Ezra 10

Ghelɨ Jûsɨ̀ ɨ jùm ghɨ̀kì ɨtum

¹A nà n-ghɨ ta Ezɨ̀là fe nyɨ̀ŋi àkfɨ̀ akfɨ asɨ a ndô Fɨyini nà dzɨ-à ɨ loyn ilêsɨ̀ ifu kûm mbɨ nâ sèynsɨ̀, ghelɨ Isìlæ̀ ɨ gvì anòyn nô sɨ idvɨ̀ ɨ yvɨ̀ŋtɨ̀ a ŋweyn a ngùŋ ɨ nà boŋ dzɨ̀ nô sɨ a ŋaŋ. Ghelɨ nâ ghèyn nà n-ghɨ ghɨ̀lûmnɨ̀ nɨ̀ ghɨ̀ki nɨ̀ woynda. ²Shèkànayà ɨ wâyn Jehìyèl vzɨ̀ a à nà n-ghɨ wul ɨ̀ ndo nɨ̀ Elàm ɨ kæ be sɨ̂ Ezɨ̀là na, “Ghèsɨ ni meyn mbɨ asɨ nɨ̀ Fɨyini feyfɨ ta ghès tî màla ghɨ̀kì atum antêynɨ̀ nɨ̀ ghelɨ atum ghì a ghɨ n-chi a ghès a mbæ̀/ngùŋ. Mɨtì iwo i bu ghɨ ta ghelɨ Isìlæ̀ kàʼ a ghɨ ni. ³Ghesɨ̀nà yɨ mɨkâyn lvɨ̂yn ghesɨ̀na nɨ̀ Fɨyini fɨ ɨ̀ jùm ghɨ̀kì nâ ghèyn nô ghɨ̀ jɨ̀m baʼsɨ̂ nɨ̀ woyn àŋena kɨ ighel ta wà n-yeʼi/tebtɨ ghes zɨ̂ ghelɨ ghì a ghɨ n-lêm/ ngvɨmlɨ isaʼ i Fɨyini. Ghesɨ̀nà ni kɨ̀ ta isaʼ i Fɨyini nɨn bê/dyêyn. ⁴Làli ɨ ndù asɨ sɨ nì iwo nâ yèynì bòm ta ghès nɨn ti a wa ibàm. Wà se sɨ ni iwo ateyn, ka wa n-fàyn àfo.”

⁵Wu taŋi tì, Ezɨ̀là ɨ làlì sɨ afu ɨ bè ngàŋsɨ ndô Fɨyini nɨ̀ ghelɨ ndo nɨ̀ Levì baʼsɨ̂ nɨ̀ ghelɨ Isìlæ̀ nô ghɨ̀ jɨ̀m ɨ yɨ mɨkâyn sɨ chfɨ̀nɨ̀ na àŋena ni iwo zɨ̀ a ghɨ kàŋtɨ̀ tî. Àŋena nɨn yɨ meyn mɨ̀kâyn ɨ chfɨ̀nɨ na ghɨ n-nî ìwo ateyn. ⁶Ezɨ̀là ɨ lù sɨ asɨ a ndô Fɨyini ɨ zɨ chi a ndo nɨ̀ Jèhòhanàn ɨ wâyn Elìyashìb. Wu n-bu læ yɨ afo a ndo afu ɨ faŋ tɨ̀ nyvɨ nô mɨ nkàyn mù bòm ta wu nà n-dzɨ̂ kûm àtu a tonɨ-a nɨ̀ ghelɨ Isìlæ̀ ghì a ghɨ tî kàsi kfa ɨ̀ faŋ tɨ̀ nà ngvɨmlɨ isaʼ i Fɨyini.

