Genesis 15

Bôbo Fɨyini ɨ yɨ mɨkâyn ŋêyn Ablàm

¹À nà n-ghɨ ta Ablàm kàsi fsɨ Lôt sɨ awu nɨ̀ tɨ̀fôyn tìtɨ̀, Bôbo Fɨyini ɨ fvɨ̀ a ŋweyn ikèʼ tèyn ta wù fvɨ̀ a jêm ɨ bè na,

“Ka wa n-fàyn a Ablàm.

Mɨ n-ghɨ nkyà ìwoŋ nɨ̀ và,

mà læ̀ fu ɨ̀mwaʼtɨ sɨ̂ và wu ghaʼ kɨ tèyn.”

²Mɨtì Ablàm ɨ bèynsɨ̀ na, “À ti n-ghɨ ìnkì ɨmwaʼtɨ ì kà nâ zɨ̀ a wa nì fu sɨ̂ mà a Bôbo Fɨyini fɨ ngaŋtɨnɨ fɨ, ma kelɨ wi wayn, a ghɨ kɨ Elìyezà ɨ wâyn wùl ɨ̀ Dàmaskùs wèyn sɨ læ̀ sɨ yɨ ndô yem a?” ³Wù n-fi meyn bè na, “Wà bû fù wayn sɨ̂ mà, yi dyêyn na à læ̀ yɨ kɨ wayn ɨ̀ fèlɨnɨ nɨ̀ mà yɨ̀ ndô yem.” ⁴Mɨtì Bôbo Fɨyini ɨ bè sɨ̂ ŋweyn na, “Ɨ̀ngaŋ. À læ̀ yɨ wi wul nâ wèyn yɨ̀ ndô zyâ, à læ̀ kwo yɨ wayn ɨ̀ lûmnɨ̀ ma à bzɨ kɨ̀ nô và.” ⁵Wu n-tàŋi tî ɨ li fvɨ̀ nɨ̀ Ablàm abe ɨ bè sɨ̂ ŋweyn na, “Ki koʼsɨ iyvɨ. Wà na ghɨ ma wà kàʼ a wà taŋ mɨ̀njêyn mzɨ̀ a wà n-yeyn wa taŋ. Woyn ghya læ̀ nà dvɨ̂ kɨ ta mɨnjêyn nâ mèyn.”

⁶Ablàm ɨ samsɨ Bôbo Fɨyini, wu nà saŋlɨ-à ɨ lì ŋweyn sɨ a wul àtì-ati. ⁷Bôbo Fɨyini ɨ fi bè sɨ̂ Ablàm na, “À n-ghɨ mà Bôbo Fɨyini vzɨ̀ a mɨ n-læ fvɨ̀sɨ vâ sɨ a ntèʼ Ûl ilaʼ nɨ̀ ghelɨ Kaldì sɨ gvì sɨ fu ilaʼ yèynì sɨ và na à na ghɨ ìlaʼ ì zæ.”

⁸Mɨtì Ablàm ɨ bɨf na, “Mɨ ti n-kelî nô sɨ a gha a Bôbo Fɨyini fɨ ngaŋtɨnɨfɨ na à læ̀ nà kelɨ mà ilaʼ nâ yèynì a?” ⁹Bôbo Fɨyini ɨ kæ bè sɨ̂ ŋweyn na, “Gvi nɨ̀ wayn nyàm mbòloʼ iki ɨ̀mòʼ nɨ̀ bzɨ ndoŋ ìmòʼ nɨ̀ àyaʼ àmòʼ a nô mɨ ì kà ateyn ɨ ghɨ bèŋsɨ̀ tal. Wà nî wa kini gvi kɨmɨ nɨ̀ fɨ̀nlàynɨ̀ fɨ̀ nɨ̀ wâyn àlàlàtoto.”

