Genesis 1

Nzɨ̀tɨ

¹A n-læ nà ghɨ a nzɨ̀tɨ Fɨyini fɨ ɨ faytɨ ìyvɨ nɨ̀ nse. ²A ghɨ tì mbzɨ ɨ ghɨ kɨ iyum, ɨlwêʼ ɨ bɨm ghɨ kɨ tèyn, abe-a fɨmà, ma mû luyn meyn kɨ̀ ɨlwêʼ ɨ̀ jɨ̀m, Ayvɨs a Fɨyini-à ɨ jêl atû àteyn.

³Fɨyini fɨ taŋi ɨ bè na, “Ibayn i na ghɨ.” Ibayn i ɨ gvì. ⁴Fɨyini fɨ yeyn ibayn ateyn ɨ nà saŋlɨ-à, ɨ gwòsɨ̀ ìbayn nɨ̀ àbe a fɨmnɨ-a, ⁵ɨ toŋtɨ ìbayn na, “Nɨ̀nchuè” ɨ toŋtɨ àbe a fɨmnɨ-a na “Nɨ̀ntuʼ.” Ɨtuʼ ni kfa jɨ ɨ læ bɨs layn, a nà ghɨ àchi akɨ asɨ-a.

^6-7Fɨyini fɨ ɨ fi taŋi ɨ bè na, “Ayemi-a na ghɨ gwôsɨ̀ mu ɨlweŋ ɨ̀ bwò ta ka ɨ̀n lì na ghɨ iyvɨ, ɨ̀n lì ɨ ghɨ a nse.” Yi nà ghɨ kɨ tì. À ti ta Fɨyini fɨ nɨn læ faytɨ ayemi kì a kɨ n-gwôsɨ̀ mu mzɨ̀ a mɨ̀ n-ghɨ iyvɨ nɨ ɨmzɨ̂ a mɨ̀ n-ghɨ a nse, ⁸ɨ toŋtɨ àyemi ateyn na, “Iyvɨ.” Ɨtuʼ ni kfa jɨ, ɨ læ bɨs layn a nà sɨ ghɨ ànkùmtɨ̀ achi.

⁹Fɨyini fɨ ɨ fi taŋi ɨ bè na, “Mû mzɨ̀ a mɨ̀ n-ghɨ a nse chɨyntɨ alêʼ àmòʼ ta ka nse fvɨ koʼ.” Yi nà ghɨ kɨ tì. ¹⁰Fɨyini fɨ ɨ toŋtɨ àlêʼ kì a mu lù sɨ ateyn tì na, “Nse” ɨ toŋtɨ mu mzɨ̀ a mɨ̀ chɨ̀yntɨ̀ tî na, “Jva ìghaʼnɨ.” Fɨyini fɨ ɨ yeyn ɨ nà saŋlɨ-à.

¹¹Fɨyini fɨ ɨ fi taŋi ɨ bè na, “Ɨfwo na lemâ atû nse kolâ mɨ̀tam, fvɨsɨ̀ mɨ̀saŋ, ghɨ tôʼ mɨ ghà a kasi koʼ kɨ ànkeyna.” Yi nà ghɨ kɨ tì. ¹²Ɨfwo nà sɨ lemâ atû nse kɨ̀ a tɨ̂nkì a tɨ̂nkì ɨ̀nkàʼ ɨ boŋ lemâ, nô mɨ ghà ɨ kolâ mɨ̀tam, fvɨsɨ̀ mɨ̀saŋ. Afo a nɨn bû læ nà kolâ fɨ̀tam kèsa fvɨsɨ̀ fɨ̀saŋ fɨ afo a kɨlu-à. Fɨyini fɨ yeyn ɨ nà saŋlɨ-à. ¹³Ɨtuʼ ni kfa jɨ ɨ læ bɨs layn a nà sɨ ghɨ mɨchi ɨ̀n tal.

^14-15Fɨyini fɨ fi taŋi ɨ bè na, “Ɨchfɨ iyvɨ i nɨ̀ njoŋ nɨ̀ mɨ̀njèyn fvɨ iyvɨ ɨ̀ gwòsɨ̀ nà bayna, kâʼsɨ̀ ɨ̀lwêʼ, nî ta ka ghɨ na yeyn kelî nɨ̀nchuè fî yeyn kelî nɨ̀ntuʼ, kya sɨ taŋ mɨchi nɨ̀ bèŋsɨ̀ nɨ̀ mɨ̀lvɨ mzɨ̀ a ghɨ n-kelɨ sɨ nà naŋsɨ awo ateyn.” Yi nà ghɨ kɨ tì. ¹⁶Yi ti n-ghɨ na Fɨyini fɨ nɨ̂n læ faytɨ tɨbayn tɨ ghaʼlɨnɨtɨ nâ tèyntɨ̀ ta ka chuè na bayn nɨ̀nchuè, njoŋ ɨ bayn nɨ̀ntuʼ. Wu n-faytɨ meyn kɨmɨ mɨ̀njêyn. ¹⁷Fɨyini fɨ nɨ̂n lem meyn ɨ̀fwo nâ wèyn iyvɨ na wu na kâʼsɨ̀ nse, ¹⁸bayn nɨ̀nchuè, bayn nɨ̀ntuʼ, gwôsɨ̀ mɨ̀lvɨ nâ mèyn ta ka ghɨ na yeyn keli-à. Fɨyini fɨ yeyn tî ɨ nà saŋlɨ-à. ¹⁹Ɨtuʼ ni kfa jɨ ɨ læ bɨs layn na à na sɨ ghɨ mɨ̀chi ɨ̀n kæ̀.

