Ezra 9

Ezɨ̀là ɨ tuynsɨ na ka ghelɨ Jûsɨ̀ fî màla ghelɨ ɨtum

¹À nà n-ghɨ sɨ a ibàm awo nâ ghàyn, ghɨ chitɨ koʼ, ghelɨ ghɨ tisɨnɨ a Isìlæ̀ /ɨtu asas a ndosɨ ɨ gvi bè sɨ̂ mà na, “Ghelɨ Isìlæ̀ baʼsɨ̂ nô nɨ̀ ngàŋsɨ ndô Fɨyini nɨ̀ ghelɨ ndo nɨ̀ Levì bû fvɨ̀sɨ̀ ngeŋsɨ àŋena sɨ awo a chaʼnɨnɨ-a afî a ghelɨ ghì a ghɨ nà n-chi ilaʼ afêyn nɨ̀ ghelɨ ghì a ghɨ nà n-chi a tɨlaʼ tɨ litɨ a mbæ̀ ìlaʼ nâ ghàyn nɨn nî ta ghelɨ Kenàn nɨ̀ ghelɨ Hît nɨ̀ ghelɨ Belìz nɨ̀ ghelɨ Jubùs nɨ̀ ghelɨ Amòn nɨ̀ ghelɨ muwàb nɨ̀ ghelɨ Ijìb nɨ̀ ɨ ghɨ Amò. ²Àŋena nɨn ndu meyn woyn ghelɨ tɨlaʼ nâ tèyntɨ̀ sɨ a àŋena ghɨ̂kì ɨ ndù ghɨli sɨ a ghɨ̂kì nɨ̀ woyn àŋena ghɨ lûmnɨ̀ ɨ nì na isas i ndo i laynɨ-i nɨ̀ Fɨyini fɨ̀ chɨyntɨ ŋêyn ghelɨ nâ ghèyn ɨ nà sɨ ghɨ kɨ ighel. Mbɨ nâ yèyn nɨn ghɨ tèyn ma à zɨ kɨ̀ nô ghelɨ ghɨ tisɨnɨ ateyn sɨ asɨ jæ na ghelɨ ghɨ li yeyn sɨ̂ àŋena ɨ̀ jùmtɨ̀.

³À nà n-ghɨ ta mà yvɨ iwo ateyn, atem à kema ɨ teyna, ma ghal ɨ bàytɨ̀ àwaf à kema nɨ̀ ndzɨ sìsɨ̀ a mà màʼ antêynɨ̀ àteyn ɨ fi gùfi choʼtɨ̀ nyuŋsɨ lisɨ a ma atu nɨ̀ ìdyel ì yemi, ɨ dùʼì a nse ɨ nà kumî ɨ̀wuyn/ɨ nà koynsɨ̂ ìsuyn/ sɨ nà kayn mbzɨ. ⁴Ghelɨ ghì nô ghɨ̀ jɨ̀m a ghɨ nà n-fâyn isaʼ i Fɨyini fɨ Isìlæ̀ ɨ gvì ghesɨ̀ àŋena ɨ chɨ̀yntɨ dùʼì amoʼ sɨ nà kayn mbzɨ bòm mbɨ nâ yèyn a ghelɨ Isìlæ̀ ghì a ghɨ n-kasi kfa nɨn læ nì. Ma dùʼì afu ɨ nà kayn kɨ mbzɨ nò sɨ chem ɨlvɨ afî a ghɨ nî ghɨ nà fu ìfu ateyn a ndô Fɨyini aleŋ ɨlvɨ ikfa.

Ezɨ̀là ɨ jèm

⁵A nà ghɨ ɨlvɨ ifu nâ ghè aleŋ ɨlvɨ ikfa ma làlì sɨ alèʼ ghè a mà nà duʼ ateyn tì ma iwumi i bemnɨ-i ku meyn mà kɨ nɨ̀ ɨ̀shwâʼtɨ̀ ɨ ndzɨ sìsɨ̀ a ma ɨwùyn a mà nì ghal bàytɨ̀ ɨ̀ ndù nguʼ alvɨ à kema asɨ a ndô Fɨyini ɨ̀ làysɨ̀ ɨ̀wu ɨ̀ wom iyvɨ asɨ nɨ̀ Bôbo Fɨyini, ɨ Fɨyini femfɨ, ⁶ɨ jèm ɨ bè na,

“Ô Bôbo Fɨyini femfɨ, mɨ n-wûmî nô sɨ a ŋaŋ sɨ làysɨ̀ asɨ à kema sɨ ki sɨ koʼsɨ nɨ̀ và bòm ta ghèsɨ ni meyn mbɨ yì luyn koʼ chwò ɨ̀tu wes. Ɨmwaʼtɨ mbɨ nɨ̀ ghèsɨ luyn meyn koʼ kùm ìyvɨ. ⁷Sɨ zɨ̀tɨ̀ ɨtuʼ nɨ̀ ghɨ̀bo ghesɨ sɨ koʼ sɨ chem lvɨ̂yn/layn, ghèsɨ jɨŋ meyn nô sɨ a ŋaŋ bòm mbɨ seysɨ. Mbɨ seysɨ nî meyn wà visi tɨfôytɨ atum tɨ gvî zuètɨ tɨ̀fôyn teytɨ nɨ̀ ngàŋsɨ ndô Fɨyini nɨ̀ ghelɨ̀ ghesɨ ghɨ li, ghàytɨ ghɨli ndù nɨ̀ àŋena ilaʼ atum ɨ̀ ghàytɨ fsɨ ɨfwo ɨ̀ wes, bèbsɨ ntèʼ seysɨ ɨ̀ fì wùmsɨ nô ghès kɨ̀ têyn ta yi bu gàyn layn.