¹⁰Ablàm ɨ gvì nɨ̀ ɨfwo nâ wèyn sɨ̂ Bôbo ɨ sɨ gwòsɨ̀ nô mɨ nyam ì kà kɨ̀ antêynɨ̀ àntêynɨ̀ ɨ lèm ɨ̀byâs ateyn wu kèʼnɨ̀ keʼnɨ, mɨtì ɨ faŋ tɨ sɨ mɨnyuyn mzɨ̀. ¹¹Ta wù nì tî ɨ̀ngùluŋ ɨ nà sɨ suʼî gvɨ̂tɨ̀ atû ɨ̀kfɨ̀ ɨ nyâmsɨ̀ nâ ghè mɨtì Ablàm ɨ sâŋ kɨ saŋ. ¹²A nà ghɨ ta ɨchfɨ-iyvɨ i sɨ sœ ndû, mbunisɨ kaynɨsɨ ku Ablàm, abe a gvɨtɨ fɨm kɨ têyn tɨ̀k. ¹³Bôbo Fɨyini ɨ bè sɨ̂ Ablàm na, “Wa kya samoʼ na woyn ghya læ̀ nà ghɨ ghelɨ ghɨ gvinɨ ilaʼ atum i li fî ghɨ ɨ̀kôs, a ghɨ nyablɨ nɨ̀ àŋena ilaʼ nâ ghè sɨ a bèŋ ighɨ ì kæ̀. ¹⁴Mɨtì a ma fu ngeʼ sɨ̂ ìlaʼ nâ zɨ̀ a àŋena nɨn ghɨ ɨkôs ateyn tì. Sɨ ibàm ateyn, a wôyn ghya læ̂ fvɨ̀ sɨ ilaʼ nâ ghè nɨ̀ ìghaʼi yi dvɨ̂ kɨ tèyn. ¹⁵Sɨ̂ và, wà læ̀ lemâ ɨ̀ dvɨ̀yn tèyn ɨ̀ kfa yeyn ghɨ̀bo ghya kɨ̀ nô nɨ̀ mbôynɨ̀. Ghɨ læ̀ gvɨmì và nɨ̀ àdèŋà. ¹⁶Ɨjwâŋ ɨ woyn nɨ̀ và læ̀ chwô ɨ̀ twal a a li-a koʼ na à na sɨ ghɨ ɨ̀jwâŋ ɨ̀ kfæ̀ ɨ̀ kæ kasi sɨ gvì ilaʼ nâ ghàyn bòm ta awo a bɨ-a nɨ̀ ghelɨ Amò bu duʼ tɨ̀ dvɨ̀ tɨ̀ kfeyn ta ka mà fu ngeʼ sɨ̂ àŋena.” ¹⁷Ɨchfɨ iyvɨ i ni sœ, abe a fɨ̂m, ntòyn ì lì nɨ̀ ɨ̀kfêtɨ̀ ɨvɨ̀s ateyn ɨ gvɨtɨ fvɨ kɨ têyn, fɨleʼfɨ tum ateyn, nkɨsɨ ɨvɨ̀s sɨ balî antêynɨ̀ àteyn ɨ gvi toynɨ chwò antêynɨ̀ ɨ̀byàs ɨ nyâmsɨ̀ ghê a Ablàm nì sɨ gwòsɨ̀ tî. ¹⁸Bôbo Fɨyini ɨ yɨ mɨkâyn ɨlvɨ nâ ghè ŋêyn Ablàm ɨ bè na, “Mɨ n-fu ìlaʼ yèynì sɨ̂ wôyn ghya sɨ zɨ̀tɨ̀ a jvâ Ijìb sɨ ndù sɨ chem a Yuflèt ɨ jva ìghaʼnɨ, ¹⁹a ghɨ ilaʼ i ghelɨ Kên nɨ̀ ghelɨ Kenìz ŋêyn ghelɨ Kadmò. ²⁰A fî ghɨ kɨmɨ ìlaʼ i ghelɨ Hêt nɨ̀ ghelɨ Belìz ŋêyn ghelɨ Lefà, ²¹nɨ̀ ghelɨ Amò ŋêyn ghelɨ Kenàn nɨ̀ ghelɨ Gigàsh ŋêyn ghelɨ Jebùs.”