⁷Ghɨ n-tum meyn ntum sɨ̂ ghelɨ ghì a ghɨ tî kàsi kfà nô ghɨ̀ jɨ̀m a Jèlusalèm nɨ̀ ìlaʼ i Judà ì na ghɨ gvi yvɨ̀ŋtɨ̀ a Jèlusalèm. ⁸Ghelɨ ghɨ tisɨnɨ ŋêyn chyeʼsɨ nɨn chwosɨ meyn sɨ isaʼ na ghɨ ghal ɨ̀ fsɨ nô mɨ ɨ̀fwo nda vzɨ̀ a wù faŋ tɨ̀ gvì a nchɨ̀yntɨ nâ ghàyn ibàm i mɨchi ɨ̀n tal ɨ̀ fì jùm fvɨ̀sɨ̀ nô ŋweyn sɨ antêynɨ̀ nɨ̀ ghelɨ ghì a ghɨ tî kàsi kfa.

⁹Ghelɨ isas i ndo nɨ̀ Judà nɨ̀ ɨ ghɨ Benjamìn nô ghɨ̀ jɨ̀m nɨn yvɨtɨ meyn a Jèlusalèm antêynɨ̀ mɨ̀chi ɨ̀n tal nâ ghàyn. A nà ghɨ a mɨchi mɨ̀vɨm ɨ̀m bò a njoŋsɨ bulamòʼ ma nô ghelɨ ghɨ̀ jɨ̀m gvi meyn nà duʼ a ɨwe ghaʼnɨ abe a ndô Fɨyini, duʼ tì ma mɨ̀têm mɨ̀ àŋena koytɨ meyn bòm ìwo zɨ̀ a ghɨ jàŋ àŋena sɨ ateyn ivɨ-i fî suʼî nô sɨ a ŋaŋ. ¹⁰Ezɨ̀là ɨ ngàŋ ndô Fɨyini zɨ̀ ɨ làlì ɨ timi iyvɨ ɨ bè sɨ̂ àŋena na, “Yi to meyn nɨ̀ àtu a sɨ̂ Fɨyini fɨ ɨ̀ màla ghɨ̀ki atum ɨ̀ fì nì na mbɨ̂ ghelɨ Isìlæ̀ toʼ dvɨ̀. ¹¹Yì loyn læ̂ ìlêsɨ̀ ifu lvɨ̂yn sɨ̂ Bôbo Fɨyini ɨ Fɨyini fɨ ghɨ̀bo ghi ɨ̀ nì ìwo zɨ̀ a fɨ n-kôŋ/n-kɨŋ. Ka yi n-fì chi ta ghelɨ ɨtum ghì a zɨ̂ àŋena nɨn chi baʼsɨ. Yì jum ghɨ̀kì atum ghì a yì tî màla tî.”

¹²Ghelɨ nâ ghì nô ghɨ̀ jɨ̀m ɨ bèynsɨ̀ nô nɨ̀ gyà i to na, “Wà bè kɨ̀ nô samoʼ. Ghès nɨn nî kɨ ìwo zɨ̀ a wà bè./Ghès nɨn nî kɨ ta wà bè. ¹³Mɨtì ghelɨ nɨn dvɨ̂ chwôsɨ̀ afêyn, ivɨ-i fî suʼî nô sɨ a ŋaŋ ma ghès kàʼ ghɨ bû dùʼì nà duʼ kɨ abe isas ivɨ. Sɨ kfeynsɨ iwo nâ yêynì nɨn ghɨ tèyn ma ghèsɨ̀ kàʼ ghɨ bû nì kɨ̀ ibàm achi àmòʼ kèsa ibàm i mɨchi ɨ̀n bò bòm ta ghèsɨ ni meyn mbɨ ì bemnɨ antêynɨ̀ ìwo nâ ghàyn. ¹⁴Yi n-jôf na ghelɨ ghì a ghɨ n-tisɨ ghes ghal iwo nâ yèynì sɨ̂ ghès ghɨ̀ jɨ̀m. Àŋena lem ɨlvɨ ghelɨ ghì a ghɨ màla ghɨ̀kì atum a ntèʼsɨ nɨ̀ ghès nô sɨ̀ jɨ̀m, àŋena fvɨ gvì ateyn bàʼsɨ nɨ̀ chyeʼsɨ nɨ̀ ghelɨ ghɨ tisɨnɨ ntèʼ nâ sìsɨ̀ ghɨ fel iwo ateyn nô sɨ chem ta ka ɨtoŋ ɨ yafɨnɨ ɨ bemnɨ nɨ̀ Fɨyini fɨ na bu fì ghɨ wi a ghès atu.” ¹⁵Àŋena nɨn taŋi tî, a tuynsɨ kɨ Jònatàn ɨ wâyn Asahèl iwo ateyn ŋêyn Jàziyà ɨ wâyn Tikvà. Meshulàm ŋêyn Shabetày ɨ wul ɨ̀ ndo nɨ̀ Levì ɨ tòʼ àŋena.

