Genesis 16
Ŋwàʼlɨ̀ Nzɨ̀tɨ
Hagày ŋêyn Ishmàyêl
1Wî Ablàm ma à ti Selày nà n-ghɨ bula wù bzɨ wayn sɨ̂ ŋweyn. A ghɨ tì wâyn wùl ɨ̀ Ijìb ɨ wi ɨ̀lvì ɨ felɨ̀ sɨ̂ ŋweyn ghɨ toŋtɨ̂ na Hagày. 2Selày ɨ kæ bè sɨ̂ Ablàm na, “Bôbo Fɨyini bû fù ma nɨ̀ wàyn. Lì læ̂ wâyn ɨ̀ fèlɨnɨ nɨ̀ mà wêyn ɨ chi nɨ̀ ŋweyn, lvɨfɨli a wù bzɨ woyn sɨ̂ mà.” Ablàm ɨ bɨmi ìwo zɨ̀-ì a Selày bè. 3À ti ta Selày nɨ̀n læ fu wâyn ɨ̀ fèlɨnɨ nɨ̀ ŋweyn sɨ lûm ŋweyn sɨ a wi ma àŋena sɨ ghɨ ma ghɨ chi meyn a Kenàn sɨ a bèŋsɨ̀ ìvɨm. 4Ablàm ɨ chi nɨ̀ Hagày wu timi ɨlvâ. A nà sɨ ghɨ ta wù kèli na yi bôŋ meyn wayn, wu nà bu lî wì na Selày nɨ̀n ghɨ àfo. 5Selày ɨ bè sɨ̂ Ablàm na, “Mɨ n-jɨ̂ŋ tèyn wa kya ntsɨyn. À tî fu kɨ̀ nô mà wayn ɨ̀ felɨnɨ nɨ̀ mà sɨ̂ và sɨ a wi. Wù yeyn meyn lvɨ̂yn na yi boŋ meyn wayn nà sɨ bu lî wì na mɨ n-ghɨ àfo. Mɨ n-jêm na Bôbo Fɨyini gamtɨ dyèyn na à nì jàs nda antêynɨ̀ nɨ̀ ghesɨ̀và a.” 6Ablàm ɨ bèynsɨ̀ ɨ bè na, “À n-ghɨ wayn ɨ̀ fèlɨnɨ nɨ̀ và, wa kelɨ àdyaʼ a ŋweyn atu. Wà kòŋ a wà ni nô mɨ ghà nɨ̀ ŋweyn.” Ta wù tàŋi tî Selày ɨ zɨtɨ kɨ sɨ chuʼlɨ nɨ̀ Hagày. Wu leʼ ɨ lù. 7Ta wù lù tî ɨ̀ se sɨ ndù nchì Bôbo Fɨyini ɨ yeyn ŋweyn a ngùŋ ìsɨ i lɨmàlɨ̀mà i li a nse ìyum a dzɨ ta yi nà n-ndû a Shû. 8Nchì àteyn ɨ toŋtɨ ŋweyn ɨ bɨf sɨ̂ ŋweyn na, “Wayn ɨ̀ felɨnɨ nɨ̀ Selày, wà lù wo nà ndû wo?” Hagày ɨ bèynsɨ̀ na, “Mɨ n-leʼ nà ìfèl nɨ̀ mà.”
9Nchì Bôbo ɨ bè sɨ̂ ŋweyn na, “Kasi ndu ɨ nà yvɨnɨ̂ kɨ yvɨnɨ nà ìfèl nɨ̀ và.” 10Yì n-fi meyn be kɨmɨ na, “Mɨ n-fu woyn sɨ̂ và ghɨ dvɨ̂ kɨ tèyn ma wùl kàʼ wu bû taŋ.” 11Nchì Bôbo Fɨyini ɨ fi bè kɨ sɨ̂ Hagày na,
“Wà n-ghɨ ɨlvâ, ghɨ sɨ bzɨ wayn ɨ̀ lûmnɨ̀.
Wà bzɨ wa fu izɨyn i ŋweyn na Ishmàyêl bòm ta Bôbo Fɨyini yvɨ meyn ìdzɨ̂ ì zæ.
12Mɨtì wayn vâ nâ wèyn læ̀ nà chi ndû kɨ ta nyam ɨtwaʼ. Wù læ̀ nà nû nô mɨ ndà, nô mɨ ndà ɨ nû ŋweyn.
Wù læ̀ nà bâyn woynà ŋweyn kɨ ghɨ̀ jɨ̀m.”
13Hagày ɨ yvɨ ta Bôbo Fɨyini tàŋi sɨ̂ ŋweyn tì ɨ kæ bè na, “Wà n-ghɨ Fɨyini fìfɨ̀ a fɨ n-toʼnɨ nɨ̀ mà.” Wù n-bè têyn ta wù sɨ kayn nâ a ti yeyn kɨ̀ nô zɨ Fɨyini fìfɨ̀ a fɨ n-yeyn zɨ têyn nà bu ghɨ a. 14À ti iwo zɨ̀ a yi n-læ gàyn ghɨ nà toŋtɨ̂ ìbɨ i mu nâ zɨ̀-ì na, “Ibɨ i mu nɨ̀ wùl ɨ̀ vzɨ̀ a wù n-chi, yeyn mà.” Sɨ chem layn ibɨ ateyn i bu ghɨ kɨ ghɨ alèʼ ghè a Kadèsh nɨ̀ Belèd nɨ̀n lêm ighami ateyn.
15Hagày nɨ̀n læ meyn kasi ndù sɨ̂ nà ìfèl nɨ̀ ŋweyn ɨ bzɨ wayn ɨ lûmnɨ̀. Ablàm ɨ chfɨ̀ ìzɨyn i ŋweyn na Ishmàyêl. 16Hagày nɨn læ bzɨ Ishmàyêl Ablàm ɨ ghɨ bèŋ mɨ̀vɨm nfama njvasɨ̀ ntufa.