Genesis 2

¹À ti ta Fɨyini fɨ nɨn læ faytɨ mèsi mbzɨ, nô mɨ nɨ̀ ghà ɨ̀lvì ateyn. ²Fɨyini fɨ nɨ̂n læ mèsi ifêl i ŋweyn nô ì jɨ̀m a mɨchi ntufa, a nà ghɨ a mɨ̂chi nsòmbo wu yvɨ̀tɨ̀. ³À nà n-ghɨ a mɨchi nsòmbo nâ ghè, Fɨyini fɨ ɨ boysɨ àchi ateyn ɨ lèm na à n-ghɨ àchi sɨ a ninyɨŋ bòm ta à nà n-ghɨ àchi kì a wù n-læ yvɨ̀tɨ ateyn ta wù fàytɨ mèsì mbzɨ.

Fɨyini fɨ ɨ faytɨ Adàm ŋêyn Îf

⁴À ti dzɨ zɨ̀ a Bôbo Fɨyini nɨ̂n læ faytɨ mbzɨ ateyn. Wu n-læ faytɨ iyvɨ nɨ̀ nse kɨ̀ a dzɨ nâ ghàyn ⁵Fɨyini fɨ nɨn læ se sɨ faytɨ mbzɨ, afo-a ɨ timî ghɨ wi a nse ta kɨ n-koʼ, ɨ̀nkàʼ ɨ ghɨ wi, nô mɨ ɨ̀nfùʼ ɨ ghɨ wi bòm ta à nà n-ghɨ tì Bôbo Fɨyini ɨ bu duʼ tɨ̀ sùʼsɨ iyvɨ, nô mɨ wùl ɨ bu duʼ tɨ̀ nà ghɨ sɨ nà felɨ ɨfwo. ⁶À nà n-fvɨ̂ kɨ àmyâʼ saynsɨ̂ ɨ̀lwêʼ kɨ ɨ̀ jɨ̀m. ⁷Bôbo Fɨyini ɨ kæ myèytɨ̀ abɨ̂l a nse ɨ bom wul ateyn. Sɨ ibàm ateyn wu fyef azuê a ŋweyn a ntoŋsɨ azue nɨ̀ wùl, wu nà sɨ zuêsɨ̀-à.

⁸Bôbo Fɨyini ɨ faytɨ gveyn a Edèn, abàs ghè a ɨchfɨ̂-iyvɨ nɨn sal ateyn ɨ lèm wul nâ vzɨ̀ a wù bòm tî ateyn. ⁹Bôbo Fɨyini ɨ nì tɨ̀nkì tɨ ɨnkàʼ tɨ koʼ a gvêyn nâ ghè kɨ tɨ̀ jɨ̀m, jôblɨ̀ kɨ tèyn fî kolâ mɨ̀tam mɨ fom kɨ tèyn. Wu fi zɨ ndu kɨ nô itòŋ i gvêyn ɨ tòʼ fɨ̀kâʼ fɨ lifɨ ɨ̀ntam mɨ̀ ateyn ɨ fu ìchi zɨ̀ a yi læ̀ mæ wi ɨ fi tòʼ fɨ lifɨ ɨ̀ntam mɨ̀ ateyn ɨ fu ìtof na wùl na kya njùŋ fî kya mbɨ

¹⁰A nà n-ghɨ tì jvà î lì ɨ chwô kalì antêynɨ̀ Edèn, nî na gvèyn na yvɨ̂tɨ̀-à. Yi nà n-toynɨ̂ mesì gveyn, yi gwòsɨ̀ akœ à kæ̀. ¹¹Ghɨ nà n-toŋtɨ̂ ɨ̀kœ ɨ wu asɨ na Bishòŋ, wu ngoynɨ̂ chwô kɨ antêynɨ̀ ìlaʼ i Hàvilà ì jɨ̀m tèyn, chwô fvɨ-à. ¹²Ilaʼ i Hàvilà nâ zɨ̀ nà n-kelɨ àso ɨkwo a baŋnɨ-a kɨ so kɨ tèyn nchès, ngòʼsɨ jûŋ sɨlisɨ nɨ̀ mɨ̀yìsi ɨ̀nlɨ̀mtɨnɨ̂ ɨ̀n jùŋ ɨ̂n lì ɨ ghɨ kɨmɨ afu. ¹³Ghɨ nà n-toŋtɨ̂ ànkùmtɨ̀ ɨkœ jvâ na Gishòn, kɨ ngoynɨ̂ jêl toynɨ̂ kɨ ilaʼ i Kûsh ì jɨ̀m tèyn, chwô fvɨ-à. ¹⁴Ghɨ nà n-toŋtɨ̂ ànkùmtɨ̀ ɨkœ jvâ a li-a na Tayglìs, kɨ kalì ndu a Ashù dzɨ abàs ghè a ɨchfɨ̂-iyvɨ i nɨn sal ateyn, toŋtɨ̂ ɨ̀kœ ɨ goʼsɨnɨ na Yuflèt.