¹⁶Ghelɨ ghì a ghɨ n-kasi kfa tî ɨ ni kɨ ta ghɨ kàŋtɨ̀/bè. Ezɨ̀là ɨ ngàŋ ndô Fɨyini zɨ̀ ɨ kæ sɨ choʼtɨ ɨtu asas a ndosɨ sɨ nyàʼ azɨyn a àŋena. Wu nà n-ndû nô mɨ isas i ndo ì kà, choʼ àtu ateyn. A nà ghɨ achi a kɨ asɨ-a a njoŋsɨ ìvɨm, àŋena zɨ̀tɨ̀ sɨ dùʼì sɨ kɨŋ/kitɨ sɨ fvɨ̀ sɨ koʼ nɨ̀ ghelɨ ghì a ghɨ màla ghɨ̀ki atum. ¹⁷A nà ghɨ achi a kɨ asɨ-a a njoŋ ìmòʼ a bêŋ ifɨ àŋena fèlɨ mèsì nɨ̀ ghelɨ ghì nô ghɨ̀ jɨ̀m a ghɨ màla ghɨ̀kì atum.

Azɨyn a ghelɨ ghì a ghɨ màla ghɨ̀kì atum

¹⁸Ghɨ n-ki antêynɨ̀ nɨ̀ ngàŋsɨ ndô Fɨyini isas i ndo nɨ̀ Joshwà ŋêyn woynà ŋweyn ɨ yeyn ma Maseyà nɨ̀ Elizà nɨ̀ Jalìb nɨ̀ Gèdalìyà mala meyn ghɨ̀kì atum.

¹⁹Àŋena chfɨ̀nɨ̀ sɨ jum ghɨ̀kì ateyn nô mɨ ndà a àŋena antêynɨ̀ ɨ fu/sɨ ayaʼ na Fɨyini fɨ lesɨ fù ŋweyn.

²⁰A nà n-ghɨ isas i ndo nɨ̀ Imà ma

Hànanì ŋêyn Zèbàdayà mala meyn ghɨ̀kì atum.

²¹Woyn Holìm ma à ti

Maseyà nɨ̀ Jehìyèl nɨ̀ Òzayà nɨn mala meyn ghɨ̀ki atum.

²²Woyn Bashì ghì a ghɨ n-mala ghɨ̀kì atum nà n-ghɨ:

Elìyonày nɨ̀ Maseyà nɨ̀ Ishmàyêl nɨ̀ Nètanìyèl nɨ̀ Jozabàd nɨ̀ Elasà.

²³Ghelɨ ndo nɨ̀ Levì ghì a ghɨ n-mala ghɨ̀kì atum nà n-ghɨ:

Jozabàb nɨ̀ Shimè nɨ̀ Kèlayà vzɨ̀ a ghɨ nà n-toŋtɨ kɨmɨ na Kèlità nɨ̀ Bètahayà nɨ̀ Judà nɨ̀ Elizà.

²⁴À nà n-ghɨ antêynɨ̀ nɨ̀ ghelɨ njàŋsɨ̀ ma à màla:

Elìyashìb ɨ wul àtum.

A ghɨ antêynɨ̀ nɨ̀ ghelɨ ghì a ghɨ n-chî achfɨ̂ a mbàyn ma

Shalùm nɨ̀ Telèm nɨ̀ Yulì mala meyn ghɨ̀kì atum.

