb ɨlvɨ ghê a wù nî wu nà ndû a jvâ ateyn. Wà læ̂ wa lì mbàŋ zɨ̀ a wà tî màʼ yì kasi sɨ a mbam tî ɨ ndu dùʼì a mbæ̀ jvà Nâyl ɨ nà chîtɨ̀ ŋweyn. ¹⁶Wù gvî wa bè sɨ̂ ŋweyn na, Bôbo Fɨyini ɨ Fɨyini fɨ ghelɨ Hibɨ̀lù ti meyn tùm na mà be sɨ̂ và na, wà visi ghelɨ̀ ghem ghɨ lu ta ka àŋena ndu kòʼsɨ mà a nse ìyum. Mɨtì wà bû yvɨ iwo zɨ̀ a mà bè sɨ koʼ sɨ chem lvɨ̂yn. ¹⁷Bôbo Fɨyini bê meyn na yi n-nî ìwo a wà yeyn ɨ̀ kèli na à n-ghɨ zɨ̀ Bôbo Fɨyini. Mɨ n-leŋ mbàŋ yèyn a mɨ n-kelɨ a ma awu tèyn atû jvà Nâyl a jvà àteyn kasi sɨ a mɨ̂lùŋ, ¹⁸a sfɨsɨ kfɨtɨ, a mu mɨ̀ àteyn na lɨ̂m ghaʼ ghelɨ Ijìb sɨ nyvɨ.”

¹⁹Bôbo Fɨyini nɨ̀n fi meyn bè sɨ̂ Mosìs na wù be sɨ̂ Alòyn na, “Li mbàŋ zyâ ɨ nàysɨ̀ atû jvàsɨ̀ a Ijìb nô sɨ̀ jɨ̀m, nàysɨ atû jvà i to, ɨ nàysɨ̀ atû jvasɨ ghè a ghɨ lì lî, ɨ nàysɨ̀ atû mɨ̀chɨ̀m, ɨ nàysɨ̀ atû tɨ̀bɨ̀ ghê a ghɨ tɨm ɨ̀ we mu ateyn, a ka sɨ kasi kɨ̀ sɨ a mɨ̂lùŋ. Mɨ̀lûŋ na ghɨ nô mɨ a wo a Ijìb, ghɨ nô mɨ ɨfwo fî a ghɨ tu tòmtɨ mu ateyn nô ɨ̀ jɨ̀m.”

²⁰Mosìs ŋêyn Alòyn ɨ ni kɨ ighel ta Bôbo bè, Alòyn ɨ làysɨ̀ mbàŋ ŋweyn asɨ nɨ̀ fòyn ŋêyn chyeʼsɨ ŋweynsɨ ɨ leŋ atû jvà Nâyl mu mɨ̀ àteyn ɨ kasi sɨ a mɨ̂lùŋ nô ɨ̀n jɨ̀m. ²¹Sfɨsɨ nɨn kfɨtɨ meyn sɨ a jvà Nâyl, yi nà lɨ̂m ghaʼ ghelɨ Ijìb sɨ nyvɨ, mɨ̀lûŋ ɨ ghɨ kɨ ɨlwêʼ ɨ̀ jɨ̀m a Ijìb.

²²Mɨtì ghelɨ ghɨ kuʼnɨ a Ijìb ɨ boŋ ni kɨmɨ àwo nâ kì-à nɨ̀ ìkuʼ i àŋena, fòyn Ijìb ɨ fi tosɨ ndu kɨ nɨ̀ àtem a, ɨ faŋ tɨ yvɨ iwo zɨ̀ a Mosìs ŋêyn Alòyn nɨn bê, kɨ̀ ighel ta Bôbo Fɨyini nɨn læ bè. ²³Yi n-gàyn tî fòyn ɨ kwo bèynlɨ̀ ɨ kasi zɨ kɨ a ntoʼ ɨ faŋ tɨ̀ li mɨ na à n-ghɨ ìwo. ²⁴Ghelɨ Ijìb nô ghɨ̀ jɨ̀m ɨ nà sɨ tɨm ɨ̀lwêʼ a mbæ̀ jvà Nâyl sɨ keli mu sɨ nyvɨ bòm ta àŋena nà n-kaʼ ghɨ bû fì nyvɨ̀ mu mɨ̀ jvà.

Ɨ̀nchwàmàkès ɨ fvɨ̀ a Ijìb

²⁵Mɨ̀chi nɨ̀n læ meyn chwò nsòmbo ta Bôbo Fɨyini nì jvà Nâyl kasi sɨ a mɨ̂lùŋ.