²⁰Fɨyini fɨ ɨ fi taŋi ɨ bè na, “Jvasɨ luyn nɨ̀ ɨ̀fwo vzɨ̀ a wu n-chi ateyn, mɨ̀nyûyn na tâynɨ̀ chwô iyvɨ.” ²¹À ti ta Fɨyini fɨ nɨ̂n læ faytɨ nyamsɨ ghaʼlɨnɨ sìsɨ̀ a sɨ nchi a jvâsɨ̀ nɨ̀ ɨ̀fwo ɨlvzɨ vzɨ̀ nô ɨ̀ jɨ̀m a wu n-ghɨ ateyn, jelɨ̀ chwô antêynɨ̀ àteyn. Fɨyini fɨ ɨ yeyn tî ɨ nà saŋlɨ-à. ²²Fɨyini fɨ boysɨ ɨ̀fwo ateyn ɨ kæ bè na, wu na bzɨ-à, yam ndù-à ta ka jvasɨ luyn, mɨ̀nyûyn na boŋ dvɨ̀ ndû a mbzɨ. ²³Ɨtuʼ ni kfa jɨ ɨ læ bɨs layn, a nà sɨ ghɨ mɨ̀chi ɨ̀n tâyn.

²⁴Fɨyini fɨ ɨ fi taŋi ɨ bè na, ɨfwo zuesɨnɨ ɨ lælɨnɨ nɨ ɨ ghaʼlɨnɨ ɨ fvɨ̀ ɨ luyn atû nse kɨ̀ a tɨ̂nkì a tɨ̂nkì, nyamsɨ maʼnɨsɨ nɨ̀ nyamsɨ ɨtwaʼsɨ nɨ̀ ɨ̀fwo ɨlvɨ vzɨ̀ a wu n-jelɨ̀ atû nse fvɨ. ²⁵À ti ta Fɨyini fɨ nɨ̂n læ faytɨ nyamsɨ ɨtwaʼ kɨ̀ a tɨ̂nkì a tɨ̂nkì nɨ̀ nyamsɨ maʼnɨsɨ kɨ̀ a tɨ̂nkì a tɨ̂nkì nô mɨ nɨ̀ ghà ɨ̀lvì vzɨ̂ a kɨ ŋaŋlɨ̀ chwô atû nse, Fɨyini fɨ ɨ yeyn tî ɨ nà saŋlɨ-à.

²⁶Fɨyini fɨ ɨ fi taŋi ɨ bè na, ghesɨ̀nà faytɨ wul wù na fɨsɨ̂ ghesɨ̀nà ta ka wù na kelɨ àdyaʼ atû sfɨsɨ a jvâ, nɨ̀ mɨ̀nyûyn iyvɨ, kelɨ àdyaʼ atû nyamsɨ maʼnɨsɨ nɨ̀ nyamsɨ ɨtwaʼsɨ, nô mɨ nɨ̀ ghà, ɨ̀lvì vzɨ̂ a kɨ n-jelɨ̀ atû nse.

²⁷À ti ta Fɨyini fɨ nɨ̂n læ faytɨ wul na wù na fɨsɨ̂ ŋweyn.

Fɨyini fɨ nɨ̂n læ faytɨ wul wu nà ghɨ kɨ ta ŋweyn.

Wu n-læ faytɨ wul ɨ̀ lûmnɨ̀ ɨ fi faytɨ wul ɨ wi.

²⁸Fɨyini fɨ boysɨ àŋena ɨ kæ bè na, “Yì na bzɨ-à ta ka yì dvɨ ɨ̀ lùynsɨ mbzɨ ɨ̀ nà saʼa. Yi n-kelɨ àdyaʼ atû sfɨsɨ a jvâ fî kelɨ àdyaʼ atû mɨ̀nyûyn iyvɨ fî kelɨ àdyaʼ nô mɨ atû ghà ghê a kɨ n-jelɨ̀ chwô atû nse.”

²⁹Fɨyini fɨ nɨ̂n taŋi meyn ɨ bè na, “Ma fu meyn ɨ̀fwo vzɨ̀ a wu n-koʼ a nse nô ɨ̀ jɨ̀m nɨ̀ ɨ̀nkàʼ, nɨ̀ mɨ̀tam mzɨ̀ a mɨ̀ n-kola nô ɨ̀n jɨ̀m nɨ̀ mɨ̀saŋ mzɨ̀ a mɨ̀ n-fvɨ̂ ateyn. À n-chɨ̂yntɨ̀ ghɨ kɨ ɨ̀fwo ɨ yɨnɨ nɨ̀ zɨ̀. ³⁰Ma fu meyn ɨ̀nfûʼ nô mɨ nɨ̀ ghà vzɨ̂ a kɨ n-koʼ a nse sɨ ɨfwo ɨ yɨnɨ sɨ̂ nyamsɨ nɨ̀ mɨ̀nyûyn nɨ̀ ɨ̀fwo ɨlvɨ vzɨ̀ nô ɨ̀ jɨ̀m a wu n-jelɨ̀ chwô atû nse. Yi nà ghɨ kɨ tì.”

³¹Fɨyini fɨ ɨ yeyn ɨfwo vzɨ̀ a wù fàytɨ nô ɨ̀ jɨ̀m ɨ nà saŋlɨ-à. Ɨtuʼ kfa jɨ, ɨ læ bɨs layn a nà sɨ ghɨ mɨchɨ ntufa.