⁸Mɨtì wà dyêyn meyn àtem a juŋà nɨ̀ và sɨ̂ ghès sɨ a fɨlêŋnɨ̀ fɨ ɨlvɨ lvɨ̂yn a Bôbo Fɨyini feyfɨ ɨ̀ nì ghèsɨ leʼ fvɨ̀ sɨ a ndô àkòs ɨ̀ bœ̀ ɨ̀ gvì lèytɨ̀ a ndo nɨ̀ và. Wà ti meyn fvɨ̀sɨ̀ ghès a Fɨyini feyfɨ sɨ a ndô àkòs ɨ̀ lìsì àdɨli sɨ a ghès a tɨtèm/fu iyvɨ̂tɨ̀ sɨ̂ ghès ⁹Ghès ti nà ghɨ ɨ̀kôs mɨtì wà fvɨsɨ̀ ghès sɨ a ndo àkòs ɨ̀ nì tɨ̂fôyn tɨ Besìyà tɨ keli àtem a juŋà sɨ̂ ghès ɨ̀ vìsi na ghès kasi kfa ɨ̀ kàsi bàʼlɨ̀ ndô zyâ zɨ̀ a yì tî bɨ̀sà nà nyɨŋ a nse ɨ̀ fì kèli àlêʼ sɨ lèytɨ̀ sɨ dùʼì ateyn a Jèlusalèm ilaʼ i Judà.

¹⁰Mɨtì ghès ti kàʼ ghɨ fi bè nô na gha sɨ̂ và lvɨ̂yn a Bôbo kûm àwo nâ kèynà a kɨ gyàyn kòʼ têyn a? Ghèsɨ fi meyn faŋ tɨ̀ yvɨ̀nɨ isaʼ ì zæ zɨ̀ a, ¹¹wa n-læ tum ghelɨ ghɨ felɨnɨ nɨ̀ và ma à ti nfèʼtɨ̀sɨ ghaʼnɨsɨ ɨ gvi fu sɨ̂ ghès. Àŋena nɨn be meyn sɨ̂ ghès na, “Ilaʼ zɨ̀ a yi n-zɨ ndû ateyn sɨ lì sɨ nà kelɨ-a nɨn ghɨ ma yi luyn meyn nɨ̀ mbɨ bòm ta ghelɨ ilaʼ nâ ghèyn nô ghɨ̀ jɨ̀m nɨn chî kɨ nchînɨ̀ ìchaʼnɨnɨ. ¹²Bòm tèyn, ka yi n-vìsi woyn àŋena ghɨ lûmnɨ̀ ndu wôyn ghi sɨ a ghɨ̂kì kèsa yi ndû woyn àŋena sɨ a ghɨ̂kì sɨ̂ wôyn ghi ghɨ lûmnɨ̀. Yi kæ sɨ nà ghɨ sɨ nà ghɨ ilaʼ i to i, yɨ ɨ̀fwo ɨ jûŋ vzɨ̀ a wu n-fvɨ̂ ilaʼ nâ ghàyn, woyn wôyn ghi ghɨ sɨ læ̀ sɨ nà kelɨ ilaʼ nâ yèynì kɨ̀ samoʼ, ka yî n-læ̀ vìsi na ghelɨ nâ ghèyn na chî nɨ̀ mbôynɨ̀ a yi antêynɨ̀ fî lemâ.

¹³“À kæ sɨ nà ghɨ ma awo nâ kèynà tî gàyn sɨ̂ ghès têyn bòm mbɨ̂ seysɨ, a à na ghɨ a Bôbo ma wà bu tî fù ngeʼ sɨ̂ ghès yì koʼ chem ta mbɨ sìsɨ̀ a ghès tî nì. Wà ti meyn fì bœ̀sɨ̀ ghelɨ ghèyn a ghɨ tî kàsi kfa têyn. ¹⁴A ti bè na ghèsɨ̀ fî faŋ, nà kolɨ̀ kɨ kolɨ isaʼ ì zæ malâ ghelɨ awo a bɨ-a ghèyn àŋena boŋ malâ ghès a? A ghès ti kæ sɨ ni têyn a wà faŋ tɨ̀ yàbsɨ ɨtoŋ sɨ̂ ghès sɨ bebsɨ ghes nô ghɨ̀ jɨ̀m sɨ faŋ tɨ̀ vìsi nô wul ɨ̀mòʼ a? ¹⁵Ô Bôbo Fɨyini fɨ Isìlæ̀ fɨ̀, wà n-layna, mɨtì bœ̀sɨ ghelɨ awo a bɨ-a têyn ta ghes. Ghès ghêyn a wa asɨ nɨ̀ mbɨ̂ seysɨ nô mɨ ta ghès nɨn kfeynɨ wi sɨ gvì a wa asɨ bòm mbɨ seysɨ.