¹⁵Bôbo Fɨyini nɨn læ meyn lì wul vzɨ̀ a wù bom ɨ lèm antêynɨ̀ gvèyn Edèn na wù na fèlà fî kini-à. ¹⁶Mɨtì ɨ fu sɨ̂ ŋweyn sɨ a nfàsì nfàsì na, “Wà kàʼ a wà kfɨl nô mɨ fɨ̀tam fɨ fɨ̂kàʼ fɨ̀kà a gvêyn kɨ̀ ta wà n-kôŋ, ¹⁷a bu kɨ fɨ̀tam fɨ fɨ̂kàʼ fìfɨ̀ a fɨ n-fu itof na wùl na kya njùŋ fî kya mbɨ tî, bòm ta wà læ̀ kæ kfɨl fɨtam ma fɨ lù atû fɨ̀kàʼ nâ ghè nô mɨ achi à kà, fì nì nô mɨ ghà a wà kfɨ kɨ̀ achi nâ ghè” ¹⁸Bôbo Fɨyini ɨ fi kæ bè na, “Yi n-jofɨ̀ wì na wul ɨ̀ lûmnɨ̀ na ghɨ kɨ ŋweyn nìnyɨŋ. Mɨ n-faytɨ̂ ngàmtɨ̀ yi kfeynɨ̂ sɨ ŋweyn.”

¹⁹A nà n-ghɨ tì ma Bôbo Fɨyini myeytɨ meyn nse ɨ̀ bom nyamsɨ ateyn nô sɨ̀ jɨ̀m ɨ̀ fì bom nô mɨ̀nyuyn ɨ̀n jɨ̀m, ɨ̀ lì gvì nɨ̀ ɨ̀fwo nâ wèyn sɨ̂ wùl sɨ yeyn nâ wu n-fu àzɨyn ateyn na gha a. Wu nà fu nô mɨ ìziyn ì kà, yi kfeyn kɨ tì. ²⁰Wu n-læ meyn fu azɨyn a nyamsɨ maʼnɨsɨ nô sɨ̀ jɨ̀m ɨ fu azɨyn a mɨ̂nyùyn nô ɨ̀n jɨ̀m ɨ fi fu azɨyn a nyamsɨ ɨtwaʼ nô sɨ̀ jɨ̀m. Mɨtì ngàmtɨ̀ ɨ nà ghɨ wi ta yì n-kfeynɨ sɨ̂ ŋweyn. ²¹Bôbo Fɨyini ɨ kæ nì na wù buni nô a jûŋ. Wu se sɨ buni, wu choʼ fvɨ̀sɨ̀ àvɨf ichibɨ̀ nɨ̀ ŋweyn ɨ kasi chɨytɨ àlêʼ ateyn nɨ̀ njwò ɨ̀wuyn nɨ̀ ŋweyn. ²²Bôbo Fɨyini ɨ faytɨ wul ɨ wi nɨ̀ àvɨf nâ kì ɨ li gvì nɨ̀ ŋweyn sɨ̂ wùl ɨ lûmnɨ̀. ²³Wul ɨ lûmnɨ̀ ɨ byal bè na,

“Ema. À ti wul tèyn kɨ̀mɨ ta ma,

Ɨvɨf ɨwùyn nɨ̀ ŋweyn nɨn ghɨ kɨ ɨwom,

Njwò ɨ̀wùyn nɨ̀ ŋweyn ɨ ghɨ kɨ ɨyêm.

Wù fvɨ̀ a ma ɨwùyn, ma ghɨ wul ɨ̀ lûmnɨ̀.

Yi ti n-dyêyn na izɨyn i ŋweyn i nɨn ghɨ, ‘wul ɨ wi.’”

²⁴Bòm tèyn wùl ɨ lûmnɨ̀ læ̀ nà visî bò ŋweyn nɨ̀ nà ŋweyn, wu ndù ɨ chɨ̀yntɨ̀ ŋêyn wî ŋweyn, àŋena ghɨ̀ bò ɨ nà sɨ kasî ghɨ kɨ àfo àmòʼ.

²⁵Wùl ɨ lûmnɨ̀ ŋêyn wî ŋweyn ɨ nà sɨ ghɨ kɨ nô nɨ̀ àsas a yuma têyn, mɨtì wumî wì.