²⁵A ghɨ antêynɨ̀ nɨ̀ ghelɨ Isìlæ̀ ghɨ li ma

Lemìyà nɨ̀ Izìyà nɨ̀ Malkijà nɨ̀ Mijamìm ɨ woyn Balòsh ghɨ li mala meyn ghɨ̀kì atum.

²⁶A ghɨ antêynɨ̀ nɨ̀ woyn Elàm ma Màtanìyà nɨ̀ Sàkàliyà nɨ̀ Jehìyèl nɨ̀ Abdì nɨ̀ Jèlìmot nɨ̀ Elajà mala meyn ghɨ̀ki atum.

²⁷A ghɨ a woyn nɨ̀ Zatù a ghɨ Elìyonày nɨ̀ Elìyashìb nɨ̀ Màtànayà nɨ̀ Jelemòt nɨ̀ Zabàd nɨ̀ Azizà.

²⁸A ghɨ a woyn nɨ̀ Bebayì a ghɨ

Jèhòhanàn nɨ̀ Hànànayà nɨ̀ Zabayì nɨ̀ Atlày.

²⁹A ghɨ a woyn nɨ̀ Banì a ghɨ:

Meshulàm nɨ̀ Malùk nɨ̀ Adanìyà nɨ̀ Jashùb nɨ̀ Shiyèl nɨ̀ Jelemòt.

³⁰A ghɨ a woyn nɨ̀ Bàhàt Mowàb a ghɨ:

Adinà nɨ̀ Kelàl nɨ̀ Bènayà nɨ̀ Maseyà nɨ̀ Màtànayà nɨ̀ Bèzalèl nɨ̀ Binyù nɨ̀ Mànasè.

³¹A ghɨ a woyn nɨ̀ Halìm a ghɨ:

Elizà nɨ̀ Ishijà nɨ̀ Malkijà nɨ̀ Shèmayà nɨ̀ Shimìyòn nɨ̀, ³²Benjamìn nɨ̀ Malùk nɨ̀ Shèmalìyà.

³³A ghɨ a woyn nɨ̀ Hashùm a ghɨ:

Màtènây nɨ̀ Màtatà nɨ̀ Zabàd nɨ̀ Elifelèt nɨ̀ Jèlìmây nɨ̀ Mànasè nɨ̀ Shimìyèl.

³⁴A ghɨ a woyn nɨ̀ Banì a ghɨ:

Madày nɨ̀ Amlà nɨ̀ Uzìyèl, ³⁵nɨ̀ Bènayà nɨ̀ Bèdayà nɨ̀ Kèluhì nɨ̀, ³⁶Vanìyà nɨ̀ Mèlèmot nɨ̀ Elìyashìb, ³⁷nɨ̀ Màtànayà nɨ̀ Màtènây nɨ̀ Jasù.

³⁸A ghɨ a woyn nɨ̀ Binùyn a ghɨ:

Shemè, ³⁹nɨ̀ Shèlèmayà nɨ̀ Natàn nɨ̀ Àdayà, ⁴⁰nɨ̀ Màknàdebày nɨ̀ Shashày nɨ̀ Shalày, ⁴¹nɨ̀ Azalèl nɨ̀ Shèlèmayà nɨ̀ Shemalìyà, ⁴²nɨ̀ Shalùm nɨ̀ Amalìyà nɨ̀ Josèf.

⁴³A ghɨ a woyn nɨ̀ Nebò a ghɨ:

Jeyèl nɨ̀ Màtìtayà nɨ̀ Zabàb nɨ̀ Zebnà nɨ̀ Jadày nɨ̀ Jowèl nɨ̀ Bènayà.

⁴⁴Ghelɨ nâ ghèyn têyn nô ghɨ̀ jɨ̀m nɨn mala meyn ghelɨ atum ɨ bzɨ woyn ŋêyn àŋena. Ghelɨ nâ ghèyn nɨn jum meyn ghɨ̀kì ateyn baʼsɨ̂ nɨ̀ woyn.